Sampela Tok i Kam Long Olgeta Hap
Bikpela Kot i Orait Long Wanpela Witnes Bilong Jehova
Long 1990 wanpela Witnes Bilong Jehova long Florida, Amerika, i lusim bikpela hap blut taim ol dokta i katim em na kamautim pikinini. Ol dokta i ting ol i mas givim blut long em, nogut em i dai. Meri Witnes i gat strongpela tingting na bilip, olsem na em i no orait long ol dokta i givim blut long em. Kwiktaim ol dokta i go long kot na kot i tok, sapos ol dokta i ting dispela meri i mas kisim blut bilong helpim em, maski meri i no laik, ol inap givim. Ol i tok, sapos meri i dai, ol pikinini i no gat mama bilong lukautim ol. Na Distrik Kot Bilong Apil Bilong Florida i wanbel long ol dokta i ken givim blut long meri Witnes. Tasol bihain Sprim-Kot Bilong Florida i harim kot na sakim tok bilong tupela kot. Sprim-Kot i tok, laik bilong sikman Witnes i antap long laik bilong ol dokta. Tasol sori tru, ol dokta i bin givim pinis blut long dispela meri Witnes. Sprim-Kot Bilong Florida i strong long tok, sikman inap sakim sampela samting dokta i laik givim long em na sikman inap mekim ol samting em i ting i stret long bilip bilong em.
Planti Man i Mekim Tok Spen
Wanpela nius long tok Spen (Cambio16 América) i tok, long nau planti manmeri i save mekim tok Spen, winim 330 milion. Taim yia 2000 i kirap, inap 35 milion manmeri i save mekim tok ples Spen bai sindaun long Amerika. Na long yia 2000, tok Spen bai kamap nambawan tok ples bilong ol man long hap bilong Wes, winim tok Inglis. Wanpela oganaisesen ol i kolim Instituto Cervantes, i save helpim planti man long lain long tok Spen, na dispela oganaisesen i kamapim ripot olsem: Long Amerika namel long yia 1986 na 1990 namba bilong ol man i lain long tok ples Spen i go bikpela olsem 70 pesen. Long Japan long wankain taim namba bilong ol man i lain long tok ples Spen i go bikpela olsem 80 pesen. Bilong wanem planti man i laik save long dispela tok ples? Dairekta bilong dispela oganaisesen (Instituto Cervantes) i tok, long nau planti man i save, long hap bilong Wes tok Spen i no wanpela tok ples nating, nogat; em i wanpela bikpela samting. Na narapela gutpela samting bilong tok ples Spen, em planti kantri i save mekim dispela tok ples.
Ol Man i Laikim Lombo i Gat Pait
Long nau planti man moa i save kaikai lombo i gat pait. Ol man i no save laikim lombo ol i tok, pait bilong lombo i save karamapim swit bilong kaikai. Tasol ol man i save laikim lombo i no wanbel long dispela tok. Nius Reader’s Digest i tok, wanpela buk i save stori long lombo na i tok, lombo i gat wanpela kain marasin long en i no gat smel, na taim man i kaikai, ol liklik samting tru olsem ol sel long maus bilong man i wok gut wantaim dispela marasin bilong lombo, olsem na em i helpim man long kisim gut swit bilong kaikai. Na sampela i tok, lombo i gutpela long skin na yumi no ken sik tumas. Wanpela bikpela lombo i no tan i gat planti vaitamin C long en, winim vaitamin C i stap long wanpela orens. Long Meksiko ol i gat wanpela lombo i gat bikpela pait, winim ol narapela. Ol i kolim dispela lombo habanero. Ol i tok, taim man i kaikai lombo habanero, em i pilim olsem het bilong em i lusim bodi na stap long narapela hap. Tasol maski olsem, ol i amamas long kaikai.
Ol Pikinini i Pamuk
Nau tasol ol i skelim sampela pikinini i save mekim gret 6 long ol komyuniti skul long Konektikat, Amerika. Long olgeta wan handet wan handet sumatin, 28 i save pamuk. Na long ol haiskul, 49 pesen bilong ol yangpela i mekim gret 8, na 60 pesen bilong ol yangpela i mekim gret 10, ol tu i save pamuk. Na sampela saveman i ting planti pikinini i save pamuk. Wanpela nius (USA Weekend) i kamapim tok bilong nambawan dokta bilong gavman long Amerika em i tok, bilong helpim ol yangpela meri na ol i no ken kisim bel, na bilong helpim planti yangpela na ol i no ken kisim sik AIDS, “ol skul i mas givim nating kondom long ol sumatin.” Inap 50 distrik i gat ol skul long en, ol i bin bihainim tok bilong nambawan dokta bilong gavman. Wanpela skul long Nu Heven, Konektikat, i save givim kondom long ol pikinini na sampela i gat 10-pela krismas tasol. Sampela man i no amamas long dispela samting na ol i tok, dispela kain pasin bilong givim kondom long ol pikinini i save kirapim ol long pamuk.
Ol Yangpela i Gat Hevi Long Dring
Nius Asahi Evening News i tok, ol i bin skelim 14,000 yangpela i save go long haiskul long Japan na ol i kisim save olsem: Long olgeta wan handet wan handet sumatin, winim 17 i gat hevi long dring. Planti bilong ol dispela yangpela em pikinini man. Ol i dring na bihain ol i kisim hevi long tingting na skin na sindaun bilong ol. Planti bilong ol dispela yangpela i tok, ol i dring, long wanem, dring i swit long maus bilong ol. Long olgeta 4-pela 4-pela sumatin, wanpela i tok em i dring na bai em i no ken pilim moa olsem em i no gat poroman o em i bel hevi. Dokta Kenji Suzuki i bin bosim wok bilong skelim ol dispela sumatin, em i tok: ‘Ol tisa na papamama i mas mekim sampela samting nau bilong helpim ol dispela yangpela. Ol i mas skulim gut pikinini long ol hevi dispela pasin bai kamapim.’ Long Japan gavman i tambuim ol manki long dring sapos ol i no winim 20 krismas.
Ol i No Tingim Skin
Wanpela nius (Süddeutsche Zeitung) i tok: ‘Long olgeta 10-pela 10-pela man i wok long ol ofis, winim 3-pela i no save tingim skin bilong ol.’ Nius i kamapim ripot bilong wanpela meri (Claudia Pohle) bilong Yunivesiti Rur long Bokum taim em i bin givim sampela askim long 343 man i wok long ol ofis. Em i bin askim ol, ol i save mekim wanem bilong lukautim skin, bel, tingting, na sindaun bilong ol. Winim 36 pesen bilong ol i tok, ol i no save tingim tumas skin bilong ol. Na klostu 20 pesen bilong ol i tingting liklik long mekim eksasais, na 20 pesen tasol i save ol i mas mekim wanem bilong lukautim skin bilong ol na ol i save mekim.
Ol i Bagarapim Pikinini
Wanpela nius bilong Brasil (O Estado de S. Paulo) i tok, ‘Long nau ol man i mekim pasin nogut long planti pikinini.’ Planti pikinini man na pikinini meri wantaim i save kisim nogut long wanpela man i paitim em samting. Tasol long olgeta wan handet wan handet pikinini em wanpela i mekim pasin sem long ol, 23 em pikinini man na 77 em pikinini meri. Na maski pikinini i liklik tru, em tu i karim hevi taim kros pait i kamap insait long famili. Wanpela meri (Miriam Mesquita) em i olsem wanpela profesa long Yunivesiti bilong Sau Paulo, em i tok: ‘Winim 30 pesen bilong ol pikinini i no winim yet 10-pela krismas, ol i bagarap long han bilong wanpela wanfamili.’ Long olgeta wan handet wan handet pikinini i dai, 29 i dai long wanem papa, o ankol, o brata, o nupela papa, i bin kilim ol i dai. Na paslain long ol i mekim olsem, ol i reipim pikinini. Nius O Estado de S. Paulo i tok, long 90 pesen bilong olgeta pikinini long Brasil em ol wanfamili i mekim nogut long ol, i no gat wanpela i toksave long polis long dispela samting ol i mekim nogut long pikinini.
Planti Man i Gat Patpela Skin
Dokta Robert Kushner em i dairekta bilong wanpela klinik (Nutrition and Weight Control) long Yunivesiti Sikago. Dispela dokta i tok: ‘I gat planti patpela man long Amerika, winim ol narapela kantri.’ Nius The Toronto Star i tok, ‘Long 1990 ol patpela man i winim 17 krismas, namba bilong ol i go antap olsem 28 pesen; long 1985 em 24 pesen tasol.’ Wanem as bilong dispela hevi? Ol saveman i skelim dispela samting na tok, ol man i kaikai planti, o ol i no eksasais, o skin i patpela, o ol i kisim patpela skin long papa o mama bilong ol. Wanpela meri bilong Nesenel Senta Bilong Helt Statistik, em Charlotte Schoenborn, em i tok: ‘Skin bilong planti man long nau i wok long go patpela tru, na em wanpela samting yumi mas tingim.’ Man i gat patpela skin inap kisim sik—mak bilong blut bilong em inap go antap, o em inap kisim sik daiabitis, o narapela bikpela sik. Tasol i hatwok long helpim ol man i gat patpela skin. Ol dokta i tok, man i gat patpela skin i mas senisim sampela pasin long sindaun bilong em. Nius The Toronto Star i tok: ‘Yumi no ken kaikai planti na yumi mas eksasais. Taim man i lusim skin, em i mas eksasais oltaim na skin i no ken go patpela gen.’
Ples Bilong Lainim Raskol
Wanpela loya bilong Brasil (Noely Manfredini D’Almeida) i tok: ‘Ol man i giamanim bel bilong ol yet sapos ol i ting planti kalabusman i man nogut taim ol i go kalabus. Planti kalabusman long Brasil ol i yangpela tasol na ol i rabis tru. Taim ol i yangpela yet ol i insait long pasin raskol.’ Polis i save kalabusim ol wantaim ol man i save tru long pasin raskol. Nius Veja i tok, ‘ol haus kalabus i save kamapim ol raskolman, wankain olsem haus faktori i save kamapim ol samting. Ol kalabusman i bin mekim ol liklik rong tasol, ol i lain moa long mekim sampela kain pasin nogut, long wanem, ol i kisim save long ol man i bin kalabus longtaim, em ol i man bilong mekim ol bikpela rong.’
Win na Kisim Bagarap Tu
I no longtaim i go pinis na ol manmeri bilong Kalombia i amamas tru, long wanem, tim bilong ol long pilai soka i winim mak bilong insait long 1994 Wol Kap. Nesenel tim bilong Kalombia i winim tim bilong Ajentina taim ol i kikim 5-pela gol. Ajentina i no kikim wanpela gol. Ol man na meri bilong Kalombia i pati nabaut long ol rot samting bilong kamapim bikpela amamas bilong ol. Tasol sampela samting i kamap bilong bagarapim amamas bilong ol. Wanpela ripot i tok, taim ol man i pati nabaut long ol rot, 70 man i dai. Na 900 manmeri i kisim bagarap taim ka i bam, o sampela i spak, o sampela i pait. Wanpela bikman i tok, tru planti i kisim bagarap, tasol ol i no tingting planti, long wanem, dispela kain samting i save kamap long kain taim olsem.