Askim
Olsem wanem? Yumi mas truim olgeta strongpela tok promis yumi mekim long God?
Long Baibel, strongpela tok promis em wanpela tok promis man i mekim long God, olsem long mekim wanpela samting, o long mekim ofa, o mekim wanpela bikpela wok, o abrusim sampela samting i no olsem i brukim lo. Baibel i gat ol stori bilong ol strongpela tok promis ol man i mekim, olsem ol bai givim sampela samting bilong ol yet long God sapos em i helpim ol pastaim. Olsem Hana, em mama bilong profet Samuel, em i “mekim wanpela strongpela promis long Bikpela olsem, ‘Bikpela . . . sapos yu givim mi wanpela pikinini man, orait bai mi givim em long yu na bai em i ken i stap wokman bilong yu inap em i dai. Na bilong makim dispela, ol i no ken katim gras bilong en.’ ” (1 Samuel 1:11) Baibel i stori tu olsem ol strongpela tok promis em samting man i mekim long laik bilong em yet. Ol strongpela tok promis bilong Baibel i strongpela olsem wanem?
King Solomon bilong Israel long bipo i tok: “Sapos yu mekim wanpela promis long God, orait yu no ken wet longtaim bilong mekim ol samting yu bin promis.” Na em i tok moa: “Yu mas bihainim promis bilong yu. Sapos yu mekim promis long God na yu no bihainim dispela promis, orait dispela i no gutpela pasin. Sapos yu no inap bihainim promis bilong yu, orait mobeta yu no mekim promis.” (Saveman 5:4, 5) Lo God i givim ol Israel long rot bilong Moses, i tok: “Sapos yupela i mekim wanpela strongpela promis long God, Bikpela bilong yumi, orait yupela i mas inapim kwiktaim. Bai God i no lusim tingting long promis bilong yupela na sapos yupela i no inapim promis, yupela i gat asua long ai bilong God.” (Lo 23:21) Dispela i kamapim klia olsem pasin bilong mekim tok promis long God em i bikpela samting. I mas i gat gutpela as bilong mekim, na man i mas save em inap tru long bihainim tok promis em i bin mekim. Sapos em i no inap truim, orait i gutpela em i no ken mekim strongpela tok promis. Tasol olsem wanem? Yu mas bihainim olgeta tok promis?
Olsem wanem sapos wanpela i bin mekim strongpela tok promis na bihain em i painimaut olsem dispela tok promis i no stret wantaim laik bilong God? Olsem wanem sapos em i wanpela tok promis i gat sampela pasin bilong bungim lotu i tru wantaim pasin pamuk? (Lo 23:18) Yumi save, em i no ken bihainim dispela tok promis em i mekim. Na tu, aninit long Lo Bilong Moses, sapos wanpela meri i mekim strongpela tok promis, papa bilong em o man bilong em i ken katim dispela tok promis.—Namba 30:3-15.
Tingim tu sapos wanpela i mekim strongpela tok promis long God long i stap singel, tasol nau em i pilim olsem sapos em i bihainim dispela tok promis na em i no marit, bai bel bilong em i pulim em long mekim pasin pamuk. Yu ting em i mas strong yet long bihainim promis em i bin mekim? Bilong lukautim em yet, i gutpela sapos em i no bihainim dispela tok promis na bai em i no mekim pasin pamuk, na em i ken askim God long marimari long em na lusim rong bilong em. Em yet i mas tingim ol samting em bai mekim. Narapela i no inap makim wanem samting em i mas mekim.
Olsem wanem sapos wanpela i mekim strongpela tok promis na bihain em i luksave olsem em i no bin tingting gut pastaim na em i mekim? Em i mas truim yet dispela tok promis? I hatwok long Jepta i bihainim strongpela tok promis em i bin mekim long God, tasol em i bin mekim. (Hetman 11:30-40) Sapos wanpela i no truim strongpela tok promis bilong em, dispela inap mekim na God bai “belhat” na bagarapim ol samting em i bin hatwok long kisim. (Saveman 5:6) Sapos man i no ting em i bikpela samting long truim strongpela tok promis bilong em, bai God i no amamas long em.
Jisas Krais i tok: “Taim yupela i tok Yes, yupela i mas truim dispela tok Yes, na taim yupela i tok Nogat, yupela i mas truim dispela tok Nogat; long wanem, ol tok yupela i skruim long en i kam long dispela man nogut,” Satan. (Matyu 5:37, NW ) Ol Kristen i mas truim ol strongpela tok promis ol i bin mekim long God, na tu, ol i mas bihainim olgeta tok ol i mekim—long God na long ol man. Olsem wanem sapos Kristen i bin pasim tok wantaim narapela na pastaim em i ting i gutpela long mekim, tasol bihain em i skelim gut na em i luksave olsem samting em i tok promis long mekim i no gutpela? Em i no ken ting dispela em i liklik samting. Tasol em i mas toktok gut wantaim narapela em i pasim tok wantaim em, na ating narapela bai katim dispela tok tupela i bin pasim.—Song 15:4; Sindaun 6:2, 3.
Long ol strongpela tok promis yumi mekim na olgeta narapela samting tu, yumi mas i gat wanem tingting? Oltaim yumi mas strong long mekim ol samting bambai yumi ken pas gut wantaim God Jehova.
[Ol Piksa long pes 30, 31]
Hana i no gat tupela tingting long truim strongpela tok promis bilong em
[Ol Piksa long pes 30, 31]
Jepta i truim strongpela tok promis em i bin mekim, maski i hatwok tru long mekim olsem