“Yupela Liklik Lain Sipsip, Yupela i No Ken Pret”
“Yupela liklik lain sipsip, yupela i no ken pret. Papa bilong yupela em i tok pinis long em bai . . . givim kingdom bilong en long yupela.”—LUK 12:32.
“MOBETA yupela i tingting long painim kingdom bilong God.” (Luk 12:31, Nupela Testamen bilong 1988) Taim Jisas i givim dispela tok long ol disaipel, em i makim wanpela lo i bin stiaim tingting bilong ol Kristen kirap long taim bilong em i kam inap long nau. Kingdom bilong God i mas i stap olsem namba wan samting bilong yumi. (Matyu 6:33) Tasol Luk i kamapim sampela tok moa Jisas i bin mekim, em ol gutpela tok bilong strongim bel bilong wanpela liklik lain Kristen. Em i tokim ol: “Yupela liklik lain sipsip, yupela i no ken pret. Papa bilong yupela em i tok pinis long em bai . . . givim kingdom bilong en long yupela.” (Luk 12:32) Jisas em i Gutpela Wasman, na tok bilong em i makim olsem planti hevi bai painim dispela liklik lain disaipel bilong em. Tasol sapos ol i wok long putim Kingdom i stap olsem namba wan samting bilong ol, ol i no ken pret. Olsem na dispela tok bilong Jisas i no wanpela hatpela tok; em i wanpela gutpela tok promis bilong strongim bel bilong ol na ol i no ken pret.
2 Jisas i givim dispela tok long ol disaipel bilong em ol i stap wantaim em, na em i kolim ol olsem “liklik lain sipsip.” Na em i givim dispela tok tu long ol man Jehova bai “givim kingdom” long ol. Sapos yumi skelim dispela lain disaipel wantaim bikpela lain tru ol bai bilip long Jisas long taim bihain, yumi ken tok, ol i liklik lain tasol. Na ol i gutpela samting tru, long wanem, Jehova i bin makim ol bilong kisim wanpela gutpela wok tru long bihain, em wok king. Papa bilong ol, em Bikpela Wasman Jehova, em i singautim ol bilong i stap king insait long Kingdom bilong Krais.
Liklik Lain Sipsip
3 Orait, husat ol i insait long dispela liklik lain ol i bilong kisim dispela gutpela wok? Em ol man God i bin makim ol long spirit holi na ol i bihainim Krais Jisas. (Aposel 2:1-4) Aposel Jon i lukim ol long heven na ol i holim musik olsem gita na ol i singsing. Em i tok long ol olsem: “Mi lukim Pikinini Sipsip i sanap long maunten Saion, na 144,000 manmeri i sanap wantaim em. Nem bilong Pikinini Sipsip na nem bilong Papa bilong en, dispela nem God i bin raitim long pes bilong ol. . . . Olgeta ples Pikinini Sipsip i laik i go long en, orait ol dispela man i save bihainim em i go. God i bin baim bek ol dispela lain namel long olgeta manmeri bilong graun, na ol i stap olsem namba wan lain God i kisim bek, bai ol i stap ol lain bilong em yet na bilong Pikinini Sipsip. Ol i no bin mekim tok giaman. Nogat. Ol i no gat asua long wanpela samting.”—KTH 14:1, 4, 5.
4 Kirap long Pentikos bilong yia 33, dispela lain God i bin makim ol long spirit holi, ol i stap olsem maus bilong Krais long graun. (2 Korin 5:20) Long nau liklik hap tasol bilong dispela lain ol i stap long graun, na ol i wok wantaim olsem lain wokboi i gat gutpela tingting. (Matyu 24:45; KTH 12:17) Kirap long 1935 “ol arapela sipsip” i bung wantaim ol, em ol Kristen i gat tingting long i stap oltaim long graun, na nau ol i bikpela lain tru, inap sampela milion. Ol i helpim liklik lain remnan long autim gutnius long olgeta hap bilong graun.—Jon 10:16.
5 Wanem tingting bilong dispela liklik hap lain ol i stap yet long graun? Ol i save bai ol i kisim wanpela kingdom i no inap bagarap, olsem na ol i pret long God na mekim wok bilong em. (Hibru 12:28) Long pasin daun ol i save, ol i kisim wanpela gutpela wok tru i save givim bikpela amamas tru long man. Ol i painim pinis “wanpela bis i gutpela tru,” olsem Jisas i tok piksa long en taim em i stori long Kingdom. (Matyu 13:46) Dispela bikpela hevi tru i wok long kam klostu, na dispela lain God i bin makim ol, ol i sanap strong na ol i no pret. Maski bikpela bagarap tru i laik painim olgeta lain bilong dispela graun long ‘bikpela De bilong Jehova,’ dispela liklik lain remnan i no pret na tingting planti long ol samting bai kamap bihain. (Aposel 2:19-21) I no gat as na bai ol i pret.
Lain i Go Liklik
6 Nau long dispela taim, namba bilong liklik lain i stap yet long graun i go daun tru. Dispela i kamap ples klia long ripot bilong Memorial bilong 1994. I gat olsem 75,000 kongrigesen bilong lain bilong Jehova long graun, tasol inap 8,617 manmeri tasol i kisim bret na wain bilong Memorial bilong makim olsem ol i bilong lain remnan. (Matyu 26:26-30) Tasol ol manmeri i bung long Memorial ol inap olsem 12,288,917. Ol Kristen bilong liklik lain ol i save pinis dispela samting i mas kamap. Jehova i makim pinis namba bilong dispela liklik lain, em 144,000 tasol, na em i kirap bungim ol long Pentikos bilong yia 33. Klostu long taim dispela namba em inap pinis, Jehova bai i no ken singautim sampela moa bilong dispela lain. Na ol samting i kamap long nau i makim olsem wok bilong bungim dispela lain bilong kisim gutpela samting tru, em i pinis long 1935. Tasol Baibel i tok profet olsem ol arapela sipsip long taim bilong las de ol bai kamap bikpela lain olsem ‘planti manmeri tru i no inap man i kaunim namba bilong ol. Ol i bilong olgeta lain na olgeta kantri na olgeta kain skin na olgeta tok ples.’ Kirap long 1935, Jehova i mekim bikpela wok long bungim ol dispela “planti manmeri tru” em ol i gat tingting long i stap oltaim oltaim long Paradais long graun.—KTH 7:9; 14:15, 16; Song 37:29.
7 Planti bilong lain remnan ol i winim pinis 70 o 80 o 90 krismas. Wan wan ol i winim pinis 100 krismas. Tasol olgeta i save, long rot bilong kirap bek na go long heven, bihain ol bai bung wantaim Krais Jisas na mekim wok king wantaim em long Kingdom. Dispela lain planti manmeri tru ol bai stap long graun na King Krais Jisas bai bosim ol. Olsem na olgeta wan wan i mas amamas long gutpela sindaun Jehova i laik givim long ol. Em i no wok bilong yumi long makim olsem yumi laik i go long heven o yumi laik i stap long graun. Em wok bilong Jehova long skelim dispela samting. Tupela lain wantaim i ken amamas tru long tingim gutpela sindaun ol man i laikim tumas Jehova ol bai kisim bihain, maski ol bai stap long Kingdom bilong heven o long Paradais long graun aninit long dispela Kingdom.—Jon 6:44, 65; Efesus 1:17, 18.
8 Dispela liklik lain 144,000 em lain “Israel tru bilong God,” na ol i olsem senis bilong lain Israel bilong skin long ol samting God i laik mekim bilong kamapim laik bilong em. (Galesia 6:16) Olsem na lain remnan em i hap lain bilong Israel bilong spirit i stap yet long graun. Nau Jehova i wok long putim mak long ol bilong makim olsem em i orait pinis long ol. Long piksa, aposel Jon i lukim dispela samting i kamap, na em i stori olsem: “Mi lukim narapela ensel . . . em i holim mak bilong God, . . . na em i singaut strong long dispela 4-pela ensel God i givim strong long ol bilong bagarapim graun wantaim solwara. Em i tok olsem, ‘Yupela i no ken hariap long bagarapim graun na solwara na ol diwai. Mipela i laik putim mak bilong God bilong yumi long pes bilong ol wokman bilong en pastaim . . . ’ Na mi harim ol i kolim namba bilong ol manmeri i kisim mak. Ol i putim mak long 144,000 manmeri namel long olgeta lain bilong Israel [bilong spirit].” (KTH 7:2-4) Wok bilong putim mak long lain Israel bilong spirit i laik pinis nau, na dispela i makim olsem klostu nau sampela bikpela samting tru bai kamap. Yumi inap save, klostu nau dispela “bikpela hevi tru” bai kamap, em taim bilong ol ensel long lusim 4-pela win bilong bagarapim ol samting long graun.—KTH 7:14.
9 Nau ol manmeri bilong bikpela lain ol inap olsem sampela milion. Ol remnan i amamas tru long dispela samting! Dispela liklik lain i stap yet long graun, namba bilong ol i wok long i go liklik tru, tasol ol i bin lainim na redim sampela man bilong bikpela lain bilong holim bikpela wok insait long oganaisesen bilong God long graun, nau i wok long i go bikpela tru. (Aisaia 61:5) Olsem Jisas i makim, i gat sampela manmeri ol bai abrusim bagarap long taim bilong dispela bikpela hevi tru.—Matyu 24:22.
“No Ken Pret”
10 Satan wantaim ol ensel nogut bilong em ol i raus pinis long heven na i kam daun long hap klostu long graun. Nau em wantaim lain bilong em ol i wok long redi bilong kirapim pait long lain bilong Jehova. Baibel i tok profet long dispela pait na i kolim olsem pait bilong Gok bilong graun Magok. Satan i laik pait tru long husat? Em i laik pait long hap lain bilong liklik lain “Israel tru bilong God” ol i stap yet long graun, em ol i sindaun gut “namel tru long olgeta kantri bilong graun.” (Esekiel 38:1-12) Tasol lain remnan wantaim ol poroman bilong ol, em ol arapela sipsip, ol bai lukim wanpela samting dispela pait bilong Satan bai kamapim—em bai kirapim Jehova long mekim wanpela bikpela samting. Em bai kirap na helpim lain bilong em, na dispela bai kirapim ‘bikpela De bilong Jehova.’ (Joel 2:31) Long nau dispela lain wokboi i gat gutpela tingting ol i mekim wanpela bikpela wok tru bilong helpim ol man long abrusim bagarap; ol i toksave long ol man long dispela bikpela samting Jehova bai mekim. (Malakai 4:5; 1 Timoti 4:16) Olsem wanem? Yu insait long dispela wok bilong autim gutnius bilong Kingdom bilong Jehova? Bai yu strongim bel na mekim yet wok bilong autim tok bilong Kingdom?
11 Long nau ol hevi bilong graun i go bikpela tru, olsem na em i taim stret bilong liklik lain i mas harim gut tok bilong Jisas, em i tokim ol: “Yupela liklik lain sipsip, yupela i no ken pret”! Ol samting i wok long kamap nau bilong inapim laik bilong Jehova, olsem na ol i mas i gat strongpela bel na no ken pret. Olgeta wan wan i save, ol i mas sanap strong i go inap long pinis tru. (Luk 21:19) Krais Jisas, em Bikpela bilong dispela liklik lain, em i bin sanap strong na stap gut long God i go inap long taim em i dai, na olsem tasol olgeta wan wan bilong lain remnan i mas sanap strong na stap gut long God.—Hibru 12:1, 2.
12 Olgeta bilong liklik lain i mas i gat wankain tingting olsem bilong aposel Pol. Em i wanpela bilong liklik lain na em i bin autim tok long Jisas i bin kirap bek, na ol tok em i mekim i stret wantaim tok bilong Jisas, em i tok ol i no ken pret. Pol i tok: “Oltaim yu mas tingting long Jisas Krais, em i bin i dai na i kirap bek, na . . . mi save autim dispela gutnius, na long dispela as tasol ol man i save lukim mi olsem man nogut, na ol i givim ol kain kain hevi long mi na putim mi long kalabus. Tasol . . . mi save strongim bel bilong mi na karim dispela olgeta hevi, bai mi ken helpim ol manmeri God i bin makim bilong em yet. . . . Yumi ken bilip tru long dispela tok, ‘Sapos yumi bin i dai tru wantaim em, orait bai yumi stap laip tu wantaim em. Sapos yumi stap strong na karim olgeta hevi, orait bai yumi stap king tu wantaim em. . . . Sapos yumi promis long bihainim em, na yumi no bihainim dispela tok bilong yumi, em bai i bihainim yet tok em i bin mekim. Em i no inap senisim tok bilong em.’ ”—2 Timoti 2:8-13.
13 Olsem aposel Pol i bin mekim, lain remnan tu i orait long karim hevi na pen taim ol i autim ol strongpela tok bilong God i stap long Baibel. Ol i bilip strong tru long ol tok promis bilong God long kisim bek ol na givim Kingdom long ol sapos ol i stap gut long em i go inap long taim ol i dai. (KTH 2:10) Wantu ol bai kirap bek na senis i kamap spirit, na ol bai go i stap wantaim Krais Jisas na mekim wok king wantaim em. Ol i bin holimpas bilip na long dispela pasin ol i winim pait na daunim strong bilong dispela graun!—1 Jon 5:3, 4.
Samting Ol i Wetim i Narapela Kain
14 Olsem wanem dispela kirap bek em liklik lain i wetim i narapela kain? Wanpela samting i olsem: Em bai kamap paslain long kirap bek bilong “ol stretpela man na ol man nogut.” (Aposel 24:15) Kirap bek bilong liklik lain em i nambawan bikpela samting, olsem Baibel i tok long 1 Korin 15:20, 23: “Krais i dai pinis, na . . . em i kirap paslain long ol arapela man i dai pinis, olsem namba wan kaikai i redi long gaden. Tasol yumi olgeta bai yumi kirap bek na kisim laip long taim bilong yumi yet. Namba wan em Krais. Na bihain, taim em i kam bek, yumi olgeta lain bilong en bai yumi kirap bek.” Liklik lain i gat wankain pasin olsem bilong Jisas long sanap strong long bilip, olsem na ol i save long gutpela samting i wetim ol taim ol i pinisim wok bilong ol long graun. Na kirap long taim Bikpela i kam long tempel bilong em bilong skelim ol long 1918, ol i save gut tru long dispela samting.—Malakai 3:1.
15 Pol i kamapim narapela as na yumi ken ting dispela kirap bek i narapela kain. Long 1 Korin 15:51-53, em i tok: “Mi laik autim wanpela tok hait long yupela. Bai yumi olgeta i . . . senis na i kamap narakain. Dispela bai i kamap wantu tasol, long taim bilong las biugel i krai. . . . I olsem. Dispela bodi i save bagarap, em i mas senis na i stap gut oltaim. Dispela bodi i save dai, em i mas senis na i stap laip oltaim.” Dispela tok i makim ol manmeri bilong liklik lain ol i dai nau long taim Jisas i stap pinis olsem King. Taim ol i dai, ol i no ken slip longtaim long matmat. “Wantu tasol” ol i kisim bodi i no save dai.
16 Yumi kisim dispela save, olsem na yumi inap pilim gut tok bilong aposel Jon long Kamapim Tok Hait 14:12, 13. Em i tok: “ ‘Taim dispela kain pasin i kamap, ol manmeri bilong God i mas i stap strong, em ol manmeri i save bihainim ol lo bilong God na holimpas bilip bilong ol long Jisas.’ Mi harim maus bilong wanpela man i singaut long heven olsem, ‘Yu raitim tok olsem, “Nau na olgeta taim bihain, ol manmeri i bilip long Bikpela na ol i dai, ol i ken amamas.” ’ Na Holi Spirit em tu i tok, ‘Ol i ken amamas tru, long wanem, ol i lusim dispela hatwok ol i bin mekim, na ol i ken malolo. . . . Gutpela pasin ol i bin mekim, em i go wantaim ol.’ ”
17 Em nau, gutpela prais tru i wetim remnan bilong liklik lain! Taim ol i dai, wantu tasol ol bai kirap bek. Em bikpela senis tru bai painim lain remnan taim ol i kisim nupela wok long ples bilong ol spirit! Dispela samting i wok long painim ol long nau, na truim bilong ol bikpela tok profet bilong Baibel i wok long kamap, olsem na lain remnan i mas strongim bel na “no ken pret.” Na pasin bilong ol long strongim bel na i no pret, dispela i save strongim ol manmeri bilong bikpela lain, em ol tu i mas kisim pasin bilong strongim bel na no ken pret, na bai ol i ken wetim God i kisim bek ol long taim bilong bikpela hevi tru, i winim olgeta narapela hevi i bin kamap long graun.
18 Taim yumi kamapim gen stori bilong ol wok bilong liklik lain, dispela i strongim ol wantaim bikpela lain long bihainim yet pasin bilong pret long God tru. Taim bilong God long skelim ol man long kot i kamap pinis, na i no gat bikpela hap taim moa bilong mekim wok bilong em. Tru tumas, taim i sot pinis na ol narapela man i mas kirap na pret long God. Tasol yumi yet i no pret na ting God i no inap kamapim laik bilong em. Em bai kamapim tru ol samting em i laik mekim!
19 Ol i harim pinis nek bilong ol lain long heven i tok: “Bikpela bilong yumi wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun. Na Bikpela bai i stap king oltaim oltaim.” (KTH 11:15) Yumi save, Bikpela Wasman Jehova i wok long stiaim olgeta sipsip bilong em na ‘bringim ol i go long gutpela rot.’ (Song 23:3) Em i bringim liklik lain i go bilong kisim prais bilong ol long heven. Na em bai lukautim ol narapela sipsip long taim bilong bikpela hevi tru na bai ol i ken i stap oltaim long graun aninit long dispela gutpela Kingdom, na King Krais Jisas bai bosim ol. Tru, Jisas i givim tok long liklik lain, tasol olgeta wokboi bilong God long graun i mas harim dispela tok bilong em, olsem: “Yupela i no ken pret.”
Yu Inap Stori Long Dispela?
◻ I gat wanem as na yumi ken ting, namba bilong liklik lain i stap yet long graun i mas i go liklik?
◻ Wanem samting i mekim na lain remnan i mas sanap strong?
◻ Bilong wanem ol Kristen i no ken pret, maski taim bilong Gok bilong Magok long kam pait long ol i klostu pinis?
◻ Olsem wanem na kirap bek bilong lain 144,000 i narapela kain, na long nau em i narapela kain tru?
[Askim Bilong Stadi]
1. Bilong wanem Jisas i mekim dispela tok: “Yupela liklik lain sipsip, yupela i no ken pret”?
2. Dispela liklik lain sipsip ol i husat? Bilong wanem ol i ken amamas?
3. Jon i lukim wanem gutpela piksa tru bilong dispela liklik lain?
4. Long nau liklik lain i gat wanem wok long graun?
5. Wanem tingting bilong ol man bilong liklik lain ol i stap yet long graun? Bilong wanem ol i no ken pret?
6, 7. (a) Bilong wanem namba bilong liklik lain i stap yet long graun i go daun tru long nau? (b) Olgeta wan wan i mas ting olsem wanem long dispela samting ol i wetim?
8. Olsem wanem long wok bilong putim mak long lain 144,000? Taim dispela wok i pinis, wanem samting bai kamap?
9. Liklik lain i ting olsem wanem long dispela bikpela lain em ol i wok long i go bikpela tru?
10. (a) Husat bai kirapim pait long lain bilong God? Dispela bai kirapim wanem samting? (b) Wanem ol askim i sutim yumi olgeta wan wan?
11. Bilong wanem yumi mas strongim bel na no ken pret nau long dispela taim?
12. Olsem Jisas i bin mekim, Pol i givim wanem tok long liklik lain long ol i no ken pret?
13. Liklik lain i bilip strong long wanem samting? Dispela i kirapim ol long mekim wanem?
14, 15. Dispela kirap bek em liklik lain i wetim, em i narapela kain olsem wanem?
16, 17. Taim yumi tingim kirap bek bilong liklik lain long nau, olsem wanem yumi ken tok, Jehova i mekim gut tru long ol?
18, 19. (a) Olsem wanem yumi save, taim i sot pinis? (b) I gat wanem as na liklik lain wantaim ol arapela sipsip i no ken pret?