Dediket—Long Husat?

“Mipela bai bihainim stret olgeta tok bilong Bikpela.”​—⁠KISIM BEK 24:⁠7.

LONG Februeri 1945 long Japan, wanpela lain pailot bilong ol balus bilong pait (Yatabe Flying Corps) ol i bung long wanpela bikpela haus bung. Olgeta wan wan pailot i kisim hap pepa na ol i mas raitim tok olsem ol bai orait long go insait long wanpela lain bilong pait ol i kolim kamikase. Wanpela ofisa i bin stap long dispela taim em i tok: “Mi ting God i singautim mi bilong givim skin bilong mi olsem ofa bilong helpim kantri long dispela bikpela taim nogut. Bel bilong mi i kirapim mi na mi orait long mekim dispela wok.” Em i lain long mekim wok pailot na ol narapela wok long balus Ohka (em balus olsem roket) na em i mas stiaim i go stret long sip bilong ol birua na balus bai pairap na pailot i bagarap wantaim balus. Tasol pait i pinis na em i no gat rot long mekim dispela wok long balus na dai bilong helpim kantri na king bilong em. Taim Japan i lus long pait, em i no bilip moa long dispela king.

² Bipo planti man long Japan i bilip olsem king bilong Japan em i wanpela god i gat laip. Long ol narapela kantri i gat ol narapela samting ol man i bin givim bel olgeta long en olsem god bilong ol na ol i mekim yet. Planti milion ol i givim bel olgeta long Maria o Buda o ol narapela god​—⁠em ol i wokim piksa bilong sampela na lotu long en. Sampela man i save autim tok bilong lotu long televisen ol i save gut long toktok na grisim ol man, olsem na ol man i save givim bikpela mani long ol bilong helpim ol, na i olsem ol i lotuim ol. Taim pait i pinis, ol Japan i laik painim narapela samting ol inap givim skin bilong ol long en. Sampela ol i kirap na givim bel long wok, olsem god bilong ol. Long olgeta hap, maski ol i bilong Is o Wes, planti ol i givim bel long bungim mani kago. Planti yangpela i givim bel tru long sampela man bilong musik na ol i bihainim pasin na wokabaut bilong ol dispela man. Planti manmeri long nau ol i lotuim ol yet, na ol laik bilong ol i kamap olsem god bilong ol. (Filipai 3:19; 2 Timoti 3:⁠2) Tasol yu ting i gutpela long ol man i givim bel olgeta long ol dispela samting o long ol man na ol i kamap olsem god bilong ol?

³ Planti man, taim ol i lukim olsem ol dispela samting i no gat strong long helpim ol, ol i les long en. Taim ol i save, ol dispela god ol i givim bel long en em “ol man tasol i bin wokim,” nau ol i bel hevi. (Song 115:⁠4) Na sampela man i gat nem long autim tok bilong lotu long televisen, taim ol pasin nogut bilong ol i kamap ples klia, ol man i bin bilip tru long ol, ol i pilim olsem ol dispela man i bin giamanim ol. Na taim bikpela hevi bilong mani i bin kamap na ol kampani i mas pinisim planti wokman, bikpela bel hevi i kamap na sik bilong tingting i kisim sampela wokman. Na nau long dispela taim, strong bilong mani i go daun na ol man i bin putim mani i olsem god bilong ol, ol i kisim bikpela hevi tru. Pastaim ol i bin dinau na putim dispela mani long sampela bisnis samting na ol i ting bihain bai ol i kisim winmani long en, tasol mani i lus nating na ol i no gat rot long bekim dispela dinau. (Matyu 6:​24) Na taim ol man i gat nem long musik o piksa wokabaut samting ol i dai o ol man i no laikim ol moa, ol man i bin putim ol olsem god bilong ol, nau ol i lus tru. Na ol man i bin bihainim pasin bilong amamasim skin tasol, planti ol i kisim samting nogut long en long bihain na ol i gat bikpela hevi.​—⁠Galesia 6:⁠7.

⁴ Wanem samting i save kirapim ol man long givim bel olgeta long ol dispela samting i no inap helpim ol liklik? Wanpela bikpela samting i kirapim ol, em tingting bilong dispela graun Satan i bosim. (Efesus 2:​2, 3) Ol samting dispela tingting bilong graun i mekim, i kamap ples klia long kain kain rot. Sampela famili i strong long bihainim pasin bilong ol tumbuna na dispela i save bosim sampela man. Na ol save bilong skul wantaim pasin bilong famili i save stiaim tingting bilong sampela man. Na tingting bilong ol man long ples wok, olsem ol i strong long kisim namba samting, dispela i kirapim sampela na ol i wok wok tasol na ol i no malolo, na dispela inap bagarapim ol na ol i dai. Na tingting bilong ol man bilong graun long kisim planti mani samting, dispela i save pulim sampela na ol i bihainim dispela pasin. Tingting na bel bilong planti man i go nogut na dispela i kirapim ol long tingting tasol long inapim ol laik bilong ol yet. Ol i no skelim pastaim olsem: Dispela samting em inap tru long ol i givim bel olgeta long en olsem god bilong ol o nogat?

Wanpela Lain i Dediket

⁵ Winim 3,500 yia i go pinis, wanpela lain ol i painim pinis wanpela samting em inap tru long ol i ken givim bel olgeta long en. Ol i givim skin bilong ol olgeta long nambawan King, em God Jehova. Taim dispela lain Israel i stap long ples drai bilong Sainai, ol i tokaut olsem ol i dediket long God.

⁶ Wanem samting i kirapim ol Israel long mekim olsem? Taim ol i wok kalabus long Isip, Jehova i givim wok long Moses bilong helpim ol long lusim kalabus na ol i ken i stap fri. Moses i askim Jehova, olsem wanem em i ken kamapim klia dispela God em i bin salim Moses i kam long ol. Orait God i tokim Moses, “Mi Yet Mi Stap Olsem.” Em i tokim Moses long tokim ol Israel: “Mi Yet, em i nem bilong God. Na em i bin salim mi na mi kam long yupela.” (Kisim Bek 3:​13, 14) Dispela tok i makim olsem Jehova inap kamap wanem wanem kain bambai em i ken kamapim ol laik bilong em. Em bai kamapim long ples klia olsem em i Man bilong truim ol tok promis bilong em, na em bai mekim long wanpela rot ol tumbuna bilong lain Israel i no bin save long en.​—⁠Kisim Bek 6:​2, 3.

⁷ Ol Israel i lukim bikpela hevi i painim Isip wantaim lain bilong en taim Jehova i salim Tenpela Samting Nogut i kam long Isip. (Song 78:​44-51) Na bikpela lain man meri pikinini, ating ol i winim 3 milion, ol i kisim ol samting bilong ol na kirap wokabaut i go lusim hap bilong Gosen insait long wanpela nait tasol. Yumi kirap nogut long ol inap mekim hariap olsem. (Kisim Bek 12:​37, 38) Orait, ol i kamap long solwara Retsi na Jehova i kamapim klia long ol olsem em i “strongpela soldia tru.” Em i brukim solwara na larim ol Israel i wokabaut i go na bihain em i pasim bek solwara na bagarapim ol Isip i wok long raunim ol, na long dispela rot em i kisim bek ol Israel long han bilong ami bilong king bilong Isip. Olsem na ol Israel “i lukim dispela bikpela wok Bikpela i bin mekim bilong winim ol Isip. Na ol . . . i pret na i stap aninit long Bikpela, na ol i bilip long em.”​—⁠Kisim Bek 14:31; 15:3; Song 136:​10-15.

⁸ Tasol i olsem ol Israel i no pilim yet dispela nem bilong God​—⁠ol i kirap toktok planti long Jehova na wokman bilong em Moses, long wanem, ol i sot long kaikai na wara. Jehova i salim ol pisin olsem abus i kam long ol, na em i salim mana i kam daun olsem ren, na em i kamapim wara long wanpela bikpela ston long Meriba. (Kisim Bek 16:​2-5, 12-15, 31; 17:​2-7) Na Jehova i kisim bek ol Israel taim ol Amalek i kam pait long ol. (Kisim Bek 17:​8-13) Olsem na bihain i no gat rot na bai ol Israel i ken tok, Jehova i giaman taim em i tokaut long Moses: “Mi Bikpela [Jehova], mi Bikpela [Jehova]. Mi God na mi as bilong marimari na sori. Na mi no save belhat kwik. . . . Mi save laikim tumas planti tausen lain manmeri, olsem mi promis pinis, na mi save lusim ol kain kain sin na bikhetpasin bilong ol.” (Kisim Bek 34:​6, 7) Tru tumas, Jehova i kamapim klia olsem em inap tru long ol man i ken givim bel olgeta long em olsem God bilong ol.

⁹ Ol Israel i bilong Jehova yet, long wanem, em i bin baim bek ol long Isip. Tasol em i God bilong marimari na mekim gut long ol man, olsem na em i givim rot long ol long kamapim laik bilong ol olsem ol i laik mekim wok bilong em. (Lo 7:​7, 8; 30:​15-20) Na em i kolim ol samting ol Israel i mas mekim bilong bihainim kontrak em i wokim wantaim ol. (Kisim Bek 19:​3-8; 20:1–23:33) Taim Moses i kolim ol dispela tok long lain Israel, ol i tokaut olsem: “Mipela bai i mekim olgeta samting olsem Bikpela i tok.” (Kisim Bek 24:​3-7) Long laik bilong ol yet ol i kamap wanpela lain i dediket long Bikpela King Jehova.

Yumi Pilim Tru na Yumi Dediket

¹⁰ Jehova, em Man bilong wokim yumi, em inap yet long yumi givim bel olgeta long em olsem God bilong yumi. (Malakai 3:6; Matyu 22:37; KTH 4:11) Tasol yumi no ken bilip nating, o bel i kirap nating, o sampela i subim yumi​—⁠olsem papamama, na long dispela as yumi dediket long Jehova, nogat. Yumi mas i gat stretpela save long Jehova na pilim tru olgeta samting Jehova i bin mekim bilong helpim yumi. (Rom 10:2; Kolosi 1:​9, 10; 1 Timoti 2:⁠4) Jehova i bin givim rot long ol Israel na long laik bilong ol yet ol i ken tokaut olsem ol i dediket long em, na olsem tasol em i givim rot long yumi tu na long laik bilong yumi yet yumi ken dediket long em na kamapim long ol man.​—⁠1 Pita 3:⁠21.

¹¹ Taim yumi stadi long Baibel, yumi save gut long God. Tok bilong em long Baibel i helpim yumi long save long ol gutpela pasin bilong em, ol i kamap ples klia long olgeta samting em i bin wokim. (Song 19:​1-4) Baibel i soim yumi, God i no wanpela God Triwan i no gat wanpela man inap save long en. Em i no save lus long pait, olsem na em i no gat wok long tokaut olsem em i no stap God moa. (Kisim Bek 15:11; 1 Korin 8:​5, 6; KTH 11:​17, 18) Em i bin truim ol tok promis bilong em, na dispela i kirapim yumi long tingim gen insait bilong dispela gutpela nem tru bilong em, Jehova. Em i Bikpela Man bilong kamapim laik bilong em. (Stat 2:​4; Song 83:18; Aisaia 46:​9-11) Taim yumi stadi long Baibel, yumi save gut olsem Jehova i save truim ol tok bilong em na yumi inap bilip tru long em.​—⁠Lo 7:9; Song 19:​7, 9; 111:⁠7.

¹² Samting i kirapim yumi long laikim Jehova, em pasin sori bilong em. Baibel i kamapim klia olsem em i save laikim tru ol man na lusim rong bilong ol na marimari long ol. Tingim samting em i bin mekim long Jop: Taim Jop i stap gut long God na i holimpas bilip pinis, God i mekim gut tru long em. Stori bilong Jop i kamapim klia tru olsem Jehova “em i save sori moa yet long yumi, na oltaim em i save marimari long yumi.” (Jems 5:11; Jop 42:​12-17) Tingim pasin Jehova i bin mekim long Devit taim em i mekim pasin pamuk na kilim man i dai. Tru tumas, Jehova i redi long lusim ol bikpela rong bilong man sapos man i laik i kam long em na i “pilim hevi long sin na i daunim em yet.” (Song 51:​3-11, 17) Na tingim pasin Jehova i mekim long Sol bilong taun Tarsus, pastaim em i man bilong mekim nogut long lain bilong God. Ol dispela stori i kamapim klia marimari bilong Jehova, na em i orait long kisim ol man i bin tanim bel na bai ol i ken mekim wok bilong em. (1 Korin 15:9; 1 Timoti 1:​15, 16) Pol i pilim olsem em inap givim laip bilong em olgeta long mekim wok bilong dispela gutpela God bilong sori. (Rom 14:⁠8) Yu gat wankain tingting?

¹³ Jehova i bin wokim rot bilong kisim bek ol Israel long kalabus long Isip, na em i wokim pinis rot bilong kisim bek yumi tu long kalabus bilong sin na dai​—⁠dispela rot em ofa bilong Krais Jisas. (Jon 3:16) Pol i tok: “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.” (Rom 5:⁠8) Dispela gutpela pasin God i mekim i kirapim ol man i gat stretpela bel long dediketim skin bilong ol long Jehova long rot bilong Krais Jisas. “Krais i bin givim bel bilong en long mipela, na dispela i save kirapim mipela long wok, long wanem, mipela i save pinis olsem, wanpela man i bin kisim ples bilong yumi olgeta na i dai . . . bilong helpim yumi ol man i stap laip, bai yumi no ken tingting moa long yumi yet na wokabaut. Nogat. Yumi ken tingting long dispela man i kisim ples bilong yumi na i dai pinis, na i kirap bek tu. Yumi ken tingting long em na wokabaut.”​—⁠2 Korin 5:​14, 15; Rom 8:​35-39.

¹⁴ Tasol sapos yumi save long ol gutpela pasin bilong Jehova na ol samting em i bin mekim bilong helpim ol man, dispela tasol i no inap. Yumi mas lainim bel bilong yumi long pilim tru ol gutpela pasin bilong Jehova. Yumi ken mekim olsem wanem? Yumi mas bihainim ol tok bilong Baibel long olgeta wokabaut bilong yumi na bai yumi ken pilim tru olsem taim yumi bihainim ol lo bilong God long Baibel, dispela i save helpim tru yumi. (Aisaia 48:17) Bel bilong yumi i mas pilim tru olsem Jehova i bin kisim bek yumi long ol stingpela pasin bilong dispela graun nogut Satan i bosim. (Skelim wantaim 1 Korin 6:11.) Taim yumi wok long subim skin bilong yumi long bihainim pasin i stret, dispela i lainim yumi long bilip na wetim Jehova i helpim yumi, na nau yumi save tru, Jehova em i God i gat laip, na em i Man bilong harim beten. (Song 62:8; 65:⁠2) Orait, i no longtaim na yumi pilim olsem yumi pas gut wantaim Jehova na yumi inap kamapim bel bilong yumi long em. Pasin bilong laikim tumas Jehova bai wok long kamap strong long bel bilong yumi, na bai yumi dediketim skin bilong yumi long em.

¹⁵ Planti manmeri ol i save pinis long dispela God bilong sori, em Jehova, na ol i dediket long em bilong mekim wok bilong em. Yumi ken tingim stori bilong wanpela man bilong mekim wok long paua na em i gat wanpela bisnis i wok gut tru. Sampela taim em bai kirap wok long moningtaim na i go olgeta inap long tulait, na em bai kam bek long haus long 5 klok moningtaim. Em bai malolo inap wanpela aua samting, na bihain em bai go bek long wok. Em i tok: “Mi bin givim skin bilong mi olgeta long wok bilong mi.” Orait, meri bilong em i kirap stadi long Baibel na em tu i mekim olsem wantaim meri bilong em. Em i tok: “Olgeta god mi bin save long ol i kam inap long dispela taim, mipela i mas mekim wok bilong ol, na ol i no mekim wanpela samting bilong helpim mipela. Tasol Jehova i no olsem. Em yet i kirap na salim Pikinini bilong em i kam long graun, maski em i gat dispela wanpela Pikinini tasol.” (1 Jon 4:​10, 19) Insait long 10-pela mun, dispela man i dediketim skin bilong em long Jehova. Bihain long en, em i tingting tasol long mekim wok bilong dispela God i gat laip. Em i kirap mekim wok autim tok long olgeta de na em i go sindaun long wanpela hap ol i sot long ol man bilong autim tok. Olsem ol aposel i bin mekim, em i ‘lusim olgeta samting na bihainim Jisas.’ (Matyu 19:27) Tupela mun bihain, Sosaiti Was Taua i singautim tupela long go wok long brens-ofis bilong ol long kantri em tupela i stap long en, na mekim sampela wok long paua. Inap 20 yia pinis em i wok long brens-ofis na mekim wok em i laikim tumas​—⁠i no bilong helpim em yet​—⁠em wok bilong Jehova.

Kamapim Dediket Bilong Yu

¹⁶ Taim ol yangpela na lapun tu i stadi long Baibel, ol bai pilim tru ol samting Jehova i bin mekim bilong helpim ol. Dispela i mas kirapim ol long givim skin bilong ol long Jehova. Ating yu wanpela bilong ol, a? Olsem wanem yu ken dediket long Jehova? Taim yu kisim pinis stretpela save long Baibel, yu mas kirap na mekim wok long dispela save yu bin kisim​—⁠yu mas bilip tru long Jehova na Krais Jisas. (Jon 17:⁠3) Yu mas tanim bel na lusim ol pasin nogut ating bipo yu bin mekim. (Aposel 3:19) Em nau, yu inap dediket na kamapim long Jehova long beten bilong yu. Ating yu no inap lusim tingting long dispela beten, long wanem, long dispela taim stret nupela samting bai kamap long i stap bilong yu wantaim Jehova​—⁠bai yu kirap long pas gut wantaim em.

¹⁷ Moses i bin tokim ol Israel long ol samting ol i mas mekim bambai ol i ken insait long kontrak wantaim Jehova. Olsem tasol ol elda long ol kongrigesen bilong ol Witnes Bilong Jehova i save helpim ol manmeri em nau tasol ol i dediket na bai ol i ken save long ol samting ol i mas mekim. Ol elda i mekim ol askim i stap long wanpela buk na bai ol i ken save, dispela man o meri i save gut long ol bikpela as tok bilong Baibel na em i save long ol samting em i mas mekim bilong i stap Witnes Bilong Jehova, o nogat. Orait nau ol i mas mekim wanpela bung bilong kamapim dediket bilong em long ol man. Yumi save, taim man i dediket nupela long Jehova, em i amamas long tokim ol narapela olsem nau em i kamap wanbel wantaim Jehova. (Skelim wantaim Jeremaia 9:24.) Bilong mekim olsem, em i kisim baptais long wara bilong makim olsem em i dediket pinis. Taim em i go insait long wara na em i kam antap gen, dispela i makim olsem em i dai pinis o lusim pinis olpela wokabaut bilong em, em i bin tingting tasol long mekim laik bilong em yet, na nau em i kirap bihainim nupela wokabaut, em bilong mekim laik bilong God. Dispela i no wanpela pasin o mak bilong lotu tasol, na em i no olsem wanpela pasin bilong lotu Sinto, olsem misogi, em ol i tok, wara em i save klinim man.a Baptais i bilong kamapim long ples klia olsem man i dediket pinis long Jehova long rot bilong beten.

¹⁸ Dispela bung em wanpela samting bai pas long tingting bilong dispela nupela wokman bilong God na kirapim em long tingim olsem nau em i kamap wanbel wantaim Jehova. Dispela pailot bilong Japan yumi stori pinis long em, em i bin dediket long kantri na king bilong em, tasol dediket bilong em i lus nating. Tasol dispela dediket yumi mekim long Jehova i no inap lus nating, long wanem, Jehova i save stap oltaim oltaim na em i God i gat olgeta strong, na em i save mekim olgeta samting em i tok long mekim. Em wanpela tasol em inap tru long yumi givim bel olgeta long em na lotuim em.​—⁠Aisaia 55:​9-11.

¹⁹ Tasol i gat sampela samting moa bilong dediket em yumi mas save long en. Olsem: Taim yumi dediket, dispela i save mekim wanem long i stap bilong yumi long olgeta wan wan de? Stori i kamap bihain long dispela bai toktok long dispela samting.

[Ol Futnot]

Yu Inap Tingim?

◻ Bilong wanem dediket bilong ol man bilong graun i bin lus nating?

◻ Wanem samting i bin kirapim ol Israel long dediket long Jehova?

◻ Wanem samting i kirapim yumi long nau na yumi dediket long Jehova?

◻ Yumi dediket long God olsem wanem?

◻ Baptais long wara i makim wanem samting?

[Askim Bilong Stadi]

1, 2. (a) Sampela man i givim bel olgeta long wanem samting, olsem god bilong ol? (b) Dediket em i samting bilong ol man bilong lotu tasol?

3. Sampela samting ol man i givim bel long en olsem God bilong ol, olsem wanem yumi save ol i no gat strong bilong helpim ol man?

4. Wanem samting i save kirapim ol man long dediketim skin bilong ol long wanpela samting i no inap helpim ol liklik?

5. Stori long wanpela lain i bin dediket long Jehova inap 3,500 yia samting i go pinis.

6. Nem bilong God bai makim wanem samting long ol Israel?

7, 8. Ol Israel i lukim wanem samting na ol i save, Jehova em i God ol inap givim bel olgeta long em?

9. Bilong wanem Jehova i givim rot long ol Israel na bai ol i ken tokaut olsem ol i dediket long mekim wok bilong em? Ol i tok wanem?

10. Wanem samting i mas kirapim yumi long dediket long Jehova?

11. Taim yumi stadi long Baibel, yumi bin kisim wanem save long Jehova?

12. (a) Wanem samting i mekim na yumi laikim tru Jehova? (b) Olsem wanem stori bilong sampela man long Baibel i kirapim yumi na yumi laik mekim wok bilong Jehova? (c) Yu yet yu ting olsem wanem long mekim wok bilong Jehova?

13. Wanem bikpela pasin sori tru Jehova i bin mekim na dispela i kirapim ol man i gat stretpela bel na ol i laik dediket long em?

14. Taim yumi kisim save long gutpela pasin Jehova i bin mekim long ol man long bipo, dispela save tasol inap kirapim yumi long dediket long em? Stori long dispela samting.

15. Wanpela man pastaim em i bin givim bel olgeta long wok bisnis bilong em, tasol wanem samting i kirapim em long dediket long mekim wok bilong Jehova?

16. Wanem sampela samting man i mas mekim bilong dediket long Jehova?

17. (a) Bilong wanem ol elda i save givim ol askim long ol manmeri i dediket nupela? (b) Taim man i dediket long Jehova, wanem bikpela samting em i mas mekim kwiktaim bihain long en?

18. Olsem wanem yumi ken bilip tru olsem dediket bilong yumi i no inap lus nating?

19. Stori i kamap bihain long dispela bai toktok long wanem samting?

[Piksa long pes 10]

Long Sainai lain Israel i dediket long Jehova