No Ken Les na Lusim Wok!

“Yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.”​—⁠GALESIA 6:⁠9.

LAION i gat kain kain pasin bilong raunim abus. Sampela taim em bai raunim abus long ol liklik raunwara o long ol liklik rot ol animal i save wokabaut long en. Na wanpela buk i tok, sampela taim laion i save painim wanpela pikinini sibra i slip i stap na nau laion i holim em.​—⁠Portraits in the Wild.

² Aposel Pita i tok, birua bilong yumi, Satan, “em i olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pita 5:⁠8) Satan i save em i gat sotpela taim tasol, olsem na em i strong moa yet long putim hevi long ol man bilong pasim ol na bai ol i no inap mekim wok bilong Jehova. Tasol dispela “laion i singaut strong,” em i gat bikpela tingting moa yet long kaikai ol man i mekim wok bilong Jehova. (KTH 12:​12, 17) Pasin bilong em long raunim ol, em i wankain olsem pasin bilong laion long raunim abus. Em i wankain olsem wanem?

³ Sampela taim Satan i save hait na redi i stap​—⁠em i kirapim ol man long mekim nogut o birua long yumi na bai yumi lusim Jehova na yumi no mekim moa wok bilong em. (2 Timoti 3:12) Tasol olsem laion i save mekim, sampela taim Satan bai lukim wanpela abus i stap na nau em bai holim. Satan i save wet i go inap long taim wanpela samting i mekim na yumi bel hevi, o i olsem strong bilong yumi i laik pinis. Orait nau em bai wok strong long kirapim yumi long lusim wok bilong Jehova. Tasol yumi no ken i stap olsem abus bilong Satan!

⁴ Nau yumi stap long taim bilong planti hevi tru, winim olgeta narapela taim bipo. Nau long dispela taim bilong “planti hevi nogut tru,” ating planti bilong yumi i pilim olsem wok bilong ol i no kamap gutpela na ol i bel hevi long dispela, o ol i pilim olsem ol hevi i wok long daunim ol. (2 Timoti 3:⁠1) Orait, yumi ken mekim wanem na bai yumi no les olgeta na nau yumi stap olsem abus tru bilong Satan? Olsem wanem yumi ken bihainim tok bilong aposel Pol? Em i tok: “Yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.”​—⁠Galesia 6:⁠9.

Sampela i Mekim na Yumi Bel Hevi

⁵ Long taim bilong ol man bilong raitim Baibel, ating sampela taim ol gutpela wokman bilong Jehova tu ol i pilim olsem ol hevi i wok long daunim ol. Man bilong raitim Song, em Devit, em i tok: “Mi singaut singaut na strong bilong mi i pinis olgeta. Olgeta nait aiwara bilong mi i wasim bet bilong mi. Mi krai moa yet na hetpilo bilong mi i wara olgeta.” Bilong wanem Devit i bel hevi olsem? Em i tok: “Mi gat planti birua.” Ol samting nogut ol man i bin mekim long Devit i bagarapim tru bel bilong em na em i krai moa yet na bikpela aiwara i go daun. Tasol Devit i no lusim Jehova, maski ol man i mekim nogut long em.​—⁠Song 6:​6-9.

⁶ Na i olsem tu long yumi. Ating sampela i bin mekim ol tok o pasin long yumi i bagarapim tru bel bilong yumi na i olsem strong bilong yumi i pinis. Sindaun 12:18 i tok: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em.” Na sapos wanpela brata o sista Kristen i mekim kain tok olsem, dispela tok inap sutim lewa na i go insait tru. Ating em bai bel hevi long dispela tok na em bai bel nogut long dispela man o meri​—⁠em pasin bilong yumi ol man. Bai yumi mekim moa yet dispela pasin sapos yumi ting brata o sista i no bin mekim gutpela pasin o pasin i stret long yumi. Ating bai yumi hatwok long toktok wantaim em, o yumi wok long abrusim em. Kain bel hevi olsem i bin daunim tru sampela man na ol i lusim wok bilong Jehova na ol i no kam moa long ol miting Kristen. Sori tru, ol i “opim dua long Satan” na ol i stap olsem abus tru bilong em.​—⁠Efesus 4:⁠27.

⁷ Orait, taim sampela i mekim na yumi bel hevi o ol i mekim wanpela tok o pasin i bagarapim bel bilong yumi, yumi ken mekim wanem na bai yumi no opim dua long Satan? Yumi mas wok strong bambai yumi no ken i stap bel nogut. Yumi yet i mas i go hariap na traim kamap wanbel gen wantaim em o stretim dispela hevi. (Efesus 4:26) Kolosi 3:13 i tokim yumi: “Sapos wanpela man namel long yupela em i gat tok long narapela brata i bin mekim rong long em, orait em i mas . . . lusim sin bilong dispela brata.” Na i stret yumi mas lusim sin bilong em sapos em i tokaut olsem em i bin mekim rong, na em i tanim bel tru. (Skelim wantaim Song 32:​3-5 na Sindaun 28:13.) Tasol yumi mas save, taim yumi lusim rong bilong man, i no olsem yumi no tingim ol rong man i bin mekim, o yumi ting ol i liklik samting tasol. Bilong lusim rong bilong man, yumi mas lusim pasin bilong bel nogut long em. Pasin bilong bel nogut long man em inap daunim yumi tru, olsem wanpela hevipela samting yumi mas karim. Em inap mekim na yumi tingim dispela samting tasol, na yumi no stap amamas. Na tu, em inap givim sik long yumi. Tasol pasin bilong lusim rong bilong man i narapela kain​—⁠sapos i stret long mekim olsem, dispela bai helpim yumi yet. Olsem na yumi mas bihainim pasin bilong Devit, na sapos sampela i bin mekim wanpela pasin o tok i sutim bel bilong yumi, yumi no ken les na lusim Jehova!

Taim Yumi Popaia

⁸ Jems 3:2 i tok: “Planti taim . . . yumi save popaia.” Taim yumi mekim olsem, bel bilong yumi i gat tok. (Song 38:​3-8) Na bel bilong yumi bai kotim yumi moa yet sapos yumi hatwok long daunim wanpela pasin bilong skin i no gutpela, na sampela taim yumi pundaun na mekim gen.a Wanpela Kristen i bin hatwok olsem, na em i tok: “Mi no laik i stap laip moa, long wanem, mi ting nogut mi bin mekim dispela kain rong Jehova i no inap lusim. Mi ting mi no ken mekim moa wok bilong Jehova, long wanem, ating em i no laikim mi moa.” Taim bel i kotim yumi strong tru na yumi les na yumi no wok strong moa long stretim pasin bilong yumi, em nau, yumi opim dua long Satan​—⁠na ating kwiktaim em bai kam holim yumi olsem wanpela abus! (2 Korin 2:​5-7, 11) Olsem na yumi mas kisim stretpela tingting long dispela pasin bilong bel i gat tok.

⁹ Taim yumi mekim rong, i stret bel i kotim yumi. Tasol sampela taim Kristen i pilim olsem em i no gutpela man na bai God i ken marimari long em, olsem na bel i wok long kotim em inap longtaim. Tasol Baibel i strongim bel bilong yumi, olsem: “Sapos yumi autim sin bilong yumi, orait God bai i . . . mekim stretpela pasin na lusim sin bilong yumi. Na em bai i rausim olgeta pasin nogut i stap long yumi na mekim yumi i kamap klin.” (1 Jon 1:⁠9) Orait olsem wanem? I gat as na bai yumi ting God i no ken mekim olsem long yumi? Tingim tok bilong Jehova long Baibel, em i tok, em i “save rausim sin bilong mipela.” (Song 86:5; 130:​3, 4) Jehova i no inap mekim tok giaman, olsem na em bai bihainim ol tok promis bilong em i stap long Baibel sapos yumi tanim bel tru na yumi go long em long rot bilong beten.​—⁠Taitus 1:⁠2.

¹⁰ Orait, sapos yu wok strong long daunim wanpela pasin i no stret na yu pundaun na mekim gen, yu mas mekim wanem? Yu no ken les long wok yet long daunim dispela pasin! Sapos wanpela taim yu pundaun na mekim gen, yu no ken ting ol wok yu bin mekim long lusim dispela pasin em i lus nating, nogat. Wastaua (tok Inglis) bilong Februeri 15, 1954, i strongim bel bilong yumi na i tok: “Sapos yumi gat wanpela pasin i no stret na bipo yumi bin wokabaut long dispela pasin na em i strong tru long skin bilong yumi, ating planti taim bai yumi pundaun na mekim gen. . . . Tasol bel bilong yu i no ken bagarap olgeta long dispela. Yu no ken ting yu bin mekim dispela kain rong Jehova i no inap lusim tingting long en. Satan i laik bai yu ting olsem. Sapos yu bel hevi stret na yu kros long skin bilong yu yet long yu bin pundaun na mekim gen dispela rong, yu ken save, yu inap i kam bek long Jehova. Yu no ken les long mekim pasin daun na go long God, na beten askim em long lusim rong bilong yu na mekim yu i kamap klin na helpim yu. Yu mas i go long em olsem pikinini i save go long papa taim em i gat hevi, maski hamas taim yu mas askim em gen long lusim dispela rong. Jehova i gat pasin sori, olsem na em bai helpim yu, na sapos bel bilong yu i stret na yu no giaman, em bai mekim bel bilong yu i kamap klin na bai yu inap pilim dispela samting.”

Yumi Ting Yumi No Mekim Bikpela Wok

¹¹ Wok bilong autim tok bilong Kingdom em i bikpela samting long laip bilong Kristen, na dispela wok i givim amamas long em. (Song 40:⁠8) Tasol bel bilong sampela Kristen i gat tok, long wanem, ol i no inap mekim bikpela wok moa long autim tok. Taim bel i gat tok olsem, dispela bai pinisim amamas bilong yumi na bai yumi lusim dispela wok, long wanem, yumi ting Jehova i pilim olsem wok yumi mekim i no inap. Orait yumi ken stori long hevi bilong sampela em ol i gat dispela kain tingting.

Wanpela sista Kristen wantaim man bilong em i wok long mekim bikpela long 3-pela pikinini bilong ol. Sista i raitim pas na i tok: “Taim man i stap rabis, dispela i save kisim olgeta hap taim bilong em.” Na em i tok: “Mi mas wok long painim rot bilong lukautim mani bilong mipela. Olsem na mi mas lusim bikpela hap taim long go lukluk long ol stua i no save putim bikpela pe long ol samting, na ol stua i save daunim pe bilong sampela samting bilong pinisim kwik, na mi save wokim ol klos bilong mi. Na mi save lusim wanpela o tupela aua long olgeta wik long bungim ol hap pepa olsem tiket na mi inap karim i go long stua na kisim kaikai long en. Sampela taim bel bilong mi i gat tok long dispela samting mi save mekim​—⁠mi ting mi mas lusim dispela hap taim long autim tok.”

Wanpela sista i gat 4-pela pikinini na man bilong em i no save bilip. Sista i tok: “Mi ting mi no save laikim tru Jehova. Olsem na mi wok strong long mekim wok bilong Jehova. Mi strong strong, tasol mi pilim olsem dispela wok mi mekim i no inap. As bilong dispela, em mi pilim olsem mi no inap mekim wanpela gutpela wok, olsem na Jehova i no inap orait long ol wok bilong em mi save mekim.”

Wanpela Kristen i bin mekim wok bilong Jehova long olgeta de olsem painia, tasol em i mas lusim. Em i tok: “Mi ting mi no inapim gut tok promis bilong mi long mekim wok bilong Jehova long olgeta de. Man! Mi bel hevi stret long dispela! Taim mi tingim dispela samting, mi save krai.”

¹² Tru, yumi laik mekim wok bilong Jehova inap tru long strong bilong yumi. (Song 86:12) Tasol taim sampela i no inap mekim bikpela wok moa, bilong wanem bel bilong ol i gat tok long dispela? Ating as bilong dispela hevi bilong sampela, em ol i ting ol i no inap mekim wanpela gutpela wok, o sampela samting i bin painim ol bipo na nau ol i gat dispela tingting. Na sampela ol i gat tingting kranki long wok Jehova i laik bai yumi mekim. Wanpela Kristen i tok: “Pastaim mi ting, sapos yumi no wok wok i go inap long yumi sotwin stret, wok bilong yumi i no inap.” Olsem na dispela Kristen i putim mak i antap tru, na taim em i no inap winim dispela mak, bel bilong em i kotim em moa yet.

¹³ Orait, Jehova i laik bai yumi mekim wanem? Em i laik bai yumi givim bel olgeta long mekim wok bilong em, na yumi mekim inap tru long skel bilong yumi. (Kolosi 3:23) Tasol ating samting yumi laik mekim i no wankain olsem samting yumi inap long mekim. Ating i gat sampela samting i pasim yumi, olsem yumi lapun pinis, o yumi gat sik, o skin i no strong tumas, o yumi gat planti wok insait long famili. Tasol sapos yumi mekim wok bilong Jehova inap tru long skel bilong yumi, yumi ken save yumi givim bel tru long mekim wok bilong Jehova, wankain olsem brata o sista em i gat strongpela skin na em i gat rot long mekim wok bilong Jehova long olgeta de, olsem wok painia.​—⁠Matyu 13:​18-23.

¹⁴ Orait, olsem wanem yu ken save hamas wok yu inap tru long mekim? Sapos yu laik, yu ken toktok wantaim wanpela strongpela Kristen, olsem wanpela elda, o wanpela sista i gat save long dispela kain samting, em i save long ol samting yu inap mekim na ol samting yu no inap mekim, na ol wok yu mas mekim insait long famili. (Sindaun 15:22) Yu mas save, Jehova i no save tingim hamas aua samting yu save kisim long wok autim tok na nau em i skelim olsem yu gutpela samting tru long ai bilong em o nogat. Long ai bilong Jehova, olgeta wokman bilong em i gutpela samting tru. (Hagai 2:7; Malakai 3:​16, 17) Ol aua samting yu kisim long wok bilong autim tok, ating em i winim o i aninit long wok ol narapela Kristen i mekim, tasol sapos yu wok strong na yu mekim wok inap tru long skel bilong yu, Jehova bai amamas long dispela wok bilong yu, na yu no ken bel hevi na ting em i no laikim.​—⁠Galesia 6:⁠4.

Sampela “i Mas Bekim Planti Samting”

¹⁵ Jisas i tok: “Ol man i kisim planti samting, ol i mas bekim planti samting gen.” (Luk 12:48) Tru tumas, ol elda bilong kongrigesen “ol i mas bekim planti samting.” Ol i save wok strong tru long helpim kongrigesen, olsem Pol i bin mekim. (2 Korin 12:15) Ol i mas redim ol tok, na go lukim sampela brata sista i gat hevi samting, na harim kot insait long kongrigesen, tasol ol i mas mekim tu ol wok bilong ol insait long famili​—⁠ol i no ken lusim. (1 Timoti 3:​4, 5) Na sampela elda ol i gat wok tu long wokim ol Haus Kingdom, na mekim wok long Hospital Lieson Komiti, na ol i save mekim sampela wok long ol liklik na bikpela kibung. Olsem wanem ol dispela man inap wok strong olsem long mekim ol dispela bikpela wok bilong ol na skin bilong ol i no les?

¹⁶ Moses, em i man bilong pasin daun tru, em i mekim bikpela wok tumas long stretim hevi bilong ol narapela, na strong bilong em i laik pinis. Olsem na tambu papa bilong em, em Jetro, i tokim em long rot bilong stretim dispela hevi, olsem: Em i mas tilim sampela wok i go long ol narapela man i gat save long mekim. (Kisim Bek 18:​17-26; Namba 12:⁠3) Olsem Sindaun 11:2 i tok, “ol man i gat gutpela tingting i save daunim ol yet.” Man i daunim em yet, em i save em i no inap mekim olgeta samting. Na em i no surik long tilim sampela wok i go long ol narapela man, na em i no pret na ting, sapos em i tilim wok i go long ol man i gat save long mekim, bai em i no inap bosim moa ol wok.b (Namba 11:​16, 17, 26-29) Em i gat laik tru long helpim ol long kamap strong na kisim wok insait long kongrigesen.​—⁠1 Timoti 4:⁠15.

¹⁷ Ol manmeri insait long kongrigesen ol inap mekim planti samting bilong helpim ol elda na bai ol i no gat bikpela wok tumas. Ol i save, ol elda i gat famili bilong ol yet long lukautim, olsem na ol i no ken strong tumas long pulim taim bilong ol elda o singaut oltaim long ol i mas helpim ol. Na ol i mas tingim meri bilong ol elda, ol i daunim sampela laik bilong ol yet bambai man bilong ol i ken helpim ol brata sista insait long kongrigesen. Wanpela meri i gat 3-pela pikinini na man bilong em i wanpela elda, na meri i tok: “Mi mas mekim bikpela wok insait long famili bambai man bilong mi inap mekim wok elda bilong em; tasol mi no save toktok planti long dispela samting. Mi save Jehova i blesim tru famili bilong mipela, long wanem, man bilong mi i mekim dispela wok, na mi no save bel nogut long em i givim taim na strong bilong em long mekim wok elda bilong em. Tasol mi mas mekim sampela wok moa antap long wok bilong mi, olsem klinim arere bilong haus, na mekim hap wok moa long skulim na stretim ol pikinini bilong mipela, long wanem, man bilong mi i gat planti wok.” Tasol sori tru, sampela i no pilim bikpela wok em i mekim, na ol i tokim em: “Bilong wanem yu no mekim wok painia?” (Sindaun 12:18) Tasol i gutpela sapos yumi givim gutpela tok long ol narapela na tokim ol, ol i mekim gutpela wok, na yumi no ken sutim tok long ol long sampela wok ol i no inap mekim!​—⁠Sindaun 16:24; 25:⁠11.

Las De i No Kamap Yet

¹⁸ Man i ran longwe tru long wanpela resis, taim em i save em i kamap klostu pinis long mak em i no save lusim resis. Tru, ating strong bilong em i laik pinis na em i ting em i no inap ran moa​—⁠em i sotwin olgeta na em i tuhat nogut tru na em i dai tru long dring wara​—⁠tasol em i kamap klostu pinis long mak na em i no ken lusim resis. Na yumi ol Kristen tu i insait long wanpela resis na yumi laik kisim prais olsem laip i stap oltaim, na nau yumi kamap klostu pinis long mak. Nau i no taim bilong lusim resis!​—⁠Skelim wantaim 1 Korin 9:24; Filipai 2:16; 3:​13, 14.

¹⁹ Wankain samting i bin painim ol Kristen long taim bilong ol aposel. Long yia 61 samting, aposel Pol i salim pas i go long ol Kristen long Jerusalem. Taim i laik pinis​—⁠dispela lain “ol manmeri” nogut, em ol Juda i bin lusim God, klostu ol i laik pinis. Ol Kristen long Jerusalem ol i mas was i stap moa yet na stap gut long God; taim ol i lukim ol ami i banisim Jerusalem, ol i mas ranawe lusim dispela taun. (Luk 21:​20-24, 32) Olsem na Pol i givim tok long ol long taim stret, em i tok: “Yupela i no ken les long sanap strong.” (Hibru 12:⁠3) Long dispela tok “les long sanap strong,” Pol i mekim tupela tok, olsem “les” (kaʹmno) na “strong i pinis” (e·klyʹo·mai). Wanpela saveman bilong Baibel i tok, ‘Aristotal i mekim dispela tok [Grik] taim em i stori long ol man bilong ran long resis​—⁠taim ol i kamap pinis long mak, ol i no taitim bun moa na ol i pundaun long graun. Ol man i kaunim pas [bilong Pol] ol i stap yet long resis. Ol i no ken lusim namel. Maski bikpela hap strong bilong ol i pinis, ol i mas bosim skin na i no ken airaun na pundaun. Em nau, long dispela taim gen ol i kisim toksave long ol i mas sanap strong na karim hevi.’

²⁰ Tok bilong Pol i stret tru long yumi ol Kristen bilong nau! Nau long dispela taim planti hevi moa yet i wok long kamap, na sampela taim yumi pilim olsem yumi ran long resis na yumi sotwin pinis na lek i no gat strong moa na yumi laik pundaun. Tasol nau yumi stap klostu pinis long mak na yumi no ken lusim resis! (2 Stori 29:11) Dispela Birua bilong yumi, Satan, em dispela “laion i singaut strong,” em i laik bai yumi les na lusim resis. Tasol yumi tenkyu tru long Jehova, em i mekim ol samting bambai em i ken “strongim ol man i no gat strong.” (Aisaia 40:29) Wanem ol dispela samting? Na yumi ken mekim wanem wok long en bilong helpim yumi? Bai yumi toktok long dispela samting long stori i kamap bihain long dispela.

[Ol Futnot]

Bai Yu Bekim Olsem Wanem?

◻ Taim yumi bel hevi long tok samting bilong ol narapela o ol i bagarapim bel bilong yumi, yumi ken mekim wanem na bai yumi no les na lusim wok bilong Jehova?

◻ Taim bel i kotim yumi, wanem stretpela tingting bai helpim yumi na yumi no les na lusim wok?

◻ Jehova i laik bai yumi mekim wanem?

◻ Olsem wanem pasin daun inap helpim ol elda na ol i no ken les?

◻ Olsem wanem na tok bilong Pol long Hibru 12:3 i stret tru long yumi ol Kristen bilong nau?

[Askim Bilong Stadi]

1, 2. (a) Wanem ol pasin bilong laion long raunim abus? (b) Satan i laik tru long raunim husat na kaikai?

3, 4. (a) Satan i save mekim wanem bilong raunim na kaikai ol wokman bilong Jehova? (b) Nau yumi stap long taim bilong “planti hevi nogut tru,” olsem na yumi gat wanem ol askim?

5. Wanem samting i mekim na Devit i les na i no gat strong? Tasol em i no mekim wanem?

6. (a) Ol tok na pasin bilong ol narapela inap mekim wanem long yumi? (b) Sampela i mekim wanem na ol i stap olsem abus tru bilong Satan?

7. (a) Taim sampela i mekim wanpela samting i bagarapim bel bilong yumi, yumi ken mekim wanem na bai yumi no givim rot long Satan long holim yumi? (b) Bilong wanem yumi mas lusim pasin bilong bel nogut long man?

8. (a) Bilong wanem bel bilong sampela i kotim ol moa yet long sampela taim? (b) Taim bel bilong yumi i gat tok na yumi larim dispela i daunim yumi olgeta na nau yumi les na i no laik wok strong moa, dispela inap nogutim yumi olsem wanem?

9. I gat wanem as na yumi ken bilip tru long marimari bilong God?

10. Wanem gutpela tok wanpela Wastaua (tok Inglis) i bin mekim long daunim wanpela pasin em skin i strong long mekim?

11. (a) Yumi mas ting olsem wanem long mekim wok bilong autim tok bilong Kingdom? (b) Sampela Kristen i gat wanem tingting long autim tok na dispela i givim hatwok long ol?

12. Bilong wanem bel bilong sampela Kristen i gat tok long ol i no inap mekim bikpela wok moa long autim tok?

13. Jehova i laik bai yumi mekim wanem?

14. Yu ken mekim wanem sapos yu laik bai wanpela i helpim yu long skelim hamas wok yu inap mekim long autim tok?

15. Olsem wanem na ol elda bilong kongrigesen “i mas bekim planti samting”?

16. (a) Jetro i bin givim wanem tok long Moses bilong stretim wanpela hevi bilong em? (b) Wanem pasin bai kirapim elda long tilim sampela wok i go long ol narapela?

17. (a) Ol manmeri bilong kongrigesen inap mekim wanem na bai ol elda i no gat planti wok tumas? (b) Meri bilong ol elda i save mekim wanem bilong helpim man bilong ol? Yumi ken mekim wanem bilong makim olsem yumi pilim tru dispela gutpela wok ol i mekim?

18, 19. (a) Bilong wanem nau em i no taim bilong lusim resis bilong kisim laip i stap oltaim? (b) Aposel Pol i givim wanem tok long ol Kristen long Jerusalem long taim stret bilong en?

20. Olsem wanem na dispela tok bilong Pol i stret tru long yumi ol Kristen bilong nau?