Askim
Taim God i makim ol man bilong wanpela skin na wanpela lain tasol bilong bosim ol Kristen bilong pastaim—em olgeta i Juda tasol—yu ting dispela i makim olsem God i laikim wanpela lain tasol?
Nogat tru. Ol namba wan lain Jisas i singautim ol long kamap disaipel, olgeta i bilong lain Juda. Bihain, long de Pentikos long yia 33, ol namba wan lain God i makim ol long spirit holi bilong kamap king wantaim Krais long heven, ol i bilong lain Juda na bilong ol man bilong ol narapela lain ol i bihainim lotu bilong ol Juda. Bihain, God i mekim olsem long sampela Samaria na ol man bilong ol narapela lain ol i no katim skin. Em nau, long dispela as, lain bilong bosim ol Kristen bipo, em “ol aposel na ol hetman” long Jerusalem olsem Aposel 15:2 i tok, ol i bilong lain Juda. Ol dispela man i gat bikpela save moa long ol tok bilong Baibel na long lotu i tru, na longtaim pinis rot i bin op long ol long kamap strongpela elda Kristen.—Skelim wantaim Rom 3:1, 2.
Aposel sapta 15 i stori long wanpela bung bilong lain bilong bosim ol Kristen—long dispela taim i gat planti Kristen i bilong ol narapela lain. Ol i man bilong Afrika, na Yurop, na sampela narapela hap. Tasol i no gat wanpela tok long Baibel i makim olsem sampela bilong ol narapela lain i bin kam insait long lain bilong bosim ol Kristen na bai ol inap kirapim ol man i no Juda long laikim tru lotu Kristen, nogat. Tru, ol dispela nupela Kristen bilong ol narapela lain ol i gat wankain namba olsem ol narapela insait long “lain Israel tru bilong God,” tasol ating ol i tingim bikpela save bilong ol dispela strongpela Kristen Juda bilong longtaim, olsem ol aposel, em ol i insait long lain bilong bosim ol Kristen long dispela taim. (Galesia 6:16) Aposel 1:21, 22 i helpim yumi long save, ol dispela Kristen Juda ol i gat bikpela save.—Hibru 2:3; 2 Pita 1:18; 1 Jon 1:1-3.
Inap planti handet yia God i bin mekim bikpela wok long lain Israel, na Jisas i bin kisim ol aposel bilong em long dispela lain. Tasol em i no popaia o mekim pasin i no stret long wanem em i no makim wanpela aposel bilong ol dispela hap nau yumi kolim Saut Amerika, Afrika, Esia, nogat. Bihain liklik, ol man na meri bilong ol dispela hap bai ol inap kisim ol gutpela wok, winim ol wok ol inap kisim sapos ol i wanpela aposel long graun, o wanpela bilong dispela lain bilong bosim ol Kristen bipo, o wanpela i gat wok long bosim ol lain bilong God long nau.—Galesia 3:27-29.
Wanpela aposel i tok, “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Tru tumas, ofa bilong Krais inap helpim olgeta man, maski ol i bilong wanem lain. Ol man bilong mekim wok long Kingdom bilong heven na bikpela lain manmeri bilong kisim laip oltaim long graun, ol i man bilong olgeta lain na tok ples.
Planti man i save tingting kranki long ol man bilong ol narapela lain na skin na tok ples. Dispela samting i kamap ples klia long Aposel 6:1, em i stori long ol disaipel i save tok Grik ol i gat kros long ol disaipel i save tok Hibru, o tok Aram. Ating taim yumi go bikpela yumi bin kisim sampela tingting kranki long ol man bilong ol narapela lain na skin na tok ples, o long ol man o ol meri. Sapos olsem, yumi mas wok strong na larim tingting bilong God i bosim bel na tingting bilong yumi. Tingting bilong God i olsem: Yumi ol man yumi wankain tasol long ai bilong em, maski yumi gat wanem kain skin. Taim God i kolim ol mak ol elda na wokman i mas winim, em i no toktok long skin na lain bilong man, nogat. God i kolim ol mak bilong spirit ol dispela man i mas winim. Long nau tu, ol elda long kongrigesen, na ol wasman bilong raun, na ol brata i wok long brens-ofis, ol i mas winim ol mak wankain olsem dispela lain bilong bosim ol Kristen long bipo ol i bin winim.