Amamas Long Kaikai Tako
Wanpela man long Meksiko i raitim dispela stori bilong Kirap!
TAKO em wanem samting? Long tok ples Spen em i makim planti samting, tasol long kantri Meksiko na Not Amerika em i makim kaikai. Wanem kain kaikai? Wanem kain swit bilong en?
Tako em i olsem sanwis, na skin bilong en ol i kolim totila, na ol i wokim long plaua bilong kon, na ol i no putim yis long plaua. Em i raunpela samting olsem plet. Ol i putim sampela abus samting insait long en na ol i pasim i kamap longpela olsem sosis, na sampela taim ol i praim. Ol i wokim totila long plaua bilong wit tu. Tako em nambawan kaikai bilong ol Meksiko.
Wanpela nius (El Universal) bilong Meksiko i tok, ‘Tako em gutpela kaikai, na em i bikpela samting bilong ol Meksiko.’ Tasol long nau pe bilong baim tako long haus kaikai em i go antap tumas, olsem na planti Meksiko i no inap baim. Tasol ol man bilong wok strong ol i ting ol i mas kaikai tako, em ol man bilong wok long brik, na long faktori, na ol man bilong wok gaden, na ol man bilong go antap long maunten. Ol i pilim olsem ol i no gat strong sapos ol i no kaikai tako. Taim sampela i laik kaikai, ol i putim tako long plet graun na hatim long paia, na nau em i swit moa!
Sapos yu no baim long stua—yu yet yu wokim, em i no bikpela mani tumas. Na insait long en yu ken putim ol bin, o sis, o poteto, o rais, o mit bilong pik o bilong kakaruk, o wanem narapela kain kaikai yu laikim. Na yu ken wokim kain kain tako, tasol maski yu wokim wanem kain, em i gutpela samting bilong kaikai.
Tako Ol i Save Laikim
Long poin bilong Yakatan ol i save kaikai wanpela kain kaikai ol i kolim kosinita pibil. Ol i kilim wanpela liklik pik, na klinim gut, na putim kari long en, na nau ol i kukim long paia, na taim ol i kaikai em i gat narapela kain swit bilong en i gutpela moa. Sapos ol i wokim tako long kosinita pibil olgeta Meksiko i save laikim tru.
Yu ken kaikai nating ol tako, o yu ken praim. Tako i gutpela moa sapos yu kukim long gris o wel i hat tru. Putim ol tako long wel liklik taim tasol, inap long ol i braunpela liklik, na rausim. Bihain putim hatpela sos long ol, olsem sos i pait na bai ol i swit moa!
Long Biktaun Meksiko ol man i save laikim tako ol i bin wokim long mit bilong bulmakau na ol i kukim mit stret long hap ain paia. Bilong wokim olsem, putim wara bilong muli long mit, na sampela pepa tu, na putim long paia. Nau putim sampela anian long ain, na taim wara i kamap antap long mit putim sol long en, na nau tanim. Hatim tupela totila, na taim mit i tan putim namel long tupela totila, na kapsaitim sos i go long en, na kaikai wantaim anian, na bai yu amamas long en.
Na i gat narapela kain tako ol i wokim long mit bilong pik, ol i kolim kanitas. Bilong wokim tako kanitas ol i save katim mit i go liklik liklik, na ol i praim long gris bilong dispela mit yet. Ol i putim wanpela kain sol i go long en ol i kolim sal-tierra, na nau mit i kamap retpela. Na ol i save wokim tu long mit bilong sipsip. Ol i save kaikai ol dispela kain tako long taim ol i piknik. I gat 18 milion man long Biktaun Meksiko, na i gat planti maunten nabaut na ol liklik taun i stap long en, na long Sarere Sande ol famili bilong Biktaun Meksiko i save go piknik long maunten, na ol i baim mit, na totila, na sis, na samting bilong gaden ol i kolim nopeles, na kumu warakares, na ol i wokim tako bilong ol bilong kaikai long taim ol i piknik. Na sos ol i putim long en ol i wokim long wanpela kain kari ol i kolim korianda. Na bilong kaikai bihain long en, em ol i kaikai banana o painap samting.
Sapos yu laik kisim kwik wanpela kaikai, tingim tako bilong ol Meksiko, yu ken redim hariap. Orait, olsem wanem long wanpela tako? Yu laikim wanpela? Bai yu amamas long kaikai!