Ol Man i Amamas Long Litimapim Nem Bilong God Ol i Stap Narapela Kain
“Litimapim nem bilong Bikpela! Yupela wokman bilong Bikpela, litimapim nem bilong em!”—SONG 113:1.
1, 2. (a) Olsem Song 113:1-3 i tok, i stret yumi mas givim bel long litimapim nem bilong husat? (b) I stret yumi kamapim wanem askim?
GOD JEHOVA em i Bikpela Man bilong wokim olgeta samting, em i King bilong heven na graun inap oltaim oltaim. Olsem na i stret tru yumi givim bel long litimapim nem bilong em. Dispela em i as na Song 113:1-3 i tokim yumi: “Litimapim nem bilong Bikpela! Yupela wokman bilong Bikpela, litimapim nem bilong em! Yumi olgeta i mas amamas long nem bilong Bikpela, nau na olgeta taim bihain. Long hap bilong sankamap i go inap hap bilong san i go daun, yumi olgeta manmeri i mas litimapim nem bilong Bikpela.”
2 Yumi Witnes bilong God, olsem na yumi amamas long mekim olsem. Yumi amamas tru, klostu nau God Jehova bai mekim dispela gutpela singsing yumi mekim long nau bilong litimapim nem bilong em i go nabaut long olgeta hap bilong graun! (Song 22:27) Olsem wanem? Nek bilong yu i bung wantaim dispela bikpela lain i singsing? Sapos olsem, ating yu amamas tru long stap narapela kain long ol man bilong dispela graun em ol i bruk bruk na ol i no amamas!
3. (a) Wanem samting i mekim na lain bilong Jehova i stap narapela kain? (b) Olsem wanem yumi stap narapela kain?
3 Yumi wanbel long litimapim nem bilong Jehova na dispela i mekim na yumi stap narapela kain. Yumi autim wankain tok na yumi skulim ol man long wankain tok, na yumi olgeta i bihainim wankain pasin bilong tokaut long “ol gutpela pasin” bilong Jehova. (Song 145:7) Tru tumas, yumi lain i dediket pinis long Jehova, yumi stap narapela kain bambai yumi ken mekim wok bilong God bilong yumi, Jehova. God i bin tokim lain i dediket long em long bipo, em ol Israel, ol i mas stap narapela kain long ol lain i stap klostu long ol na ol i mas klia long ol pasin bilong ol dispela lain. (Kisim Bek 34:12-16) Em i bin givim ol lo long lain bilong em bilong helpim ol long mekim olsem. Olsem tasol long nau, Jehova i givim Baibel Holi long yumi. Ol tok bilong en i skulim yumi long ol samting yumi mas mekim bambai yumi stap narapela kain long ol man bilong dispela graun. (2 Korin 6:17; 2 Timoti 3:16, 17) Yumi no stap narapela kain, olsem ol bruder na sister bilong Bikpela Babilon i save mekim, em ol i lusim ol man na i go i stap long ol haus bruder na haus sister. Yumi bihainim pasin bilong Krais Jisas—yumi stap narapela kain, long wanem, yumi save autim tok long ol man na litimapim nem bilong Jehova.
Bihainim Pasin Bilong Jisas
4. Olsem wanem Jisas i olsem gutpela piksa bilong litimapim nem bilong Jehova?
4 Jisas i no bin lusim wok bilong em long litimapim nem bilong Jehova. Na dispela i mekim na em i stap narapela kain long ol man bilong graun. Long ol haus lotu na long tempel long Jerusalem, em i litimapim nem holi bilong God. Maski em i stap antap long maunten o long nambis, taim bikpela lain manmeri i kam bung, Jisas i autim tok i tru bilong Jehova. Em i tok: “Papa, yu Bikpela bilong heven na bilong graun, mi tenkyu long yu.” (Matyu 11:25) Na taim em i kot long Pontius Pailat, em i tokaut olsem: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim.” (Jon 18:37) Jisas i save, dispela em i bikpela wok tru. Maski em i stap we, Jisas i tokim ol man long Jehova na em i litimapim nem bilong em.
5. Song 22:22 i makim husat? Yumi mas i gat wanem kain tingting?
5 Long Song 22:22, yumi inap painim tok profet long Nambawan Man bilong litimapim nem bilong Jehova, olsem: “Bai mi autim tok long ol brata bilong mi long strongpela wok yu bin mekim. Taim ol i bung bilong lotu bai mi go namel long ol na litimapim nem bilong yu.” Na long Hibru 2:11, 12, aposel Pol i makim truim bilong ol dispela ves long Bikpela bilong yumi Jisas na long ol man em Jehova i bin makim bilong kisim biknem long heven. Olsem Jisas, ol i no sem long litimapim nem bilong Jehova namel long ol man i bung bilong lotu. Olsem wanem? Yumi gat wankain tingting taim yumi go long ol miting bilong yumi long kongrigesen? Taim yumi givim bel tru long harim ol tok na bekim tok na mekim singsing, yumi litimapim nem bilong Jehova. Tasol olsem wanem? Taim yumi mekim olsem nau pasin bilong yumi long litimapim nem bilong Jehova i pinis?
6. Jisas i givim wanem wok long ol disaipel bilong em? Ol man i laikim tru lait ol i save litimapim nem bilong God olsem wanem?
6 Long Matyu 5:14-16, Bikpela bilong yumi Jisas i givim wok long ol disaipel bilong em bilong i stap olsem lait na kirapim ol narapela long litimapim nem bilong Jehova. Em i tok: “Yupela i olsem lait bilong graun. . . . Lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.” Ol man i laikim tru lait ol i save litimapim nem bilong God. Ol i mekim olsem wanem? Yu ting ol i mekim olsem long rot bilong ol gutpela tok na pasin bilong helpim ol manmeri tasol? Nogat. Ol i mekim olsem taim ol i litimapim nem bilong Jehova long pasin wanbel. Tru tumas, ol man i laikim tru lait ol i save dediket long God na ol i kamap olsem man i amamas long litimapim nem bilong Jehova. Yu mekim pinis dispela gutpela samting?
Amamas Long Litimapim Nem Bilong Jehova
7. Ol man i litimapim nem bilong Jehova, bilong wanem ol i amamas? Long de Pentikos bilong yia 33 C.E. ol i kisim wanem amamas?
7 Ol man i litimapim nem bilong Jehova, bilong wanem ol i amamas? Long wanem, pasin bilong amamas em wanpela gutpela pasin spirit holi bilong God i kamapim. Long Galesia 5:22, pasin bilong amamas i kam bihain long pasin bilong laikim ol arapela. Ol disaipel bilong Jisas long taim bilong ol aposel ol i kamapim dispela gutpela pasin em spirit bilong Jehova i kamapim. Long de Pentikos bilong yia 33 C.E., taim God i kapsaitim spirit bilong em long ol 120 disaipel bilong Jisas, olgeta i kirap litimapim nem bilong Jehova long kain kain tok ples. Ol gutpela Juda i lotu long God, na ol i sindaun long planti ol narapela kantri na ol i kam long Jerusalem, “ol i kirap nogut.” Ol i tok: “Olsem wanem na yumi olgeta wan wan yumi harim ol i toktok long tok ples bilong yumi stret. . . . Yumi olgeta i harim ol i autim tok bilong ol strongpela wok bilong God long ol tok ples bilong yumi.” (Aposel 2:1-11) Ol i litimapim nem bilong Jehova long kain kain tok ples na wanem samting i kamap? Inap 3,000 Juda na ol narapela man i bihainim lotu Juda ol i bilip long gutnius bilong Mesaia. Ol i baptais, na kisim spirit holi, na ol i bung wantaim ol disaipel na givim bel long litimapim nem bilong Jehova. (Aposel 2:37-42) Man! Em gutpela samting tru i bin kamap!
8. Bihain long Pentikos, ol Kristen i mekim wanem bambai amamas bilong ol i ken go bikpela moa?
8 Stori i tok moa olsem: “Long olgeta de ol i save bung wantaim long tempel. Na ol i save kaikai wantaim long narapela narapela haus bilong ol. Bel bilong ol i gutpela, na ol i save amamas na kaikai wantaim. Oltaim ol i save litimapim nem bilong God, na olgeta manmeri i belgut long ol. Long olgeta de Bikpela i wok long kisim bek sampela manmeri, na long dispela pasin em i mekim namba bilong ol manmeri i bilip long Jisas i kamap planti moa.” (Aposel 2:46, 47) Yu ting ol i amamas, long wanem, ol i bung na kaikai wantaim? Nogat. Ol i amamas, long wanem, long olgeta de ol i litimapim nem bilong God Jehova. Na amamas bilong ol i go bikpela moa taim ol i lukim planti tausen ol i bilip long tok ol i autim olsem God bai kisim bek ol man. I wankain long yumi long nau, a?
Olgeta Lain i Amamas Long Litimapim Nem Bilong God
9. (a) Long wanem taim na olsem wanem God i bin kirap long opim rot bilong ol manmeri bilong olgeta lain i ken harim gutnius? (b) Bilong wanem God i kapsaitim spirit holi long Kornilius wantaim ol wanlain bilong em paslain long baptais bilong ol?
9 Jehova i no laik bai ol wokboi bilong em i stap olsem lait bilong wanpela lain tasol. Olsem na kirap long yia 36 C.E. rot i op bilong ol manmeri bilong olgeta lain i ken harim gutnius bilong em. God i stiaim Pita i go long haus bilong wanpela kepten bilong ami long Sisaria em i no bilong lain Juda. Pita i lukim Kornilius wantaim ol wanlain na ol pren tru bilong em ol i bung i stap. Ol i putim gut yau long ol tok bilong Pita, na bel bilong ol i kirap na bilip long Jisas. Olsem wanem yumi save ol i bilip? Long wanem, God i kapsaitim spirit holi long ol dispela manmeri bilong ol narapela lain. God i save givim presen bilong spirit holi long ol man taim ol i baptais pinis, tasol long dispela taim Jehova i givim pastaim bilong makim olsem em i orait long ol dispela manmeri i no bilong lain Juda. Sapos Jehova i no bin mekim olsem, Pita i no ken save olsem nau God i orait long ol man bilong ol narapela lain i kamap wokboi bilong Em na ol i inapim mak bilong kisim baptais.—Aposel 10:34, 35, 47, 48.
10. Olsem wanem Jehova i tok profet long bipo yet olsem ol man bilong olgeta lain bai litimapim nem bilong em?
10 Long bipo yet Jehova i tok profet olsem ol man bilong olgeta lain bai litimapim nem bilong em. Yes, long olgeta hap bilong graun bai i gat ol man i amamas long litimapim nem bilong em. Bilong kamapim klia dispela samting, aposel Pol i kamapim sampela tok profet bilong Ol Skripsa Hibru. Em i tokim ol Kristen bilong kongrigesen long Rom, em ol i bilong ol narapela narapela lain, olsem: “Yupela olgeta i mas amamas long kisim ol arapela Kristen i kam i stap wantaim yupela, olsem Krais tu i bin amamas long yupela i ken i stap wantaim em. Na long dispela pasin bai yupela i kamapim biknem bilong God. Mi tok olsem, Krais i bin kamap wokman bilong helpim ol lain Juda. Em i mekim olsem bilong soim olsem tok bilong God i tru, na long dispela pasin em inapim olgeta promis God i bin givim long ol tumbuna bilong ol. Na tu, em i laik bai ol arapela lain i lukim marimari bilong God na litimapim nem bilong em, olsem buk bilong God i tok [long Song 18:49], ‘Olsem na bai mi litimapim nem bilong yu namel long ol arapela lain manmeri. Na bai mi mekim song bilong litimapim nem bilong yu.’ Na narapela tok bilong buk bilong God i olsem [long Lo 32:43], ‘Yupela ol manmeri bilong ol arapela kantri, yupela i ken amamas wantaim ol manmeri bilong God.’ Na long narapela hap em i tok olsem [long Song 117:1], ‘Yupela olgeta lain pipel, litimapim nem bilong Bikpela. Yupela manmeri bilong olgeta kantri, litimapim nem bilong en.’ ”—Rom 15:7-11.
11. Olsem wanem God i bin helpim ol manmeri bilong olgeta lain long kisim save long tok i tru bilong em? Wanem samting i bin kamap long dispela?
11 Ol manmeri bilong olgeta lain i mas bilip long Krais Jisas, dispela man God i makim bilong bosim olgeta lain, na bai ol inap wanbel long litimapim nem bilong Jehova. Bilong helpim ol long save long tok i tru i bringim man long laip oltaim, God i kirapim wanpela wok bilong skulim ol man long olgeta hap. Em i stiaim ol long rot bilong gutpela wokboi bilong em. (Matyu 24:45-47) Wanem samting i kamap long dispela? Winim 5 milion manmeri long 230 kantri ol i amamas long litimapim nem bilong Jehova. Na planti milion moa ol i kamapim klia olsem ol tu i laik mekim olsem. Long 1996 inap 12,921,933 i kam long Memorial. Man! Em gutpela samting tru!
Bikpela Lain i Amamas Long Litimapim Nem Bilong Jehova
12. Aposel Jon i lukim wanem gutpela driman? Na long nau yumi inap lukim wanem samting bilong en?
12 Long driman, aposel Jon i lukim wanpela ‘bikpela lain’ ol i bilong olgeta lain man. (KTH 7:9) Dispela bikpela lain i bung wantaim liklik hap lain God i bin makim na ol i singsing long wanem samting? Jon i tok: “God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi.” (KTH 7:10) Long olgeta hap bilong graun yumi autim strong tok long dispela samting. I olsem yumi holim ol lip bilong diwai pam na yumi wanbel long tokaut olsem God em i King bilong heven na graun, na yumi amamas long tokaut long ai bilong olgeta long heven na long graun olsem em yet wantaim Pikinini bilong em Krais Jisas, em Pikinini Sipsip, tupela i kisim bek yumi. Man! Aposel Jon i amamas tru long lukim dispela gutpela driman long bikpela lain! Na long nau yumi amamas tru long lukim dispela bikpela lain, na long i stap insait long en!
13. Wanem samting i makim na lain bilong Jehova i stap narapela kain long ol man bilong graun?
13 Olsem wokboi bilong Jehova yumi amamas long holim nem bilong em. (Aisaia 43:10, 12) Yumi Witnes bilong Jehova, olsem na yumi stap narapela kain long ol man bilong dispela graun. Yumi amamas long holim dispela nem bilong God i narapela kain, na yumi mekim wok bilong em, em dispela wok i olsem as bilong i stap bilong yumi! Long rot bilong Kingdom Jehova i laik mekim gut nem holi bilong em na kamapim klia olsem em i King bilong heven na graun, na dispela tu i mekim na yumi bilip olsem i stap bilong yumi i gat as bilong en. Na em i bin helpim yumi long wok wantaim em long kamapim dispela laik bilong em long nem na Kingdom bilong em. Em i mekim olsem long 3-pela rot.
God i Givim Tok i Tru Long Yumi
14, 15. (a) Wanem wanpela rot bilong God long helpim yumi long wok wantaim em long kamapim laik bilong em long ol samting bilong nem na Kingdom bilong em? (b) Olsem wanem Kingdom i kamap long yia 1914 C.E. i narapela kain long kingdom i bin bagarap long yia 607 B.C.E.?
14 Namba wan rot bilong Jehova long helpim lain bilong em i olsem: Em i givim tok i tru long yumi. Wanpela bikpela tok hait em i kamapim em Kingdom bilong em i kirap mekim wok long 1914. (KTH 12:10) Dispela gavman long heven i narapela kain long piksa bilong en, em kingdom bilong God long Jerusalem, em bipo ol king long lain bilong Devit i bin mekim wok long en. Dispela kingdom i bin bagarap, na kirap long yia 607 B.C.E., ol narapela lain i bosim Jerusalem. Tasol nupela Kingdom God i kamapim long yia 1914 em i wanpela gavman bilong heven na Jehova tasol bai bosim, na em i no inap bagarap. (Daniel 2:44) Na lain bilong bosim Kingdom em tu i narapela kain. Em i narapela kain olsem wanem? Kamapim Tok Hait 11:15 i tok: “Mi harim ol lain i stap long heven i singaut strong olsem, ‘Bikpela bilong yumi wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun. Na Bikpela bai i stap king oltaim oltaim.’ ”
15 Dispela Kingdom bilong ‘Bikpela na man em i makim bilong kisim bek ol manmeri’ bai bosim olgeta manmeri bilong graun. Dispela nupela rot bilong Jehova long mekim wok king, em Pikinini bilong em wantaim ol 144,000 brata bilong Jisas, na klostu olgeta bilong ol i kirap bek pinis na i stap long heven, em i no olsem wanpela samting nating ol man bilong bikpela skul i laik toktok long en. Nogat. Dispela Kingdom bilong heven em i wanpela gavman tru. Aninit long dispela gavman bai yumi kisim laip oltaim na bai yumi stap gutpela olgeta, na dispela i as na yumi ken amamas tru! Jehova i givim ol dispela gutpela tok i tru bilong Baibel long yumi, olsem na long olgeta taim yumi amamas long autim long ol man. (Song 56:10) Olsem wanem? Long olgeta taim yu save autim long ol man olsem Kingdom bilong God long han bilong Krais i kirap pinis long mekim wok long heven?
Spirit Holi na Bikpela Lain Brata i Helpim Yumi
16, 17. Wanem namba 2 na namba 3 rot bilong God long helpim yumi long wok wantaim em long kamapim laik bilong em?
16 Namba 2 rot bilong God long helpim yumi long wok wantaim em long kamapim laik bilong em i olsem: Em i givim spirit holi long yumi, na dispela i helpim yumi long bihainim ol gutpela pasin em spirit holi i save kamapim na God i ken orait long yumi. (Galesia 5:22, 23) Na Pol i tokim ol Kristen God i bin makim olsem: “Mipela i kisim Spirit i kam long God, bai mipela i ken save long olgeta presen God i bin givim long mipela.” (1 Korin 2:12) Taim yumi bihainim spirit bilong Jehova, yumi olgeta inap save long ol gutpela samting God i givim long yumi long nau—ol tok promis bilong em, na ol lo, na kain samting olsem.—Skelim wantaim Matyu 13:11.
17 Namba 3 rot bilong God long helpim yumi i olsem: Yumi gat wanpela bikpela lain brata i stap long olgeta hap, na yumi ken bung wantaim gutpela oganaisesen bilong Jehova bilong lotu long em. Aposel Pita i bin toktok long dispela bikpela lain brata na em i laik kirapim yumi long “givim bel bilong [yumi] long ol arapela manmeri bilong God.” (1 Pita 2:17) Gutpela lain brata sista bilong yumi, em narapela i save laikim narapela, ol i helpim yumi long amamas long mekim wok bilong Jehova. Song 100:2 i tok: “Yupela i mas belgut long Bikpela na lotu long em. Yupela singim song bilong amamas na go klostu long em.” Na ves 4 i tok moa olsem: “Yumi mas i go insait long haus bilong en na tenkyu long em na litimapim nem bilong em. Yumi tenkyu long em na givim biknem long em.” Olsem na taim yumi autim tok long ol man o yumi go long ol miting bilong yumi, yumi inap amamas tru. Yumi painim pinis bel isi na gutpela sindaun long gutpela banis bilong tempel spirit bilong Jehova!
Amamas Long Litimapim Nem Bilong Jehova!
18. Bilong wanem yumi inap amamas long litimapim nem bilong Jehova maski ol man i birua long yumi o ol narapela hevi i painim yumi?
18 Maski yumi gat wanem kain hatwok, o ol man i birua long yumi, o ol narapela hevi i painim yumi, yumi amamas yumi stap long gutpela haus bilong Jehova bilong lotu long em. (Aisaia 2:2, 3) Yumi mas tingim, amamas em samting bilong bel. Ol brata sista Kristen bilong yumi bilong pastaim ol i amamas long litimapim nem bilong Jehova maski wanem ol hevi i painim ol na ol samting bilong ol i lus. (Hibru 10:34) Ol wanbilip bilong yumi long nau i gat wankain pasin olsem ol dispela Kristen bilong pastaim.—Matyu 5:10-12.
19. (a) Wanem tok i save kirapim yumi long litimapim nem bilong Jehova? (b) Sapos yumi laik kisim laip oltaim, yumi mas mekim wanem? Na yumi tingting strong long mekim wanem?
19 Yumi olgeta i save mekim wok bilong Jehova yumi amamas long bihainim tok bilong Baibel long litimapim nem bilong Jehova. Ol tok long Buk Kamapim Tok Hait i litimapim nem bilong Jehova, planti taim buk i gat tok olsem: “Litimapim nem bilong God!” (KTH 19:1-6) Long ol 6-pela ves bilong Song 150, inap 13 taim Baibel long tok Hibru i tok, yumi mas litimapim nem bilong Jehova. Yes, olgeta samting i gat laip ol i mas amamas wantaim long litimapim nem bilong Jehova. Sapos yumi laik kisim laip oltaim yumi mas insait long wok bilong litimapim nem bilong Ja! Yes, ol man bilong kisim laip oltaim em ol man i litimapim nem bilong Jehova oltaim. Las de i klostu, olsem na yumi tingting strong long stap klostu long lain bilong God i stap long olgeta hap bilong graun. Long dispela taim yumi inap wetim ol laspela tok bilong Song 150 i kamap tru olsem: “Yupela olgeta samting i gat laip, litimapim nem bilong Bikpela! Litimapim nem bilong Bikpela!”
Bai Yu Bekim Olsem Wanem?
◻ Wanem samting i mekim na lain bilong Jehova i stap narapela kain?
◻ Bilong wanem lain bilong Jehova i amamas?
◻ Wanem samting i makim olsem yumi stap narapela kain long ol man bilong graun?
◻ Long wanem 3-pela rot God i helpim yumi long wok wantaim em long kamapim laik bilong em?
[Piksa long pes 17]
Maski Jisas i stap we, em i tokim ol man long Jehova na em i litimapim nem bilong em