Inap Yu “Kam Long Masedonia”?
1. Wanem samting i kirapim Pol na ol poroman bilong em long go long Masedonia?
1 Long yia 49 C.E., aposel Pol i lusim Antiok bilong Siria na mekim namba tu raun bilong wok misineri bilong em. Em i laik go long Efesus na ol narapela taun long Esia Maina. Tasol long rot bilong visen, holi spirit i singautim em long “kam long Masedonia.” Em wantaim ol poroman bilong em i amamas long mekim olsem. Na rot i op long ol i insait long wok bilong kamapim namba wan kongrigesen long dispela hap. (Apo. 16:9, 10; 17:1, 2, 4) Long sampela hap bilong graun long nau, planti man i laik harim tok, tasol ol i sot long ol wokman bilong helpim ol. (Mat. 9:37, 38) Olsem wanem? Rot i op long yu inap helpim ol?
2. Bilong wanem sampela i no tingting long go sindaun long narapela kantri?
2 Ating yu laik kamap misineri olsem Pol, tasol yu no tingting strong long go long narapela kantri. Olsem, ating rot i no op long yu go long Skul Gileat, long wanem, yu winim bikpela krismas pinis, o yu wanpela singel sista, o yu gat ol liklik pikinini. O ating yu no tingting long go sindaun long narapela kantri, long wanem, yu pilim olsem yu no inap lainim nupela tokples. O yu bin lusim as ples na kam sindaun long kantri nau yu stap long en, long wanem, yu laik kisim gutpela wok mani, olsem na yu gat tupela tingting long lusim dispela kantri. Tasol taim yu beten long Jehova na skelim gut dispela samting, ating bai yu luksave olsem ol dispela samting i no inap pasim yu long i go long narapela hap we i sot long ol man bilong autim tok.
3. Bilong mekim gut wok autim tok long narapela kantri, i no olsem man i mas go long skul bilong mekim wok misineri. Bilong wanem i olsem?
3 Yu Ting Man i Mas Kisim Skul Bilong Mekim Wok Misineri? Wanem samting i mekim na wok bilong Pol na ol poroman bilong em i karim kaikai? Ol i bilip na wet long Jehova na holi spirit bilong em i helpim ol. (2 Kor. 3:1-5) Olsem na sapos sindaun bilong yu i mekim na yu no inap kisim sampela kain skul bilong mekim wok misineri, yu inap yet long mekim gut wok bilong autim tok long narapela kantri. Tingim olsem yu wok long kisim skul tu long rot bilong Skul Tiokratik Bilong Autim Tok na Miting Bilong Wok Autim Tok. Ating yu putim mak long go long Skul Gileat o long kain skul olsem, tasol sapos yu go long narapela kantri na autim tok, bai yu kisim save long wok misineri i olsem wanem, na dispela bai helpim yu long bihain sapos ol i singautim yu long kisim sampela skul moa.
4. Bilong wanem ol lain i winim bikpela krismas i no ken ting ol i no inap i go mekim wok autim tok long narapela kantri?
4 Ol Lain i Winim Bikpela Krismas: Ol lain i winim bikpela krismas na ol i strongpela Kristen na ol i gat gutpela helt, ol inap i stap olsem gutpela helpim long ol kantri we i sot long ol man bilong autim tok. Olsem wanem? Yu ritaia pinis long wok mani? Sampela i save kisim liklik pensen, tasol ol inap yusim gut bilong lukautim ol taim ol i go sindaun long ol kantri i no gat planti mani, na pe bilong ol samting olsem haus sik na ol narapela samting i daun tru.
5. Stori long ekspiriens bilong wanpela brata i ritaia na i go sindaun long narapela kantri.
5 Wanpela brata bilong wanpela kantri we ol i save mekim tok Inglis, em i elda na painia. Taim em i ritaia long wok em i go sindaun long wanpela kantri long Saut-is Esia, long wanpela hap we ol turis i save raun long en, na em i helpim wanpela liklik grup i gat 9-pela pablisa em ol i save mekim tok Inglis. Dispela grup i autim tok long 30,000 manmeri bilong ol narapela kantri em ol i stap long dispela hap. Insait long tupela yia, 50 manmeri i wok long i kam long ol miting. Dispela brata i tok: “Taim mi kam long hia, mi kisim planti gutpela blesing!”
6. Stori long ekspiriens bilong wanpela singel sista i go sindaun long kantri we i sot tru long ol man bilong autim tok.
6 Ol Singel Sista: Jehova i yusim ol sista long mekim bikpela wok bilong autim gutnius long ol kantri we i sot tru long ol man bilong autim tok. (Sng. 68:11) Wanpela singel sista i bin putim mak bilong mekim bikpela wok moa long autim tok long narapela kantri, tasol papamama bilong em i tingting planti, nogut hevi i painim em. Olsem na em i go long wanpela kantri we i no gat hevi long mani na wok politik. Em i raitim pas i go long brens ofis, na em i kisim helpim, ol i tokim em long ol samting bilong dispela kantri. Insait long 6-pela yia em i stap long dispela kantri, em i kisim planti gutpela blesing. Em i tok: “Long kantri bilong mi, mi no gat planti Bible stadi. Tasol dispela hap we ol i sot long ol man bilong autim tok, mi inap mekim planti Baibel stadi na mi kisim pasin bilong mekim gut wok tisa.”
7. Stori long ekspiriens bilong wanpela famili i go sindaun long narapela kantri.
7 Ol Famili: Sapos yu gat ol pikinini, yu ting dispela i pasim yu long go long narapela kantri bilong helpim wok bilong autim gutnius? Tupela marit i gat tupela pikinini, em ol i gat 8 na 10 krismas, ol i bin mekim olsem. Mama i stori long ekspiriens bilong ol olsem: “Mipela i amamas tru olsem mipela i mekim bikpela long ol pikinini bilong mipela long hia, long wanem, ol inap bung oltaim wantaim ol painia salim na ol misineri. Planti gutpela samting i painim mipela taim mipela i mekim wok long hap we i sot tru long ol man bilong autim tok.”
8. Olsem wanem? Yu inap mekim wok autim tok long narapela kantri na yu no lainim nupela tokples? Stori long dispela.
8 Tingting Planti Long Tokples: Olsem wanem? Pasin bilong tingting planti long lainim nupela tokples i pasim yu long go sindaun long narapela kantri? Ating long narapela kantri we i sot long ol man bilong autim tok bilong Kingdom, ol man i mekim wanpela tokples em yu save long en. Olsem: Tupela marit i save mekim tok Inglis i go long wanpela kantri we ol i save mekim tokples Spen. Na i gat planti man bilong narapela kantri ol i kam sindaun long hap, ol i save mekim tok Inglis. Brens ofis i bin toksave long ol long sampela tok Inglis kongrigesen we i sot long ol man bilong autim tok, na tupela i makim wanpela bilong ol dispela kongrigesen na inap tupela taim ol i go lukim dispela kongrigesen. Taim ol i go bek long ples, ol i skelim gut ol samting na bai ol i no tromoi bikpela mani long baim ol samting long olgeta mun, olsem na insait long wanpela yia ol inap seivim mani. Taim ol i go bek long dispela kantri, ol brata long dispela hap i helpim ol long painim wanpela haus we pe bilong rent i liklik inap long ol i ken baim.
9, 10. Ol man i lusim as ples bilong ol na go sindaun long narapela kantri, ol i ken tingting long mekim wanem? Bilong wanem ol i mas mekim olsem?
9 Lusim As Ples na Go Sindaun Long Narapela Kantri: Olsem wanem? Yu bin lusim kantri bilong yu na go sindaun long narapela kantri paslain long yu kisim tok i tru? Ating i gat bikpela wok long helpim ol man long as ples bilong yu yet. Olsem wanem? Yu tingting long go bek long as ples bilong yu bilong helpim wok bilong autim gutnius? Ating em bai isi moa long yu kisim wok na haus, winim ol man bilong narapela hap, na yu save pinis long tokples. Na tu, ating ol manmeri bai amamas moa long harim tok bilong Kingdom yu autim long ol, winim ol man bilong narapela kantri.
10 Wanpela refiuji i lusim ples bilong em long Albenia na i go sindaun long Itali. Em i kisim gutpela wok na em i save salim mani i go bek long famili bilong em long Albenia. Bihain long em i kisim tok i tru, em i kirap lainim sampela painia salim bilong Itali long tokples Albenia. Ol dispela painia i laik go long dispela hap i sot tru long ol man bilong autim tok. Dispela brata i tok: “Ol i go long ples mi bin lusim. Ol i no save long tokples, tasol ol i amamas long i go. Mi save long pasin bilong ples na tokples Albenia. Mi stap mekim wanem long Itali?” Dispela brata i wokim tingting long i go bek long Albenia bilong helpim wok bilong autim gutnius. Em i tok: “Mi no bel hevi liklik long mi bin lusim wok mani long Itali. Mi gat gutpela wok moa long Albenia. Long tingting bilong mi, pasin bilong givim bel olgeta long mekim wok bilong Jehova, dispela i bikpela samting na i save givim bikpela amamas!”
11, 12. Ol bratasista i tingting long i go helpim wok bilong autim tok long narapela kantri, ol i mas mekim wanem samting?
11 Rot Bilong Mekim: Paslain long Pol na ol poroman bilong em i go long Masedonia, ol i bin tingting long go olsem long hap wes, tasol “holi spirit i tambuim ol,” olsem na ol i go long hap not. (Apo. 16:6) Taim ol i go klostu long Bitinia, Jisas i pasim ol. (Apo. 16:7) Long rot bilong Jisas, Jehova i wok yet long stiaim wok bilong autim tok. (Mat. 28:20) Olsem na sapos yu tingting long go sindaun long narapela kantri, beten askim Jehova long stiaim yu.—Luk 14:28-30; Jems 1:5; lukim blok “Bilong Save Sapos Kantri Yu Tingting Long En i Gat Nid.”
12 Askim ol elda na ol narapela strongpela bratasista long kamapim tingting bilong ol na tokim yu stret, olsem yu inap mekim gut wok long narapela kantri o nogat. (Snd. 11:14, NW; 15:22) Ritim ol buk na nius mipela i kamapim we i stori long wok bilong autim tok long ol narapela kantri, na tu, mekim gut wok painimaut long ol kantri yu tingting long en. Yu ting yu inap visitim dispela kantri, na ating stap planti de liklik bilong kisim sampela save long en? Sapos yu tingting strong long i go long narapela kantri, yu inap raitim pas i go long brens ofis bilong dispela kantri bilong kisim sampela save moa. Yu ken painim atres bilong dispela kantri long Yearbook bilong dispela yia. Tasol no ken salim pas i go stret long brens ofis, givim long ol elda bilong yu na ol bai raitim sampela tok tu long dispela pas, paslain long ol i salim.—Lukim buk Oganaisesen Bilong Mekim Laik Bilong Jehova, pes 111-112.
13. Brens ofis bai mekim wanem bilong helpim yu? Tasol em wok bilong yu yet long mekim wanem?
13 Brens ofis bai salim pas i stori long sampela samting bilong dispela kantri, bilong helpim yu long wokim disisen bilong yu. Tasol em i no wok bilong ol long raitim pas i go long embasi na tok olsem ol bai lukautim yu long sait bilong mani, o stretim rot long yu bai stap long dispela kantri, o stretim visa na ol narapela pepa bilong gavman, o painim haus bilong yu. Em ol samting yu yet i mas skelim gut paslain long yu go sindaun long narapela kantri. Na tu, em wok bilong yu long i go lukim embasi bilong kisim sampela save long ol samting yu mas mekim bilong kisim visa na pepa i givim tok orait long yu ken wok long dispela kantri. Ol bratasista i tingting long helpim wok autim tok long narapela kantri, em wok bilong ol yet long stretim ol samting bilong lukautim ol na mekim ol samting i stret wantaim lo bilong gavman long dispela samting.—Gal. 6:5.
14. Yumi mas tingim gut wanem samting taim yumi laik go visitim o i go sindaun long ol kantri i gat tambu long wok autim tok?
14 Ol Kantri i Gat Tambu Long Wok Autim Tok: Long sampela kantri i gat tambu, ol bratasista bilong dispela hap i mas bihainim savetingting long mekim wok lotu bilong ol. (Mat. 10:16) Ol pablisa husat i go visitim o i go sindaun long dispela hap bilong helpim wok, ating ol inap pulim ai bilong ol man long wok bilong yumi na dispela inap kamapim hevi long ol asples bratasista. Sapos yu tingting long go helpim wok autim tok long kantri we i gat tambu, plis raitim pas na givim long lain elda na bai ol i salim long brens ofis paslain long yu stretim rot bilong i go.
15. Ol bratasista em sindaun bilong ol i mekim na ol i no inap i go helpim wok long narapela kantri, olsem wanem ol inap mekim bikpela wok moa long hap bilong ol yet?
15 Sapos Yu No Inap Go Long Narapela Kantri: Sapos yu no inap mekim i go helpim wok bilong autim tok long narapela kantri, orait no ken bel hevi. Ating “bikpela dua” bai op long yu ken mekim narapela wok. (1 Kor. 16:8, 9) Ating wasman sekit bilong yu bai save long wanpela hap i sot long ol man bilong autim tok, we i no longwe long hap bilong yu. O yu inap helpim wanpela grup bilong narapela tokples em ol i stap klostu. O ating yu inap mekim bikpela wok moa bilong autim tok insait long kongrigesen bilong yu yet. Maski yu gat wanem kain sindaun, bikpela samting em olsem yu givim bel olgeta long lotuim Jehova.—Kol. 3:23.
16. Yumi mas mekim wanem long ol bratasista husat i laik i go helpim wok bilong autim tok long narapela kantri?
16 Olsem wanem? Yu save long wanpela strongpela Kristen husat i putim mak long i go helpim wok bilong autim tok long narapela kantri? Sapos olsem, i gutpela long sapotim na strongim em! Taim Pol i lusim Antiok bilong Siria, em namba tri biktaun bilong Gavman Bilong Rom (bihain long Rom na Aleksandria). Em i wanpela bikpela teritori, na ating kongrigesen bilong Antiok i nidim Pol bilong helpim wok long dispela hap, olsem na sapos em i go ol bai sori tru long em. Tasol Baibel i no kamapim olsem ol brata i bin mekim ol tok bilong pasim em long go, nogat. Ol i no tingim hap bilong ol yet tasol. Ol i tingim olsem “dispela graun” i olsem “gaden” bilong mekim wok long en.—Mat. 13:38.
17. I gat wanem as na yumi mas tingting long “kam long Masedonia”?
17 Pol na ol poroman bilong em i kisim planti blesing, long wanem, ol i bihainim dispela singaut long kam long Masedonia. Taim ol i stap long taun Filipai long Masedonia, ol i bungim Lidia, na “Jehova i opim bel bilong em long kisim ol tok Pol i autim.” (Apo. 16:14) Tingim bikpela amamas bilong Pol na ol wanwok misineri bilong em taim Lidia na ol wanhaus bilong em i kisim baptais! Long planti kantri, i gat ol lain olsem Lidia, em ol i gat gutpela bel na ol i no harim yet tok bilong Kingdom. Sapos yu “kam long Masedonia,” olsem hap we i sot long ol man bilong autim tok, ating yu inap kisim amamas bilong painim na helpim ol dispela man.
[Blok long pes 5]
Bilong Save Sapos Kantri Yu Tingting Long En i Gat Nid
• Lukim Yearbook bilong dispela yia. Skelim gut namba bilong pablisa wantaim namba bilong olgeta manmeri long dispela kantri.
• Yusim Index long mekim wok painimaut long ol atikol na ekspiriens i stori long dispela kantri.
• Toktok wantaim ol narapela pablisa i bin visitim dispela kantri o ol i bin i go stap long dispela kantri.
• Mekim wok painimaut long Intenet samting, sapos yu tingting long go long wanpela kantri we yu inap autim tok long wanpela tokples yu save long en. Dispela bai helpim yu long save hamas manmeri long dispela kantri i mekim dispela tokples.