Truim Tok Promis Bilong Yumi Long Olgeta De
1 Man bilong raitim Song, em Devit, i tokim Jehova: “Long olgeta de bai mi bihainim ol promis bipo mi tokim yu long en, na bai mi singim song bilong litimapim nem bilong yu.” (Sng 61:8) Devit i save, pasin bilong mekim tok promis, em samting man i mekim long laik bilong em yet. Tasol em i save tu, sapos em i mekim wanpela tok promis, bai em i gat wok long truim. Em i gat rot long truim ol tok promis bilong em long olgeta de, olsem na em i litimapim nem bilong Jehova.
2 Taim yumi dediket long Jehova, yumi bin tok promis long bihainim laik bilong em. Yumi bin daunim laik bilong yumi yet na wok bilong Jehova i kamap nambawan bikpela samting long i stap bilong yumi. (Lu 9:23) Olsem na long olgeta de yumi tu i mas bihainim tok promis bilong yumi. (Sav 5:4-6) Long olgeta wokabaut bilong yumi, yumi mas bihainim dispela tokaut yumi bin mekim taim yumi baptais, long wanem, yumi save, “long maus yumi save autim bilip bilong yumi na God i kisim bek yumi.” (Ro 10:10) Olsem na yumi mas autim gutnius. (Hi 13:15) Sindaun bilong yumi olgeta wan wan i narapela narapela, tasol long olgeta de yumi olgeta i mas tingim wok bilong autim gutnius em i bikpela samting.
3 Painim Rot Bilong Autim Tok Long Olgeta De: Taim yumi autim gutnius long ol narapela, yumi save amamas. Bilong mekim olsem long olgeta de, yumi mas painim rot bilong autim tok. Sampela i bin autim tok long ol wanwok, ol wanskul, ol wantok, o ol narapela ol i save bungim long olgeta de, na ol i bin kisim planti gutpela ekspiriens. Na yumi ken autim tok long telefon o raitim pas. Sapos yumi mekim olgeta dispela samting na yumi makim taim long autim tok long ol haus na mekim ol gobek, ating dispela bai opim rot long yumi kirapim Baibel-stadi na kisim bikpela amamas. Tru tumas, ating long olgeta de yumi inap painim rot bilong autim tok.
4 Wanpela sista i kirap long kaunim liklik buk Skelim Sampela Tok Bilong Baibel Long Olgeta De long taim bilong malolo long ples wok. Em i singautim wanpela meri wanwok long sindaun wantaim em na kaunim teks bilong de, na dispela i opim rot long kirapim Baibel-stadi wantaim em. Ol i save stadi 30 minit long olgeta de, inap faipela de long wik. Narapela wanwok i lukim ol i stadi olsem. Bihain em i tokaut em i wanpela brata i bin lusim wok autim tok. Pasin bilong sista long givim bel long autim tok i kirapim em na em i go lukim wanpela elda na bai em inap kirap gen long autim tok. Dispela sista i bin helpim tupela narapela, long wanem, long olgeta de em i save truim tok promis bilong em.
5 Taim yumi pilim tru long bel ol gutpela samting Jehova i bin mekim bilong helpim yumi, na yumi wok long truim dediket bilong yumi long olgeta de inap long skel bilong yumi, yumi save stap belgut na amamas. Olsem man bilong raitim Song, yumi tu inap tok: “God, Bikpela bilong mi, mi givim bikpela tenkyu long yu. Na mi laik litimapim biknem bilong yu oltaim oltaim.”—Sng 86:12.