Stori Bilong Wanpela Man
Givim Bel Olgeta Long Mekim Wok Maski i Gat Ol Traim
STORI BILONG RODOLFO LOZANO
Mama i karim mi long Septemba 17, 1917, long taun Gomes Palasio, Durango Provins, long Meksiko. Pait ol Meksiko i mekim bilong daunim gavman i kamap strong long dispela taim. Maski dispela pait i pinis long 1920, inap planti yia bihain i gat ol hevi i kamap long hap mipela i stap long en na dispela i givim hatwok long mipela.
WANPELA taim, mama bilong mi i kisim save olsem ol soldia bilong lain i bikhet long gavman bai pait wantaim ami bilong gavman, olsem na inap sampela de em i no larim mi wantaim 3-pela brata na 2-pela susa bilong mi i lusim haus. Mipela i no gat planti kaikai, na mi tingim yet taim mi na liklik susa bilong mi i bin hait aninit long bet. Bihain long dispela hevi, mama i kisim mipela ol pikinini i go sindaun long Yunaitet Stets na bihain papa i kam bungim mipela long dispela hap.
Mipela i kamkamap long Kalifonia long 1926, paslain liklik long taim bilong bikpela hevi bilong mani i kamap long Yunaitet Stets. Bilong painim wok mipela i save go sindaun long ol narapela narapela hap olsem San Wakin Veli, Santa Klara, Salinas, na King Siti. Mipela i lain long planim ol kain kain prut na kumu sayor samting na kisim long taim ol i redi pinis. Tru, taim mi stap yangpela yet em i taim bilong mekim ol strongpela wok, tasol mi stap amamas.
Painim Tok i Tru Bilong Baibel
Long Mas 1928, wanpela Sumatin Bilong Baibel, em nem bilong ol Witnes Bilong Jehova long dispela taim, i bin kam lukim mipela. Em i wanpela lapun man i save mekim tok ples Spen, nem bilong em Esteban Rivera. Nem bilong buklet em i lusim wantaim mipela em “Ol Man i Dai Pinis Ol i Stap We?” Mi kirap nogut long nem bilong buklet wantaim ol tok i stap insait long en. Maski mi manki yet, mi wok long stadi long Baibel na bung wantaim ol Sumatin Bilong Baibel. Bihain mama wantaim susa bilong mi, nem bilong em Aurora, ol i kamap meri bilong wok strong long litimapim nem bilong Jehova.
Long 1935 samting, ol i wokim wanpela Haus Kingdom long San Hose bilong kongrigesen bilong tok Inglis. Planti man bilong mekim tok Spen i save wok long ol fam long dispela hap, olsem na mipela i kirap autim tok long ol na mekim Stadi Wastaua. Ol Witnes i mekim tok Spen em ol i stap 80 kilomita longwe long mipela long San Fransisko, ol i givim helpim long mipela. I no longtaim na 60 manmeri i save bung long ol miting mipela mekim long tok Spen long Haus Kingdom bilong San Hose.
Bihain, long Februeri 28, 1940, mi kisim baptais long wara long wanpela kibung long San Hose bilong makim olsem mi dediket pinis long Jehova. Long yia bihain ol i makim mi long mekim wok painia, olsem wanpela Witnes i mekim wok autim tok long olgeta de. Na bihain long Epril 1943, ol i askim mi long go sindaun long taun Stoktan, em i wanpela taun i stap longwe olsem 130 kilomita, na ol i laik bai mi kirapim wanpela kongrigesen long tok ples Spen. Long dispela taim mi mekim wok olsem wasman siaman long kongrigesen tok Inglis long San Hose, na tu mi save lukautim ol Witnes i mekim tok ples Spen long dispela hap. Mi stretim rot bambai sampela narapela brata inap lukautim ol dispela wok, na bihain mi go sindaun long Stoktan.
Traim i Painim Mi
Kirap long 1940, ol lain i save makim husat bai go insait long ami ol i wok long singautim mi planti taim, tasol long olgeta taim ol i save daun long tingting bilong mi olsem bel bilong mi i no orait long mi insait long pait. Long Disemba 1941, taim Yunaitet Stets i go insait pinis long Namba Tu Pait, lain bilong makim husat bai go insait long ami i strong moa long mi mas i go. Orait bihain, long 1944, ol i kalabusim mi. Taim mi wetim kot long makim strafe mi bai kisim, ol i kalabusim mi long wanpela rum wantaim ol raskol. Planti raskol, taim ol i kisim save olsem mi wanpela Witnes Bilong Jehova, ol i askim mi olsem God bai ting olsem wanem long rong ol i bin mekim.
Sampela Witnes long San Hose i baim kot bilong mi bambai mi ken lusim kalabus na wetim kot. Wanpela loya long Los Enjeles i save helpim ol man i gat kain kot wantaim gavman olsem mi, i tok em bai helpim mi na mi no gat wok long baim em. Jas i tok mi inap lusim kalabus sapos mi lusim wok painia na kisim wanpela wok mani, na long olgeta mun mi mas i go ripot long ol man bilong gavman long mi stap olsem wanem. Mi tok nogat long dispela, olsem na jas i tok mi mas kalabus tupela yia long MekNil Ailan haus kalabus long Provins Wosington. Long dispela hap mi lusim bikpela hap taim bilong stadi gut long Baibel. Na tu, mi lain long paitim taipraita. Taim tupela yia i no pinis yet ol i larim mi i lusim kalabus, long wanem, mi save bihainim gutpela pasin insait long haus kalabus. Kwiktaim mi stretim rot bilong mekim yet wok painia.
Mekim Bikpela Wok Moa
Long 1947 long taim bilong kol, ol i makim mi wantaim narapela painia long mekim wok namel long ol man i mekim tok Spen long taun Kolorado Siti, Teksas. Tasol dispela hap i kol nogut tru, olsem na mipela i go long San Antonio, long wanem, em i no kol tumas. Tasol long dispela hap i gat ren long olgeta taim na dispela i bagarapim wok autim bilong mipela. Mani bilong mipela i pinis. Na inap sampela wik mipela kaikai ol sanwis mipela wokim long kabis i no tan na ti mipela wokim long gras alfalfa. Poroman bilong mi i go bek long as ples, tasol mi stap yet. Taim ol Witnes i mekim tok Inglis i kisim save olsem mi stap rabis tru, ol i kirap long helpim mi.
Taim bilong kol i pinis, na mi go bek long ples wok bilong mi long Kolorado Siti, na bihain i gat wanpela kongrigesen long tok Spen i kamap. Bihain mi go sindaun long Switwara, Teksas, na mi helpim ol long kamapim narapela kongrigesen long tok Spen. Taim mi stap long Switwara, mi kisim wanpela pas i singautim mi long go long klas namba 15 bilong Wastaua Baibel Skul Bilong Gileat, em bilong skulim ol man long mekim wok misineri, na em i kirap long Februeri 22, 1950. Mipela mekim gretuesen long kibung intenesenel long Yanki Stediam long Nu Yok Siti, na bihain long en mi stap 3-pela mun moa long hetkota bilong ol Witnes Bilong Jehova long Bruklin. Long dispela hap mi kisim skul long wok mi bai mekim long brens-ofis bilong Meksiko.
Wok Long Meksiko
Mi kamap long Meksiko Siti long Oktoba 20, 1950. Klostu tupela wik bihain ol i makim mi long kamap wasman bilong brens-ofis, na mi mekim dispela wok inap fopela yia hap. Ol save mi kisim taim mi bin wok painia, stap long kalabus, long Skul Gileat, na long Bruklin i bin helpim mi tru. Taim mi kamap long Meksiko, kwiktaim mi luksave olsem i gat wok long helpim ol brata sista long kamap strong long ol samting bilong spirit. I gat bikpela wok tru long helpim ol brata long bihainim stretpela pasin bilong marit em Baibel i kamapim.
Long ol kantri bilong Latin-Amerika, em Meksiko i wanpela bilong ol, em pasin bilong man na meri long sindaun wantaim maski ol i no marit stret. Ol lotu bilong Kristendom, na moa yet long Misin Katolik, ol i larim ol man i bihainim dispela pasin i no stret wantaim tok bilong Baibel. (Hibru 13:4) Olsem na sampela i bin kam insait long ol kongrigesen bilong ol Witnes Bilong Jehova, tasol marit bilong ol i no stret. Nau ol i givim 6-pela mun long ol dispela lain long stretim marit bilong ol. Sapos ol i no stretim insait long 6-pela mun, bai ol i no inap i stap Witnes Bilong Jehova.
Planti ol i no hatwok long stretim sindaun bilong ol. Ol i mas stretim marit long gavman na em tasol. Tasol sampela i gat bikpela hatwok. Hevi bilong ol i olsem: Sampela i bin marit 2-pela o 3-pela taim, na ol i no bin bihainim lo bilong gavman bilong katim marit. Taim marit bilong lain bilong Jehova i stret wantaim Tok Bilong God, ol kongrigesen i kirap kisim planti blesing bilong spirit.—1 Korin 6:9-11.
Long Meksiko long dispela taim ol man i no save kisim planti skul. Paslain long mi kam long 1950, brens-ofis i bin kirapim skul long ol kongrigesen bilong lain long rit na rait. Orait mipela i stretim gut ol dispela klas na rejistaim wantaim gavman. Kirap long 1946 na i kam inap long nau, long rot bilong ol klas ol Witnes i lukautim, winim 143,000 manmeri long Meksiko ol i kisim save long rit na rait!
Ol lo bilong Meksiko i save strong long pasim ol samting bilong lotu. Inap sampela yia pinis, i gat sampela bikpela senis i bin kamap long dispela samting. Long 1992 gavman i kamapim nupela lo long ol samting bilong lotu, olsem na long 1993 ol Witnes Bilong Jehova long Meksiko i rejista olsem wanpela oganaisesen bilong lotu.
Ol dispela senis i givim bikpela amamas long mi, em ol samting mi no ting em inap kamap long sampela yia i go pinis. Inap planti yia mi bin go long ol ofis bilong gavman planti taim na ol man mi lukim ol i no bilip tumas long yumi ol Witnes. Tasol gutpela tru Dipatmen Bilong Lo long brens-ofis i bin wok long stretim ol dispela samting, olsem na i no gat planti samting i wok long pasim wok autim tok.
Mekim Wok Wantaim Poroman Misineri
Taim mi kamap long Meksiko i gat planti misineri, em ol i winim pinis Skul Gileat, ol i stap pinis. Wanpela bilong ol em Esther Vartanian, em bilong Amenia na em i bin kirap painia long Valeho, Kalifonia long 1942. Mitupela i marit long Julai 30, 1955, na bihain mipela i wok yet long Meksiko. Mitupela i sindaun long brens-ofis; mi wok yet long brens-ofis na Esther i mekim wok misineri long Meksiko Siti.
Long 1947, Esther i kirap mekim namba wan wok misineri bilong em long Montere, Nuevo Leon, Meksiko. Long dispela taim taun Montere i gat wanpela kongrigesen i gat 40 pablisa long en, tasol taim em i lusim dispela hap na i go sindaun long Meksiko Siti long 1950, Montere i gat 4-pela kongrigesen. Nau long brens-ofis i gat tupela yangpela brata, em ol i tumbuna pikinini bilong tupela famili em Esther i bin stadi wantaim ol taim em i stap long Montere.
Long 1950 ol misineri i stap long Meksiko Siti i save autim tok long klostu olgeta hap bilong en. Long hap bilong ol long mekim wok ol i raun long lek na ol bas i olpela tru na planti manmeri i pas pas long ol bas. Taim mi kam sindaun long dispela hap long pinis bilong 1950 i gat 7-pela kongrigesen i stap. Nau i gat 1,600 kongrigesen na winim 90,000 pablisa long Meksiko Siti, na long yia i go pinis, winim 250,000 manmeri i bin bung long Memorial bilong tingim i dai bilong Krais! Long ol dispela yia mitupela Esther i bin amamas long wok wantaim planti bilong ol dispela kongrigesen.
Taim mitupela Esther i kirapim wanpela Baibel-stadi, mitupela i wok strong long kirapim papa bilong famili long laikim na insait long stadi bambai famili olgeta i ken insait long stadi. Long dispela rot mipela i lukim planti bikpela famili ol i kirap mekim wok bilong Jehova. Mi bilip olsem wanpela as na planti manmeri i hariap i kam insait long tok i tru long Meksiko em i olsem, long planti famili olgeta i wanbel na kam insait long tok i tru.
Jehova i Bin Mekim Gut Long Wok
Kirap long 1950 na i kam inap long nau, wok long Meksiko i bin kamap gutpela tru, olsem namba bilong ol Witnes i go antap na ol senis i kamap long oganaisesen. Mi amamas tru olsem mi bin helpim liklik dispela wok long i go bikpela, na long wok wantaim wanpela lain i gat pasin bilong mekim gut long ol narapela na amamas.
Sampela yia i go pinis Karl Klein, em wanpela bilong Lain Bilong Bosim Ol Witnes, na meri bilong em Margaret, ol i bin kam lukim mipela long taim bilong malolo bilong ol. Brata Klein i laik pilim tingting bilong ol brata sista long wok ol i mekim, olsem na em wantaim Margaret ol i kam bung wantaim Kongrigesen San Wan Tesontla, i stap klostu long Meksiko Siti, em kongrigesen mi na meri bilong mi i save go long en. Haus Kingdom bilong mipela i liklik, braitpela bilong en i olsem 4.5 mita na longpela bilong en i olsem 5.5 mita. Taim mipela i kamap long Haus Kingdom, klostu 70 ol i stap pinis, na i gat liklik spes tasol i stap. Ol lapun i sindaun long ol sia, ol yangpela i sindaun long ol fom, na ol liklik pikinini i sindaun long ol blok simen o long plua.
Brata Klein em i pilim tru gutpela pasin olgeta pikinini i mekim: Olgeta i holim Baibel bilong ol yet i redi i stap na ol i wok long painim ol skripsa em brata bilong mekim tok i kolim. Bihain long pablik-tok, Brata Klein i stori long Matyu 13:19-23 na em i tok, long Meksiko i gat planti bilong dispela “gutpela graun” Jisas i stori long en. Long nau, 7-pela bilong ol dispela pikinini i bin stap long dispela miting ol i wok long helpim ol lain ol i wok long skruim brens-ofis i go bikpela klostu long Meksiko Siti. Na wanpela i wok long Betel na sampela moa ol i mekim wok painia!
Taim mi kam nupela long Meksiko Siti, i gat 11-pela tasol i wok long brens-ofis. Nau i gat 1,350 ol i stap, klostu 250 bilong ol i stap bilong wokim ol nupela haus bilong brens-ofis. Taim ol i pinisim dispela wok, ating long yia 2002, mipela inap singautim 1,200 brata moa long kam na mekim wok. Tingim: Long 1950 namba bilong ol pablisa i no winim 7,000 long kantri olgeta, tasol long nau namba i winim 500,000! Amamas i stap long bel bilong mi i pulap na i kapsait taim mi lukim ol gutpela samting Jehova i bin mekim bilong blesim wok ol brata bilong yumi long Meksiko, em ol i gat pasin daun, ol i mekim bilong litimapim nem bilong em.
Wanpela Bikpela Hevi
Wanpela bikpela hevi bilong mi long nau em sik i save painim mi. Klostu long olgeta taim bipo skin bilong mi i save stap strong, no gat sik. Tasol long Novemba 1988 mi kisim sik strok na dispela i bin givim hatwok long mi. Mi tenkyu long Jehova, long wanem, long rot bilong sampela kain eksasais samting mi kamap orait liklik, tasol sampela hap bodi bilong mi i no save wok gutpela tumas. Mi save go yet long dokta na kisim marasin samting i save helpim mi long abrusim het i pen na sampela narapela hevi i stap yet long bodi bilong mi, em sik strok i bin kamapim.
Mi no inap mekim ol samting mi gat laik long mekim, tasol bel na tingting bilong mi i stap isi, long wanem, mi bin helpim planti manmeri long kisim save long ol samting Jehova bai mekim na ol i kamap ol wokboi i dediket pinis long em. Na tu, mi save amamas long toktok wantaim planti brata sista Kristen taim ol i kam lukim brens-ofis bilong mipela; mi pilim olsem dispela i save strongim ol na mi tu wantaim.
Mi save, ol wok bilong Jehova yumi mekim, em i amamas long en, na dispela wok bai i no inap lus nating, na dispela i save strongim mi tru. (1 Korin 15:58) Maski mi gat sik na mi no inap mekim planti samting, mi bin putim long bel na tingting bilong mi ol tok bilong Kolosi 3:23, 24, em i tok: “Olgeta samting yupela i mekim, yupela i mas wok strong na mekim. I no olsem yupela i mekim wok bilong ol man. Nogat. Yupela i mekim wok bilong Bikpela. Yupela i save, bihain Bikpela bai i givim pe long yupela, em ol dispela gutpela samting em i makim pinis bilong ol manmeri bilong en.” Mi wok long bihainim dispela tok, olsem na mi bin lain long givim bel olgeta long mekim wok bilong Jehova maski i gat sampela traim i painim mi.
[Piksa long pes 24]
Long 1942 taim mi wok painia
[Piksa long pes 24]
Meri bilong mi i bin kirapim wok misineri bilong em long Meksiko long 1947
[Piksa long pes 24]
Mi wantaim Esther long nau
[Ol Piksa long pes 26]
Antap long han kais: Famili Betel bilong Meksiko long 1952 na mi stap long poret
Antap: Winim 109,000 ol i bung long wanpela stediam long Meksiko Siti long wanpela kibung distrik long 1999
Daunbilo long han kais: Nupela brens-ofis bilong mipela ol i wokim