Kain Kain Kaikai i Save Amamasim Ol Meksiko

Wanpela man long Meksiko i raitim dispela stori bilong Kirap!

OLSEM WANEM? Yu laik traim wanpela kaikai bilong ol Meksiko? Sapos olsem, sindaun klostu long tebol i gat laplap i gat kain kain kala na harim switpela smel bilong ol kaikai i stap long en.

Klostu olgeta kantri i gat kain kain kaikai, tasol long Meksiko ol i gat planti moa. Sampela ol i kolim mole, na i gat kain kain sos bilong putim antap long kaikai na ol dispela sos i save pait long maus. Na i gat ol liklik kaikai olsem tostada, na ensilada, na sope, na kesadilia, na tilakoios, na ol dispela i bilong kirapim bel long laik long kaikai. Na tu, ol i gat ol pankek tako i swit moa. Na ol i gat planti kain mit ol i save tanim wantaim plaua wit na kari samting bilong mekim mit i swit. Na ol i save wokim kain kain kaikai long ol pis na kindam samting.

Olsem wanem? Yumi stori long ol dispela gutpela kaikai na ating maus bilong yu i wara, a? Orait, yumi ken stori long sampela gutpela kaikai bilong Meksiko em planti man i save long en.

Mole​—Kaikai Tru Bilong Meksiko

Dispela nem mole em i kam long tok ples Astek na insait bilong en i olsem “sos.” Mole em sos ol i save putim long kakaruk o rais na mekim kaikai i swit. Wanpela buk (Mexico’s Feasts of Life) i tok: ‘Kaikai mole i narapela narapela kain long olgeta provins na long olgeta liklik ples long Meksiko. Na olgeta man i save kukim mole ol i gat pasin bilong ol yet long kukim.’

Ol i wokim dispela sos long ol lombo, na tomato, na anian, na galip, na bret ol i bin kukim long paia, na klov na paura sinamon bilong mekim kaikai i swit, na wel, na sol na pepa. Na ol i save putim liklik sokolat bambai sos i no pait tumas na i no swit tumas. Olsem wanem? Yu laik mipela i putim liklik hap bilong dispela sos antap long kakaruk na rais bilong yu? Tasol was gut na putim liklik tasol, long wanem, maus na bel i mas lain long kaikai dispela sos.

Lombo i Gat Pait

Planti man i save laikim lombo i gat pait na ol i save putim sampela liklik kaikai insait long lombo na kukim olsem tasol. Long Meksiko ol i gat wanpela traipela lombo ol i kolim poblano. Ol i save kukim liklik taim long gris long praipan na dispela i save rausim skin na mekim lombo i malumalum. Bihain ol i rausim rop na pikinini insait long lombo. Nau ol i kisim mit ol i bin katkatim na tanim wantaim sampela galip na kari samting bilong mekim kaikai i swit, na ol i kukim long praipan. Bihain ol i pulapim dispela mit insait long lombo, na pasim maus bilong en long ol liklik stik olsem masis samting. Sampela taim ol i putim sis insait na putim lombo long plaua ol i bin tanim wantaim liklik susu o wara na nau ol i kukim long praipan. Ol i kaikai dispela lombo wantaim sos tomato. Ol i swit tru na ol man i laikim moa moa yet, olsem na ol i mas was gut taim ol i amamas long kaikai, nogut ol i daunim tu ol liklik stik i save pasim maus bilong lombo!

I gat narapela kain lombo ol i kolim sili en nogada. Ol i save tanim galip wantaim mit bilong bulmakau na pik, o sampela taim ol i katkatim sampela prut na tanim wantaim sayor, na putim dispela insait long lombo. Nau ol i kukim lombo, na bihain putim em long bokis ais bilong mekim i kol liklik. Taim ol i laik kaikai, ol i save kapsaitim strongpela susu ol i kolim krim i gat suga long en antap long lombo, na ol i putim sampela prut antap tu.

Wanpela Kaikai Meksiko Bilong Kirapim Bel Long Kaikai

Wanpela liklik kaikai bilong ol Meksiko bilong kirapim bel long laik tru long kaikai, em tortila wantaim planti kain kain sos i gat pait. Planti man i save long tortila. Planti tortila i no strong, ol i malumalum olsem pankek na ol i save wokim long plaua konmil. Ol i kukim antap long wanpela hap ain i hat tumas. Planti sos bilong kaikai wantaim tortila ol i wokim long grinpela lombo. Dispela lombo i longpela liklik na patpela. O ol i wokim long narapela lombo em i liklik na em i no patpela tumas. Long planti kantri ol man i save mekim wok long dispela tupela lombo i gat pait, long wanem, ol kampani i save putim insait long wara vinega na pulimapim long botol samting na salim i go long olgeta hap.

Wanpela sos ol man i laikim tumas em i no hatwok long wokim. Ol i mekim wok long lombo, na tomato, na anian em ol i no bin kukim. Ol i katkatim liklik liklik na putim sol long en. Sapos yu tanim dispela sos wantaim bata bilong diwai (avocado) yu bin paitim i kamap olsem bata, em i swit moa. Ol Meksiko i kolim dispela kaikai gwakamole, na sampela taim ol i save putim antap long kaikai olsem sos, o ol i putim wantaim liklik hap kaikai ol i pasim insait long wanpela pankek tortila. Na ol i save wokim grinpela sos long grinpela lombo, na retpela sos long retpela lombo.

Wanpela kaikai ol i kolim tostada, ol i wokim olsem: Ol i kukim tortila long praipan na em i kamap strong liklik, na ol i putim bin antap long en ol i bin kukim long praipan, na liklik hap kakaruk o mit, na anian, na wanpela sos. Kaikai sope i wankain liklik long tostada, tasol pankek (tortila) bilong sope i strong na em i liklik. Kaikai tilakoios ol i wokim long bikpela pankek (tortila) na insait long en ol i putim ol bin ol i kukim long praipan. Antap long tilakoios ol i save putim anian na sos. Kaikai ensilada i wankain liklik long ol tako. Ol i putim liklik kakaruk insait long en na pasim, na antap long en ol i putim sos mole na sis na anian. Sapos yu save laikim strongpela susu (krim), yu ken putim dispela antap long ol dispela kain kaikai sapos yu laik.

Olgeta man i save laikim kesadilia! Ol i kisim dispela nem long nambawan bikpela samting ol i save putim insait long en​—em sis. Tasol ol i save wokim kesadilia long kain kain samting​—pik, na wanpela talinga bilong kon, ol plaua bilong pamken, na mit bilong bulmakau ol i bin katkatim liklik liklik, na sosis pik, na planti samting moa. I gat kain kain pasin bilong wokim kaikai kesadilia, tasol ol man i save laikim tru dispela kaikai sapos ol i wokim taim ol i redim pankek tortila. Long wanpela hap bilong tortila ol i save putim sis na pasim. Nau ol i putim gris long hap ain i hat na kukim tortila antap long en. Ol i tanim long tupela hap bilong en bambai em inap tan gut. Taim ol i kaikai, ol i putim sos insait long en, na taim em i hat yet ol i save kaikai. Man! Em i swit moa!

Em Bilong Ol Man i No Pret

I gat sampela kaikai sampela Meksiko tasol i save kaikai! Olsem wanem? Yu laik kaikai palai wantaim sos mole? Em i swit moa. Olsem wanem? Yu laik kaikai ol retpela anis ol i bin kukim long praipan na wokim tako? Ol man i save tru long kaikai dispela samting ol i tok em i swit moa taim yu putim retpela o grinpela sos antap long en. Olsem wanem? Yu laik kaikai ol grasopa ol i bin kukim long praipan na nau ol i kamap retpela? I gat kain kain grasopa​—bikpela na liklik. Tasol dispela ol kaikai ol i wokim long palai na grasopa na anis i bilong ol Meksiko o man i save tru long traim ol narapela kain kaikai.

Yumi stori liklik tasol long ol kain kain kaikai bilong Meksiko. Yu mas painim liklik hap taim bilong lain long ol narapela kain kaikai bilong ol tu olsem​—tamale (plaua olsem pankek ol i wokim long kon na ol i putim mit insait, na ol i save kukim long skin bilong kon), na mikiote (mit na ol kari samting ol i tanim wantaim na kukim isi isi long skin bilong wanpela purpur), na sevike (pis na kindam samting ol i no bin kukim na ol i bin larim i stap liklik taim long wara bilong muli), na kain kain sup, na kain kain bin i gat kain kain kala.

Kam! Sindaun klostu long tebol! No ken tingting planti long ol lombo i gat pait. Klostu olgeta kaikai ol i redim, ol i no wokim long lombo, na long laik bilong yu yet yu ken putim sos i pait o nogat. Sampela ol Meksiko tu i no save laikim ol lombo i gat pait. Tasol mipela i amamas sapos yu stap na traim sampela kaikai bilong ol Meksiko mipela putim pinis long tebol!

[Piksa Kredit Lain long pes 25]

The Codex Nuttall/Zelia Nuttall/Dover Publications

[Ol Piksa long pes 25]

Antap long han kais: tako

Antap long han sut: lombo releno

Antap: tostada

[Ol Piksa long pes 26]

Gwakamole

Tilakoios

Ensilada de mole