“Em i Laikim Yumi Tru Oltaim”

EM STORI BILONG JOSÉ VERGARA OROZCO

Sapos yu gat 70 krismas pinis, yu ting bai i gat wanpela samting inap mekim na bai yu kirap mekim wanpela nupela wok? Wanpela samting i bin mekim olsem long mi​—⁠winim 35 yia i go pinis.

Jehova em i Man bilong laikim yumi tru na long sori bilong em, kirap long yia 1962 i kam inap long nau, mi bin mekim wok painia oltaim, na kirap long 1972 mi bin holim wok wasman long Kongrigesen El Karisal bilong ol Witnes Bilong Jehova, long provins Halisko, long Meksiko. Pastaim mi laik stori liklik long i stap bilong mi taim mi liklik yet na mi wok long i go bikpela.

MAMA i karim mi long provins Misoakan, long Meksiko, long Ogas 18, 1886. Papa bilong mi i bilong wanpela lain ol i kolim Freemason, olsem na mipela i no save go long lotu Katolik, na mipela i no insait long ol bikpela de bilong lotu Katolik, na no gat wanpela piksa bilong lotu i stap insait long haus bilong mipela.

Taim mi gat 16 krismas, papa i lusim mipela bilong go wok mani long Amerika, tasol em i stretim tok wantaim wanpela man long lainim mi long mekim wanpela wok. Tasol tupela yia bihain, dispela man i bringim mi i go long Meksiko Siti bilong mi ken kisim trening long wanpela skul bilong ami. Bihain mi kamap soldia long ami bilong Meksiko.

Insait Long Ami na Bihain

Long yia 1910, wanpela pait i kamap long Meksiko bilong daunim gavman, na mi insait long dispela pait. Mipela olgeta yangpela bilong dispela skul bilong ami i helpim Francisco I. Madero, em wanpela paitman i laik daunim hatpela gavman bilong Porfirio Díaz. Mipela i helpim Madero inap long em i dai long 1913, na bihain long dispela, mipela i helpim Venustiano Carranza, em i holim wok presiden bilong Meksiko kirap long 1915 i go inap 1920. Ol man i givim nem Karansistas long mipela.

Inap 4-pela taim mi painim rot bilong lusim ami, tasol nogat. Olsem na mi ranawe long ami na kamap wanpela ranawe man. Long dispela as papa bilong mi, em i go bek pinis long Meksiko, em i go kalabus. Wanpela taim mi giaman olsem em i smolpapa bilong mi na mi go lukim em long haus kalabus. Mipela i raitim tok long ol liklik hap pepa bilong kamapim tingting bilong mitupela, nogut mipela i toktok long maus na ol wasman i harim. Na bihain mi kaikai ol dispela hap pepa, nogut ol i painimaut mi husat tru.

Papa i lusim kalabus na em i kam lukim mi na tokim mi long kamapim mi yet long ol bos bilong ami. Mi mekim olsem, na mi kirap nogut, long wanem, jeneral i stap bos em i no tokim ol ami long holim mi. Em i tok, i gutpela sapos mi go long Amerika. Mi bihainim tok bilong em na mi go i stap long Amerika long 1916 i go inap 1926.

Long 1923 mi maritim wanpela meri bilong Meksiko, em tu em i stap long Amerika. Mi lain long mekim wanpela wok bilong sanapim ol bikpela haus samting, na mipela i kamap waspapamama bilong wanpela pikinini meri. Taim em i gat 17 mun, mipela i go bek long Meksiko na sindaun long Halpa, long Tabasko. Orait nau, famili Kristero i kirapim pait long gavman. Dispela pait i kirap long 1926 na i stap inap long 1929.

Ol Kristero i laik bai mi insait long lain bilong ol, tasol mi no laik, na mi wantaim meri pikinini i ranawe i go long Provins Agwaskalientes. Mipela i raun raun long planti hap bilong Meksiko, tasol long 1956 mipela i go sindaun i stap long Matamoros, long Tamaulipas, na mi kisim wok bilong bosim ol man i sanapim ol bikpela haus samting.

Nupela Samting i Painim Mi

Nau senis i kamap long i stap bilong mi. Pikinini meri bilong mi, em i marit pinis na em i sindaun long hapsait bilong boda long Braunsvil, Teksas, long Amerika, em i save kam lukim mipela planti taim. Wanpela taim em i tok: “Papa, planti famili i go bung long bikpela haus bung bilong ples. Gutpela yumi go bambai yumi ken save ol i mekim wanem.” Em wanpela kibung bilong ol Witnes Bilong Jehova. Mitupela meri bilong mi, wantaim pikinini meri na man bilong em na pikinini man bilong tupela, mipela i go long olgeta 4-pela de bilong kibung.

Kirap long dispela taim, mipela i go long ol miting Kristen bilong ol Witnes Bilong Jehova. Long Meksiko, mi kamap strong long ol samting bilong spirit, na long Amerika, pikinini meri bilong mi i mekim olsem. I no longtaim na mi tokim ol wanwok bilong mi long ol tok i tru bilong Baibel mi bin kisim save long en. Mi save kisim 10-pela 10-pela bilong olgeta nupela nius Wastaua na Kirap! na mi save tilim long ol wanwok bilong mi. Faipela bilong ol man i wok long ofis na 3-pela ensinia wantaim sampela narapela wokman ol i kamap Witnes.

Long Disemba 19, 1959, em kol nogut tru na mi kisim baptais long wanpela wara! Sik i kisim olgeta brata sista i kisim baptais long dispela de, long wanem, wara i kol tumas. Pikinini meri i bin kisim baptais paslain long mi kisim, na meri bilong mi i no bin kisim baptais, tasol em i save long ol tok i tru bilong Baibel na em i no pasim mi long mekim wok bilong Jehova.

Mekim Wok Autim Tok Long Olgeta De

God i laikim yumi tru na mi pilim tru gutpela pasin sori em i bin mekim long mi. Olsem na long Februeri, 1962, taim mi gat 75 krismas, mi kirap mekim wok autim tok long olgeta de olsem wanpela painia. Sampela yia bihain, olsem long 1968, meri bilong mi i dai. Nau mi gat laik long mekim wok bilong God long narapela kantri, tasol ol brata i ting i no gutpela long mi mekim olsem, long wanem, mi lapun. Tasol long yia 1970, ol i salim mi i go bilong mekim wok painia long wanpela liklik kongrigesen long Kolotlan, long provins Halisko.

Long Septemba 1972, wasman sekit i tok, gutpela sapos mi go long liklik taun, nem bilong en El Karisal, em i stap long hap bilong Kolotlan. Long Novemba, 1972, wanpela kongrigesen i kamap na ol i makim mi long holim wok elda. Dispela taun i stap longwe long ol narapela liklik ples na taun, tasol 31 manmeri i save go long ol miting bilong kongrigesen.

Tru, mi lapun pinis, tasol mi wok strong yet long mekim wok autim tok na helpim ol man long skelim gut ol bilip bilong ol, olsem: Taim ol Katolik i kaunim bis, olsem korona, ol i save kolim wanpela beten bilong litimapim nem bilong Maria, na ol i tok, Bikpela i stap wantaim Maria, na ol i kolim Maria olsem “Mama bilong God.” Orait, mi save askim ol olsem: ‘Sapos God i Man bilong helpim Maria, olsem wanem em inap i stap pikinini bilong em tu?’

Nau mi gat 105 krismas, na klostu 20 yia pinis mi bin holim wok elda na wok painia oltaim long El Karisal, Halisko. Mi pilim olsem em laik bilong God na mi stap planti yia moa olsem, bambai mi ken mekim wok bilong em na inapim ol planti yia mi no bin mekim wok bilong em.

Wanpela samting mi lainim pinis, em olsem: Oltaim yumi mas bilip olsem Nambawan Jas bilong yumi em i sindaun long sia king bilong em na em i was long yumi na lukautim yumi oltaim long ol samting yumi mas kisim. Olsem Buk Song 117⁠:2 i tok: “Em i laikim yumi tru oltaim.”