“Amamas Long Litimapim Nem Bilong God” Kibung—Olsem Wanem? Bai Yu Stap?

AMAMAS! Long dispela taim bilong planti hevi, ating dispela tok i olsem narapela kain tok long yau bilong yu, a? Tru tumas, ol nius i no kamapim planti samting yumi ken amamas long en. Ol lain i pait, i gat hangre long planti hap, no gat wok, graun na win na wara i bagarap, ol gavman i no gat strong moa, pasin raskol​—⁠ol dispela samting i no mekim bel bilong yumi i amamas, a?

Klostu olgeta manmeri long nau i wok long painim kain kain amamas bilong skin. Tasol ol i stap amamas tru? Insait bilong dispela tok amamas i olsem, ‘pasin bilong stap belgut tru.’ Planti manmeri i no save pilim dispela kain amamas, na sapos ol i pilim, em bilong sotpela taim tasol.

Tasol Baibel i makim taim bilong yumi na i tok profet olsem: ‘Mi God, Bikpela, mi tok olsem: “Ol lain bilong mi, ol bai i amamas. Bel bilong ol wokman bilong mi bai i pulap long amamas, na bai ol i singim ol song bilong amamas.” ’ (Aisaia 65:​13, 14) Olsem wanem dispela samting inap kamap?

Bilong yu ken save, mipela laik singautim yu long i kam long wanpela kibung distrik bilong ol Witnes Bilong Jehova bai kamap long 1995/1996. As tok bilong ol kibung em, “Amamas Long Litimapim Nem Bilong God”; olgeta man i laik harim tok i ken kam​—⁠no gat pe. Long program bilong dispela 3-pela de kibung bai i gat ol tok i kam long Baibel na ol soim na sampela samting moa. Olgeta tok bilong program bai kamapim dispela as tok bilong amamas.

Ol kibung bai kirap pastaim long Amerika long Jun, na bai kamap long ol biktaun long olgeta hap i go inap long kirap bilong 1996. Ating bai i gat wanpela i kamap long hap bilong yu. Gutpela sapos yu askim wanpela Witnes Bilong Jehova long hap bilong yu. Mipela i amamas long singautim yu i kam long dispela kibung.