Rausim Man—Em Pasin Sori?

BAIBEL i tok Jehova em i “God I Gat Olgeta Strong,” na “em i holi, em i holi, em i holi.” (KTH 4:⁠8) Olsem na Jehova em i As bilong ol lo i holi. Ol dispela lo i stap long “buk bilong God,” na ol Kristen i mas bihainim. Ol i mas klia long olgeta pasin i no stret long ai bilong Jehova.​—⁠2 Timoti 3:15; Aisaia 52:11.

Baibel i tok klia olsem: “God i singautim yupela pinis, em i holi . . . Olsem na yupela i mas givim yupela yet long God na stap holi long olgeta wokabaut bilong yupela. Buk bilong God i tok olsem, “Yupela i mas i stap holi . . . , long wanem, mi God bilong yupela, mi stap holi.” (1 Pita 1:​15, 16) Lotu Kristen i kamap 19 handet yia bipo, na kirap long dispela taim i kam inap long nau ol Kristen tru i bin wok strong long lukautim bilip na pasin bilong ol bambai kongrigesen i stap klin.​—⁠Jut 3.

Bilong Wanem Ol i Mas Lukautim?

Olgeta wokboi bilong God i gat hatwok long i stap klin long pasin na long bilip bilong ol. Bilong mekim olsem ol i mas sakim 3-pela strongpela birua​—⁠em Satan, na dispela graun em i bosim, na ol laik nogut bilong ol yet em sin i kamapim. (Rom 5:12; 2 Korin 2:11; 1 Jon 5:19) Dispela graun bilong Satan bai wok long pulim yu long bihainim pasin i no stret na pasin ol yet i save bihainim, na bai ol i givim rot long yu bilong kisim planti mani, na biknem, na namba, na bikpela wok, na strong bilong bosim ol narapela. Tasol ol manmeri i strong long bihainim lotu i tru, ol i save sakim olgeta samting Satan i laik givim long ol bambai ‘pasin bilong dispela graun i no ken mekim ol i kamap doti long ai bilong God.’ Bilong wanem ol i mekim olsem? Long wanem, ol i laik i stap insait long klinpela oganaisesen bilong Jehova em i save was long ol na lukautim ol.​—⁠Jems 1:27; 1 Jon 2:​15-17.

Yumi olgeta man i no strong na sapos traim bilong Satan i pundaunim wanpela Kristen, Jehova i wokim pinis rot bilong helpim em. Ol elda i strong long bihainim ol pasin bilong spirit ol i kisim wok bilong lukautim kongrigesen, na wok bilong helpim gut ol manmeri i bin mekim rong bambai ol i ken tanim bel na stretim pasin bilong ol na kamap strong gen. Sapos wanpela Kristen i kirap mekim pasin i no stret, long pasin isi ol i mas helpim em long tanim bel na stretim pasin bilong em.​—⁠Galesia 6:​1, 2; Jems 5:​13-16.

Rausim Man—Olsem Wanem Em Pasin Sori?

Ol wokboi bilong Jehova i baptais pinis na long laik bilong ol yet ol i bihainim pasin bilong sin na ol i no laik lusim pasin nogut na stretim pasin bilong ol, ol elda i ken save, ol i no tanim bel na i no stret ol i bung wantaim ol narapela Kristen. (Skelim wantaim 1 Jon 2:19.) Ol i no ken larim ol kain man olsem i stap insait long klinpela lain Kristen, nogut ol i bagarapim. Ol i mas rausim ol.

Wanpela pasin sampela skul i mekim long nau i kamapim klia olsem i stret kongrigesen i mas rausim ol man i save mekim ol pasin nogut. Long ol skul long nau pasin bilong pait na stil na bagarapim nabaut ol man em i kamap bikpela. Olsem na sampela skul i putim lo olsem: Ol bai “rausim olgeta” ol skulmanki i sutim man long naip o gan samting, o ol i tok long mekim. Wanpela nius (The Globe and Mail) bilong Toronto, long Kanada, i stori olsem. Ol i rausim ol dispela skulmanki bambai ol inap lukautim ol narapela skulmanki em ol i laik skul gut, na bai i no gat samting bilong bagarapim ol.

Pasin bilong kongrigesen long rausim man i mekim rong na em i no tanim bel, olsem wanem em pasin sori? Taim ol kongrigesen i mekim olsem, ol i kamapim klia olsem ol i laikim tumas Jehova na ol pasin bilong em. (Song 97:10) Na dispela pasin i helpim ol manmeri i wok long bihainim stretpela pasin, nogut ol i larim dispela man nogut i stap namel long ol na em i pulim ol long bihainim pasin i no stret. Na dispela pasin i gutpela, long wanem, em i lukautim kongrigesen bambai ol i ken i stap klin. (1 Korin 5:​1-13) Sapos wanpela man o meri i mekim pasin pamuk samting o em i no stap klin long spirit na ol i larim em i stap insait long kongrigesen, dispela bai mekim kongrigesen i kamap doti long ai bilong God Jehova, na bai ol i no inap mekim wok bilong em, long wanem, em i holi. Na tu, sapos ol i rausim dispela man nogut, ating dispela bai helpim em long pilim rong bilong em, na tanim bel, na stretim pasin bilong em bambai em i ken kam bek insait long kongrigesen.

Ol Samting Em i Mekim Long Ol Narapela

Taim wanpela long kongrigesen i mekim bikpela rong, olsem bagarapim marit, em i no mekim Jehova i belgut. (Sindaun 27:11) Kristen i mekim pasin pamuk em i no gat tingting wankain olsem Josep long taim meri bilong Potifar i laik pulim em long slip wantaim em. Josep i tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” (Stat 39:​6-12) Josep i tingim tru ol pasin i stret long ai bilong Jehova na em i ranawe long dispela traim. Tasol man i bagarapim marit, i olsem em i no laikim God inap long em i sakim laik nogut bilong bel i kirap.​—⁠Galesia 5:​19-21.

Man o meri i baptais pinis na em i brukim lo bilong God, em i no tingim pen na hevi em bai givim long ol famili bilong em ol i bilip. Bel bilong sampela bai bagarap stret. Wanpela meri Kristen i kisim save olsem pikinini man bilong em i bin mekim pasin pamuk, na em i bel hevi tru. Em i tok: “Ating wan wan brata sista tasol i pilim tru bikpela hevi mipela karim. . . . Bel bilong mipela i bagarap stret.” Pasin nogut man o meri i mekim inap bagarapim gutnem bilong famili olgeta. Ol famili i stap gut long Jehova, bai ol i bel hevi na ating bai ol i pilim olsem ol i gat hap asua long dispela rong. Olsem na pasin nogut bilong man i mekim rong i givim bikpela hevi tru long famili.

Sori na Helpim Famili

Taim wanpela long famili i raus long kongrigesen, famili bilong em long lain Kristen i mas save, dispela em i pasin sori na em i lukautim kongrigesen. Ol elda i wok strong tru long helpim man o meri i mekim rong, tasol sapos em i bikhet long God na em i no laik tanim bel, ol i mas lukautim kongrigesen na i no gat narapela rot​—⁠ol i mas bihainim tok bilong Baibel olsem: “Yupela i mas rausim dispela man nogut i stap namel long yupela.” (1 Korin 5:13) Wanpela Witnes i tok: “Yumi save rausim man, long wanem, yumi laik i stap gut long Jehova.”

Taim wanpela long famili i raus long kongrigesen, famili bilong em long lain Kristen i save pilim pen. Olsem na ol elda i mas givim bel long strongim ol long spirit. (1 Tesalonaika 5:14) Ol elda i ken beten bilong helpim ol na beten wantaim ol. Planti taim ol inap i go lukim ol dispela Kristen i stap gut long Jehova na toktok wantaim ol long sampela tok bilong Baibel bilong strongim ol. Ol wasman bilong lain sipsip i mas painim rot bilong toktok wantaim ol dispela gutpela brata sista paslain na bihain long ol miting bilong strongim ol long spirit. Na ol i ken wok wantaim ol long autim tok na dispela bai strongim bel bilong ol. (Rom 1:​11, 12) Ol wasman bilong kongrigesen i mas soim ol dispela gutpela wokboi bilong Jehova olsem ol i laikim ol na tingim ol.​—⁠1 Tesalonaika 2:​7, 8.

Rong bilong wanpela man i no as na ol narapela long kongrigesen i ken givim baksait long famili bilong em i stap gut long Jehova. God i givim baksait long Sol, em king nogut bilong Israel, tasol Devit i no larim dispela i pasim em long laikim tumas pikinini bilong Sol, em Jonatan. Devit na Jonatan i pas strong moa wantaim. (1 Samuel 15:​22, 23; 18:​1-3; 20:41) Olsem na olgeta insait long kongrigesen i mas mekim pasin sori long ol Kristen em wanpela long famili bilong ol i mekim rong long Jehova, na ol i mas sambai long ol.

Sapos ol i givim baksait long ol o mekim nogut long ol, ol i no mekim pasin sori! Ol famili i stap gut long God ol i laik tru bai ol narapela i strongim ol. Ating ol i hatwok long karim dispela hevi na ol i pilim olsem ol i no gat poroman. Olsem wanem? Yu inap telefon long ol na kamapim wanpela gutpela tok bilong Baibel long ol o stori long wanpela gutpela samting i bin kamap long wok bilong autim tok? Sapos rauspela man i holim telefon, tokim em tasol yu laik toktok wantaim dispela brata o sista Kristen. O yu ken singautim ol gutpela Kristen bilong dispela famili long i kam long wanpela bung long haus bilong yu o i kam kaikai wantaim yu. Sapos yu bungim ol long taim yu go long ol stua, yu ken toktok wantaim ol long ol gutpela samting. Yu mas save, maski wanpela long famili bilong ol em i raus, ol dispela gutpela Kristen i stap insait yet long klinpela oganaisesen bilong Jehova. Nogut ol i stap wanpis na bel hevi. Olsem na yu mas was gut bambai yu sori long ol na mekim gut long ol. Wok strong long “mekim gutpela pasin long ol arapela manmeri i bilip long Bikpela.”​—⁠Galesia 6:10.

Amamas Long Rot Jehova i Putim

Yumi mas tenkyu tru long Jehova, long wanem, em i save sori long olgeta wan wan insait long lain bilong em long olgeta hap, em ol i save lotu long em. Long rot bilong oganaisesen em i stretim rot bilong helpim yumi long wokabaut stret long ai bilong em na bihainim stretpela pasin. Sapos wanpela long famili i bikhet na bihainim pasin bilong sin na ol i mas rausim em long kongrigesen, i gat rot bilong kam bek sapos em i tanim bel tru. Tingim dispela stori:

Ol elda i bin wok long helpim wanpela meri yumi ken kolim Ana, tasol em i kirap long smok na dring na kisim drak. Em i no tanim bel na em i no stap moa long kongrigesen. Tasol i no longtaim na Ana i bel hevi long em i no inap poromanim moa ol gutpela manmeri i stap insait long klinpela oganaisesen bilong Jehova, na em i beten askim Jehova long helpim em. Em i tok, pastaim em i no bin pilim gutpela pasin bilong ol elda, em ol i laik tru long helpim ol sipsip i lusim rot. Ana i kirap gen long i go long ol miting, na dispela i kirapim em long tanim bel. Bihain ol i kisim em bek na em i stap gen insait long kongrigesen i save sori long lain bilong en na lukautim ol. Na Ana i bihainim gen ol pasin i stret long ai bilong Jehova. Em i tenkyu tru long ol elda long gutpela pasin sori ol i mekim long em na em i tok tu: “Ol buk na nius Kristen i bin mekim bikpela wok tru long helpim mi. Tru tumas, Jehova i save lukautim yumi.”

Yes, God i stretim rot bambai ol man i raus long kongrigesen na bihain ol i tanim bel ol i ken kam bek. Olsem yumi stori pinis, pasin bilong rausim man em pasin sori. Tasol gutpela sapos yumi abrusim dispela samting i kamapim bikpela bel hevi​—⁠yumi mas holimpas ol stretpela pasin bilong God holi bilong yumi! Oltaim yumi mas pilim tru blesing yumi kisim, em yumi inap litimapim nem bilong Jehova insait long klinpela oganaisesen bilong em i sori long yumi na lukautim yumi.

[Piksa long pes 26]

Yu mekim pasin sori long famili bilong rauspela man em ol i stap gut long God?