Bai Yu Litimapim Nem Bilong Jehova?

“LONG olgeta hap graun ol manmeri i save litimapim nem bilong yu.” Em tok profet bilong wanpela song em lain bilong Kora i bin raitim. (Song 48:10) Long nau planti milion Witnes Bilong Jehova i litimapim nem bilong God na kamapim nem bilong em taim ol i autim gutnius bilong Kingdom bilong em. Ol i mekim dispela wok long 232 kantri na ol ailan, na ol i mekim long planti tok ples, winim 300. Olsem na tru tumas, ol i kamap pinis “long olgeta hap graun.”

Wanem samting i save kirapim ol manmeri bilong kain kain lain na sindaun na tok ples na ol i litimapim nem bilong Jehova? Wanpela bikpela as na ol i mekim olsem, em ol i tenkyu tru long em long stretpela save bilong Baibel ol i bin kisim. Ol tok i tru bilong Baibel i bin helpim ol long lusim ol bilip giaman bilong ol tumbuna na sampela bilip bilong lotu i bin kalabusim ol, olsem bikpaia. (Jon 8:32) Na tok i tru i save helpim ol long pilim tru ol gutpela gutpela pasin bilong God, olsem pasin sori, strong, gutpela tingting na save, stretpela pasin, pasin marimari. Na taim ol stretpela man i kisim save olsem God i bin givim dispela wanpela Pikinini bilong em olsem ofa bilong baim bek ol man, dispela i save kirapim ol long litimapim nem bilong Jehova na mekim wok bilong em.

Hap bilong Kamapim Tok Hait long Baibel i toktok long wanpela bikpela lain long heven i singsing wantaim na i tok: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” (KTH 4:11) Ol i no litimapim nem bilong God long wanem ol i ting em samting ol i mas mekim, nogat. Ol i mekim, long wanem, ol i daun tru long Jehova.

Autim Gutnius na Litimapim Nem Bilong God

Taim man i litimapim nem bilong Jehova, em i bihainim pasin bilong Krais Jisas, em i nambawan man tru bilong litimapim nem bilong God. Na ol man i bihainim lek bilong Krais Jisas ol i mas mekim wok bilong autim gutnius bilong Kingdom bilong God. (Matyu 4:​17, 23; 24:14) Dispela wok bilong autim tok em i kamap nambawan rot bilong litimapim nem bilong Jehova long olgeta hap.

Yumi save dispela wok bilong autim tok em i bikpela samting tru, long wanem, Baibel i tokaut klia olsem dispela wok i insait long wok bilong kisim bek ol man na ol i no ken bagarap. Rom 10:​13-15 i tok: “ ‘Olgeta manmeri i askim Bikpela long helpim ol, em bai i kisim bek ol.’ Tasol sapos ol i no bilip long em, olsem wanem bai ol i askim em long helpim ol? Na sapos ol i no harim tok long em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim? Na sapos ol i no salim ol man i go bilong autim tok, olsem wanem bai ol i autim? Buk bilong God i tok olsem, ‘Ol manmeri i amamas tru long lukim man i kam bilong bringim gutnius.’ ”

Long yia i go pinis, ol Witnes Bilong Jehova i winim wan bilion aua samting long autim tok. Na gutpela samting tru i kamap long dispela wok bilong litimapim nem bilong God! Inap 314‚000 manmeri moa i kisim baptais long wara bilong makim olsem ol i dediket pinis long Jehova, na long dispela rot ol i kam bung wantaim dispela bikpela lain long litimapim nem bilong Jehova.

Tasol olsem wanem long dispela 12,288,917 manmeri ol i bin i kam long bung bilong Memorial long 1994 bilong tingim i dai bilong Krais? Namel long dispela lain i gat olsem 7,000,000 samting ol i no kirap yet long litimapim nem bilong Jehova long rot bilong autim gutnius. Tasol ol i kam bung long dispela bikpela miting, na dispela inap mekim na bihain sampela milion moa bai kirap long litimapim nem bilong Jehova. Yumi ken mekim wanem bilong helpim ol dispela manmeri i gat laik long harim gutnius na bai ol i ken kamap man bilong litimapim nem bilong Jehova?

I Gat Helpim i Stap

Ating planti manmeri i gat laik long litimapim nem bilong Jehova, tasol ol i ting ol i no inap winim mak bilong mekim dispela wok. Tasol ol i ken tingim tok bilong man bilong raitim Song, em i tok: “Mi lukluk i go long ol maunten. Tasol man bilong helpim mi bai i kamap long wanem hap? Bikpela i bin wokim heven na graun, em wanpela tasol i save helpim mi.” (Song 121:​1, 2) Ating dispela man i bin lukluk i go long ol maunten bilong Jerusalem, em haus bilong Jehova i stap long en na em i ples gavman bilong God i stap long en long graun. Dispela inap givim stretpela tingting long yumi olsem: Jehova na oganaisesen bilong em tasol inap helpim ol man long kirap na litimapim nem bilong God na autim tok bilong Kingdom.​—⁠Song 3:4; Daniel 6:⁠10.

Long nau, ol man i laik litimapim nem bilong Jehova ol inap tingting long kisim gutpela helpim long oganaisesen bilong em long graun. Olsem: Ol Witnes Bilong Jehova i save mekim Baibel-stadi wantaim ol man i laik harim gutnius, na ol i no save singaut long pe; long dispela rot ol i helpim ol dispela man. Dispela stadi i no bilong lainim ol long ol bilip bilong Baibel tasol​—⁠em i save helpim man long pilim tru ol samting em i lain long en na amamas long dispela oganaisesen Jehova i mekim wok long en.

Olsem na Witnes i mekim dispela Baibel-stadi em i wok strong na bai ol dispela nupela tok i tru i go long bel bilong dispela man​—⁠i no long het bilong em tasol. Na tisa i mas soim Baibel-stadi, olsem wanem Jehova i mekim wok long rot bilong oganaisesen bilong Em bilong kamapim laik bilong Em long graun. Buk Ol Witnes Bilong Jehova Ol i Wanbel na Mekim Wok Bilong God Long Olgeta Hap Bilong Graun na video-kaset Jehovah’s Witnesses​—⁠The Organization Behind the Name, ol i bin mekim gutpela wok bilong helpim ol Baibel-stadi long kisim dispela save.

Ol miting Kristen tu i save mekim bikpela wok bilong helpim ol dispela man bambai ol i ken kirap na litimapim nem bilong Jehova. Taim Witnes i stadi nupela yet wantaim man, em i ken singautim man long i go long ol miting Kristen. Bihain, man bai kisim save olsem em i bikpela samting long em i mas i go oltaim long olgeta miting na bekim tok long miting. (Hibru 10:​24, 25) Bilong helpim gut ol wanbilip na ol dispela man bihain bai i kirap long litimapim nem bilong Jehova, ol wasman i mas redim ol gutpela miting i save strongim ol man long ol samting bilong spirit na ol inap mekim wok long ol tok i kamap long en.

Helpim Ol Pikinini Long Litimapim Nem Bilong Jehova

Liklik taim bihain ol pikinini tu inap kamap man bilong autim gutnius. Baibel i makim bikpela wok bilong ol papa, ol i mas “skulim ol [pikinini] long tok bilong Bikpela.” (Efesus 6:⁠4) Taim ol papamama i daun long God na ol i skulim gut ol pikinini, orait taim ol i liklik yet ol inap kisim laik long litimapim nem bilong Jehova.

Wanpela pikinini meri long Ajentina, planti taim insait long sampela mun em i askim ol elda bilong kongrigesen long helpim em bambai em i ken winim mak bilong kamap wanpela pablisa bilong Kingdom. Bihain papamama na ol elda i tok orait long em i ken kamap wanpela pablisa i no baptais yet. Nau em i save pinis long kamapim gut tok bilong Kingdom long ol man. Dispela liklik pikinini meri i gat 5-pela krismas tasol na em i no save long kaunim buk, tasol em inap tingim ples sampela tok bilong Baibel i stap long en. Taim em i painim pinis wanpela tok, em i save askim man bilong haus long kaunim, na bihain em i kamapim insait bilong en.

Em nau, ol elda na papamama inap mekim gutpela wok tru taim ol i wok long kirapim na helpim ol man em ol i wok long kamap strong, na liklik taim ol inap kamap man bilong litimapim nem bilong Jehova.​—⁠Sindaun 3:⁠27.

Pas Gut Wantaim Jehova Oltaim

Tasol olsem wanem sapos yu yet yu bin bung wantaim ol Witnes Bilong Jehova inap longtaim liklik, tasol yu no kirap yet long autim tok wantaim ol? I gutpela sapos yu givim sampela askim long skin bilong yu olsem: ‘Mi bilip tru olsem mi painim pinis tok i tru na Jehova tasol i God tru? Mi bilip tru olsem Kingdom bilong God tasol inap stretim ol hevi bilong ol man? Mi lusim pinis olgeta lotu giaman na ol pasin bilong dispela graun Jehova i no save laikim? Mi save laikim tumas God na ol stretpela lo bilong em?’ (Song 97:10) Sapos yu inap tok yes long ol dispela askim na tok bilong yu i stret, orait wanem samting i pasim yu na yu no litimapim nem bilong Jehova?​—⁠Skelim wantaim Aposel 8:⁠36.

Bilong litimapim nem bilong Jehova, yu mas autim gutnius. Tasol i no dispela samting tasol yu mas mekim. Sapos yu kisim pinis stretpela save bilong Baibel, na yu bilip tru, na yu bihainim ol lo bilong God, orait yu mas strongim pasin wanbel namel long yu na Jehova. Bai yu mekim olsem wanem? Yu mas dediket long em long rot bilong beten na kisim baptais long wara bilong kamapim long ples klia dediket bilong yu. Sapos yu laik kisim laip i stap oltaim yu mas mekim olsem. Olsem na kirap kwik long bihainim tok bilong Jisas, em i tok: “Yupela i mas i go insait long liklik dua. Dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.”​—⁠Matyu 7:​13, 14.

Klostu nau bikpela bagarap bai pinisim pasin bilong dispela graun, olsem na nau i no taim bilong wet na tingting pastaim. Kirap kwik long mekim ol samting bambai yu ken pas gut wantaim Jehova inap oltaim oltaim. Tru tumas, nau em i taim bilong tok yes long dispela askim, Bai yu litimapim nem bilong Jehova?