Litimapim Nem Bilong Jehova Long Ol Bikpela Wok Em i Mekim!
“Bel bilong mi em i litimapim nem bilong Bikpela. . . . God i gat bikpela strong, em i bin mekim narakain samting tru bilong helpim mi.”—Luk 1:46-49.
1. Jehova i mekim wanem ol bikpela wok na i stret yumi litimapim nem bilong em?
JEHOVA inap tru long yumi litimapim nem bilong em long ol bikpela wok em i mekim. Taim profet Moses i stori long God i kisim bek ol Israel long Isip, em i tok: “Yupela yet i lukim olgeta dispela bikpela samting God i bin mekim.” (Lo 11:1-7) Na taim ensel Gabriel i tokim nupela meri Maria long em bai karim Jisas, Maria i tok: “Bel bilong mi em i litimapim nem bilong Bikpela. . . . God i gat bikpela strong, em i bin mekim narakain samting tru bilong helpim mi, na nem bilong en i stap holi.” (Luk 1:46-49) Yumi ol Witnes Bilong Jehova i save litimapim nem bilong em long ol bikpela wok em i mekim—olsem kisim bek ol Israel long kalabus long Isip, na long rot bilong mirakel gutpela Pikinini bilong em i bin kamap long bel bilong Maria.
2. (a) Samting God i ‘tingting pinis long mekim,’ em bai mekim wanem long ol man i bihainim tok? (b) Wanem samting i painim Jon long ailan Patmos?
2 Planti bikpela wok Jehova i bin mekim i bilong kamapim laik bilong em, olsem samting em i ‘tingting pinis long mekim’ na i bilong i stap oltaim oltaim. Dispela laik i olsem: Long rot bilong Mesaia na Kingdom bilong em, Jehova bai mekim gut long ol man i bihainim tok. (Efesus 3:8-13) Dispela laik bilong em i bin wok long kamap isi isi taim lapun aposel Jon i lukim long driman wanpela dua long heven i op i stap na em i lukluk i go insait. Em i harim maus bilong wanpela man i singaut strong olsem: “Yu kam antap hia, na bai mi soim yu olgeta samting i mas kamap bihain.” (KTH 4:1) Gavman bilong Rom i bin rausim Jon i go long ailan Patmos, long wanem, em i ‘bin autim tok bilong God na Jisas,’ na taim em i stap long dispela ailan em i kisim ‘tok i stap hait em Jisas Krais i bin kamapim ples klia.’ Samting Jon i lukim na harim i kamapim klia planti samting bilong dispela laik bilong God, na dispela i givim lait bilong spirit long olgeta trupela Kristen na i strongim ol long taim stret.—KTH 1:1, 9, 10.
3. Ol 24 hetman Jon i lukim long driman ol i olsem piksa bilong husat?
3 Taim Jon i lukluk i go insait long dispela dua long heven i op i stap, em i lukim 24 hetman ol i sindaun long sia king na ol i gat hat olsem bilong king. Ol i brukim skru long pes bilong God na ol i tok: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” (KTH 4:11) Ol dispela hetman ol i olsem piksa bilong olgeta Kristen God i makim, em ol i kirap bek pinis na holim bikpela namba God i bin tok promis long givim long ol. Ol bikpela wok Jehova i mekim taim em i wokim ol samting i kirapim ol dispela hetman long litimapim nem bilong em. Yumi tu i kirap nogut long ol samting i kamapim klia “bikpela strong bilong [God] i stap oltaim oltaim.” (Rom 1:20) Na taim yumi wok long kisim save long Jehova, yumi kisim save long sampela as moa na yumi ken litimapim nem bilong em long ol bikpela wok em i mekim.
Tokaut Long Ol Wok Bilong Jehova!
4, 5. Stori long sampela tok Devit i mekim bilong litimapim nem bilong Jehova.
4 Man bilong raitim Song, em Devit, em i litimapim nem bilong God long ol bikpela wok Em i mekim. Devit i singsing olsem: “Bikpela i stap king long taun Saion. Singim song long em na litimapim nem bilong em. Tokaut long olgeta lain pipel long ol bikpela wok em i bin mekim. God, yu ken marimari long mi. Lukim pen na hevi ol birua i givim mi. Yu save kisim bek mi long taim klostu mi laik i dai, na yu mekim mi i stap gut. Olsem na mi ken stori long olgeta samting yu bin mekim na mi ken litimapim nem bilong yu.” (Song 9:11, 13, 14) Taim Devit i givim piksa bilong tempel long pikinini bilong em Solomon, em i mekim gutpela tok long God na litimapim nem bilong em. Em i tok: “Yu gat olgeta strong na pawa. Yu gat biknem, na yu stap antap tru. Yu nambawan olgeta. . . . Yu stap bikpela king bilong olgeta samting. . . . God bilong mipela, nau mipela i tenkyu long yu, na litimapim biknem bilong yu.”—1 Stori 29:10-13.
5 Planti taim Baibel i tokim yumi long litimapim nem bilong God, olsem Devit i bin mekim. Buk Song i kamapim planti singsing i litimapim nem bilong God, na Devit i bin raitim planti bilong ol dispela singsing. Oltaim em i litimapim nem bilong Jehova na tok tenkyu long em. (Song 69:30) Kirap long taim bilong Devit na i kam inap nau, ol man i bin mekim wok long ol singsing bilong litimapim nem bilong Jehova, em ol singsing God i bin kirapim Devit na sampela moa long raitim.
6. Buk Song inap helpim yumi olsem wanem?
6 Tru tumas, Buk Song i save helpim gut ol man i lotuim Jehova! Taim yumi laik tok tenkyu long God long ol bikpela wok em i bin mekim bilong helpim yumi, ating yumi tingim ol gutpela tok bilong litimapim nem bilong em i stap long Buk Song. Taim yumi kirap long moningtaim, ating sampela taim bel i kirapim yumi long kamapim kain tok olsem: “Bikpela, yu God Antap Tru, i gutpela sapos mi tenkyu long yu na mekim ol song bilong litimapim nem bilong yu. Na long olgeta moningtaim i gutpela sapos mi tokaut long yu laikim mi tumas, na long olgeta nait mi tokaut long yu bin lukautim mi gut. . . . Mi tingting long strongpela wok bilong yu, na mi belgut tru na mi singim song bilong amamas.” (Song 92:1-4) Taim yumi winim wanpela hevi i laik pasim yumi long kamap strong long ol samting bilong spirit, ating bai yumi beten na amamas long Jehova na tenkyu long em, olsem man bilong raitim Song i bin mekim taim em i tok: “Yupela kam. Yumi mekim song bilong litimapim nem bilong Bikpela. Yumi tingting long strongpela God em i kisim bek yumi, na yumi singim song na amamas long em. Yumi go klostu long em na tenkyu long em. Yumi mekim sampela song bilong amamas na litimapim nem bilong em.”—Song 95:1, 2.
7. (a) Olsem wanem long planti singsing ol Kristen i mekim? (b) Wanem wanpela as na yumi mas kam kwik long ol miting na stap inap long taim miting i pinis?
7 Planti taim yumi litimapim nem bilong Jehova taim yumi mekim singsing long ol miting bilong kongrigesen na ol kibung. Ol tok long Buk Song i as bilong planti bilong ol dispela singsing. Yumi amamas tru yumi gat ol singsing bilong litimapim nem bilong Jehova! Pasin bilong mekim ol singsing bilong litimapim nem bilong God em i wanpela gutpela as na yumi mas kam kwik long ol miting na stap inap long taim miting i pinis. Long dispela rot yumi inap mekim ol singsing na harim beten wantaim ol wanlotu bilong yumi.
‘Litimapim Nem Bilong Ja!’
8. Wanem insait bilong dispela tok “Haleluya”?
8 Tok “Haleluya” ol i kisim long wanpela tok Hibru, insait bilong en i olsem “Yupela ol manmeri, litimapim nem bilong Ja.” Song 135:1-3 i singautim yumi olsem: “Litimapim nem bilong Bikpela [“Ja,” NW ]. Yupela wokman bilong Bikpela, yupela i mas litimapim nem bilong en. Yupela i save sanap insait long banis bilong Bikpela, long haus bilong God bilong yumi. Litimapim nem bilong en, long wanem, em i save mekim gut tru long yumi. Em i save marimari long yumi, olsem na yumi mas singim ol song bilong litimapim nem bilong en.”
9. Wanem samting i kirapim yumi long litimapim nem bilong Jehova?
9 Taim yumi tingim ol gutpela gutpela samting God i bin wokim na olgeta wok em i save mekim bilong helpim yumi, bel bilong yumi i pilim tru na dispela i kirapim yumi long litimapim nem bilong em. Na taim yumi tingim tingim long bel ol strongpela wok Jehova i bin mekim bilong helpim lain bilong em long bipo, yumi laik litimapim nem bilong em. Na taim yumi tingim ol tok promis bilong ol bikpela samting Jehova bai mekim bihain, yumi save tingim sampela rot bilong kamapim tenkyu bilong yumi na litimapim nem bilong em.
10, 11. Olsem wanem i stap bilong yumi i mas kirapim yumi long litimapim nem bilong God?
10 I stap bilong yumi yet i mas kirapim yumi long litimapim nem bilong Ja. Devit i singsing olsem: “Yu bin wokim olgeta hap bilong bodi bilong mi. . . . Mi pret long yu, olsem na mi save litimapim nem bilong yu [Jehova]. Olgeta samting yu wokim i narakain na i nambawan tru. Mi save gut long dispela samting na mi pilim tru.” (Song 139:13, 14) Tru tumas, bodi bilong yumi “i nambawan tru.” Yumi inap lukim na harim ol samting, na wokim gut tingting—ol dispela samting i gutpela presen tru. Olsem na olgeta samting yumi mekim i mas litimapim nem bilong Man bilong wokim yumi, a? Pol i kamapim klia dispela samting taim em i tok: “Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God.”—1 Korin 10:31.
11 Sapos yumi laikim tru Jehova, bai yumi mekim olgeta samting bilong givim biknem long em. Jisas i tok namba wan lo i olsem: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela na long strong bilong yupela.” (Mak 12:30; Lo 6:5) Yumi mas laikim tru Jehova na litimapim nem bilong em, long wanem, em i Man bilong wokim yumi, na em i Man bilong givim yumi ‘olgeta gutpela samting na olgeta presen i gutpela tru.’ (Jems 1:17; Aisaia 51:13; Aposel 17:28) I stret yumi mekim olsem, long wanem, pasin bilong wokim gut tingting, na yumi inap tingim ol samting bilong spirit, na strong bilong skin bilong yumi—olgeta pasin na save bilong yumi—ol dispela samting i kam long Jehova. Em i Man bilong wokim yumi, olsem na em inap long yumi laikim tru em na litimapim nem bilong em.
12. Wanem tingting bilong yu long ol bikpela wok bilong Jehova na ol tok bilong Song 40:5?
12 Ol bikpela wok bilong Jehova i kamapim planti as na yumi mas laikim tru em na litimapim nem bilong em! Devit i tok: “God, Bikpela bilong mi, yu bin mekim planti gutpela wok bilong helpim mipela. I no gat man i olsem yu. Yu winim ol tru. Sapos mi autim tok long ol man na tokim ol long wok na tingting bilong yu, olaman! Dispela i moa moa yet! Mi no inap kaunim ol samting yu bin mekim bilong helpim mipela.” (Song 40:5) Devit i no inap tingim olgeta gutpela samting Jehova i bin mekim, na yumi tu i no inap. Tasol taim yumi kisim save long sampela bikpela wok bilong em, yumi mas litimapim nem bilong em.
Ol Wok na Laik Bilong God
13. Olsem wanem ol bikpela wok bilong God i as na yumi inap wetim gutpela samting i kamap?
13 Samting yumi wetim i kamap bihain, as bilong dispela em ol bikpela wok God i bin mekim bilong kamapim dispela laik bilong em bilong i stap oltaim oltaim. Taim pasin bikhet i kamap long Iden, Jehova i mekim namba wan tok profet i as na ol man inap wetim gutpela samting i kamap bihain. Taim God i kolim strafe bilong snek, em i tok: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Taim Jehova i mekim bikpela wok na kamapim Bikpela Tait na rausim olgeta man nogut, em i kisim bek Noa wantaim famili bilong em, olsem na dispela tok promis long salim Pikinini bilong meri i kam, em i stap yet long bel bilong ol man i stap gut long God. (2 Pita 2:5) Ol tok profet Jehova i mekim long ol man bilong bilip olsem Abraham na Devit, ol i tokaut long sampela samting moa Jehova bai mekim long rot bilong dispela Pikinini.—Stat 22:15-18; 2 Samuel 7:12.
14. Wanem nambawan bikpela samting Jehova i mekim bilong helpim ol man?
14 Jehova em Man bilong mekim ol bikpela wok bilong helpim ol man, na dispela samting i kamap klia moa yet taim em i givim Pikinini bilong em, Jisas Krais—em dispela Pikinini em i bin tok promis long salim i kam—olsem ofa bilong baim bek ol man. (Jon 3:16; Aposel 2:29-36) Dispela ofa i opim rot na bai ol man i ken kamap wanbel gen wantaim God. (Matyu 20:28; Rom 5:11) Ol namba wan lain i kamap wanbel wantaim Jehova em i bringim ol i kam insait long kongrigesen Kristen em i kamapim long de Pentikos long yia 33 C.E. Spirit holi i helpim ol, na ol i autim gutnius long planti hap na helpim ol man long save olsem wanem i dai na kirap bek bilong Jisas i opim rot long ol man i bihainim tok i ken kisim ol blesing bilong i stap oltaim, aninit long Kingdom bilong God i stap long heven.
15. Jehova i bin mekim wanem gutpela samting long taim bilong yumi?
15 Long taim bilong yumi, Jehova i bin mekim gutpela wok bilong bungim ol laspela manmeri bilong lain Kristen em i makim ol. Em i tokim ol ensel ol i mas holimpas win bilong bagarapim ol samting i go inap long taim olgeta bilong lain 144,000 i kisim pinis mak. Dispela lain bai mekim wok king wantaim Krais long heven. (KTH 7:1-4; 20:6) Ol Kristen God i makim ol em i helpim ol long lusim kalabus long ‘Bikpela Babilon,’ em olgeta lotu giaman. (KTH 17:1-5) Lain remnan i lusim dispela kalabus long 1919 na i kam inap long nau God bin lukautim gut ol, na dispela i bin givim rot long ol long mekim wanem? Dispela i bin givim rot long ol long mekim laspela wok bilong autim tok taim Jehova i no kirap yet long pinisim ol pasin nogut bilong dispela graun bilong Satan long taim bilong “bikpela hevi tru,” klostu nau bai kamap.—Matyu 24:21; Daniel 12:3; KTH 7:14.
16. Wanem samting i kamap long dispela wok bilong nau long autim tok bilong Kingdom long olgeta hap?
16 Ol Witnes em Jehova i bin makim ol long spirit holi, ol i bin givim bel na go pas long autim tok bilong Kingdom long olgeta hap. Olsem na planti “arapela sipsip” i kirap lotuim Jehova na long nau dispela lain i wok long go bikpela. (Jon 10:16) Yumi amamas olsem rot i op yet long ol man i gat pasin daun i ken bung wantaim yumi long litimapim nem bilong Jehova. Ol man i bihainim singaut long “kam” ol inap abrusim bagarap long taim bilong bikpela hevi tru, na ol i gat rot long litimapim nem bilong Jehova long olgeta taim bihain.—KTH 22:17.
Planti Tausen i Wok Long Kam Insait Long Lotu i Tru
17. (a) Jehova i mekim wanem ol bikpela wok bilong helpim wok bilong autim tok? (b) Truim bilong Sekaraia 8:23 i kamap olsem wanem?
17 Long nau Jehova i save mekim ol bikpela wok bilong helpim wok bilong autim tok. (Mak 13:10) Long taim bilong yumi, em i bin ‘opim rot long mekim bikpela wok.’ (1 Korin 16:9) Olsem na nau yumi inap autim gutnius long planti hap em bipo ol birua bilong tok i tru i bin pasim dispela wok. Planti manmeri em bipo ol i stap tudak long ol samting bilong spirit, nau ol i bihainim dispela singaut bilong lotuim Jehova. Ol i wok long truim dispela tok profet: “Long dispela taim 10-pela man bilong ol longwe ples bai i kam holim wanpela Juda man na bai ol i tok olsem, ‘Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.’ ” (Sekaraia 8:23) “Yupela Juda” i makim ol Juda long spirit, em liklik hap lain Kristen long nau em God i bin makim ol. Namba 10 inap makim samting long graun em inap olgeta, olsem na “10-pela man” i makim “planti manmeri tru” ol i kam bung wantaim “Israel tru bilong God,” na ol i kamap “wanpela lain sipsip.” (KTH 7:9, 10; Galesia 6:16) Yumi amamas tru long lukim planti manmeri em ol i wok wantaim long lotuim God Jehova!
18, 19. Wanem samting i kamapim klia olsem Jehova i mekim gut long wok bilong autim tok?
18 Yumi amamas tru long lukim planti handet tausen manmeri ol i bihainim lotu i tru long ol kantri em bipo lotu giaman i bin bosim ol strong tumas na i luk olsem ol man i no ken kisim gutnius. Lukim yiabuk bilong ol Witnes Bilong Jehova bilong yia 2001, na lukim hamas kantri i gat 100,000 i go inap olsem 1,000,000 pablisa i autim tok bilong Kingdom. Dispela i kamapim long ples klia olsem Jehova i mekim gut long wok autim tok bilong Kingdom.—Sindaun 10:22.
19 Yumi lain bilong Jehova yumi litimapim nem bilong Papa bilong yumi long heven na tok tenkyu long em, long wanem, em i mekim na i stap bilong yumi i gat as tru bilong en, na wok bilong Jehova yumi mekim i gat bikpela pe tru bilong en, na i gat ol gutpela samting yumi ken wetim i kamap bihain. Yumi wetim olgeta samting bai kamap olsem God i tok promis long en, na yumi tingting strong long ‘stap klostu long em na larim em i laikim yumi na wetim laip bilong i stap gut oltaim oltaim.’ (Jut 20, 21) Yumi amamas tru long lukim bikpela lain i litimapim nem bilong God, nau ol inap olsem 6,000,000! Lain remnan wantaim ol arapela sipsip, olsem poroman bilong ol, ol i stap long 91,000 kongrigesen long 235 kantri. Yumi olgeta i kisim planti kaikai bilong spirit long rot bilong “wokboi i gat gutpela tingting.” (Matyu 24:45) Oganaisesen bilong God i wok long kamap strong moa na long gutpela pasin sori oganaisesen i save lukautim wok bilong Kingdom long rot bilong 110 brens-ofis bilong ol Witnes Bilong Jehova. Yumi tenkyu olsem Jehova i bin kirapim bel bilong ol manmeri bilong em long ‘givim ol nambawan samting bilong ol bilong givim biknem long em.’ (Sindaun 3:9, 10) Olsem na yumi inap mekim yet wok bilong autim tok long olgeta hap, na wokim ol faktori bilong prinim buk, haus Betel, haus misineri, Haus Kingdom, na Haus Kibung, taim i gat wok long mekim olsem.
20. Taim yumi tingim tingim ol bikpela wok Jehova i mekim, dispela i mas mekim wanem long yumi?
20 Yumi no inap kolim olgeta bikpela wok em Papa bilong yumi long heven i mekim. Tasol ating i no gat wanpela man i gat stretpela bel em inap surik long bung wantaim bikpela lain manmeri ol i save litimapim nem bilong God! Olsem na olgeta man i laikim tru God ol i mas amamas na singaut: “Litimapim nem bilong Bikpela! Yupela olgeta i stap long heven antap, litimapim nem bilong Bikpela! Yupela olgeta ensel, litimapim nem bilong em! . . . Na ol yangpela man na ol yangpela meri, na ol lapun na ol pikinini, yupela olgeta litimapim nem bilong Bikpela! Tru tumas, olgeta i mas litimapim nem bilong Bikpela. Biknem bilong em wanpela i winim tru biknem bilong olgeta manmeri. Biknem bilong en i antap tru, i winim heven na graun.” (Song 148:1, 2, 12, 13) Em nau, long nau na long olgeta taim bihain, yumi mas litimapim nem bilong Jehova long ol bikpela wok em i mekim!
Bai Yu Bekim Olsem Wanem?
• Kolim sampela wok bilong Jehova na i stret yumi litimapim nem bilong em.
• Wanem samting i mekim na bel i kirapim yu long litimapim nem bilong Jehova?
• Olsem wanem ol bikpela wok bilong God i as na yumi inap wetim gutpela samting i kamap?
• Jehova i mekim wanem ol bikpela wok bilong helpim wok bilong autim tok bilong Kingdom?
[Piksa long pes 10]
Yu save givim bel tru long mekim ol singsing i litimapim nem bilong Jehova?
[Ol Piksa long pes 13]
Yumi amamas rot i op yet long ol man i gat pasin daun i ken bung wantaim yumi long litimapim nem bilong Jehova