Jehova i Save Strongim Man i No Gat Strong
“Ol manmeri i bilip long Bikpela na i wetim em i helpim ol, ol bai i stap strong oltaim. Na bai ol i flai olsem ol tarangau. Bai ol i ran na ol i no inap sotwin, na bai ol i wokabaut na ol i no inap les.”—AISAIA 40:31.
OL TARANGAU i strongpela pisin tru. Ol inap trip long win i go inap longwe tru na ol i no wokim pul bilong ol. Wanpela kain yelopela tarangau ol i save kolim “King Bilong Olgeta Pisin,” pul bilong en i bikpela tru, inap olsem tupela mita samting. Em ‘i save go antap tru na trip inap sampela aua antap long kil bilong maunten, na em bai flai i go antap i go i go na bihain bai yu lukim em olsem wanpela liklik mak tru long skai.’—Buk The Audubon Society Encyclopedia of North American Birds.
2 Aisaia i tingim strong bilong tarangau long flai i go antap tru na em i tok: “Bikpela i save strongim ol man i no gat strong, na taim bun bilong ol i slek pinis, em i save mekim ol i stap strong. Strong bilong ol strongpela yangpela man i save slek na pinis. Tasol ol manmeri i bilip long Bikpela na i wetim em i helpim ol, ol bai i stap strong oltaim. Na bai ol i flai olsem ol tarangau. Bai ol i ran na ol i no inap sotwin, na bai ol i wokabaut na ol i no inap les.” (Aisaia 40:29-31) Em i gutpela tru long yumi save, Jehova i save givim strong long ol manmeri i bilip long em na ol inap wok i go moa—i olsem em i givim strongpela pul bilong tarangau long ol na ol i no inap les. Orait nau yumi ken stori long ol samting Jehova i givim bilong strongim ol man i no gat strong.
Beten i Gat Strong
3 Jisas i tokim ol disaipel long “beten long olgeta taim, na ol i no ken les.” (Luk 18:1) Orait, taim ol hevi bilong dispela graun i laik daunim yumi na yumi kamapim bel bilong yumi long Jehova, yu ting dispela bai helpim yumi long kisim bek strong na yumi no ken les na lusim wok? Yes, tasol i gat sampela samting yumi mas tingim.
4 Taim yumi beten askim Jehova long sampela samting, yumi mas i gat stretpela tingting long ol samting yumi laik bai Jehova i mekim. Wanpela Kristen em i gat bikpela sik bilong bel hevi, na bihain em i tok: ‘Dispela em i wankain olsem ol narapela sik—Jehova i no save wokim mirakel na pinisim sik nau long dispela taim. Tasol em i save helpim yumi long karim dispela hevi na orait liklik long dispela taim nau yumi stap long en.’ Em i stori long beten i bin helpim em, na em i tok: ‘Inap 24 aua long olgeta de mi inap singaut long spirit holi bilong Jehova.’ Olsem na Jehova i no save banisim yumi na bai ol hevi bilong dispela taim i no ken painim yumi. Tasol em i save “givim Holi Spirit long ol man i askim em.” (Luk 11:13; Song 88:1-3) Dispela spirit inap strongim yumi long winim olgeta hevi i save painim yumi. (1 Korin 10:13) Na spirit inap givim “strong bilong God” long yumi bambai yumi inap sanap strong na karim ol hevi inap long taim Kingdom bilong God i pinisim olgeta hevi bilong yumi long nupela taim klostu nau bai kamap.—2 Korin 4:7.
5 Tasol bilong beten bilong yumi i gat strong, yumi mas beten oltaim na no ken les, na yumi mas kamapim stret samting yumi laik beten askim God long en. (Rom 12:12) Olsem: Sapos yu hatwok long daunim wanpela pasin i no stret na sampela taim yu les na i olsem yu no gat strong moa, orait long olgeta de taim yu kirap long moningtaim, beten askim Jehova long helpim yu bambai yu no ken pundaun na mekim dispela pasin long dispela de. Mekim kain beten olsem inap sampela taim moa long dispela de, na long taim yu laik slip tu long olgeta nait. Sapos wanpela taim yu pundaun na mekim dispela pasin, orait beten strong na askim Jehova long lusim dispela rong, na toktok wantaim em tu long samting i bin kirapim yu na yu mekim gen dispela pasin, na ol samting yu ting yu inap mekim bambai yu ken abrusim dispela samting long bihain. Sapos yu beten oltaim olsem, na yu kamapim stret dispela hevi yu laik bai Jehova i helpim yu long en, dispela bai kamapim klia long Man bilong harim beten olsem yu gat laik tru long winim dispela pait, na yu no giaman.—Song 65:2; Luk 11:5-13.
6 Tasol sampela taim, ol man i les na i pilim olsem ol i no gat strong moa, ol i ting ol i no gutpela man inap long ol i ken beten. Wanpela meri Kristen i gat dispela tingting na bihain em i tok: “Dispela tingting inap bagarapim yumi, long wanem, em i makim olsem yumi kamap man bilong skelim yumi yet long kot, tasol em i no wok bilong yumi long mekim olsem.” Tru tumas, “God . . . yet i jas.” (Song 50:6) Baibel i strongim bel bilong yumi na i tok, “maski sapos bel bilong yumi i kotim yumi long wanpela samting, . . . God em i save long olgeta samting.” (1 Jon 3:20) Em nau, taim yumi skelim yumi yet na makim olsem yumi no gutpela man inap long yumi ken beten, yumi ken save, ating Jehova i no save ting olsem long yumi! Dispela i strongim bel bilong yumi, a? Em i “save long olgeta samting” bilong yumi, na em i save long ol samting i bin mekim na yumi pilim olsem yumi no gutpela man. (Song 103:10-14) Marimari bilong em na pasin bilong em long pilim tru ol hevi bilong yumi, dispela i save kirapim em long harim beten bilong “man i pilim hevi long sin na i daunim em yet.” (Song 51:17) Em i nolaik tru long man i ‘pasim yau na i no laik harim ol rabisman i singaut long ol bilong helpim ol,’ orait olsem wanem bai em yet i pasim yau na i no harim singaut bilong yumi taim yumi krai long em bilong helpim yumi?—Sindaun 21:13.
Lain Brata i Gat Pasin Sori
7 Narapela samting Jehova i givim long yumi bilong helpim yumi long kisim bek strong, em lain brata Kristen bilong yumi. Em i gutpela samting tru long yumi inap insait long bikpela famili brata sista i stap long olgeta hap! (1 Pita 2:17) Taim ol hevi bilong graun i wok long daunim yumi, pasin sori bilong ol brata inap helpim yumi long kisim bek strong. Olsem wanem na dispela inap helpim yumi? Long wanem, yumi save yumi no stap wanpis long karim ol hevi bilong dispela taim, na dispela tingting inap strongim bel bilong yumi. Namel long ol brata sista bilong yumi, yumi save sampela i gat ol wankain hevi olsem yumi. (1 Pita 5:9) Taim yumi save, ol narapela tu i karim ol wankain hevi olsem yumi, na bel hevi bilong yumi i no narapela kain, dispela i strongim bel bilong yumi.
8 Insait long lain brata i gat pasin sori, yumi inap painim “ol gutpela pren” em ol bai helpim na strongim yumi taim yumi gat hevi. (Sindaun 17:17) Taim ol i givim sampela gutpela tok sori long yumi o mekim sampela samting i makim olsem ol i tingim yumi, planti taim dispela em inap long strongim yumi. Wanpela Kristen i ting em i no inap mekim wanpela gutpela wok, na dispela i bagarapim bel bilong em. Em i tok: “Ol pren bilong mi i laik helpim mi long daunim dispela tingting kranki bilong mi, na ol i save givim sampela gutpela tok long mi olsem mi no samting nating tasol.” (Sindaun 15:23) Taim yangpela pikinini meri bilong wanpela sista i dai, pastaim sista i hatwok long mekim ol singsing long Haus Kingdom, na em i hatwok moa long mekim ol singsing i stori long man i dai pinis bai kirap bek. Em i stori long dispela na i tok: “Wanpela taim mi krai na wanpela sista i sindaun long narapela lain sia em i lukim mi. Em i kam na holimpas mi na em i singsing wantaim mi. Bel bilong mi i pilim tru gutpela pasin bilong ol brata sista na mi laikim ol moa yet, na mi amamas tru long mipela i go long ol miting, long wanem, mipela i save, long Haus Kingdom yet mipela inap kisim helpim bilong strongim mipela.”
9 Tasol yumi olgeta wan wan i gat wok long mekim pasin sori i go bikpela insait long lain brata Kristen. Olsem na yumi mas “givim bel” moa yet long olgeta brata sista bilong yumi. (2 Korin 6:13) Sori tru! Taim sampela i les na i pilim olsem ol i no gat strong moa, sapos ol i ting ol brata sista i no laikim ol moa, em i no gutpela, a? Tasol sampela Kristen i tok ol i pilim olsem ol i stap wanpis na ol brata sista i no tingim ol. Wanpela sista em man bilong em i no laikim tok i tru, em i tok: “Yumi olgeta i laik bai yumi gat sampela gutpela pren na gutpela tok bilong strongim bel bilong yumi, na yumi laik bung wantaim sampela em ol i gat pasin sori. Plis, tokim ol brata sista olsem ol i gat wok long helpim mipela!” Tru tumas, ol brata sista i gat hevi long sindaun bilong ol—olsem sampela marit em poroman bilong ol i no bilip, na sampela i stap wanpis na i mas lukautim ol pikinini, na sampela i gat bikpela sik, na ol lapun, na ol narapela tu—ol i mas i gat sampela gutpela lain bilong bung wantaim ol. Olsem wanem? Sampela bilong yumi i lusim tingting long dispela samting?
10 Yumi ken mekim wanem bilong helpim ol? Yumi ken mekim ol samting bilong kamapim klia moa olsem yumi laikim ol tru. Taim yumi laik singautim sampela i kam kaikai wantaim yumi, yumi no ken lusim tingting long ol brata sista i stap bel hevi na yumi gat wok long strongim bel bilong ol. (Luk 14:12-14; Hibru 13:2) Yumi no ken ting, sindaun bilong ol i mekim na ol i no inap i kam. Yumi mas singautim ol i kam, na larim ol yet i tingim. Na maski ol i no inap i kam, ol i save yu bin tingim ol, na dispela inap strongim bel bilong ol. Ating dispela bai helpim ol long kisim bek strong.
11 Sampela brata sista i gat hevi, ating yumi mas helpim ol long ol narapela rot, olsem: Ating wanpela mama wanpis i laik bai wanpela strongpela brata i ken helpim pikinini man bilong em i no gat papa. (Jems 1:27) Ating wanpela brata o sista i gat bikpela sik na em i laik bai wanpela i ken i go long stua na baim kaikai samting bilong em, o helpim em long sampela wok bilong haus. Ating wanpela lapun i laik bai em i gat sampela pren em i ken toktok wantaim ol, o ol i ken helpim em long i go autim tok. Taim i gat ol dispela lain i stap bilong helpim ol oltaim, dispela bai i traim bel bilong yumi, yumi laikim tru ol brata o nogat. (2 Korin 8:8) Nogut yumi tingim bikpela taim na strong yumi mas lusim long helpim ol dispela brata sista na yumi surik long ol. Yumi mas pilim tru hevi bilong ol na yumi mas kirap na helpim ol, na long dispela rot yumi kamapim klia olsem yumi gat pasin sori Kristen.
Tok Bilong God i Gat Strong
12 Taim man i lusim kaikai, i no longtaim na strong bilong em bai pinis. Orait, i gat narapela rot tu na Jehova i save givim strong long yumi—em i save givim planti kaikai bilong spirit long yumi. (Aisaia 65:13, 14) Em i givim wanem ol kaikai bilong spirit long yumi? Nambawan samting tru, em Baibel. (Matyu 4:4; skelim wantaim Hibru 4:12.) Olsem wanem dispela inap helpim yumi long kisim bek strong? Taim ol hevi bilong yumi i kirap long pinisim strong bilong yumi, yumi ken kaunim stori bilong ol hevi i bin painim ol man na meri bilong bipo ol i bin i stap gut long God. Ol i stap gutpela piksa tru long pasin bilong holimpas bilip, tasol ol i man tasol, “wankain olsem yumi.” (Jems 5:17; Aposel 14:15) Ol wankain hevi i bin painim ol olsem i save painim yumi. Yumi ken tingim hevi bilong sampela.
13 Taim meri bilong Abraham i dai, Abraham i krai sori moa yet long em, maski em i bilip olsem meri bilong em bai kirap bek. (Stat 23:2; skelim wantaim Hibru 11:8-10, 17-19.) Devit i tanim bel, tasol em i pilim tru ol rong bilong em na em i ting em i no gutpela man inap long mekim wok bilong Jehova. (Song 51:11) Moses i ting em i no inap mekim gut wok bilong em. (Kisim Bek 4:10) Epafroditus i bel hevi taim ol brata i harim olsem em i gat bikpela sik na em i no inap mekim bikpela wok moa long “wok bilong Krais.” (Filipai 2:25-30) Pol i mas wok strong tru long daunim sin i stap long skin bilong em. (Rom 7:21-25) Yuodia na Sintike em tupela sista long kongrigesen Filipai na God i bin makim ol long spirit holi, tasol i gat sampela hevi i stap namel long tupela. (Filipai 1:1; 4:2, 3) Nau yumi save, ol dispela gutpela man na meri ol i gat ol hevi i wankain olsem bilong yumi, tasol ol i no les na lusim wok bilong Jehova. Na Jehova i no les na lusim ol. Em nau, dispela save i strongim bel bilong yumi, a?
14 Bilong helpim yumi long kisim strong long tok bilong em long Baibel, Jehova i mekim wok long lain wokboi i gat gutpela tingting long givim kaikai long yumi ‘long taim em i makim.’ (Matyu 24:45) Inap longtaim pinis, dispela wokboi i bin mekim wok long nius Wastaua na Kirap! bilong sambai long tok i tru bilong Baibel na tokaut olsem Kingdom bilong God tasol inap pinisim hevi bilong ol man. Na inap olsem planti yia pinis, ol dispela nius i bin kamapim planti tok bilong Baibel i stori long ol hevi i kamap long sindaun bilong ol man, na ol hevi insait long famili, na ol kain kain bel hevi, em ol i save painim sampela long lain bilong God tu. Bilong wanem ol i kamapim ol kain tok olsem long ol dispela nius? Ol i kamapim bilong helpim ol manmeri i gat ol dispela kain hevi na bai ol i ken kisim strong long tok bilong Baibel na dispela tok i ken strongim bel bilong ol. Tasol ol dispela kain tok bilong ol dispela nius i save helpim yumi olgeta long save gut long ol hevi i wok long painim ol brata sista bilong yumi. Olsem bai yumi inap bihainim gut tok bilong Pol, em i tok: “Strongim bel bilong ol man i save pret na long helpim ol man i no strong. Na yupela i mas isi isi long olgeta man.”—1 Tesalonaika 5:14.
Ol Elda i Olsem ‘Ples Hait Long Taim Bilong Bikpela Win’
15 Jehova i givim narapela samting tu long yumi bilong helpim yumi taim yumi les na i no gat strong moa—em ol elda bilong kongrigesen. Profet Aisaia i tok long ol olsem: “Ol wan wan bikman [olsem elda] bai i helpim gut ol manmeri i kam bilong kisim helpim [long] ol. Ol bai i stap olsem ol ples hait ol manmeri i ken i go na hait long en long taim bilong bikpela win na ren. Na bai ol i stap tu olsem wara i ran i go long ples drai na olsem bikpela ston i haitim san long ples drai.” (Aisaia 32:1, 2) Olsem na ol elda i gat wok long bihainim dispela pasin Jehova i bin tok profet long ol bai mekim. Ol i mas i stap olsem man bilong mekim gut bel bilong ol man na bai ol i ken kisim nupela strong, na ol i mas amamas long “helpim ol arapela long karim hevi bilong ol.” (Galesia 6:2) Ol i ken mekim olsem wanem?
16 Olsem yumi tok pinis, taim man i les na i no gat strong moa, sampela taim em i ting em i no gutpela man inap long em i ken beten. Orait, ol elda i ken mekim wanem? Ol i ken beten wantaim em na beten bilong helpim em. (Jems 5:14) Taim em i harim ol i beten askim Jehova long helpim em long save, Jehova na ol narapela tu ol i laikim em tru, dispela bai mekim gut bel bilong em. Taim man i gat hevi na em i harim elda i beten strong, dispela inap strongim bel bilong em. Dispela inap givim tingting long em na em bai ting sapos ol elda i bilip olsem Jehova bai harim beten ol i mekim bilong helpim em, orait em tu inap bilip olsem.
17 Jems 1:19 i tok: “Yupela olgeta i mas putim yau kwik long harim tok, tasol yupela i no ken hariap long mekim toktok.” Bilong helpim ol dispela manmeri long kisim bek strong, ol elda i mas putim yau long tok bilong ol na pilim hevi bilong ol. Ating sampela insait long kongrigesen ol i karim sampela hevi em ol i no inap stretim long dispela taim nau yumi stap long en, olsem na i no gat wok long wanpela i mas traim stretim dispela hevi. Bilong helpim ol, i mas i gat wanpela man ol i ken toktok wantaim em na em i ken putim yau long tok bilong ol—em i no toktok long ol i mas ting olsem wanem long dispela hevi, na em i no skelim tok bilong ol olsem ol i stap long kot.—Luk 6:37; Rom 14:13.
18 Yupela ol elda, sapos yupela i putim yau kwik long harim tok, dispela inap helpim yu na bai yu no putim bikpela hevi moa antap long dispela brata o sista. Olsem: Sapos em i bin lusim sampela miting o em i slek liklik long autim tok, yu ting yu mas tokim em olsem em i mas wok strong moa long autim tok, o em i mas go oltaim long miting? Tru, ating sampela taim i olsem. Tasol yu save gut long hevi bilong em? Em i gat sampela sik i givim hatwok long em? Nau sampela wok bilong em insait long famili i senis? I gat sampela samting moa i givim hevi long em na em i hatwok long karim? Yu mas tingim dispela: Ating bel bilong em i gat tok pinis long em i no inap mekim bikpela wok.
19 Orait, olsem wanem yu inap helpim dispela brata o sista? Putim yau long tok bilong em pastaim—nogut yu kirap kwik na tokim em long ol samting em i mas mekim. (Sindaun 18:13) Long pasin bilong gutpela tingting, givim sampela gutpela askim long em bilong kamapim ol tingting i stap long bel bilong em, olsem ‘pulim i kam antap.’ (Sindaun 20:5) Na taim em i kamapim ol tingting na hevi bilong em, yu no ken sakim—yu mas kisim tingting long en. Ating yu mas tokim em olsem Jehova i save tingim yumi na em i save, sampela taim yumi no inap mekim bikpela wok. (1 Pita 5:7) Taim ol elda i mekim pasin sori olsem long ol manmeri i no gat strong moa, bel bilong ol bai “i kisim malolo.” (1 Pita 3:8; Matyu 11:28-30) Orait, taim bel bilong ol i kisim malolo olsem, ating i no gat wok long man i mas tokim ol long wok strong long autim tok; bel bilong ol yet bai kirapim ol long mekim wok bilong Jehova inap tru long skel bilong ol.—Skelim wantaim 2 Korin 8:12; 9:7.
20 Tru tumas, nau yumi stap long taim bilong bikpela hevi tru, winim olgeta taim bipo. Yumi wok long i kam klostu long pinis bilong taim bilong las de na ol hevi bilong dispela graun bilong Satan i wok long i go bikpela moa. Olsem na yumi no ken lusim tingting olsem Satan i wokabaut olsem wanpela laion na em i wetim yumi i les na i no gat strong moa, na nau em inap holimpas yumi olsem abus bilong em. Yumi ken tenkyu tru long Jehova i save strongim ol man i no gat strong moa! Olsem na yumi mas mekim wok long olgeta samting em i givim long yumi bilong strongim yumi long mekim wok bilong em, i olsem em i givim strongpela pul bilong tarangau long yumi. Ol manmeri nogut bilong dispela taim nau, klostu bai ol i pinis, olsem na em i no taim bilong lusim dispela resis bilong winim prais—em laip i stap oltaim oltaim.—Hibru 12:1.
Wanem Bekim Bilong Yu?
◻ Taim yumi beten, yumi ken ting Jehova bai harim na em bai mekim wanem?
◻ Lain brata Kristen bilong yumi ol inap strongim yumi olsem wanem?
◻ Olsem wanem Tok Bilong God i save helpim yumi long kisim bek strong?
◻ Ol brata sista em strong bilong ol i pinis, ol elda i ken mekim wanem bilong helpim ol long kisim bek strong?
[Askim Bilong Stadi]
1, 2. Jehova i save givim wanem samting long ol man i bilip long em? Nau bai yumi stori long wanem samting?
3, 4. (a) Jisas i tokim ol disaipel long mekim wanem? (b) Taim yumi beten long Jehova, yumi ken ting em bai mekim wanem?
5. (a) Yumi mas mekim wanem tupela bikpela samting na bai beten bilong yumi i gat strong? (b) Sapos yumi hatwok long daunim wanpela pasin i no stret, yumi ken beten olsem wanem? (c) Sapos yumi beten oltaim na yumi no les, na yumi kamapim stret samting yumi laik beten long en, dispela bai kamapim klia wanem samting?
6. Olsem wanem na yumi ken ting Jehova bai harim beten bilong yumi, maski yumi ting yumi no gutpela man inap long yumi i ken beten?
7. (a) Jehova i givim wanem narapela samting long yumi bilong helpim yumi long kisim bek strong? (b) Wanem save inap strongim yumi?
8. (a) Wanem sampela stori i kamapim klia olsem lain brata bilong yumi ol inap helpim na mekim gut bel bilong yumi? (b) Olsem wanem wanpela “gutpela pren” i bin helpim o strongim yu?
9, 10. (a) Olsem wanem yumi ken mekim pasin sori i go bikpela moa insait long lain brata bilong yumi? (b) Husat i mas i gat sampela gutpela lain bilong bung wantaim ol? (c) Yumi ken mekim wanem bilong strongim bel bilong ol man i gat hevi?
11. Ol man i gat hevi, ating i gat wanem ol samting yumi mas helpim ol long en?
12. Olsem wanem Baibel i save helpim yumi long kisim bek strong?
13. Wanem ol stori long Baibel i kamapim klia olsem ol man na meri i stap gut long God long bipo ol i gat ol wankain hevi olsem bilong yumi?
14. (a) Jehova i mekim wok long wanem samting bilong helpim yumi long kisim strong long tok bilong em long Baibel? (b) Bilong wanem nius Wastaua na Kirap! i bin kamapim stori bilong ol hevi i kamap long sindaun bilong ol man, na insait long famili, na ol kain kain bel hevi i save painim man?
15. Aisaia i mekim wanem tok profet long ol man i mekim wok elda? Olsem na ol elda i gat wanem wok?
16. Ol elda i ken mekim wanem bilong helpim wanpela em i ting em i no gutpela man inap long em i ken beten?
17. Bilong wanem ol elda i mas putim yau long tok bilong ol brata sista na pilim hevi bilong ol?
18, 19. (a) Sapos elda i putim yau kwik long harim tok, olsem wanem dispela inap helpim em na bai em i no putim bikpela hevi moa antap long brata o sista i gat hevi? (b) Wanem gutpela samting i save kamap taim ol elda i mekim pasin sori long man i no gat strong moa?
20. Liklik taim nau na ol manmeri nogut bilong dispela taim bai pinis, olsem na yumi mas tingting strong long mekim wanem?
[Piksa long pes 17]
Taim yumi laik singautim sampela i kam kaikai wantaim yumi, yumi no ken lusim tingting long ol brata sista i stap bel hevi na yumi gat wok long strongim bel bilong ol
[Piksa long pes 18]
Ol elda i ken beten askim Jehova long helpim ol man i no gat strong na bai ol i ken save, Jehova na ol brata i save laikim tru ol