Yu Inap Go Mekim Wok Bilong God Long Narapela Kantri?
“PLANTI taim mi bin tingting long mekim wok misineri. Taim mi singel yet mi save autim tok long Teksas, Amerika, long dispela hap i gat bikpela wok bilong autim tok. Taim mi marit, meri bilong mi i wok wantaim mi. Taim pikinini meri bilong mipela i kamap, mi tingting olsem, ‘Em nau, mi no inap tingting moa long mekim wok misineri.’ Tasol Jehova i save mekim na laik bilong ol man i save kamap tru na Jehova i save mekim moa yet, taim ol i laik mekim laik bilong em.”—Jesse, long nau em i mekim wok long Ekwado wantaim meri na 3-pela pikinini bilong em.
“Mi bin ting olsem mi no inap mekim wok painia long narapela kantri, long wanem, mi no bin kisim skul long Gileat long mekim wok misineri. Taim mi bin lukim wanpela Baibel-stadi bilong mi i mekim tok long miting o taim em i autim tok, dispela i mekim mi amamas, na mi tenkyu long Jehova long larim mi i mekim dispela wok.”—Karen, em wanpela meri singel i bin mekim wok painia inap 8-pela yia long Saut Amerika.
“Mi na meri bilong mi i mekim wok bilong autim tok long olgeta de long Yunaitet Stets inap 13 yia pinis, na bihain mipela i tingting olsem mipela i mas mekim wok long nupela hap. Nau mipela i amamas tru, winim long bipo; tru tumas, em i gutpela rot bilong bihainim long i stap bilong mipela.”—Tom, em i save mekim wok painia wantaim meri bilong em Linda, long hap bilong Amason.
Ol dispela gutpela tok i kam long ol manmeri em sindaun bilong ol i mekim na ol i no inap go kisim skul bilong mekim wok misineri long Skul Gileat. Tasol ol i kisim planti amamas na ol i pilim tu planti hatwok bilong mekim wok bilong God long narapela kantri. Olsem wanem na ol dispela samting i painim ol? Olsem wanem? Yu inap mekim kain wok olsem?
Stretpela Tingting i Mas Kirapim Man
Stretpela tingting i mas kirapim man na bai em i ken mekim gut wok long narapela kantri—em i no ken tingting long raun tasol na em i go. Ol man i mekim dispela wok na ol i holim yet, ol i gat stretpela tingting long dispela wok. Olsem aposel Pol, ol i ting olsem ol i gat dinau long God na long ol man. (Rom 1:14) Ol inap mekim wok autim tok long as ples bilong ol bilong inapim tok bilong Jisas. (Matyu 24:14) Tasol ol i pilim olsem ol i gat dinau na ol i laik i go helpim ol man em ol i no gat rot bilong harim gutnius.
Narapela gutpela as na ol man i laik mekim wok long narapela kantri em olsem: Long sampela hap, wok bilong ol i save kamapim gutpela kaikai moa. Taim yumi lukim wanpela man bilong kisim pis i wok long kisim planti pis tru long wanpela hap bilong raunwara, ating yumi laik i go klostu long dispela hap na hukim sampela pis, a? Na olsem tasol, ol gutpela stori bilong ol wok i go bikpela long ol narapela kantri, dispela i bin kirapim planti long i go long dispela hap em “ol i kisim bikpela lain pis moa.”—Luk 5:4-10.
Tingim Gut Pastaim
Planti kantri i no save larim ol man bilong narapela kantri i mekim wanpela wok mani long taim ol i kam mekim wok lotu long dispela kantri. Olsem na ol man i laik i go mekim wok bilong God long narapela kantri ol i mas i gat mani bilong lukautim ol yet. Olsem wanem ol dispela man i lukautim ol yet long mani samting? Sampela ol i bin salim haus bilong ol na ol man i baim o ol i larim ol man i rentim haus bilong ol na bai ol i ken kisim mani bilong mekim dispela wok. Na sampela i salim bisnis bilong ol na ol man i baim. Sampela i bungim mani bilong mekim dispela wok. Sampela i save go mekim wok autim tok long narapela kantri inap wanpela o tupela yia, na bihain ol i save go bek long kantri bilong ol na bai ol i ken mekim wok mani na bungim sampela mani, na ol i save go bek gen bilong mekim wok autim tok.
Wanpela gutpela samting bilong i go mekim wok autim tok long ol kantri i no gat planti wok bisnis samting, em pe bilong ol kaikai samting i daunbilo liklik, winim ol kantri i gat planti wok bisnis. Ol man i go mekim wok long ol dispela kain kantri, ol inap mekim wok long liklik mani olsem pensen tasol ol i save kisim bilong lukautim ol yet long kaikai samting. Tasol sindaun bilong man yet bai mekim na man i lusim planti mani o liklik mani. Long ol kantri i no gat planti wok bisnis samting, i gat sampela gutpela haus i stap tasol pe bilong ol i bikpela tru.
Olsem na man i laik i go mekim wok long narapela kantri, pastaim em i mas skelim gut hamas mani em bai lusim. Tasol i gat planti samting moa em i mas skelim—i no mani tasol. Ating tok bilong sampela i bin mekim wok long Saut Amerika em inap givim sampela gutpela tingting long yu.
Bikpela Hatwok
Markku, em i bilong Finlan, em i tok: “Mi hatwok tru long lainim tok Spen. Mi bin ting olsem mi no save yet long dispela tok ples, olsem na mi mas stap longtaim liklik na bai ol i makim mi long kamap wanpela wokman bilong kongrigesen. Mi kirap nogut olsem bihain long tupela mun tasol ol i askim mi long lukautim Buk-Stadi! Tru tumas, i gat planti samting mi bin mekim i semim mi. Mi save hatwok long kolim nem bilong ol man. Long wanpela taim mi kolim nem bilong Brata Sancho olsem ‘Brata Chancho (olsem pik),’ na mi kolim nem bilong Sista Salamea olsem ‘Malasea (olsem man nogut).’ Gutpela tru, ol brata na sista i isi long mi.” Bihain Markku i mekim wok wasman sekit long dispela kantri inap 8-pela yia wantaim meri bilong em Celine.
Chris, meri bilong Jesse em yumi bin stori long em long kirap bilong dispela stori, em i tok: “Mi tingim yet namba wan taim bilong mipela long wasman sekit i kam lukim kongrigesen, na long dispela taim mipela i bin stap long dispela hap inap 3-pela mun tasol. Mi lukim olsem brata i mekim tok piksa na i kolim wanpela gutpela tok tru bilong helpim mipela long pilim tru, tasol mi no save em i tok wanem. Long dispela taim stret long Haus Kingdom aiwara bilong mi i kam daun. I no olsem liklik aiwara i kam daun, nogat. Mi krai bikpela. Bihain long miting mi stori gut long wasman sekit long pasin mi mekim. Em i mekim gutpela pasin na em i mekim wankain tok ol narapela i tokim mi, ‘Ten paciencia, hermana’ (‘Sista, strongim bel na stap isi’). Tupela o 3-pela yia bihain, taim mipela i bung gen, mipela i toktok inap 45 minit, na mipela i amamas olsem mipela inap toktok wantaim.”
Narapela brata i tok: “Stadi em i bikpela samting. Taim mipela i lusim bikpela hap taim long stadi na lainim tok ples, mipela inap toktok gut wantaim ol man.”
Olgeta bai wanbel long tok kain hatwok olsem bai kamapim planti gutpela samting. Taim man i wok strong long lainim wanpela nupela tok ples em i save kisim pasin bilong daunim em yet, pasin bilong stap isi, na pasin bilong no ken les kwik. Wanpela bikpela rot tru i op long autim gutnius long ol narapela man. Olsem: Taim man i lainim tok Spen, em inap toktok wantaim ol man bilong wanpela tok ples em 400 milion manmeri long olgeta hap bilong graun i save mekim. Planti brata sista em bihain ol i bin i go bek long kantri bilong ol, ol inap mekim wok yet long tok ples ol i bin lainim bilong helpim ol manmeri em tok ples bilong ol em tok Spen.
Olsem Wanem Long Pasin Bilong Tingim Tingim Ples?
Deborah i bin mekim wok autim tok long hap bilong Amason wantaim man bilong em, Gary, na em i tok: “Taim mipela i go namba wan taim long Ekwado long 1989, mi save tingim tingim ples bilong mi. Bihain mi lain long pas gut wantaim ol brata na sista long kongrigesen. Ol i bin kamap olsem famili bilong mi.”
Karen, em yumi bin stori long em long kirap bilong dispela stori, em i tok: “Mi bin go autim tok long olgeta de bambai mi ken daunim pasin bilong tingim tingim ples. Long dispela rot mi no tingting nabaut na tingim ples. Mi bin tingim tu olsem papamama bilong mi i amamas long wok mi mekim long narapela kantri. Oltaim mama i bin strongim bel bilong mi na em i tok olsem: ‘Jehova inap lukautim yu gut, winim mi.’ ”
Makiko, em i bilong Japan, em i lap na i tok: “Taim mi autim tok long de olgeta, skin bilong mi i save les liklik. Olsem na taim mi go long haus na mi kirap tingim tingim ples, mi save slip hariap. Em nau, dispela tingting i no save stap longtaim.”
Olsem Wanem Long Ol Pikinini?
Sapos yu gat ol pikinini, yu mas tingting tu long ol samting ol i mas kisim, olsem skul. Sampela papamama i laik bai ol pikinini i mas stap long haus na skul, na sampela i putim ol pikinini long ol skul long dispela hap.
Al i bin i go sindaun long Saut Amerika wantaim meri bilong em, na tupela pikinini, na mama. Em i tok: “Mipela i kisim save olsem taim mipela i putim ol pikinini long skul, dispela i helpim ol long lainim hariap tok ples bilong dispela hap. Insait long 3-pela mun tasol ol i save gut long mekim dispela tok ples.” Tasol tupela pikinini man bilong Mike na Carrie i save skul long rot bilong pas samting taim ol i stap long haus. Papamama i tok: “Mipela i kisim save olsem mipela i no inap larim ol pikinini yet i mekim dispela kain skul. Mipela tu i mas insait long ol kos na mipela i mas save ol manki i mekim gut kos ol i kisim o nogat.”
David na Janita i bilong Ostrelia, na ol i kamapim tingting bilong ol long tupela pikinini man bilong ol. “Mipela i laik bai ol manki bilong mipela i mas lukim ol narapela lain i stap olsem wanem. Em i no hatwok long ting olsem pasin na sindaun yumi go bikpela long en i wankain tasol olsem bilong ol narapela, tasol nogat. Na tu, ol i bin lukim ol lo bilong God i wok gut long olgeta hap bilong graun, maski ol i stap long wanem kantri o wanem pasin bilong ples ol i stap long en.”
Ken i tok: “Mi gat 4-pela krismas tasol taim famili bilong mi i lusim Inglan long 1969. Tru mi bel hevi, long wanem, mipela i no sindaun long haus ol i wokim long graun malumalum na pasim long kunai, olsem mi bin ting, tasol mi pilim olsem taim mi wok long i go bikpela, i stap bilong mi i gat gutpela amamas tru long en. Mi save sori long ol narapela pikinini em ol i no kisim wankain amamas olsem mi! Mi save stap na raun wantaim ol misineri na ol painia salim, olsem na mi kirap mekim wok painia haptaim long taim mi gat 9-pela krismas.” Long nau Ken i wanpela wasman sekit.
Pikinini meri bilong Jesse, em Gabriella, em i tok: “Ekwado i kamap olsem ples tru bilong mipela. Mi amamas tru long papamama bilong mi i bin pasim tok wantaim bilong kam long dispela hap.”
Tasol long sampela pikinini, i gat narapela narapela as na ol i no amamas long sindaun long ol dispela ples, na papamama bilong ol i mas i go bek long kantri bilong ol. Long dispela as, sapos yupela i laik i go stap long narapela kantri, i gutpela sapos pastaim yupela i go lukim pastaim. Taim yupela i lukim pinis dispela kantri orait yupela i ken pasim tok wantaim olsem yupela bai go mekim wok long dispela hap o nogat.
Ol i Kisim Ol Blesing
Tru tumas, bilong i go mekim wok long narapela kantri, dispela i gat planti hatwok, na man i mas lusim sampela laik bilong em yet. Olsem wanem? Hatwok na taim ol brata sista i bin lusim bilong i go mekim wok long narapela hap i bin karim kaikai? Yumi ken larim ol i stori long yumi.
Jesse: “Insait long 10-pela yia mipela i sindaun long biktaun Ambato, mipela i lukim ol kongrigesen i go bikpela tru, pastaim i gat tupela na bihain i gat 11-pela. Mipela i bin helpim wok long kirapim 5-pela bilong ol dispela kongrigesen, na mipela i bin mekim wok konstraksen bilong wokim tupela Haus Kingdom. Mipela i bin amamas tru long helpim tupela Baibel stadi long olgeta wan wan yia long winim mak bilong kisim baptais. Wanpela samting tasol mi bel hevi long en i olsem, mi bel hevi long mi no kam long hia long 10-pela yia paslain.”
Linda: “Ol man i amamas tru long gutnius na long hatwok mipela i mekim bilong helpim ol, na dispela i save strongim tru mipela. Olsem: Long wanpela liklik taun i stap long bus wanpela sumatin bilong Baibel nem bilong em Alfonso, em i ting i gutpela samting long mekim pablik-tok long ples bilong em. Nau tasol em i bin i go sindaun long nupela haus em i bin wokim long diwai, na dispela kain haus i no gat planti long dispela ples. Em i ting olsem em tasol i gat gutpela haus long dispela taun olsem na em i givim dispela haus bilong em long ol brata na bai ol i ken mekim wok long en olsem Haus Kingdom, na em i go sindaun gen long liklik haus kunai bilong em.”
Jim: “Ol aua mipela i lusim bilong toktok wantaim ol man long taim mipela i autim tok long dispela hap i winim tru ol aua mipela i lusim long Yunaitet Stets. Na tu, long hia mipela i stap isi tru. Na mipela i gat bikpela hap taim bilong stadi na autim tok.”
Sandra: “Taim mi lukim tok i tru bilong Baibel i senisim i stap bilong ol man na sindaun bilong ol i gutpela, dispela i save mekim mi amamas. Long bipo mi bin stadi long Baibel wantaim Amada, em wanpela meri i gat 69 krismas na em i gat wanpela liklik stua. Long olgeta 10-pela 10-pela kap susu, oltaim em i save pulimapim tupela kap wara insait long en na giamanim ol man. Em i giamanim moa yet ol man i save kam baim dispela susu long stua bilong em, long wanem, em i save sotim skel bilong susu ol i baim. Tasol taim em i stadi long tok i stap aninit long liklik het-tok ‘Stretpela Pasin i Kamapim Amamas’ long sapta 13 long buk Save i Bringim Man Long Laip Oltaim, Amada i lusim dispela pasin nogut. Man! Mi amamas tru long lukim em i kisim baptais sampela mun bihain long dispela.”
Karen: ‘Bipo mi no gat wok long wetim Jehova i helpim mi olsem nau mi save mekim, na ol wok bilong em mi bin mekim bipo i no bikpela olsem wok mi mekim long dispela hap. Mi kamap pren bilong Jehova na dispela pasin i kamap strong tru.’
Olsem Wanem Long Yu?
Insait long planti yia planti tausen Witnes i bin go sindaun long ol narapela kantri bilong mekim wok bilong God. Sampela i stap inap wanpela o tupela yia na sampela ol i stap longtaim. Ol i gat save long mekim wok, ol i strong long ol samting bilong spirit, na ol i gat mani, olsem na ol i laik i go long narapela kantri bilong autim gutnius bilong Kingdom long ol narapela. Ol inap mekim wok long ol hap em ol pablisa bilong Kingdom long dispela hap i no inap i go mekim wok autim tok long en, long wanem, i hatwok long painim wok mani long dispela hap. Planti i bin baim ol ka i gat 4-wil draiv na bai ol i ken i go long ol hap em ol Witnes bilong dispela hap i no inap go long en. Sampela i laik stap long wanpela biktaun, na ol i strongim tru ol bikpela kongrigesen i no gat planti elda long en. Tasol olgeta wantaim i tok olsem ol i bin kisim planti blesing bilong spirit, winim ol samting ol i bin mekim bilong helpim ol narapela.
Olsem wanem? Yu inap insait long dispela gutpela wok bilong autim tok long narapela kantri? Sapos i no gat wanpela samting i pasim yu, yu inap painim rot bilong i go mekim dispela wok? Namba wan bikpela samting yu ken mekim em yu ken rait long brens-ofis bilong Sosaiti long kantri em yu tingting long i go mekim wok long en. Ol toksave yu kisim bai i helpim yu long tingting gut long mekim tru dispela wok. Na tu, yu ken painim ol gutpela tok yu inap bihainim em i stap long stori “Go Out From Your Land and From Your Relatives,” long Wastaua, tok Inglis, Ogas 15, 1988. Taim yu stretim gut rot na Jehova i blesim wok bilong yu, ating yu tu inap kisim gutpela amamas long mekim wok autim tok long narapela kantri.
[Piksa long pes 24]
TOM NA LINDA LONG WANPELA LIKLIK ROT I STAP LONGWE, EM OL I LAIK I GO LONG HAP BILONG OL LAIN SHUA INDIAN
[Piksa long pes 25]
PLANTI OL I MEKIM WOK AUTIM TOK LONG BIKTAUN BILONG EKWADO, EM KWITO
[Piksa long pes 25]
MAKIKO I AUTIM TOK LONG OL MAUNTEN ANDIS
[Piksa long pes 26]
FAMILI HILBIG I BIN MEKIM WOK AUTIM TOK LONG EKWADO INAP 5-PELA YIA PINIS