Sampela Tok i Kam Long Olgeta Hap
Stap Fri Long Mekim Lotu
Nius The Daily Yomiuri bilong Tokyo i tok, long Mas 8, 1996, Sprim-Kot bilong Japan i tok, wanpela koles (Municipal Industrial Technical College) long Kobe i bin brukim lo taim ol i rausim Kunihito Kobayashi, wanpela Witnes Bilong Jehova, long wanem, em i no laik insait long ol spot olsem judo, karate, kung-fu. Bikpela kot bilong Japan i sakim apil bilong koles, olsem na sapos bihain wankain hevi i kamap ating i no gat wok long go long kot. Kot i luksave olsem, bilip bilong dispela sumatin i “bikpela samting na i as tru” na em i no laik insait long ol kain spot olsem. Kot i tok, Kobayashi em i wanpela “gutpela sumatin” long skul, na skul inap makim narapela kain spot bilong em i ken insait long en olsem senis bilong ol spot em i no laik mekim.
Kaunim Buk—“Isi Isi Em i Bringim Yumi Long Indai”?
Long Itali wanpela lain (Association of Small Publishing Houses) i skelim pasin bilong ol man long Itali long kaunim buk na kisim save olsem: Long 1995 inap 80 pesen bilong ol man long Itali ol i “no bin opim wanpela buk, o sapos ol i bin opim buk, ol i no inap tingim nem bilong buk o husat man i bin raitim.” Wanpela nius bilong Rom (La Repubblica) i tok, ol samting ol Itali i save lukim, long televisen tu, dispela i bikpela samting long ol—ol samting bilong kaunim nogat. Samting ol i lukim long ai i bikpela samting long pasin, sindaun, na olgeta samting ol Itali i save mekim. Nius i tok moa: “Ol Itali i no man bilong kaunim buk na ol i no save ol i lus long wanpela gutpela samting.” Na lain i kisim save olsem planti Itali i ting man bilong kaunim buk “i no inap pas ‘gut’ wantaim narapela man,” na “bel bilong em i no inap kirap liklik.” Ol man i no save kaunim buk, “ol i ting taim i lus nating sapos ol i kaunim buk,” na ol buk i ‘samting bilong ol lapun tasol,’ o dispela pasin long kaunim buk bai “mekim na ‘isi isi em bai bringim yumi long indai.’ ”
Mi Laikim Binatang Plis!
Sapos yumi mas kaikai binatang bilong stretim sik bilong yumi, ating yumi no laik, a? Tasol sampela man i save mekim olsem. Nius Asiaweek i tok, dispela i no nupela tingting. Wanpela haus kaikai (Imperial Herbal Restaurant) long Singapo i save redim kaikai i gat anis na skopion long en. Ol i tok, tupela kain binatang i gutpela kaikai bilong helpim skin na stretim sik. Mama bilong haus kaikai em Misis Tee Eng Wang-Lee, na em i tok, anis i gutpela bilong helpim man i gat pen long skru bilong em. Na sapos bel bilong man i no stap isi o het i pen nogut tru, gip bilong skopion i gutpela bilong stretim dispela kain sik. Sampela narapela kain binatang ol i mekim wok long en olsem marasin bilong daunim pen, em ol liklik binatang i kain olsem bilong saksak em ol i drai pinis. Na wanpela kain samting olsem kiau bilong ol binatang ol i kolim sikada, i gutpela bilong helpim ol man i trautim win, kisim sua long maus o nus samting, o kisim sik misels. Na haus i drai pinis bilong binatang nogut ol i kolim honet, i gutpela bilong kilim ol snek samting long bel. Swit bilong ol dispela binatang i olsem wanem? Anis i pait liklik long maus olsem viniga, na yu mas wokim wokim maus taim yu kaikai skopion. Misis Wang-Lee i tok: “Bilong laikim dispela kain kaikai, ol man i mas traim inap planti taim.”
Abrusim Hevi Long Marasin Nogut
Wanpela nius (FDA Consumer) i tok, ol liklik pikinini inap kisim bagarap long haus bilong ol yet sapos ol i daunim liklik hap marasin i no bilong ol. Liklik pikinini i dringim marasin bilong stretim sik, o marasin bilong klinim haus, o bia samting, em inap sik o dai. Olsem na ol dispela samting i mas stap long wanpela hap em pikinini i no inap lukim na kisim. Ol dokta samting i tingting planti long pasin bilong givim planti tumas marasin ain na vaitamin long pikinini. Dokta George Rodgers bilong wanpela lain long Yunaitet Stets (Kentucky Regional Poisoning Center), em i tok: “Ol kampani i save wokim vaitamin bilong pikinini bilong luk olsem loli o wanpela samting bilong piksa komik, em nau, ol i ting dispela samting em i loli, ol i no ting em marasin.” Ol man i gat save long dispela samting i tok, sapos skin bilong pikinini i kamap narakain olsem ai bilong em i raun kranki samting, o em i laik slip tumas, o yu painim wanpela botol marasin i op i stap, kwiktaim ring long dokta o long wanpela lain i gat save long marasin nogut, na bihainim gut tok bilong ol.
Ol i Telefon Bilong Kisim Helpim
Nius The Globe and Mail i tok, olgeta de 4,000 yangpela i save telefon long wanpela lain long Kanada i gat wok long helpim ol yangpela i gat hevi. Telefon i no gat pe. Dispela i kamapim klia olsem ol yangpela i gat “bikpela hevi tru long nau, winim bilong bipo.” Dairekta bilong dispela lain i gat wok long givim helpim long ol yangpela, em Christine Simmons-Physick, em i tok: “Ol hevi long wok bisnis na mani long nau i save mekim na planti manmeri i no stap isi, na dispela bel hevi i save kalap long ol yangpela tu.” Long ol dispela 4,000 yangpela i save telefon, klostu 2,000 bilong ol i stori olsem ol i no stap wanbel wantaim narapela. Inap 78 pesen bilong ol yangpela i save telefon em ol yangpela meri, long wanem, ol yangpela meri i no sem long askim wanpela long helpim ol, planti manki i save sem. Ol yangpela i telefon, long wanem, ol i save wanpela man bai harim gut tok bilong ol. Planti papamama na ol narapela man i bikpela pinis, “ol i sakim tok bilong pikinini na ol i no harim hevi bilong em, long wanem, ol i ting hevi bai pinis bihain taim pikinini i go bikpela liklik. Sapos yumi gat dispela kain pasin long pikinini, yumi ken save, ol i no ken askim yumi gen long helpim ol.”
Pasin Nogut na Ol Yangpela Long Rasia
Nius The St. Petersburg Press i tok, long Sen Pitasbek, Rasia, “pasin nogut ol yangpela i save mekim i go moa nogut—ol i tingting pinis na bagarapim ol man nabaut.” Olsem: Long 1995 long wanpela skul long Sen Pitasbek, ol i pasim rop long han lek bilong wanpela skulmanki i gat 13 krismas, na paitim em i go i go inap long em i dai. Dispela i kamap bihain long em i pinisim tes bilong em long skul bilong yia 1995. Ol papamama na tisa i tingting planti long pasin nogut na bagarapim man i save kamap long ol skul, olsem na ol skul i kamapim wanpela kos bilong helpim ol pikinini long rot bilong lukautim ol yet long skul na wanpela i no ken bagarapim ol, na wanpela kos i bilong ol skulmeri na ol i ken lain long ol samting bilong mekim sapos wanpela bagarap i kamap. Na long kos bilong ol tisa, skul i tokaut long narapela samting olsem: Inap 25 pesen bilong ol yangpela meri i go long haiskul long Sen Pitasbek, ol i ting pasin bilong pamuk na kisim mani long en, em i kamap olsem pasin bilong ol Rasia. Na nius Populi, wanpela nius bilong wanpela lain bilong Yunaitet Nesen (United Nations Population Fund) i tok, long ol yangpela meri i gat 17 krismas o ol i no winim yet 17 krismas, pasin bilong rausim bel i bin go antap olsem dabol insait long 5-pela yia i go pinis.
Ol Bataplai Bilong Raun
Long olgeta mun Mas, ol traipela lain bataplai monak i save lusim Meksiko na brukim solwara. Ol i flai 800 kilomita antap long solwara i no gat wanpela ailan, na ol i kamap long wanpela liklik hap bilong nambis bilong Luisiana, Yunaitet Stets. Bihain ol i flai i go long hap not na sampela bilong ol i save kamap long Kanada. Long mun Oktoba bihain, namba 5 lain tumbuna pikinini bilong ol, ol i bihainim wankain rot na kamap long Meksiko. Kru bilong bataplai i liklik tru olsem het bilong pin. Olsem wanem ol i save ol i mas flai we? Ol man i no save. Wanpela nius (Enterprise-Record) bilong Siko, Kalifonia, i stori long tingting bilong saveman Gary Noel Ross. Em i ting wanpela kain strong olsem magnetism i save stiaim ol. Tasol wanpela askim yumi no save long bekim bilong en i olsem: Olsem wanem dispela save long rot i go bek long Meksiko i stap pinis long kru bilong namba 5 lain bilong ol dispela bataplai? Saveman Ross i tok: “Save bilong yumi i sot tru long painim as bilong dispela narapela kain pasin.”
Tok Lukaut Long Ol Nupela Klos
Nius Asiaweek i tok, long Frans, Inglan, na Tailan, ol i givim tok lukaut long wanpela kain marasin ol faktori i save mekim wok long en taim ol i wokim klos—em marasin nogut fomaldehaid. Ol i putim dispela marasin insait long pen bilong wokim kala bilong klos na pen i no ken bagarap. Planti klos i gat dispela kain marasin long pen bilong en, na ol i tok, skin na ai na wetlewa bilong man inap kisim sik long en. Nius i tok, sapos faktori bilong wokim klos i no gat win i kam insait gut na win i drai, ol man i wok long faktori ol inap kisim sik. Na ol man i baim nupela klos, ol i mas wasim paslain long ol i putim bilong abrusim sik.
Planti Man i Tok i No Gat God
Kadinal Joachim Meisner i tok, long Jemani “planti man i ting i no gat God.” Em i tok, ol komyunis i lus long ol samting bilong skin, tasol i olsem ol i win pinis long ol samting bilong tingting. Na em i tok: “I olsem dispela kain tingting long i no gat God em i kam long ol nupela provins [bipo ol i stap aninit long gavman Komyunis], na ol man long ol olpela provins [wes] i bihainim.” Wanpela nius (Weser Kurier) i tok, inap olsem 70 pesen bilong 16 milion manmeri em bipo ol i sindaun long hap ol i bin kolim Is Jemani, ol i no gat lotu. Nius i tok moa: “Sapos misin i no strong long kamapim tok tru em i bin kisim, orait em i lus tru.”