Wanpela Kain Kari i Kam Long Longwe Hap

WANPELA MAN LONG HANGARI I RAITIM DISPELA STORI BILONG KIRAP!

“MAN! Em gutpela kaikai tru! Yu putim wanem kain kari long en?” Ating bai yu tok olsem taim yu traim wanpela kaikai bilong ol Hangari ol i kolim gulas. Dispela kaikai i kisim swit bilong en long paprika, em wanpela kain kari ol i wokim long pikinini bilong wanpela kain liklik diwai lombo i no pait tumas, em ol i bin kisim i kam long Hangari long longwe hap tru.

Ol stori bilong bipo i kamapim olsem namba wan ples em dispela lombo i bin kamap long en, em Saut Amerika. Ol sospen graun ol i bin painim long ol matmat bilong ol Inka​—⁠ol i ting ol matmat i bilong planti tausen yia i go pinis​—⁠ol i bin bilasim ol dispela sospen long ol piksa bilong diwai lombo. Na ol i bin putim ol lombo wantaim ol narapela kaikai long matmat bilong ol Inka.

Sampela saveman i ting wanpela dokta i go long Amerika wantaim Kolambas, em i bin kisim pikinini bilong diwai lombo i go long Spen long yia 1493. Tasol maski dispela samting i bin kamap o nogat, Spen em i namba wan kantri long Yurop i kamapim planti lombo. Long Spen ol i kisim diwai lombo i go long Briten na long hap saut bilong Frans, em long dispela hap ol man i laik kamapim dispela lombo olsem plaua nating na i no bilong putim long kaikai o bilong kaikai! Bihain, ol bisnisman bilong Grik ol i kisim diwai lombo i go long ol kantri i stap klostu long Mediterenian na solwara Blaksi.

Diwai lombo i bin stap long Hangari kirap long yia 1550 samting. Wanpela nem ol i givim long dispela diwai em “lombo bilong Turki,” na ating dispela i makim olsem ol Turki i bin bringim lombo i kam long Hangari. Tasol maski em i kam long wanem hap tru, dispela retpela paprika bilong Hangari i gat gutpela swit bilong en, na em i wanpela kain kari em planti man long olgeta hap ol i save laikim.

Diwai lombo i save kamap gutpela long hap graun i stret na i gat wesan long en, na ol inap kisim planti lait bilong san. Long Ogas samting, ol fama i kirap stretim graun bilong planim lombo, bihain stret long ol i kisim lombo bilong yia i go pinis. Ol i planim sampela diwai lombo long rot bilong pikinini bilong en, na sampela taim ol i kamapim ol liklik diwai na bihain ol i planim ol. Ol liklik diwai lombo bilong planim i mas go bikpela long wanpela gutpela hap​—⁠olsem long wanpela neseri em win inap i go i kam long en. Long dispela hap ol i givim wara na marasin samting long ol, na rausim ol gras nogut. Paslain long ol i planim ol long gaden, ol i larim san na win i holim ol liklik diwai inap sampela aua long olgeta de.

Bihain long 6-pela i go inap 8-pela wik, em taim bilong planim ol liklik diwai long gaden. Long Hangari ol i mekim olsem long kirap bilong mun Me. Taim diwai i liklik yet ol i mas lukautim gut. Ol fama i mas putim wara long en na marasin bilong kilim ol binatang na kisim baira na brukim graun liklik sapos ol i laik kisim ol gutpela lombo.

Taim bilong kisim lombo i kirap long pinis bilong Ogas o long kirap bilong Septemba. Grinpela lombo bai kamap retpela taim em i mau pinis. Sapos ol lombo i no mau long wankain taim, ol i mas kisim ol long han na i no long masin. Maski ol i kisim ol lombo long wanem rot, planti samting bilong lombo bai senis paslain long yu mekim wok long en. Olsem: Taim ol i kisim pinis ol lombo, bikpela hap wara bilong en bai lus, na mak bilong suga na vaitamin C bilong en bai go daun.a

Taim ol i kisim pinis ol lombo, ol i mas larim ol i drai na mau gut. Wanpela pasin bilong bipo long mekim dispela samting em olsem: Ol i pasim ol lombo long rop na hangamapim. Tasol long nau, ol i save putim ol lombo insait long ol longpela bek i gat ol liklik liklik hul long en bambai win inap i go i kam long en. Ol i hangamapim ol dispela bek long hap ain samting o insait long haus bilong putim kunai. Taim ol i mau gut pinis, ol inap memeim ol lombo i kamap paura na wokim ol i kamap wanpela kain gutpela kari em long tok ples Hangari ol i kolim paprika.

Sampela paprika i pait liklik, long wanem, ol i gat wanpela kain marasin (capsaicin) long en. Ol i bin mekim wok long paprika olsem marasin bilong helpim man i gat sik long bel na pen long ol skru samting. Tru, paprika i gat gutpela swit bilong en​—⁠maski em i pait liklik o nogat​—⁠tasol i gat narapela gutpela samting bilong en tu. Taim yu putim liklik paprika long kaikai, kala bilong en i mekim na kaikai i luk naispela tru. Taim ol i putim paprika long kaikai bilong kakaruk, dispela i bin helpim ol kakaruk long kamapim ol kiau em kala bilong yelopela hap bilong en i strong moa!

Olsem wanem? Yu laik traim wanpela kaikai i gat paprika long en? Bihainim rot i stap daunbilo bilong kukim gulas. Olsem mipela ol Hangari i save tok, jó étvágyat!​—⁠kaikai gut!

[Futnot]

[Blok long pes 11]

GULAS BILONG HANGARI

1/4 kilo abus bilong bulmakau, katim i go liklik

1 bikpela spun wel

1 anian, katim i go liklik

2 hap bilong galik, memeim

2 bikpela spun paprika

2 liklik spun sol

1/4 liklik spun caraway (sapos yu laik)

2 poteto, wasim, rausim skin, na katim i go liklik

1 liklik grinpela kapsikam, klinim insait bilong en na katim i go liklik

2 liklik tomato, rausim skin na ol liklik pikinini bilong en, na katim i go liklik

100 gram nudol

Hatim wel long sospen na putim anian long en. Praim i go inap long anian i malumalum. Putim galik na paprika wantaim anian na tanim, putim liklik wara sapos anian samting i laik paia. Putim abus na sol long en, na tanim gut. Karamapim sospen long ai bilong en na larim kaikai i boil isi isi. Tanim kaikai sampela taim, na putim sampela wara sapos kaikai i laik paia. Putim caraway long kaikai sapos yu laik. Taim abus i tan, putim ol kapsikam, tomato, na 2-pela lita wara long kaikai. Larim kaikai i boil, putim ai long sospen, na larim kaikai i boil isi isi inap 15 minit. Putim ol poteto long kaikai, na larim kaikai i boil inap long taim ol poteto i tan (10 i go inap 15 minit). Putim liklik sol. Sutim kaikai wantaim ol nudol, em yu bin kukim ol long narapela sospen. Dispela kaikai em inap long 4-pela i go inap 6-pela man.