Ol i Painim Pinis Bel Isi Long Taim Nogut Bilong Pait

PIKSA long skin bilong dispela nius em i bilong bikpela pait i kamap long Bosnia na Hetsagovina. Olsem wanem? Bel isi inap i stap long kain ples olsem? Em inap. Tru, ol lain bilong lotu long dispela kantri, olsem Katolik, Isten Otodoks, Muslim, ol i pait bilong kisim graun, tasol planti manmeri ol i laik tru long bel isi i ken kamap, na sampela i painim pinis dispela gutpela samting.

Wanpela famili, nem bilong ol Djorem, ol i bin sindaun long Sarayevo, na ol i Witnes Bilong Jehova. Maski i gat pait na pasin birua long dispela taun, ol i save go oltaim long haus bilong ol man na autim gutnius bilong Kingdom bilong God long ol. (Matyu 24:14) Bilong wanem ol i mekim olsem? Long wanem, ol i save pinis, dispela Kingdom em i wanpela samting tru na em i kamap pinis long heven, na dispela Kingdom tasol inap kamapim gutaim na bel isi long graun. Ol Witnes Bilong Jehova i bilip tru long dispela samting aposel Pol i kolim olsem gutnius bilong ol man bai stap wanbel. (Efesus 2:17) Tasol gutpela wok bilong Bozo na Hena Djorem i mekim na nau planti manmeri i wok long painim bel isi long Bosnia na Hetsagovina.

Bel Isi Tru Bai Kamap Bihain

I gat sampela stori moa bilong dispela famili Djorem. Tasol pastaim yumi ken stori long tupela narapela marit nau ol i bilip tru long Kingdom bilong God. Nem bilong tupela, em Artur na Arina. Tupela wantaim ol liklik pikinini man bilong tupela i bin sindaun long wanpela hap bipo Rasia i bosim. Tasol bihain bikpela pait i kamap na Artur i insait long dispela pait. Tasol i no longtaim na em i kirap askim skin bilong em yet olsem: ‘Bilong wanem mi pait long ol dispela man ol i bin sindaun klostu long mi?’ Orait em i lusim dispela kantri, na maski planti hevi i painim em wantaim famili bilong em, bihain ol i kamap long kantri Estonia.

Bihain Artur i raun long Sen Pitasbek (long Rasia) na em i bungim ol Witnes Bilong Jehova, na em i pilim tru ol tok em i lainim long Kingdom bilong God. Laik bilong Jehova i olsem: Liklik taim nau na Kingdom bilong Em tasol bai i bosim ol man bilong graun. (Daniel 2:44) Long dispela taim bihain, bel isi bai stap long olgeta hap bilong graun, na i no gat pait moa bai kamap namel long ol lain bilong wanpela kantri o namel long ol narapela narapela kantri. Aisaia i tok profet long dispela taim olsem: “Olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting [olsem olgeta man] long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”​—⁠Aisaia 11:⁠9.

Wanpela Witnes i soim Artur long piksa i stap long wanpela buk i save kamapim tok bilong Baibel na piksa i makim dispela gutpela taim bai kamap long graun, na Artur i tok, bipo em i bin sindaun long kain gutpela ples olsem. Tasol nau pait i bagarapim tru dispela ples. Orait nau long Estonia ol Witnes Bilong Jehova i stadi wantaim Artur na famili bilong em long Baibel na ol i wok long kisim sampela save moa long Kingdom bilong God.

Bel Isi Namel Long Pait

Song 37:37 i tok: “Yu tingting long man i no gat asua long wanpela samting, na lukim stretpela man. Man i save sindaun isi wantaim ol arapela manmeri, lain bilong en bai i stap oltaim.” Na man i no gat asua na em i stretpela man long ai bilong God, em bai i stap bel isi nau long dispela taim tu​—⁠i no long bihain tasol. Olsem wanem em inap i stap olsem long nau? Orait yumi ken tingim stori bilong wanpela man nem bilong em Paul.

Paul i save sindaun long wanpela kem bilong ol ranaweman long saut-wes Itiopia, tasol em i bilong wanpela kantri i stap klostu. Long kantri bilong em, em i bin bungim wanpela Witnes Bilong Jehova i wok long wanpela kampani bilong kisim bensin, na dispela man i givim wanpela buk long em i kamapim ol tok bilong Baibel, nem bilong en Tok i Tru i Bringim Man Long Laip Oltaim.a Bihain Paul i no bungim moa dispela Witnes, tasol em i wok long stadi gut long dispela buk. Orait bikpela pait i kamap insait long kantri na nau em i ranawe i go long wanpela kem bilong ol ranaweman long Itiopia. Bihain em i kirap na tokim ol narapela man long ol tok em i bin lainim. Wanpela liklik lain i bilip olsem dispela tok em tok i tru. I no longtaim na ol i kirap na autim dispela tok long ol narapela man long kem.

Paul i raitim pas i go long nambawan ofis bilong Sosaiti Wastaua na em i askim ol long helpim em. Ol i salim wanpela Witnes i kam, em i stap long Adis Ababa, na em i kirap nogut long 35 manmeri ol i wetim em na ol i redi long kisim sampela save moa long Kingdom bilong God. Em i stretim rot long sampela i ken i kam oltaim na helpim ol.

Olsem wanem yumi ken tok, ol man kain olsem Paul ol inap i stap bel isi? Tru, ol i gat planti hevi long sindaun bilong ol, tasol ol i bilip na wetim God i helpim ol. Taim ol i kisim hevi long ol pait na pasin birua bilong dispela graun, ol i bihainim tok bilong Baibel olsem: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela.” Olsem na bel bilong ol i stap isi​—⁠i no olsem planti man long nau, bel bilong ol i no stap isi liklik. Tok aposel Pol i bin givim long kongrigesen Filipai i stret tru long ol, em i tok: “God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” Tru tumas, ol i pilim olsem ol i stap bel isi wantaim Jehova, em i God bilong givim bel isi long man.​—⁠Filipai 4:⁠6, 7, 9.

Bel Isi Long Nau

King bilong Kingdom bilong God em Krais Jisas, na em i kamap King pinis. Baibel i kolim em olsem “King bilong kamapim gutpela sindaun na bel isi.” (Aisaia 9:⁠6) Wanpela profet bilong bipo i tok long em olsem: “King bilong yupela bai i mekim olgeta kantri i lusim pasin bilong pait na i stap wanbel, na bai em i bosim olgeta manmeri . . . stat long bikpela solwara na i go inap long solwara i stap longwe. Na i stat long bikpela wara Yufretis na i go long hapsait longwe tru.” (Sekaraia 9:10) Ol kain tok olsem long Baibel i bin kirapim wanpela man, nem bilong em José, long senisim tru pasin bilong em.

Bipo José i stap long haus kalabus. Em i wanpela paitman bilong daunim gavman, na ol polis i bin holim em taim em i redim bom bilong tromoi long wanpela polis-barek. Em i ting, long rot bilong pait tasol em inap subim gavman long helpim sindaun bilong ol man long kantri bilong em. Taim em i stap kalabus, ol Witnes Bilong Jehova i kirap stadi wantaim meri bilong em long Baibel.

Taim José i lusim pinis kalabus, em tu i kirap stadi long Baibel, na liklik taim bihain tok bilong Song 85:8 i stret long em: “Mi putim yau long tok God, Bikpela i autim. Em i tok long givim bel isi . . . long mipela.” Tasol laspela hap tok bilong dispela ves i toksave olsem, “sapos mipela i no i go bek long pasin nogut bipo mipela i mekim.” Olsem na sapos man i laik painim bel isi Jehova i givim long man, em i no ken mekim ol samting long tingting bilong em yet tasol, o sakim laik bilong Jehova.

Nau José wantaim meri bilong em ol i mekim wok Kristen bilong autim tok bilong Baibel. Ol i save helpim ol man long tingim Kingdom bilong Jehova tasol inap stretim ol hevi bilong graun, em bipo José i laik stretim long rot bilong ol bom em i bin wokim. Nau tupela i bilip tru long tok bilong Baibel, em i tok: “Bikpela bai i helpim mipela long sindaun gut na ol samting mipela i mekim bai i kamap gutpela.” (Song 85:12) José i go lukim dispela polis-barek bipo em i laik bagarapim. Em i go bilong mekim wanem? Em i laik toktok wantaim ol famili bilong dispela hap long Kingdom bilong God.

Ol Man Bilong i Stap Isi

Long Song 37:​10, 11, Baibel i tok: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” Em gutpela samting tru yumi ken wet long en!

Tasol tingim dispela: Jehova bai givim dispela bel isi long “ol manmeri i daunim nem bilong ol yet.” Ol man i laik painim bel isi, ating pastaim ol i mas lain long i stap isi. Dispela tok i sutim stret Keith, em wanpela man i stap long Nu Silan. Ol i tok Keith em i ‘strongpela masolman stret,’ na em i gat strongpela pasin tu na em i man bilong pait na tok pait wantaim ol man. Em i insait long wanpela lain olsem raskol, na em i sindaun long wanpela haus i gat strongpela banis na tripela bikpela dok i raun insait long banis na bai ol man i no ken i go insait. Meri bilong em, em mama bilong 6-pela pikinini bilong em, em i bin katim marit.

Taim Keith i bungim ol Witnes Bilong Jehova, gutnius i wok strong tru long bel bilong em. I no longtaim na em wantaim ol pikinini bilong em i go long ol miting wantaim ol Witnes. Em i katim longpela gras bilong em na em i kirap autim tok bilong Kingdom long ol poroman bilong em bilong pastaim. Sampela namel long ol, ol tu i kirap na stadi long Baibel.

Keith i kirap na mekim wankain pasin olsem ol sampela milion manmeri bilong olgeta hap em ol i gat stretpela bel​—⁠em i bihainim tok bilong aposel Pita, olsem: “Sapos man i laik bai laip bilong en i kamap gutpela, na em i laik lukim gutpela taim, orait em i no ken mekim tok nogut na em i no ken mekim ol tok giaman. Em i mas givim baksait long pasin nogut, na bihainim gutpela pasin tasol. Em i mas wok long kamap wanbel wantaim ol arapela manmeri, na em i mas strong long bihainim dispela pasin.” (1 Pita 3:​10, 11) Meri bilong Keith bilong pastaim em i orait long maritim em gen, na nau Keith i lain long “kamap wanbel wantaim ol arapela manmeri.”

Bel isi Jehova i save givim long man em i bin lukautim laip bilong planti man, olsem wanpela man bipo em i man bilong pilai spot na mama i bin karim em long hap bipo Rasia i bosim. Dispela man i bin winim sampela prais long spot Olimpik, tasol bihain em i bel hevi long sampela pasin bilong dispela spot na em i kirap long dring na kisim drak. Orait insait long 19 yia bihain, planti samting i painim em, olsem em i kalabus 3-pela yia long Saibiria, na em i hait long sip na go long Kanada, na ol dispela drak i mekim na tupela taim klostu em i dai. Orait em i beten askim God long helpim em long painim as tru bilong i stap bilong em. Em i kirap stadi long Baibel wantaim ol Witnes Bilong Jehova i save mekim tok ples Rasia, na ol i helpim em long painim bekim bilong ol askim bilong em. Nau dispela man i lain pinis long i stap bel isi wantaim God na em yet, olsem sampela milion man moa i bin mekim.

Kirap Bek Long Matmat

Orait nau yumi ken stori gen long Bozo na Hena Djorem long Sarayevo. Tupela i gat wanpela liklik pikinini meri i gat 5-pela krismas, nem bilong em Magdalena. Long mun Julai i go pinis, 3-pela i lusim haus bilong mekim gen wok bilong ol long autim tok, na wanpela bom i pairap na kilim i dai 3-pela wantaim. Orait, olsem wanem long dispela gutpela taim na bel isi tupela i bin tokim ol narapela man long en taim ol i autim tok? Dispela bom i bin kilim ol i dai, em i makim olsem dispela gutpela taim na bel isi ol i autim tok bilong en i no inap i stap oltaim?

Nogat, i no olsem. Nau long dispela taim yumi stap long en, bagarap i save painim ol man. Ol bom i save bagarapim ol man. Na sampela i save dai long sik o long sampela bagarap i painim ol. Planti ol i save go lapun na ol i dai. Ol man i kisim bel isi God i save givim long man, ol dispela kain hevi inap painim ol tu, tasol ol i save, sapos ol i dai i gat gutpela samting inap painim ol bihain.

Jisas i tok promis long gutpela pren bilong em, Marta: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip yet.” (Jon 11:25) Bozo na Hena Djorem i bilip long dispela tok olsem olgeta narapela Witnes Bilong Jehova. Na tupela i bilip olsem sapos ol i dai, ol bai kirap bek long graun taim i gat bel isi tru i stap long en. God Jehova bai “mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠KTH 21:⁠4.

Klostu long taim Jisas i dai, em i bin tokim ol disaipel bilong em: “Bel isi bilong mi, em mi givim long yupela. . . . Yupela i no ken bel hevi na tingting planti.” (Jon 14:27) Yumi amamas long dispela famili Djorem em ol i gat dispela kain bel isi, na bai ol i kisim moa yet long taim ol i kirap bek. Yumi amamas long olgeta manmeri ol i save lotuim Jehova, em God bilong givim bel isi long ol man. Ol kain man olsem, tingting na bel bilong ol i stap isi. Ol i stap bel isi wantaim God. Ol i wok long kamapim pasin bilong i stap bel isi wantaim ol man. Na ol i bilip olsem bel isi bai kamap long graun long bihain. Yes, ol i painim pinis bel isi, maski ol i stap long taim nogut bilong pait. Tru tumas, olgeta man i lotuim God long spirit na long tok i tru, ol i save stap bel isi. Mipela laik bai yu tu inap painim dispela kain bel isi.

[Futnot]

[Ol Piksa long pes 7]

Ol i painim pinis bel isi, maski ol i stap long taim nogut bilong pait