Stretpela Pasin i Save Litimapim Nem Bilong Wanpela Lain
TAIM ren i kam daun inap sampela de, yumi save amamas tru taim yumi kirap long moningtaim na lukim san i lait na skai i klin tru, a? Graun i kisim pinis nupela strong, na nau ol gras samting bai kru na kamap bikpela. Bipo God Jehova i bin mekim tok piksa long dispela samting bilong makim ol gutpela blesing ol man i kisim taim stretpela king i bosim graun. Jehova i tokim King Devit: “King i mas i stap aninit long God na bosim ol manmeri long stretpela pasin. Sapos em i mekim olsem, orait ol manmeri bai i amamas long em olsem ol i save amamas long san i lait gut long moning na i no gat klaut i pasim lait bilong en. Na olsem ol i amamas long san i mekim gras i lait bihain long ren i pinis.”—2 Samuel 23:3, 4.
Tok bilong God i kamap tru long taim pikinini bilong Devit, em King Solomon, i bosim ol man long stretpela pasin. Baibel i stori olsem: “Taim Solomon i stap king, olgeta manmeri long olgeta hap bilong Juda na Israel, ol i sindaun gut klostu long gaden wain na diwai fik bilong ol, na i no gat wanpela samting nogut i kamap long ol.”—1 King 4:25.
Israel bilong bipo i lain bilong God stret. Em i givim ol lo bilong em long ol na em i tokim ol, sapos ol i bihainim tok bilong em, em bai ‘i givim biknem long ol na bai ol i winim olgeta arapela lain long graun.’ (Lo 28:1) I no stretpela pasin bilong ol Israel yet i givim biknem long ol, nogat. Stretpela pasin bilong Jehova yet i givim biknem long ol. Ol lo God i givim long ol i winim tru ol lo bilong ol narapela lain. Ol manmeri bilong Israel ol tu i gat sin na ol i save popaia olsem ol narapela lain. Olsem na Lo bilong Jehova, em i winim olgeta narapela lo, na pasin bilong ol Israel long bihainim stret dispela Lo, dispela yet i mekim na ol i kisim biknem namel long ol narapela lain. Taim ol i bihainim ol lo bilong Jehova, em i mekim gut long ol. Taim King Solomon i bosim Israel, em i pilim tru dispela samting. Olsem na em inap tok: “Sapos ol manmeri i bihainim stretpela pasin, bai kantri i gat biknem. Tasol sapos ol i mekim sin, bai ol i sem moa yet.”—Sindaun 14:34.
Tasol sori tru, planti taim lain Israel i bikhet long Jehova na dispela i daunim tru ol. Lain Israel olgeta i kisim bikpela sem. Dispela pasin bikhet i mekim na bihain Jehova i rausim ol olgeta na em i kisim wanpela nupela lain Israel bilong spirit.—Matyu 21:43.
Israel Bilong Spirit
Long wanpela miting bilong lain bilong bosim ol Kristen long Jerusalem, spirit holi i kirapim Jems, em wanpela Juda, long tokaut olsem “God i kam long ol man bilong ol arapela lain, bilong kisim ol lain manmeri bilong ol na mekim ol i kamap lain bilong [holim nem bilong, NW] em yet.” (Aposel 15:14) Aposel Pol i kolim dispela nupela lain Kristen olsem “lain Israel tru bilong God.” (Galesia 6:16) Pita i tokaut long wok bilong dispela lain, olsem: “God i makim yupela pinis, na yupela i stap . . . ol pris bilong lain bilong king. Yupela i stap lain manmeri i holi, em ol lain manmeri tru bilong God. Yupela i stap lain manmeri God i bin makim bilong em yet, bai yupela i ken tokaut long olgeta gutpela pasin em i bin mekim long yupela. Yupela i ken tokaut long em i bin singautim yupela long lusim tudak yupela i bin i stap long en, na em i bringim yupela i kam insait long lait bilong em, em lait i gutpela moa yet.” (1 Pita 2:9) Ol i lain bilong God stret, olsem na ol i mas i stap olsem lait namel long ol manmeri bilong dispela graun. Stretpela pasin bilong Jehova bai i givim nem long ol.—Filipai 2:15.
Wok bilong makim olgeta wan wan bilong dispela lain Israel bilong spirit em i kain olsem wok bilong digim graun na painim ol gutpela ston daimon. Ol i save kisim daimon long wanpela kain graun i gat ain long en, na taim ol i kamautim dispela graun, ol i save painim liklik hap daimon tasol long en, inap olsem 200 miligram long 3-pela ton graun. Bipo, taim ol i laik kamautim daimon, ol i save tanim dispela graun wantaim wara na kapsaitim antap long ol tebol i gat gris, na wara wantaim graun i ran long en. Daimon i save sakim wara, olsem na em i pas long gris na wara i wasim ol pipia graun i go. Pastaim ol daimon i gat ol liklik liklik buk long en, tasol taim ol i katim na polisim, em i save lait moa na lait bilong en i sut i go nabaut.
Daimon i no save pas long graun, na olsem tasol lain bilong Jehova i no save pas long ol samting bilong dispela graun—ol i stap narapela kain. (Jon 17:16) Taim ol i kam nupela long lait, ating ol i no lait gut. Tasol Tok Bilong Jehova na spirit bilong em i mekim na ol i kisim nupela pasin na ol i stap olsem lait namel long ol man bilong graun. Stretpela pasin bilong Jehova i givim biknem long ol namel long ol man bilong graun na ol i sutim gutpela lait bilong tok i tru bilong Kingdom i go nabaut long olgeta hap; i no stretpela pasin bilong ol yet i mekim dispela samting, nogat.
Tasol bihain liklik long yia 60 samting, sampela insait long kongrigesen i lusim bilip Kristen tru na kisim ol bilip giaman, na ol i paulim planti manmeri bilong kongrigesen. Dispela lain ol i gat nem Kristen, tasol ol i pas wantaim ol lain bilong dispela graun—ol i no i stap narapela kain, na i no inap man i ken luksave olsem ol i Kristen.
Long nau liklik hap lain Israel bilong spirit i stap yet long graun, ol i stap gut long Jehova na em i orait long ol. Ol i lusim pasin bilong dispela graun na ol i “rausim olgeta pasin doti bilong bodi na bilong spirit,” na ol i kamap klin olgeta long ai bilong God. (2 Korin 7:1) Ol i klin pinis na ol i bihainim stretpela pasin, na dispela i litimapim stretpela pasin bilong Jehova. Olsem na Jehova i mekim gut long ol na givim biknem long ol, winim olgeta narapela lain. Ol i wok strong tru long autim gutnius bilong Kingdom, olsem na planti manmeri tru bilong olgeta hap ol i kam long Jehova, na em i kisim ol tu i kam insait long lain bilong em.—KTH 7:9, 10.
Ol Man i Lukim Ol i Narapela Kain
Sampela taim ol bikman bilong graun i lukim pasin bilong ol wokman bilong Jehova na ol i litimapim nem bilong ol. Bipo, nambawan ofisa bilong sekyuriti long So Graun bilong Pretoria, long Saut Afrika, em i stori long pasin bilong ol Witnes Bilong Jehova, em ol i bilong kain kain lain na skin, na ol i kam bung long dispela ples bilong mekim kibung bilong ol long olgeta yia. Em i tok: “Olgeta i save mekim gutpela pasin na gutpela tok long ol narapela—dispela pasin ol i kamapim long ol dispela de, em i kamapim long ples klia olsem lain bilong yupela i stretpela lain, na olgeta i save sindaun wantaim olsem wanpela famili i stap amamas.”
Tasol i no long ol bikpela kibung tasol lain bilong Jehova inap bihainim stretpela pasin bilong liklik lain bilong em—ol i mekim tu long sindaun bilong ol. Olsem: Brens bilong Sosaiti Was Taua long Saut Afrika i kisim pas long wanpela meri long Johanisbek, em i tok: “Long wik i go pinis mi draivim ka i go na paus mani bilong mi i stap antap long ka. Em i pundaun long rot Yan Smats, na wanpela man long kongrigesen bilong yupela, em Mista R—, i kisim paus wantaim olgeta samting i stap insait long en, na em i telefon long mi na bekim ol dispela samting long mi. . . . Mi pilim tru stretpela pasin bilong em—long nau i no gat planti man i save mekim kain pasin olsem—na mi laik tok olsem kongrigesen bilong yu i mekim gutpela wok tru long putim ol lo em lain bilong yupela i save bihainim.”
Tru tumas, taim lain bilong Jehova i bihainim ol stretpela lo bilong em, ol i stap narapela kain long ol man bilong dispela graun. Ol i kamapim long ples klia stretpela pasin bilong Jehova, na dispela i save pulim ol man i gat gutpela bel na ol i kam insait long kongrigesen Kristen. Em pasin bilong yumi ol man, taim yumi lukim samting i klin na i stret olgeta, dispela i save pulim yumi i kam long en. Olsem: Bipo wanpela man i kam long wanpela miting bilong ol Witnes Bilong Jehova long Surik, long Swiselan, na em i tok em i laik insait long kongrigesen. Em i tok, ol i bin rausim susa bilong em long kongrigesen, long wanem, em i bin mekim pasin pamuk; na em i tok, em i laik insait long wanpela oganaisesen “i no save orait long pasin nogut.” Na wanpela bikpela buk (New Catholic Encyclopedia) i tokaut olsem ol Witnes Bilong Jehova i gat nem olsem “wanpela lain i save bihainim gutpela pasin tru, winim planti ol narapela lain.”
Stretpela pasin i save litimapim nem bilong man, tasol sin i save bagarapim gutnem bilong man, na em bai bagarapim moa yet gutnem bilong em sapos ol man long hap bilong em ol i save long dispela bikpela rong em i mekim. Na taim wanpela long kongrigesen i mekim bikpela rong, sampela taim kongrigesen i kisim bikpela sem long dispela. Bilong sambai long gutnem bilong kongrigesen, ol manmeri i stap gut long kongrigesen ol i ken kamapim long ol man olsem kongrigesen i bin givim tok long dispela man bilong stretim em, na ol i mekim long pasin marimari, i stret wantaim ol lo bilong Baibel. Sapos wanpela i mekim rong na em i no tanim bel, ol bai rausim em long kongrigesen.—1 Korin 5:9-13.
Bilong Wanem Ol i Rausim Sampela?
Tru, ol i save rausim sampela tausen manmeri long kongrigesen Kristen long olgeta yia, tasol em i liklik hap tasol bilong dispela bikpela lain Witnes i stap long olgeta hap bilong graun, klostu ol inap 5 milion. Bilong wanem ol i mas mekim olsem long wanpela insait long kongrigesen Kristen? Wanpela samting kongrigesen i save tingim, em wanem kain rong dispela man i bin mekim. Tasol wanpela bikpela samting tru ol i mas tingim i olsem: Dispela man i pilim tru bikpela rong em i bin mekim na em i tanim bel, o nogat? Sapos tru bel bilong em i bagarap stret long dispela rong em i bin mekim, na em i beten strong na askim Jehova long lusim dispela rong em i bin mekim long Em, na em i bin askim ol wasman bilong kongrigesen long helpim em, ating ol bai helpim em long kamap gutpela gen long ai bilong Jehova, na em i ken i stap yet insait long kongrigesen.—Sindaun 28:13; Jems 5:14, 15.
Sapos wanpela pikinini i pas gut wantaim papa, tasol bihain em i mekim wanpela samting papa i bel hevi long en, tupela wantaim i mas kirap kwik long stretim dispela samting na kamap wanbel gen. Na yumi tu, taim yumi dediket long Jehova yumi kamap wanbel wantaim em. Olsem na taim yumi mekim wanpela samting na Jehova i bel hevi long en, yumi mas kirap kwik na painim rot bilong kamap wanbel gen wantaim Papa bilong yumi long heven.
Gutpela tru, sampela manmeri em kongrigesen i bin rausim ol, ol i pilim tru tok piksa bilong pikinini i bin lusim papa. Long dispela tok piksa Jehova i olsem wanpela gutpela Papa em i redi long kisim bek wanpela man i bin mekim rong na i tanim bel, sapos dispela man i baut na i askim God long lusim rong bilong em. (Luk 15:11-24) Rot bilong kam bek long Jehova na kongrigesen Kristen i olsem: Man i mas pilim tru rong bilong em na tanim bel na lusim dispela pasin nogut em i bin mekim. Sampela man bilong mekim rong, bel bilong ol i bagarap stret long dispela rong ol i bin mekim, na dispela i kirapim ol long tanim bel na mekim ol samting bilong kam bek insait long gutpela kongrigesen Kristen. Taim ol i mekim olsem, ol i pilim tru tok bilong Jehova long Aisaia 57:15.
Tasol Satan i no laik bai ol man i kam bek long Jehova na em i ken lukautim ol long pasin sori. Olsem na bilong pasim rot bilong ol, Satan i laik giaman na mekim olsem God i no ken lusim rong bilong ol man. Tasol ofa bilong Krais Jisas em inap tru long karamapim rong bilong ol man i bin tanim bel—em inap karamapim tu sin bilong “olgeta manmeri i stap long graun,” em ol i bin kisim long papamama. (1 Jon 2:1, 2) I gat wanpela sin tasol em ofa bilong Krais i no save karamapim—em dispela sin man i mekim long spirit holi bilong God; long laik bilong em yet em i bikhet na sakim ol wok em spirit bilong God i mekim, olsem sin bilong Judas Iskariot na planti saveman bilong lo na ol Farisi.—Matyu 12:24, 31, 32; 23:13, 33; Jon 17:12.
Bihainim Stretpela Pasin Bilong Jehova
Long 1919, Jehova i bin kisim bek hap lain bilong Israel bilong spirit, na em i wok long givim biknem moa yet long ol, winim ol narapela lain bilong graun. Tasol i no olsem ol yet i gutpela man; Jehova i mekim olsem, long wanem, ol i daun long ol lo bilong em. Olsem na planti milion bilong “ol arapela sipsip” bilong Krais ol i kam bung wantaim lain Israel bilong spirit na i stap olsem poroman tru bilong ol. (Jon 10:16) Pasin bilong ol dispela manmeri i givim biknem long Jehova namel long ol man bilong dispela graun ol i no bihainim liklik ol stretpela lo bilong God. Bipo wanpela nius bilong Saut Afrika (Personality) i tok: “I olsem ol Witnes Bilong Jehova i gat planti gutpela pasin moa yet, na ol i no gat sampela pasin nogut.”
Bilong holim yet dispela gutnem namel long ol man i givim baksait long God, olgeta wan wan man na meri insait long kongrigesen Kristen ol i mas bihainim klinpela stretpela pasin long ai bilong Jehova long olgeta taim. Baibel i save tok piksa long ol klinpela samting tru bilong makim oganaisesen bilong Jehova long heven. Long tok piksa em i olsem wanpela naispela meri tru, na em i pasim san olsem klos bilong em, na mun i stap aninit long lek bilong em. (KTH 12:1) Baibel i tok piksa long Nupela Jerusalem i olsem wanpela taun holi i naispela tru. (KTH 21:2) God i givim “naispela waitpela klos” long meri bilong Krais, “em klos i klin tru na i lait moa yet.” (KTH 19:8) Na dispela lain planti manmeri tru ol i pasim “ol longpela waitpela klos.” (KTH 7:9) Ol man i laikim stretpela pasin, taim ol i lukim wanpela oganaisesen i gat klinpela stretpela pasin, dispela i save pulim ol i kam long en. Tasol oganaisesen bilong Satan i no klin liklik. Baibel i tok piksa long ol lotu bilong en i olsem wanpela pamukmeri, na ol man i stap ausait long taun holi ol i olsem samting i doti.—KTH 17:1; 22:15.
Jehova i tok promis long givim laip oltaim long ol stretpela man. Ol manmeri insait long kongrigesen ol i bihainim stretpela pasin bilong Jehova ol inap abrusim bagarap taim dispela pasin nogut bilong graun i pinis. Long Sindaun 1:33, God i tok promis olsem: “Ol manmeri i putim yau gut long tok bilong mi, bai ol i stap gut . . . na bai ol i no pret, long wanem, ol i save, samting nogut i no inap kamap long ol.”
Em bai gutpela tru taim Krais Jisas, em Man i winim Solomon, em i bosim dispela nupela taim long stretpela pasin na long pasin bilong pret long Jehova! (2 Pita 3:13) Bai i olsem tulait pinis long moningtaim, taim san i kamap na lait bilong en i sut i go na skai i klin tru, no gat liklik hap sno long en. Olgeta manmeri long graun bai i sindaun gut na i stap bel isi, i olsem ol i sindaun aninit long gaden wain na diwai fik bilong ol yet. Stretpela lain long graun bai i mekim graun i kamap gutpela tru, na i stap bilong ol bai i stret wantaim laik bilong God long dispela graun, na dispela bai i litimapim nem bilong God bilong yumi, Jehova, i go inap oltaim oltaim.—Maika 4:3, 4; lukim tu Aisaia 65:17-19, 25.
[Piksa Kredit Lain long pes 26]
Garo Nalbandian