Mi Stap Amamas Maski Mi Paralais
Stori bilong José Godofredo Várguez
Taim mama i karim mi, mi gat gutpela skin na mi bin orait taim mi liklik. Taim mi gat 17 krismas, mi kirap mekim wok olsem wanpela welda. Tupela yia bihain mi wok long wanpela pletfom na weldim ol ain samting klostu long ol waia i gat bikpela pawa, na ren i kirap long pundaun. Wantu bikpela pawa i kisim mi na strong bilong en i tromoim mi i go daun long graun inap 14 mita, na mi hap indai. Orait tingting bilong mi i dai na bihain long tripela mun tingting bilong mi i kam bek. Mi inap muvim het bilong mi tasol. Han na lek bilong mi i paralais, na mi bel hevi tru!
PASTAIM mi bin belhat long God na mi askim em bilong wanem em i larim mi i stap laip. Na mi tingting long kilim i dai mi yet. Mi bin go long sampela lotu, tasol no gat wanpela bilong ol i givim mi bel isi o inapim laik bilong mi long kisim save long God. Na tu, ol dispela lotu i no kirapim ol man long bihainim ol tok bilong Baibel na ol lo bilong en! Taim mama bilong mi i dai long 1981, mi kirap dring alkohol na pilai laki. Mi ting olsem bodi bilong mi i bagarap, olsem na God bai sori long mi na fogivim mi long mi dring spak. Na tu, mi sindaun nating wantaim wanpela meri na mipela i no marit stret.
Mi Senisim Tru Tingting Bilong Mi
Taim mi gat 37 krismas, em namba wan taim mi bungim ol Witnes Bilong Jehova. Mama bilong mi i bin harim tingting kranki em ol man i gat long ol Witnes, na em i tok lotu bilong ol i nogut moa long olgeta narapela lotu. Maski i olsem, mi singautim ol i kam long haus bilong mi, long wanem, mi laik soim ol olsem ol tok bilong ol i no stret, na mi ting mi save gut moa long Baibel. Tasol mi kirap nogut long luksave olsem mi gat liklik save tasol long Baibel. Na tu, mi kirap nogut tru taim ol dispela Witnes i yusim Baibel bilong bekim olgeta askim bilong mi. I no longtaim na mi bilip tru olsem mi painim pinis tok i tru.
Sori tru, meri em mitupela i bin sindaun wantaim, em i no laikim nupela bilip bilong mi, olsem na mitupela i seperet. Mi wok long senisim ol pasin na tingting bilong mi na bai i stret wantaim ol tok Baibel i skulim mi long en. God i helpim mi na strongim bel na tingting bilong mi long karim hevi bilong ol bagarap em eksiden i bin kamapim long mi. Em i helpim mi tru, olsem na insait long 20 yia i go pinis, mi bin amamas long mekim wok olsem man bilong autim tok fultaim. Mi paralais, olsem na planti man i save ting olsem wanem mi inap mekim dispela wok na stap amamas. Mi no stap wanpis. Mi stap wantaim liklik brata bilong mi, Ubaldo, em i gat sik bilong tingting ol i kolim Down syndrome. Ubaldo tu i bin kisim tok i tru bilong Baibel na mitupela wantaim i mekim wok bilong Jehova.
Mitupela i wok gut wantaim, na narapela i tingim gut narapela. Taim mipela i go autim tok, Ubaldo i save pusim wilsia bilong mi na em i save paitim dua bilong ol haus, na taim mi toktok wantaim man bilong haus, em i save helpim mi long opim Baibel na soim ol buk na nius bilong Baibel long man bilong haus. Em i save helpim mi tu long waswas samting. Na mi save lukautim mitupela long sait bilong mani long rot bilong salim ol lipstik na krim samting. Na tu, ol bratasista insait long kongrigesen bilong ol Witnes Bilong Jehova em mipela i stap long en, ol i save helpim mipela long kukim kaikai, mekim ol wok bilong haus, na kisim mipela i go lukim dokta—em ol samting mitupela Ubaldo i tenkyu tru long en!
Insait long kongrigesen Kristen, mi mekim wok elda na ol brata insait long kongrigesen i save amamas long helpim mi long mekim wok painimaut long ol tok bilong Baibel. Mi save holim pensil long maus na makim ol bikpela tok bilong buk samting mipela i stadi long en.
Taim ol manmeri i askim mi olsem mi amamas o nogat, oltaim mi save tok yes! Bilong wanem bai mi bel hevi? I stap bilong mi i gat as bilong en, na mi wetim gutpela samting God i promis long givim long ol man i stap gut long em—em gutpela helt long Paradais em klostu nau bai kamap long graun.—Aisaia 35:5, 6; Luk 23:43.
[Piksa long pes 23]
José, taim em i gat 18 krismas, wanpela yia paslain long eksiden
[Piksa long pes 24]
Wanpela brata Witnes i tanim ol pes bilong Baibel taim mi mekim tok long Haus Kingdom
[Piksa long pes 24]
Mi wantaim brata bilong mi Ubaldo i save wok gut wantaim long mekim wok autim tok long Meksiko
[Piksa long pes 24]
Ol bratasista long kongrigesen i save helpim mipela long kukim kaikai na mekim ol haus wok