Kam Lukim Wanpela Maket Bilong Ol Afrika
WANPELA gutpela rot bilong save long kalsa, pasin, na kaikai bilong wanpela kantri, em long rot bilong visitim wanpela maket bilong en. Long maket yu inap lukim ol asples, teistim kaikai bilong ol, na baim ol samting ol i salim. Na yu bai bungim ol kain kain man bilong salim ol samting em ol bai traim bes long toktok wantaim yu—maski yu gat wanem tokples.
Ol maket long Afrika ol i narakain tru. Planti manmeri i raun long maket na i gat kain kain samting bilong salim. Yu inap lukim stret pasin bilong ol long toktok, lap, na salim ol samting. Orait kam wantaim mi long wanpela maket hia long Douala, Kamarun.
Rot Bilong Ol Afrika Long Go Long Maket
Long planti bikpela biktaun long Afrika, motobaik em i gutpela rot long go long maket—pe bilong en i liklik tru na yu bai kamap long hap kwiktaim. Klostu long olgeta kona bilong rot, i gat ol motobaik i painim pasindia. Sapos yu no pret, yu ken askim ol long kisim yu. Long Kamarun i no gat narapela trenspot we pe i daun na i ron hariap olsem motobaik.
Sapos man i no laik raun long motobaik, i gat planti teksi i stap. Sampela taim planti pasindia bai tinpis long wanpela teksi na olgeta bai bungim mani wantaim long baim teksi.
Planti Liklik Haus Maket
Ating namba wan taim man i go long maket na lukim ples i pulap tru long planti manmeri na ol liklik haus maket, dispela inap pretim em liklik. Planti man na meri, na ol pikinini tu, ol i karim basket antap long het bilong ol. Insait long ol basket i gat ol kakaruk i stap laip yet, ol orens em ol i bin rausim skin, ol kain kain marasin, na planti narapela samting.
Ol gaden kaikai olsem kabis, karot, kukamba, egplan, pamken, bin, kaukau, tomato, yam, na letis i pulap antap long ol tebol em ol i wokim long diwai. Ol lain i kam long ol kantri ausait long Afrika ating ol i no luksave long sampela bilong ol dispela kaikai, long wanem, kantri bilong ol i no save groim kain kaikai olsem. Ol tebol i gat ol gutpela kala tru long en, winim ol narapela tebol, em ol tebol i salim retpela na yelopela kapsikam em nau tasol ol i bin kisim long gaden na taim san i holim ol i lait gut tru. Long planti narapela tebol i gat avokado, banana, grepfrut, melen, painapol, orens, na lemon. Ol i luk gutpela tru na pe i liklik! Na tu i gat ol yam, tapiok, na rais—em nambawan kaikai bilong ol asples—na ol anian na galik i kam long narapela kantri.
Long wanpela maket long Douala, planti papa bilong ol liklik haus maket ol i bilong lain Hausa na Fula. Pasin bilong ol long tok gude long tokples Fulfulde, na longpela klos bilong ol em ol i kolim gandouras o boubous, i blupela, waitpela, o yelopela, i pulim ai bilong ol man. Olgeta lain bilong maket i stap isi. Long dispela visit, papa bilong wanpela liklik haus maket i kisim 3-pela bikpela anian na givim long mi olsem presen. Em i tokim mi: “Tokim meri bilong yu long rausim insait bilong ol na pulapim long rais wantaim sampela spais na kukim isi isi.”
Long sampela narapela tebol, mipela i lukim ol mit bilong bulmakau na meme em nau tasol ol i bin kilim. Ol strongpela man i karim ol abus long sol na ol i tromoi antap long tebol. Ol man bilong katim mit ol i holim naip na ol i tokim ol kastama long makim wanem hap ol i laikim. Ol i salim tu ol meme, kakaruk, na pik i stap laip yet, em bilong ol kastama em ol yet i laik kilim.
Kam Kaikai Long Chophouse
Long ples maket i gat ples we ol man i kam sindaun na kaikai. Long Kamarun i gat ol liklik haus maket ol i kolim chophouse. Ol i save pilaim musik i pairap bikpela bilong pulim ol kastama i kam, tasol i gat ol hap tu we i no gat nois na ol man i ken sindaun na kisim sampela kaikai bilong Afrika na bungim ol asples. Ol i save raitim nem bilong ol kaikai long blakbot, na sapos man i no save long dispela kaikai, narapela bai toksave long em.
Tupela nambawan kaikai bilong ol, em rais na fufu em ol i wokim long tapiok, banana, o yam. Na i gat pis, mit bilong bulmakau, na kakaruk em ol i bin kukim long paia, na ol man i kaikai wantaim ol sos ol i bin wokim long okra, pinat bata, o tomato. Ol samting i stap isi na ol man inap stori gut wantaim.
Tupela weitres i karim ol kaikai i kam. Wanpela i karim bikpela trei i gat ol dis i pulap long rais i hat yet, na bin, na fufu. Ol i kisim i kam wantaim sos okra na liklik hap mit na pis. Na i gat sos bilong retpela lombo bilong ol man i laikim kaikai bilong ol i gat kik. Narapela weitres i bringim wanpela taul na dis i gat wara bilong wasim han. Mipela i mas wasim han, long wanem, ol asples i no save yusim naip na fok bilong kisim dispela kain kaikai, ol i save kaikai long han tasol. Taim ol kastama i laik kaikai, ol i save beten pastaim, na planti taim yu inap harim sampela i stap long narapela tebol i tok “Amen.”
Autim Gutnius Long Maket
Kirap long bipo yet, ples maket em ples we ol man i kam bung. Em hap we ol man inap kam na baim na salim ol samting, na tu stori long kain kain samting i kamap, bungim ol pren, na kisim wok mani tu. Baibel i tok Jisas i bin go long ples bung, we em i lainim ol man long God na oraitim ol sikman. Aposel Pol tu i bin i “go long ples bung na i toktok wantaim ol manmeri i kam i stap long dispela hap.” (Aposel 17:16, 17; Mak 6:56) Long nau tu, ol Witnes Bilong Jehova long Kamarun ol i luksave olsem ples maket em gutpela ples bung bilong autim gutnius bilong Kingdom Bilong God.—Wanpela man i salim dispela stori i kam.
[Piksa long pes 26]
Ol kala kala lombo