Bihainim Tok Promis Yu Bin Mekim Long De Bilong Marit!

DE BILONG marit em i de bilong amamas tru. Na em i wanpela bikpela taim bilong tingim gut. Man na meri i mekim wanpela bikpela tok promis em bai mekim sampela samting long ol long olgeta taim ol i stap laip. Ol manmeri i kam bung bilong lukim marit, ol i stap olsem witnes bilong dispela bikpela tok promis, tasol God Jehova em i nambawan Witnes bilong dispela tok promis.

Baibel i no tok ol i mas bihainim wanpela kain pasin bilong wokim marit. Tasol yumi save God yet i as bilong marit, olsem na long taim bilong mekim tok bilong marit long pasin bilong lotu, man na meri i save mekim wanpela tok promis bilong marit. Inap planti yia pinis ol Witnes Bilong Jehova i save mekim tok promis bilong marit olsem: “Mi, —⁠— mi laik kisim yu, —⁠— bilong marit long yu, na yu ken i stap (meri/man) bilong mi, na mi ken sori long yu na laikim yu (Meri: na daun long yu), olsem lo bilong God i tok na i stap long Baibel Holi na i bilong (meri/man) marit i Kristen em i mas bihainim, na yu ken i stap (meri/man) bilong mi inap long olgeta taim mitupela i stap wantaim long graun, olsem God i makim long lo bilong em long marit.”a

Samting Bilong Tingim Gut

Sapos yu tingting long marit, i gutpela sapos paslain long de bilong marit yu tingim gut dispela tok promis na ol samting yu mas mekim bilong bihainim. Solomon i tok: “Tingting gut pastaim, na bihain yu ken kirap na toktok. Na long taim yu toktok long God, yu no ken mekim planti toktok nating.” (Saveman 5:⁠2) Orait, olsem wanem sapos yu marit pinis? Dispela tok promis yu bin mekim long ai bilong Jehova em i bikpela samting tru, olsem na sapos yu tingim gut oltaim, dispela bai helpim yu. Olsem wanem? Yu save bihainim dispela tok promis yu bin mekim? Ol Kristen i save tingim ol tok promis bilong ol i bikpela samting. Solomon i tok moa olsem: “Sapos yu mekim wanpela promis long God, orait yu no ken wet longtaim bilong mekim ol samting yu bin promis. . . . Sapos yu no inap bihainim promis bilong yu, orait mobeta yu no mekim promis. Nogut yu promis nating na mekim sin. Sapos yu bin mekim wanpela promis, orait bihain yu no ken tokim pris olsem, yu no bin tingting gut na yu mekim promis.”​—⁠Saveman 5:​4-6.

Orait, yumi skelim ol wan wan hap bilong tok promis bilong marit, na dispela bai helpim yu long pilim tru dispela tok promis.

“Mi laik kisim yu”: Em namba wan tok bilong dispela tok promis. Em i makim olsem yu yet yu bin pasim tok long tingting bilong yu olsem yu laik marit, na nau yu yet yu gat wok long bihainim.

Baibel i no putim lo long ol Kristen i mas marit. Krais Jisas yet em i stap singel, na em i tok, sapos man inap i stap singel, i gutpela em i ken i stap olsem. (Matyu 19:​10-​12) Tasol klostu olgeta aposel bilong Jisas ol i marit. (Luk 4:​38; 1 Korin 9:⁠5) Olsem na man o meri bai marit o nogat, em i samting bilong em yet long tingim. Baibel i no givim tok orait long wanpela man i ken subim narapela long marit, nogat tru.

Olsem na taim yu pasim tok long marit, em i laik bilong yu yet. Ating yu yet yu bin makim dispela poroman yu laik marit long em. Taim yu kolim tok promis bilong marit na yu tok, ‘Mi laik kisim yu —⁠—,’ yu kisim dispela poroman wantaim ol gutpela pasin bilong em​—⁠tasol yu kisim em wantaim ol pasin kranki tu bilong em.

Bihain ating bai yu lukim sampela pasin moa bilong poroman bilong yu em pastaim yu no bin save long en. Sampela taim bai yu bel hevi long dispela. Tasol Baibel i tok, “yumi olgeta man yumi bin mekim sin.” (Rom 3:​23) Olsem na ating yu mas stretim sampela tingting bilong yu bambai yu ken sindaun gut wantaim poroman bilong yu. Tru, ating em i hatwok long mekim, na sampela taim bai yu les, tasol yu mas tingting: Yu bin mekim dispela tok promis bilong marit long ai bilong Jehova. Em inap helpim yu na bai marit bilong yu i ken wok gut.

“Bilong marit long yu, na yu ken i stap (meri/man) bilong mi”: Long namba wan marit i bin kamap bipo, taim God Jehova i givim Iv long Adam olsem meri bilong em, God i tok, “tupela i kamap wanpela bodi tasol.” (Stat 2:​24; Matyu 19:​4-6) Olsem na marit i save pasim man na meri wantaim olsem wanpela bodi tasol, na i no gat narapela pasin inap pasim gut ol man olsem. Taim yu marit, nau yu gat nupela kain poroman. Yu bin kisim em olsem “meri” o “man” bilong yu. I no gat narapela kain pasin poroman o pasin i stap insait long famili i wankain olsem dispela. Maski yu mekim wanpela pasin o tok samting long wanpela pren bilong yu o wanblut samting, ating dispela i no inap kamapim wanpela hevi namel long yupela, tasol em inap bagarapim tru bel bilong poroman marit bilong yu.

Tingim wanpela tok bilong Baibel long Efesus 4:​26, em i tok: “Sapos bel bilong yupela i hat, orait yupela lukaut. Nogut yupela i mekim sin. Nogut yupela i belhat yet i stap na san i go daun.” Ating taim sampela hevi i bin kamap namel long yu na ol famili na pren bilong yu, yu no bin stretim hariap. Tasol yu pas moa yet wantaim poroman marit bilong yu, winim ol dispela narapela man. Olsem na sapos wanpela hevi i kamap namel long yu na poroman marit bilong yu na yu no stretim kwik, dispela inap bagarapim gutpela pasin namel long yutupela long pas gut wantaim olsem wanpela bodi tasol.

Olsem wanem? Taim wanpela kros i kamap namel long yutupela, yu save larim dispela kros i stap na i olsem samting i wok long skrapim bel bilong yutupela? Yu save larim ol liklik kros o hevi i stap inap long sampela de? Bilong bihainim tok promis bilong yu, orait taim wanpela hevi i kamap namel long yutupela, yu no ken larim dispela hevi i stap inap long narapela de​—⁠kwiktaim yu mas stretim na kamap wanbel gen wantaim poroman bilong yu. Bilong mekim olsem, narapela i mas lusim rong bilong narapela na lusim tingting long en, na yu mas save olsem yu tu yu gat ol pasin kranki na yu save popaia.​—⁠Song 51:5; Luk 17:​3, 4.

“Mi ken sori long yu”: Man i laik marit, em i tok promis olsem em bai ‘sori long’ meri bilong em. Na em dispela kain pasin bilong givim bel long narapela i bin kirapim tupela long pasim tok long marit. Tasol dispela pasin bilong bel i kirap long laikim tru narapela, dispela tasol i no inap. Taim Kristen i tok promis long sori na laikim poroman bilong em, dispela em i wanpela strongpela samting tru.

Efesus 5:25 i tok: “Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios.” Pasin bilong Jisas long laikim tumas kongrigesen, em i no wankain olsem pasin bilong man long laikim tumas meri. Dispela tok “laikim tumas” long dispela hap bilong Baibel, ol i kisim long wanpela tok olsem a·gaʹpe, em i makim wanpela kain pasin sori em lo i stiaim man long mekim. Dispela skripsa long Baibel i tok, ol man marit i mas laikim tumas meri bilong ol long olgeta taim na i no ken pinis long laikim ol.

Man i no ken holim dispela kain tingting olsem “Mi laikim yu, long wanem, yu laikim mi,” nogat. Man i mas tingim meri pastaim​—⁠em i no ken tingim ol samting bilong em yet pastaim. Na meri tu i mas mekim wankain pasin long laikim man bilong em. (Filipai 2:⁠4) Sapos yu wok long kisim pasin bilong sori tru long poroman bilong yu, dispela bai helpim yu long bihainim tok promis yu bin mekim long de bilong marit.

“Laikim”: Wanpela buk dikseneri i tok, dispela tok “laikim” i olsem ‘amamas tru long em, o kamapim bel bilong yu olsem yu laikim em.’ Em nau, long tok na long pasin bilong yu, yu mas kamapim long ples klia olsem yu laikim tru poroman bilong yu! Meri i gat laik tru long man i mekim pasin i kamapim klia olsem em i laikim em tru. Ating man i save lukautim em gut long ol samting bilong skin, tasol dispela i no inap. Sampela meri marit ol i gat planti kaikai na gutpela haus, tasol ol i stap bel hevi tru, long wanem, man bilong ol i no tingim ol o mekim gut long ol.

Tasol sapos meri marit i save tru olsem man bilong em i sori long em na laikim em tumas, em bai amamas. Na i wankain tu long man marit. Dispela kain pasin sori i stap namel long man na meri bilong em, em bai kamap strong moa sapos tupela i kamapim bel bilong ol olsem ol i laikim tru poroman. Long Song Bilong Solomon, yangpela man bilong lukautim sipsip em i tokim yangpela meri bilong em: “Yu meri bilong mi na yu lewa tru bilong mi, yu laikim mi tumas na mi amamas tru. Dispela laik bilong yu i swit tumas, na i winim swit bilong wain. Smel bilong sanda yu bilas long en i winim smel bilong olkain gutpela paura.”​—⁠Solomon 4:​10.

“Na daun long yu”: Inap planti handet yia pinis sampela man ol i bin mekim nogut long meri bilong ol na daunim ol tru. Long nau tu, olsem wanpela nius (World Health) i tok, “pasin bilong paitim meri i save kamap long olgeta kantri, maski ol i gat wanem kain sindaun o ol i maniman o rabisman. Long sampela lain, ol i ting i stret long man i ken paitim meri bilong em.” Tru, ating planti man i no save mekim olsem. Tasol i olsem planti man i no save tingim ol samting bilong ol meri. Olsem na planti meri i no save litimapim nem bilong ol man. Sampela ol i bin tok, “Mi save laikim man bilong mi, tasol mi no inap daun long em!”

Tasol God Jehova i tingim tru meri em i save daun long man bilong em, maski sampela taim man i mekim ol pasin kranki o i no mekim gut long em. Meri i save, God i givim wok o namba long man marit. (1 Korin 11:3; Efesus 5:​23) Olsem na pasin bilong daun long man bilong em, dispela em i hap wok bilong lotuim Jehova na bihainim tok bilong em. God i save tingim tru ol meri i stap aninit long em na ol i bihainim tok bilong em.​—⁠Efesus 5:​33; 1 Pita 3:​1-6; skelim wantaim Hibru 6:​10.

Meri i mas tingim gut man bilong em, na man i mas tingim gut meri bilong em, na pasin bilong man i mas kirapim meri long mekim olsem, na pasin bilong meri i mas kirapim man long mekim olsem. I olsem: Insait long marit, i no stret sapos narapela i mekim strongpela tok i sutim bel bilong narapela. Na taim yu toktok wantaim ol narapela, sapos yu mekim sampela tok i daunim poroman bilong yu, yu no mekim pasin sori long em o tingim gut em. Yu no inap helpim marit bilong yu sapos yu kamapim sampela pasin kranki bilong poroman bilong yu long ol narapela o stori long en long ol man. Na sapos yu kamapim ol dispela kain tok bilong tok pilai tasol, dispela tu i no stret liklik​—⁠em i kamapim klia olsem yu no tingim gut poroman bilong yu. Tok bilong Efesus 4:​29, 32 em i bilong man marit na meri marit tu i mas bihainim: “Yupela i no ken larim ol kain kain tok nogut i kamap long maus bilong yupela. Nogat. Gutpela tok tasol i mas kamap, inap long strongim ol man . . . Yupela i mas mekim gutpela pasin long ol arapela Kristen na givim bel bilong yupela long ol.”

“Olsem lo bilong God i tok na i stap long Baibel Holi”: God i laik bai yumi yet i ken tingim ol samting yumi laik mekim. Em i no laik putim planti planti lo bilong bosim ol samting long marit. Tasol em i laik helpim yumi, olsem na em i putim sampela lo bilong stiaim yumi.

Long nau planti buk i gat stori long marit, na planti man ol i gat tingting bilong ol yet long marit. Tasol yu mas lukaut! Planti buk i toktok long ol samting bilong marit, ol dispela tok i pait wantaim ol tok bilong Baibel.

Na yumi mas save, olgeta tupela tupela marit i no wankain. Yumi ken tingim ol hap ais i save pundaun long ples kol. Sapos yu sanap longwe liklik bai yu ting olgeta i wankain tasol, tasol nogat, ol i narapela narapela kain. Na i wankain tu long ol marit. Pasin bilong yu na pasin bilong poroman bilong yu, taim ol i bung wantaim, dispela i narapela kain long pasin bilong olgeta narapela marit. Olsem na taim ol narapela i kamapim tingting bilong ol long ol samting yu mas mekim long marit bilong yu, yu no ken hariap long bihainim. Ol man bilong graun i no inap kamapim sampela tok o lo i stret long olgeta wan wan marit, nogat!

Tasol olgeta tok bilong Baibel i tru na i stret long olgeta man i bihainim. Aposel Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru . . . na bilong stretim wokabaut bilong yumi.” (2 Timoti 3:​16; Song 119:151) Sapos yu kaunim Baibel na bilip long tok bilong en na bihainim long olgeta samting yu mekim, bai yu inap bihainim tok promis bilong marit yu bin mekim.​—⁠Song 119:105.

“Inap long olgeta taim mitupela i stap wantaim long graun”: Dispela i makim olsem tupela bai stap wantaim inap longpela taim. God i tok “man i save lusim papamama na i pas wantaim meri bilong en.” (Stat 2:​24) Jehova i laik bai yutupela i stap wantaim. Mekim wok bilong God wantaim. Stadi long Baibel wantaim. Toktok wantaim, sindaun wantaim, kaikai wantaim. Amamas long i stap wantaim!

Sampela marit ol i makim taim long olgeta de bilong toktok wantaim. Maski ol i marit inap planti yia pinis, dispela pasin bilong pas gut wantaim em i bikpela samting bilong helpim ol marit long i stap amamas wantaim.

“Olsem God i makim long lo bilong em long marit”: God Jehova yet i bin kamapim marit, na marit em i wanpela presen em i givim long yumi. (Sindaun 19:14) Sapos yu no bihainim ol lo bilong God long marit, dispela inap bagarapim amamas bilong yu insait long marit, na tu, bai yu no stap gut moa wantaim Man bilong wokim olgeta samting. Tasol taim man na meri bilong em i wok strong long kamap pren bilong Jehova, olsem ol i bihainim ol lo bilong em long marit, bai ol i stap isi wantaim ol narapela man, na tupela bai stap isi wantaim.​—⁠Sindaun 16:⁠7.

Yu no ken lusim tingting olsem Jehova em i nambawan Witnes long dispela tok promis yu bin mekim taim yu marit. Wok long bihainim dispela bikpela tok promis, na marit bilong yu bai litimapim nem bilong God Jehova na givim biknem long em!

[Futnot]

[Rait long pes 22]

Long sampela samting, ol marit i olsem ol hap ais i save pundaun. I olsem olgeta tupela tupela marit i wankain tasol, tasol nogat, ol i narapela narapela kain

[Kredit Lain]

Snow Crystals/Dover