Yu Inap i Go Long Hap i Sot Long Ol Pablisa Bilong Kingdom?

“Mipela i gat gutpela sindaun long Amerika, tasol mipela i tingting planti long pasin bilong ol lain bilong dispela hap long tingting tasol long kisim planti samting bilong skin, nogut dispela tingting i kalap long mipela wantaim tupela pikinini man bilong mipela. Bipo, mi na meri bilong mi i bin mekim wok misineri, na mipela i laik kisim gen dispela kain sindaun we mipela i no holim planti samting bilong skin na i gat amamas long en.”

DISPELA laik i kirapim ol, na long 1991, Ralph na Pam i raitim pas i go long sampela brens ofis na kamapim laik bilong ol long i go long wanpela hap i sot long ol pablisa bilong Kingdom. Brens ofis long Meksiko i toksave long ol olsem ol i sot tru long ol pablisa bilong Kingdom em ol inap autim tok long ol lain i tok Inglis long Meksiko. Brens ofis i tok, “ol kaikai i redi pinis” bilong kisim. (Jo. 4:35) I no longtaim na Ralph na Pam wantaim tupela pikinini man bilong ol i gat 8 na 12 krismas, ol i tok orait long i go long dispela hap na ol i kirap stretim ol samting bilong i go sindaun long Meksiko.

Bikpela Teritori

Ralph i stori olsem: “Paslain long taim mipela i lusim Amerika, sampela brata na sista i laik helpim mipela na ol i tok: ‘Nogut yupela i go long narapela kantri na bagarap i painim yupela!’ ‘Sapos sik i painim yupela, bai yupela i mekim wanem?’ ‘Bilong wanem yupela i laik i go long narapela kantri bilong autim tok long ol lain i tok Inglis? Ol manmeri i tok Inglis long dispela hap ol i no gat laik long harim tok i tru!’ Tasol mipela i tingting strong pinis long i go. Mipela i no kisim tingting wantu tasol long i go long narapela kantri bilong autim tok. Mipela i bin tingting long dispela samting inap sampela yia pinis. Mipela i no bin kisim ol bikpela dinau i kisim longpela taim bilong bekim, na mipela i bin seivim sampela mani, na planti taim mipela famili i bin toktok wantaim long ol hatwok inap painim mipela.”

Pastaim Ralph na famili bilong em i go lukim brens ofis bilong Meksiko. Ol brata i soim ol wanpela mep bilong kantri olgeta na i tokim famili: “Dispela em teritori bilong yupela!” Famili i go sindaun long San Miguel de Allende, em wanpela taun i gat bikpela lain manmeri bilong ol narapela kantri, na i stap longwe long Mexico City inap 240 kilomita long hap not wes. Tripela yia bihain, wanpela nupela kongrigesen bilong tok Inglis i kamap long dispela taun, na kongrigesen i gat 19 pablisa long en. Dispela em i namba wan kongrigesen bilong tok Inglis i bin kamap long Meksiko​—tasol i gat planti wok moa i stap.

I gat olsem wan milion manmeri bilong Amerika i sindaun long Meksiko. Na tu, i gat planti Meksiko yet em ol i save mekim tok Inglis olsem namba tu tok ples bilong ol, olsem sampela dokta na loya samting na planti sumatin tu. Ralph i tok: “Mipela i beten askim Jehova long salim sampela wokman moa i kam. Oltaim mipela i larim wanpela rum slip long haus i stap long ol brata na sista i kam long hap bilong mipela bilong lukim na skelim ol samting.”​—Nam. 13:2.

Ol i Laik Lusim Bikpela Hap Taim Moa Long Autim Tok

I no longtaim na sampela brata na sista moa i kam, em ol i laik mekim bikpela wok moa bilong autim tok. Tupela bilong ol em Bill na Kathy i kam long Amerika. Ol i bin autim tok inap 25 yia long ol teritori i sot long ol pablisa. Ol i bin tingting long lainim tok ples Spen, tasol ol i senisim tingting taim ol i go sindaun long taun Ajijic long nambis bilong raunwara Chapala, i gat planti lain bilong Amerika i ritaia pinis na ol i kam sindaun long dispela hap. Bill i tok: “Long Ajijic mipela i wok strong long painim ol lain i tok Inglis em ol i laik kisim save long tok i tru.” Insait long tupela yia, Bill na Kathy i amamas tru long lukim wanpela kongrigesen i kamap​—em namba tu kongrigesen bilong tok Inglis long Meksiko.

Ken na Joanne bilong Kanada i laik lusim sampela samting bilong skin bambai ol i ken mekim bikpela wok moa bilong Kingdom. Ol tu i go sindaun long Meksiko. Ken i tok: “Mipela i mas lain long sindaun long wanpela hap we sampela taim i no gat hatwara o pawa, o telefon i no wok inap sampela de.” Tasol tupela i kisim bikpela amamas long wok autim tok. I no longtaim na ol i makim Ken long kamap kongrigesen sevan, na tupela yia bihain em i kamap elda. Pastaim i hatwok long pikinini meri bilong ol, Britanny, long i stap long wanpela liklik kongrigesen bilong tok Inglis i no gat planti yangpela long en. Tasol taim em i insait long wok konstraksen bilong wokim ol Haus Kingdom, em i kisim planti gutpela pren long olgeta hap bilong Meksiko.

Patrick na Roxanne i bilong Texas long Amerika, na ol i amamas long harim olsem ol inap mekim wok olsem misineri long wanpela hap i no longwe tumas we ol manmeri i save mekim tok Inglis. Patrick i tok: “Mipela i go lukim Monterrey, em wanpela taun long hap not is long Meksiko, na mipela i pilim olsem Jehova i stiaim mipela long i go helpim ol lain long dispela hap.” Insait long 5-pela de ol i salim haus bilong ol long Texas na i olsem ol i bihainim dispela tok “kam long Masedonia.” (Ap. 16:9) I hatwok liklik long mekim wok skin long Meksiko bilong kisim mani bilong lukautim ol, tasol insait long tupela yia ol i amamas long lukim liklik grup i gat 17 Witnes i kamap wanpela kongrigesen i gat 40 pablisa.

Tupela marit moa, em Jeff na Deb, ol i lusim sampela samting bilong skin bambai ol inap mekim bikpela wok moa bilong autim tok. Tupela i salim bikpela haus bilong ol long Amerika na i go sindaun long wanpela liklik flet long Cancún, em wanpela taun long is kos bilong Meksiko. Long bipo, tupela i save go long ol kibung i kamap long hap i gat eakon, na kibung i stap klostu long haus bilong ol. Tasol nau ol i mas raun long ka inap 8-pela aua bilong kamap long wanpela kibung long tok Inglis em ol i mekim insait long wanpela stediam i no gat rup long en. Tasol tupela i amamas tru long lukim wanpela kongrigesen i gat olsem 50 pablisa i kamap long Cancún.

Sampela brata na sista bilong Meksiko ol tu i kirap helpim wok bilong autim tok long tok Inglis. Olsem, Rubén wantaim famili bilong em i harim olsem ol i bin kirapim namba wan kongrigesen bilong tok Inglis long San Miguel de Allende na teritori bilong kongrigesen i karamapim olgeta hap bilong Meksiko, olsem na kwiktaim ol i pasim tok long helpim dispela kongrigesen. Tasol bilong mekim olsem, ol i mas lainim tok Inglis, na lain long tingting na pasin bilong ol man bilong ol narapela kantri, na ol i mas raun longwe tru​—inap olsem 800 kilomita long olgeta wik​—bilong i go long ol miting. Rubén i stori: “Mipela i amamas long autim tok long ol lain bilong narapela kantri em ol i bin sindaun planti yia pinis long Meksiko, tasol dispela em i namba wan taim ol i harim gutnius long tok ples bilong ol yet. Sampela i tok tenkyu long mipela na aiwara i kamap long ai bilong ol.” Pastaim Rubén wantaim famili bilong em i helpim kongrigesen long San Miguel de Allende, na bihain ol i mekim wok painia long taun Guanajuato, long sentral Meksiko, na ol i helpim wok bilong kamapim wanpela kongrigesen bilong tok Inglis i gat 30 pablisa samting. Long nau, ol i insait long wanpela grup bilong tok Inglis long Irapuato, em wanpela taun klostu long Guanajuato.

Autim Tok Long Ol Man i Hatwok Long Painim Ol

I gat planti Meksiko yet em ol i save tok Inglis. Sampela taim i hatwok long autim tok long ol, long wanem, ol i save sindaun long hap bilong ol maniman na ol hausmeri tasol i save opim dua. O sapos ol man bilong haus i opim dua ol i no laik harim tok bilong yumi, long wanem, ol i ting ol Witnes Bilong Jehova i wanpela liklik lain bilong lotu bilong dispela hap. Tasol taim ol Witnes bilong narapela kantri i autim tok long ol, sampela i save harim.

Yumi ken tingim Gloria, long taun Querétaro, long sentral Meksiko. Em i tok: “Bipo ol Witnes i mekim tok Spen i bin autim tok long mi, tasol mi no laik harim. Tasol bihain famili na ol pren bilong mi i gat sampela hevi, na dispela i mekim na mi bel hevi na mi kirap beten long God, mi askim em long helpim mi long painim rot bilong stretim ol hevi. I no longtaim na wanpela meri i tok Inglis i kam long haus bilong mi. Em i askim mi, i gat sampela long haus i save long tok Inglis. Em i meri bilong narapela kantri, olsem na tingting bilong mi i kirap, na mi tokim em olsem mi save long tok Inglis. Taim em i autim tok long mi, mi tingting, ‘Dispela meri Amerika i mekim wanem long hap bilong mi?’ Tasol mi bin beten askim God long helpim mi. Olsem na nogut God i salim dispela meri bilong narapela kantri i kam bilong helpim mi.” Gloria i orait long stadi long Baibel na kwiktaim em i kamap strong na i kisim baptais, maski famili bilong em i birua long em. Long nau, Gloria i save mekim wok painia oltaim, na man bilong em na pikinini man bilong em tu i mekim wok bilong Jehova.

Ol i Kisim Gutpela Pe

Tru, taim ol i lusim ples na i go long ol hap i sot long ol pablisa, sampela hatwok bai painim ol, tasol ol i kisim planti gutpela pe long dispela wok. Ralph, em pastaim yumi bin stori long em, em i tok: “Mipela i mekim Baibel stadi long ol manmeri bilong Inglan, Saina, Jameka, Swiden, na ol famili bilong king bilong Gana. Sampela bilong ol dispela Baibel sumatin i bin kirap autim tok fultaim. Long ol yia mipela i bin wok long ol dispela hap, famili bilong mipela i lukim 7-pela kongrigesen bilong tok Inglis i kamap. Tupela pikinini man bilong mipela i kirap mekim wok painia wantaim mipela, na long nau tupela i mekim wok long Betel long Amerika.”

Nau long Meksiko i gat 88 kongrigesen bilong tok Inglis na planti grup. Wanem samting i mekim na planti kongrigesen i kamap kwiktaim? Long bipo, planti manmeri i tok Inglis long Meksiko ol i no bin toktok wantaim ol Witnes. Na sampela i putim yau long dispela tok, long wanem, famili na ol pren bilong ol i no stap bilong pasim ol na birua long ol. Na sampela ol i laik stadi long Baibel, long wanem, ol i ritaia pinis na nau ol i gat taim bilong tingim ol samting bilong spirit. Na tu, winim 33 pesen bilong ol pablisa long ol kongrigesen bilong tok Inglis ol i mekim wok painia, na dispela i mekim na ol pablisa i wok strong na ol dispela kongrigesen i wok long i go bikpela.

Ol Gutpela Samting i Wetim Yu

Yumi ken save olsem i gat planti manmeri long olgeta hap bilong graun em ol bai putim yau gut taim ol i harim tok bilong Kingdom long tok ples bilong ol yet. Olsem na yumi amamas long save olsem planti brata na sista em ol i tingim ol samting bilong spirit​—ol yangpela na ol lapun, ol singel na ol marit​—ol i orait long lusim ples na i go sindaun long ol hap we i sot long ol man bilong autim tok bilong Kingdom. Tru, ating i gat sampela hatwok na hevi i painim ol, tasol ol hevi i liklik samting tasol taim ol i skelim wantaim amamas ol i kisim long painim ol man i gat gutpela bel na i bilip long ol tok i tru bilong Baibel. Olsem wanem? Yu inap stretim ol samting long sindaun bilong yu na bai yu inap i go long wanpela teritori long kantri bilong yu yet o long narapela kantri i sot long ol man bilong autim tok bilong Kingdom?a (Lu. 14:​28-30; 1 Ko. 16:9) Sapos olsem, yu ken bilip tru olsem yu bai kisim planti blesing tru.

[Futnot]

[Blok long pes 21]

Ol i Lukim Amamas Bilong Ol Man i Ritaia

Beryl i bin lusim Inglan na i go sindaun long Kanada. Long dispela hap em i bin mekim wok maneja bilong sampela bikpela kampani. Na tu, em i kamap hapmeri bilong raun long hos, na ol i makim em bilong i go long Olimpik Gem bilong 1980 wantaim tim bilong Kanada. Taim Beryl i ritaia pinis, em i go sindaun long Chapala, Meksiko, na planti taim em na man bilong em ol i save go kaikai long ol haus kaikai. Em i save lukim sampela lain i tok Inglis em ol i ritaia pinis na i luk olsem ol i amamas. Olsem na em i go sekanim ol na askim ol long ol i mekim wanem long Meksiko. Planti taim ol dispela lain i amamas, ol i Witnes Bilong Jehova. Beryl wantaim man bilong em i ting, sapos pasin bilong save gut long God inap mekim man i amamas na i stap bilong em i gat as tru bilong en, orait ol tu i laik save long em. Taim ol i bin go long ol miting Kristen inap sampela mun pinis, Beryl i orait long stadi long Baibel. Inap sampela yia Beryl i bin mekim wok olsem wanpela painia oltaim.

[Blok long pes 22]

“Em i Gutpela Samting Tru Long Ol i Stap Wantaim Mipela”

Ol Witnes i bin lusim ples na i go long ol hap i sot long ol pablisa bilong Kingdom, ol brata bilong ol dispela hap i amamas tru long ol. Wanpela brens ofis long Karibian i tok: “I gat planti handet Witnes bilong ol narapela kantri i kam autim tok long dispela hap, na sapos ol i lusim dispela ples, ol kongrigesen bai i no strong olsem nau. Em i gutpela samting tru long ol i stap wantaim mipela.”

Baibel i tok “planti meri i go autim dispela tok [bilong gutnius].” (Sng. 68:11) Olsem na yumi no kirap nogut long save olsem i gat planti singel sista i autim tok long ol narapela narapela kantri. Ol dispela sista i bin daunim laik bilong ol yet, ol i givim bikpela helpim tru. Wanpela brens ofis long Isten Yurop i tok: “Long planti kongrigesen bilong mipela, i gat bikpela lain sista i stap, na sampela taim ol inap olsem 70 pesen bilong ol pablisa. Planti ol i nupela long tok i tru, tasol ol singel sista bilong ol narapela kantri i wok painia long dispela hap, ol i givim bikpela helpim na i lainim gut ol dispela nupela sista long autim tok. Ol dispela sista bilong ol narapela kantri ol i olsem gutpela presen tru mipela i kisim!”

Ol dispela sista i ting olsem wanem long mekim wok autim tok long ol narapela kantri? Angelica em wanpela sista i gat 35 krismas na em i bin wok inap sampela yia olsem singel painia long narapela kantri. Em i tok: “Long wanpela asainmen bilong mi, long olgeta de mi save wokabaut long ol rot i gat graun malumalum na oltaim mi lukim ol manmeri i karim pen na hevi, na mi bel hevi tru. Tasol bel bilong mi i gutpela taim mi autim tok na helpim ol man. Na planti taim ol sista bilong dispela hap ol i tok tenkyu long mi bin kam bilong helpim ol, na mi pilim tru dispela. Wanpela sista i tok, pasin bilong mi long i kam longwe tru long kantri bilong em long mekim wok painia i bin kirapim em long autim tok fultaim.”

Sue, em wanpela painia i gat 52 krismas samting, em i tok: “Sampela hatwok bai painim yu, tasol dispela em i liklik samting taim yu skelim wantaim ol blesing yu kisim. Wok autim tok i gutpela tru! Mi save lusim planti aua long autim tok wantaim ol yangpela sista, olsem na mi save stori long ol tok mi bin lainim long Baibel na ol buk samting bilong yumi long olsem wanem yumi ken winim ol hevi. Planti taim ol i tokim mi olsem pasin bilong mi long karim hevi taim mi mekim wok olsem singel painia inap planti yia, dispela i helpim ol long save olsem ol tu inap winim ol hevi i save kamap long i stap bilong ol. Wok bilong helpim ol dispela sista i mekim bel bilong mi i gutpela tru.”

[Mep long pes 20]

(Bilong save ol dispela rait i stap we long pes, lukim buk o magasin)

MEKSIKO

Monterrey

Guanajuato

Irapuato

Ajijic

Chapala

Raunwara Chapala

San Miguel de Allende

Querétaro

MEXICO CITY

Cancún

[Piksa long pes 23]

Sampela i kisim amamas long autim tok long ol lain bilong ol narapela kantri em namba wan taim bilong ol long harim gutnius