Rot Bilong Painim Amamas Long Kamapim Disaipel
TAIM wanpela man i kamap wanwok bilong God em bai kisim bikpela amamas tru. Long nau, wanpela wok bilong God em wok bilong bungim ol man i laikim stretpela pasin na kisim ol i kam insait long kongrigesen Kristen na skulim ol long bihainim pasin Kristen long nau na bai ol inap kisim laip long nupela taim.—Maika 4:1-4; Matyu 28:19, 20; 2 Pita 3:13.
Ol Witnes Bilong Jehova long Latin Amerika i bin amamas tru long lukim wan milion manmeri i kamap disaipel bilong Krais Jisas kirap long 1980 i kam inap long nau. Long dispela hap, planti man i save bilip long tok bilong Baibel na daun long en, olsem na sampela painia na misineri i bin helpim planti man long dediket long Jehova. Ol i gat planti save long dispela wok, olsem na ol i ken stori long yumi long bikpela amamas ol i kisim long wok bilong kamapim disaipel. Ating sampela tok ol i kamapim inap helpim yu long kisim amamas long kamapim disaipel long ples yu stap long en.
Luksave Long Husat i Olsem “Sipsip”
Taim Jisas i bin salim ol aposel long autim tok, em i bin tokim ol olsem: “Sapos yupela i go insait long wanpela taun o wanpela ples, orait yupela i mas painimaut gut, wanem man bilong dispela ples em i gutpela na stretpela man.” (Matyu 10:11) Taim yu go autim tok long ol man, olsem wanem yu inap luksave long man yu ken helpim em long samting bilong spirit? Edward, em i autim tok long olgeta de inap planti yia pinis, winim 50 yia, em i tok: “Ol i kamapim long ples klia dispela samting long ol askim ol i mekim, na taim yu bekim askim bilong ol long rot bilong Baibel ol i amamas.” Na Carol i tok: “Taim wanpela man i kamapim hevi bilong em long mi, i olsem em i singaut long yumi mas helpim em. Mi wok long painim sampela tok long ol buk na nius bilong Sosaiti Was Taua bilong helpim em. Planti man, taim ol i pilim olsem yumi gat laik tru long helpim ol, ol bai kirap stadi long Baibel.” Tasol sampela taim i hatwok long luksave olsem husat i gat gutpela bel. Luis i tok: “Sampela man pastaim i luk olsem ol i laik save tru long Baibel tasol ol i no laik save tru, tasol sampela man pastaim i luk olsem ol i birua long tok i tru tasol taim ol i harim tok bilong Baibel ol i senis.” Planti man long Latin Amerika i daun long tok bilong Baibel, olsem na em i tok moa, “Mi luksave long ol man mi ken helpim ol long ol samting bilong spirit olsem: Taim mi kamapim wanpela tok bilong Baibel long ol, ol i amamas long bilip long en.” Taim yu helpim wanpela “gutpela na stretpela man” olsem long kamap strong long spirit, bai yu amamas tru na belgut. Long wanem rot yu ken helpim kain man olsem?
Kirapim Baibel-Stadi
Planti taim nambawan gutpela rot bilong helpim ol man long kisim save long Baibel, em long rot bilong ol buk na buklet bilong Baibel em “wokboi i gat gutpela tingting” i bin redim. (Matyu 24:45) Olsem wanem yu inap helpim ol man long laikim tru ol kain buk olsem? Edward i tok: “Olgeta man i gat narapela narapela kain sindaun, na pasin, na tingting, olsem na mi redi long senisim pasin bilong mi long kirapim wanpela stadi.” Yu no ken bihainim wankain pasin bilong kirapim stadi long olgeta man.
Long sampela man yu mas toktok long sampela tok bilong Baibel pastaim na bihain yu ken kirapim stadi long wanpela buk. Tasol tupela marit i mekim wok misineri i tok: “Long namba wan taim mipela i toktok wantaim man, mipela i save tokim ol long mipela i laik stadi wantaim ol.” Na wanpela Witnes i bin helpim pinis 55 man long dediket, em i tok: “Planti taim mi kirapim Baibel-stadi long rot bilong toktok long sampela tok bilong buk Yu Inap i Stap Oltaim Long Paradais Long Graun.” Sampela man i no laik stadi long wanpela buk, tasol sampela i amamas tru long stadi long wanem wanem samting ol i ting bai helpim ol. Olsem na taim yu tokim ol long ol i ken stadi long Baibel, no gat pe, ol i amamas. Sampela misineri i stori long ol man long Baibel-stadi na ol i tok: “Mi laik soim yu olsem wanem mipela i save mekim stadi. Sapos yu laikim, yu ken stadi. Sapos nogat, em laik bilong yu.” Taim yu tokim ol man olsem, ol i no pret long kirap long stadi.
Wanpela misineri i bin helpim planti man i sot long ol samting bilong skin na ol i no skul gut, em i tok: “Mi pilim olsem ol liklik nius i gutpela tru bilong kirapim Baibel-stadi.” Maski ol i mekim wok long wanem buk, ol dispela tisa i save mekim wok long olgeta de, ol i wok strong long kamapim tok bilong Baibel. Carola i tok: “Long namba wan stadi mi save mekim wok long ol piksa tasol na long 5-pela skripsa samting. Long dispela rot ol man i ken lain gut long ol bikpela tok na ol i no pilim olsem i hatwok long kisim save long Baibel.”
Helpim Ol Long Laikim Yet Stadi
Ol man i amamas taim ol i pilim olsem ol i wok long kamap strong, olsem na Jennifer i tok: “Mekim stadi long pasin ol i ken amamas long en. No ken mekim planti narapela narapela tok.” Gutpela yu mekim stadi long olgeta wik—dispela bai helpim Baibel-stadi long pilim olsem em i wok long kamap strong. Wanpela painia salim em i kamap bikpela long hap bilong bus, em i stori olsem em i bikpela samting long mekim ol tok i no hatwok long kisim insait bilong en na long kamapim gut ol bikpela tok, na long dispela rot ol man i no gat bikpela skul ol tu inap long kamap strong. Em i tok: “Long ples bilong mi, mipela i planim pikinini kaikai na bihain mipela mas givim wara long en. Sapos mipela i givim planti wara tumas, graun i kamap strong na pikinini kaikai i no inap kamap bikpela na em i dai. Na i wankain tu sapos yu stori long planti tok tumas. Baibel-stadi bai ting i hatwok tumas long stadi na em bai lusim.” Bilong kamap strong Baibel-stadi i mas lain long stadi long wanpela tok long ol wan wan stadi, maski em i laik save long planti samting. Jisas i bin tokim ol aposel bilong em olsem: “Mi gat planti tok moa mi laik givim yupela, tasol yupela i no inap kisim nau.”—Jon 16:12.
Narapela rot bilong helpim ol Baibel-stadi long laikim stadi, em yu mas kirapim ol long tingim yet ol tok bilong Baibel taim yu lusim ol pinis. Yolanda i tok: “Kamapim wanpela askim, na no ken bekim. Givim sampela homwok long ol, olsem kaunim sampela hap bilong Baibel o skelim sampela tok bilong kisim save long wanpela samting ol i bin tingim.”
Kisim Pasin Bilong Laikim Tru Jehova
Amamas bilong yu bai kamap bikpela sapos yu helpim ol Baibel-stadi bilong yu long ‘bihainim tok ol i kisim, ol i no ken harim nating tasol.’ (Jems 1:22) Yu ken helpim ol long wanem rot? Pasin bilong laikim tru Jehova i mas kirapim ol Kristen tru long mekim wok bilong Jehova. Pedro, em bilong Meksiko, em i tok: “Ol man i no inap laikim wanpela man ol i no save long em. Olsem na taim mi kirapim wanpela Baibel-stadi mi save skulim ol long nem bilong God long Baibel, na mi wok long painim rot bilong kamapim ol gutpela pasin bilong Jehova.” Taim yu toktok wantaim Baibel-stadi, yu ken strongim em long pilim tru gutpela pasin bilong Jehova taim yu kamapim bel bilong yu olsem yu laikim tru Jehova. Elizabeth i tok: “Olgeta taim mi save toktok long gutpela pasin Jehova i mekim long ol man. Taim mi mekim Baibel-stadi, na mi lukim wanpela naispela plaua, o pisin, o pikinini pusi i pilai, bai mi tokaut olsem Jehova i bin wokim ol dispela gutpela samting.” Na Jennifer i tok: “Stori long nupela taim God i tok promis long kamapim olsem em i samting tru. Askim ol, ol i laik mekim wanem long nupela taim.”
Taim wanpela man i lain na kisim save long Jehova, na em i tingim gut ol dispela samting, dispela bai go insait tru long bel bilong em na kirapim em long mekim wok. Tasol em i no inap tingim gut ol samting sapos em i no holim tok long tingting. Olsem na bihain long olgeta stadi, toktok gen long 3-pela o 4-pela bikpela tok, na dispela bai helpim Baibel-stadi long tingim gen ol tok. Planti tisa bilong Baibel i save tokim ol nupela sumatin long raitim sampela skripsa na sampela sotpela tok long baksait bilong Baibel. Wanpela misineri bilong Inglan i kamapim narapela gutpela samting bilong tingim gen sampela tok, em i tok: “Mi askim Baibel-stadi long olsem wanem dispela stadi i bin helpim em. Dispela i helpim em long tingim gut ol pasin na lo Jehova i laik bai yumi bihainim.”
Wanpela gutpela Witnes, em i winim namba 3 klas bilong Skul Gileat, em i tok: “Taim yumi skulim man, bel bilong yumi i mas kirap tru. Ol stadi bilong yumi i mas pilim olsem yumi bilip tru long ol tok yumi skulim ol long en.” Bilip i bin mekim na yu amamas long “bihainim tru tok,” na sapos yu kamapim long ples klia dispela samting, ol tu bai amamas long bihainim.—Jems 1:25.
Wanpela Witnes i bin helpim planti man long lotuim Jehova, em i tok: “Mi pilim olsem ol man i stap klostu moa long God sapos mi helpim ol long save olsem Jehova i save harim beten bilong ol. Mi stori long ol long ol samting i bin kamap long mi yet, olsem: Taim mi na poroman bilong mi i bin kamap long nupela ples wok bilong mipela olsem painia, mipela i gat liklik kaikai bilong gaden na bata tasol, na no gat mani. Mipela kaikai dispela olgeta kaikai long nait na mipela i tok, ‘Em nau, no gat moa kaikai long tumora.’ Mipela beten long Jehova long dispela samting, na mipela i go slip. Long moningtaim wanpela Witnes bilong dispela hap i kam na i tok, ‘Mi beten askim Jehova long salim sampela painia i kam. Nau mi inap autim tok wantaim yupela long de olgeta. Tasol haus bilong mi i stap longwe long hap bilong bus, olsem na mi mas kaikai wantaim yupela long belo na mi bringim dispela kaikai bilong yumi tripela i ken kaikai.’ Em i bringim bikpela hap abus bilong bulmakau na planti kaikai bilong gaden. Oltaim mi tokim ol stadi bilong mi olsem Jehova i no lusim yumi sapos yumi painim Kingdom pastaim.”—Matyu 6:33.
Helpim Ol
Bilong kamapim disaipel bilong Krais, i no inap yumi stadi tasol wantaim ol long Baibel. Wanpela misineri i bin mekim wok olsem wasman bilong raun inap planti yia, em i tok: “Stap wantaim ol. Taim yu pinisim stadi, no ken lusim ol kwiktaim. Sapos i gutpela, stap wantaim ol inap liklik hap taim.” Elizabeth i tok: “Mi gat laik tru long helpim ol, nogut bihain bai laip bilong ol i lus. Planti taim mi tingting planti long ol olsem ol i pikinini bilong mi.” Sampela narapela Witnes i tok: “Go lukim ol taim ol i sik.” “Taim yu stap klostu long haus bilong ol, olsem long taim bilong autim tok, go lukim ol liklik na larim ol i bungim sampela narapela Witnes.” Eva i tok: “Putim gut yau long tok bilong ol na bai yu kisim save long stori bilong ol long taim ol i yangpela na long sindaun bilong ol. Dispela samting inap mekim na ol man i harim tok i tru, o em inap pasim ol long kamap strong long tok i tru. Kamap pren bilong ol, na bai ol i no pret long toktok wantaim yu long ol hevi bilong ol.” Na Carol i tok: “Yumi mas tingim tru Baibel-stadi, long wanem, tok i tru bai senisim pasin bilong em, na long dispela as sampela famili na pren inap lusim em. Em gutpela sapos stadi i save haus bilong yumi i stap we na em i no pret long kam lukim yumi long wanem wanem taim em i laikim.” Helpim em long tingim kongrigesen i olsem nupela famili bilong em.—Matyu 10:35; Mak 10:29, 30.
Yolanda i tok: “Oltaim yu mas helpim ol. Sindaun wantaim ol long ol miting, na helpim ol long ol pikinini bilong ol.” Skulim ol nupela long olsem wanem ol i ken lainim gut pikinini bilong ol, na kamap klin moa, na helpim ol long redim sampela bekim bilong miting, na mekim tok long Skul Bilong Wok Autim Tok. Dispela olgeta samting i olsem hap wok bilong kamapim disaipel. Narapela sista i tok: “Em i bikpela samting long skulim ol nupela long autim tok. Sapos yu no skulim gut ol, sampela bai pret long autim tok, na bai ol i no amamas long mekim wok bilong Jehova, na ol i no ken sanap strong.” Olsem na skulim ol gut long autim tok long ol haus, na long mekim gobek, na long kirapim Baibel-stadi. Bai yu amamas tru long lukim stadi bilong yu i wok long kamap strong, long wanem, yu helpim em na soim rot long em.
Strongim Ol Long Sanap Strong
Wanpela sista i save gut long kamapim disaipel i tok: “Planti stadi i no strong tumas long stadi taim ol i baptais pinis.” Olsem na tisa na Baibel-stadi i mas save, wanpela Kristen i baptais nupela em i no kamap strong yet long samting bilong spirit. Em i mas wok strong yet long strongim bilip bilong em, na long laikim moa yet ol lo bilong God, na long givim bel tru long Jehova. Em i bikpela samting long strongim stadi long kisim pasin bilong stadi gut long haus, na long dispela rot em i ken wok yet long kamap strong.—1 Timoti 4:15.
Yu mas helpim nupela long kamap strong na kamap wanpela man insait long lain manmeri bilong God i gat pasin bilong singautim ol brata long kam long haus bilong em. Ating yu mas stiaim tingting bilong em long ol samting em i mas mekim sapos hevi i kamap wantaim wanpela brata i no gutpela olgeta. (Matyu 18:15-35) Yu mas helpim em long kamap gutpela tisa, na em yet i ken painim sampela save long Baibel. Wanpela misineri i tok: “Bihain long baptais wanpela Baibel-stadi bilong mi i laik kamap gutpela tisa moa, olsem na em i tokim mi olsem, ‘Mi mas mekim wanpela nupela stadi long wik antap, tasol mi laik bai yu helpim mi long tingim gen ol samting mi bin stadi long en long kirap bilong buk. Olsem wanem? Yu inap stadi gen wantaim mi long ol dispela sapta? Gutpela sapos yumi ken stadi long wanpela wanpela sapta, na mi inap raitim sampela tok bilong ol skripsa na sampela tok piksa, na bihain mi ken mekim wok long ol dispela tok long stadi bilong mi.’ Em i kamap gutpela tisa tru, na long wanpela kibung 4-pela stadi bilong em i kisim baptais.”
Kamapim Disaipel i Gutpela Wok
Pamela i tok: “Taim yumi kamapim disaipel, yumi kamapim sampela man moa i litimapim nem bilong Jehova. Ol man i kisim tok i tru ol inap kisim laip oltaim. Mi amamas tru long skulim ol man long tok i tru—em i gutpela samting tru! Yu inap lukim stadi i wok long kamap strong, na em i senisim pasin bilong em, na winim ol bikpela hevi. Sapos Jehova i no givim strong long ol, ol i no inap winim ol dispela hevi. Planti bilong ol dispela man nau ol i laikim tru Jehova ol i kamap gutpela pren bilong mi.”
Wanpela misineri bilong Jemani i tok: “Taim mi tingim ol man mi bin helpim ol long kamap disaipel, mi tingim sampela pastaim ol i man bilong pret, tasol ol i kamap gutpela wokman bilong God. Mi kirap nogut long dispela. Mi lukim sampela man ol i bin winim ol bikpela hevi tru, na mi save Jehova i bin helpim ol long mekim olsem. Mi lukim sampela famili pastaim ol i bruk, tasol nau ol i stap wanbel na pas gut wantaim—ol pikinini i amamas na papamama i mekim gut wok bilong lukautim ol. Mi lukim sampela man ol i mekim gutpela wok na litimapim nem bilong Jehova. Dispela em i amamas bilong ol man i save mekim wok bilong kamapim disaipel.”
Tru tumas, taim yumi stap wanwok bilong God Jehova na insait long mekim wok bilong kamapim ol disaipel, yumi save amamas tru. Ol dispela stori bilong ol misineri na painia i kamapim ples klia dispela samting. Yu tu inap kisim dispela amamas sapos yu bihainim ol dispela gutpela tok bilong ol long kamapim disaipel na yu givim bel tru long mekim wok. Na taim Jehova i givim blesing long yu bai yu kisim bikpela amamas moa yet.—Sindaun 10:22; 1 Korin 15:58.