Baibel i Tok Wanem?

Pasin Bilong Rausim Man Em Samting Bilong Helpim Man?

PASIN bilong rausim man long misin i save kamapim kain kain tingting long planti man bilong lotu.a Klostu olgeta man i wanbel long tok ol misin i mas mekim sampela samting bilong stretim man. Tasol planti i ting pasin bilong rausim man em wanpela pasin bilong bipo bipo​—⁠wanpela hatpela pasin bilong stretim man, olsem ol i bin mekim long taim ol i kamapim kot bilong misin na bagarapim planti manmeri i no bihainim bilip bilong misin, o ol i bin raun painim ol masalaimeri na bagarapim ol.

Na narapela samting i save bosim tingting bilong ol man, em ol samting nogut bilong dispela graun. Olsem na maski man bilong lotu i mekim sin, klostu olgeta misin i larim em. Em nau, yumi no kirap nogut long tok bilong wanpela pris Episkopelian taim em i tok: “Rausim man em wanpela pasin bilong misin bilong bipo, tasol mipela i no bihainim dispela pasin long nau.”

Tasol ating planti man bai kirap nogut long save, pasin bilong rausim man em i bikpela samting long ol Witnes Bilong Jehova. Tru, i hatwok long rausim wanpela man, tasol em i wanpela gutpela pasin sori. Olsem wanem em i wanpela gutpela pasin sori?

Rausim Man i Helpim Nem Bilong God Long i Stap Gut

Jehova em i gutpela God holi. Em i no orait long man i tok em i lotuim God, tasol long laik bilong em yet em i mekim bikpela rong. Aposel Pita i tokim ol Kristen olsem: “Yupela i mas givim yupela yet long God na stap holi long olgeta wokabaut bilong yupela. Buk bilong God i tok olsem, ‘Yupela i mas i stap holi na bihainim gutpela stretpela pasin, long wanem, mi God bilong yupela, mi stap holi.’ ” (1 Pita 1:​15, 16) Em nau, pasin bilong rausim man em i bin mekim bikpela rong na em i no tanim bel, i save helpim nem holi bilong God long i stap gut; dispela pasin i makim olsem yumi givim bel long dispela nem.​—⁠Hibru 6:​10, NW.

Olsem wanem? Sapos bilip bilong wanpela Kristen i no strong na em i pundaun o em i mekim bikpela rong, wantu ol bai rausim em long kongrigesen? Nogat! Jehova i no man bilong hatpela pasin. Em i save tingim yumi na marimari long yumi. Em i no save lusim tingting olsem yumi ol manmeri i gat sin. (Song 103:14) Jehova i save “yumi olgeta man yumi bin mekim sin.” (Rom 3:23) Insait long kongrigesen yet God i wokim rot na ol man i bin pundaun o mekim bikpela rong, ol i ken kisim sampela tok bilong spirit bilong helpim ol. Long pasin sori na pasin isi ol wasman bilong kongrigesen inap helpim em long ‘stretim’ pasin bilong em. (Galesia 6:⁠1) Man i harim tok bilong Baibel na em i bel hevi long samting em i bin mekim na tanim bel, dispela man i bin lusim rot bilong pasin i stret em inap “orait gen” long ol samting bilong spirit.​—⁠Jems 5:​13-16.

Tasol olsem wanem sapos wanpela Kristen i baptais pinis em i mekim bikpela rong na maski ol wasman bilong kongrigesen i wok strong long helpim em, em i no tanim bel? Olsem wanem sapos em i strong long bihainim yet pasin nogut?

Rot Bilong Lukautim Kongrigesen

Baibel i save tokim ol Kristen olsem: “Sapos wanpela man yupela i save kolim brata . . . em i mekim pasin pamuk o em i mangal long ol samting bilong ol arapela man o em i lotu long ol giaman god o em i tok bilas o em i spak o em i stilim samting bilong narapela man, orait yupela i no ken i stap wantaim em. Nogat. Na tu, yupela i no ken kaikai wantaim kain man olsem.”​—⁠1 Korin 5:⁠11.

Olsem wanem? Dispela lo i strongpela lo tumas na i save daunim man? Tingim dispela samting: Sapos polis i kalabusim wanpela raskol em bel bilong em i strong pinis long mekim pasin nogut, yu ting dispela i hatpela pasin o ol i no gat sori? Nogat, a? I stret em i kalabus na ol man long ples i ken stap isi na sindaun gut. Taim em i stap kalabus i olsem ol i rausim em long ol man i save bihainim lo.

Wankain pasin i save kamap insait long kongrigesen Kristen. I stret ol i rausim man i mekim rong na em i no tanim bel. Bilong wanem i stret? Long wanem, kongrigesen i mas stap olsem gutpela ples. Nogut ol man i no laik lusim pasin pamuk na ol narapela kain pasin nogut i stap insait long en.

Aposel Pol i save, “wanpela man i mekim pasin i no stret, em inap bagarapim planti gutpela pasin,” olsem na em i tokim ol wanbilip bilong em olsem: “Yupela i mas rausim dispela man nogut i stap namel long yupela.” (Saveman 9:18; 1 Korin 5:13) Dispela samting i mas kamap bambai kain man olsem i no ken paulim tingting bilong ol narapela, o bagarapim gutpela pasin bilong ol, o bagarapim gutpela nem bilong kongrigesen.​—⁠Skelim wantaim 1 Timoti 3:⁠15.

Helpim Olgeta Wan Wan

Na pasin bilong rausim man i save helpim olgeta wan wan insait long kongrigesen. Yumi ken tok piksa olsem: Olsem wanem sapos yu slip na nau strongpela krai bilong hon bilong ka i kirapim yu. I hatwok long sakim kain krai olsem, a? Man! Bai yu kirap nogut tru, a? Olsem tasol taim wanpela man i raus long kongrigesen, dispela samting i mas kirapim olgeta wan wan insait long kongrigesen. Ol bai tingting planti. Ol i no inap lusim tingting long samting i bin kamap. Olsem wanem dispela samting i ken lukautim ol?

Wanpela Witnes i tok: “Pastaim mi kirap nogut taim mi harim long Haus Kingdom olsem ol i bin rausim wanpela man. Tasol bihain mi pilim tru dispela samting, olsem mi tu inap pundaun.” Olsem tok bilong dispela meri i kamapim, pasin bilong rausim man inap helpim ol narapela long tingim gut pasin ol i save mekim.​—⁠1 Korin 10:⁠12.

Yumi ken save yumi stap olsem wanem long ai bilong God sapos yumi askim yumi yet olsem: ‘I gat sampela samting mi save mekim na mi inap pundaun long ol samting bilong spirit?’ Long dispela rot yumi inap wok yet long ‘pret na guria na wok strong long kisim tru dispela presen God i makim bilong yumi.’​—⁠Filipai 2:⁠12.

Kam Bek Long God

Wanpela Kristen i bin raus na kam bek, em i tok: “Maski mi bel hevi taim ol i rausim mi, i stret ol i mas mekim olsem, na i helpim mi long i stap laip.” Dispela i kamapim narapela bikpela hap wok bilong rausim man. Em inap helpim ol man em pastaim ol i no laik tanim bel long stretim rot bilong ol long kam bek long God.

Aposel Pol i tok: “Bikpela i save stretim ol man em i laikim tumas.” (Hibru 12:⁠6) Na tru, “taim Papa i givim hevi long yumi bilong stretim yumi, yumi no save amamas. Nogat. Bel bilong yumi i pilim hevi tasol. Tasol taim em i stretim yumi pinis, yumi bai kisim gutpela pasin tru. Yumi bai mekim ol stretpela pasin, na bel bilong yumi bai i stap isi.”​—⁠Hibru 12:⁠11.

Dispela samting i bin painim Richard. Klostu tupela yia em i bin stap olsem rauspela man, tasol em i tanim bel na kirap gen long bihainim pasin i stret, na kongrigesen Kristen i kisim bek em. Taim em i tingting bek long samting i bin kamap long em, em i tok: “Mi save ol i mas rausim mi na i stret ol i mekim olsem. Samting ol i mekim long mi i bin helpim mi long save, pasin mi mekim i samting nogut na mi mas askim Jehova long lusim tingting long en.”

Taim kongrigesen i mas stretim wanpela, ating em i bel hevi. Tasol pasin daun bai helpim em long kisim dispela tok bilong stretim em, na sapos em i kisim stretpela tingting long en, em bai kisim planti gutpela samting.

Olsem na pasin bilong rausim man em i gutpela rot, long wanem, dispela pasin i save helpim nem bilong God long i stap gut, na i save lukautim kongrigesen na pasin nogut i no ken stap insait long en. Na tu, sapos kongrigesen i rausim man dispela i kamapim klia pasin sori, long wanem, dispela pasin inap kirapim em long ‘tanim bel, na bai God i rausim ol sin bilong em. Sapos em i mekim olsem, orait Bikpela bai i givim nupela strong long em.’​—⁠Aposel 3:​19, 20.

[Futnot]

[Piksa Kredit Lain long pes 26]

The New Testament: A Pictorial Archive from Nineteenth-Century Sources, by Don Rice/Dover Publications, Inc.