Ol i Mekim Laik Bilong Jehova
Ol i Bihainim Laspela Tok Jisas i Givim Long Ol
LONG apinun bilong Nisan 14 long yia 33, Krais Jisas wantaim 11 gutpela aposel bilong em i stap long Jerusalem na ol i sindaun long tebol long wanpela rum antap. Jisas i save, klostu nau em i mas i dai, olsem na em i tokim ol: “Liklik taim tasol bai mi stap wantaim yupela.” (Jon 13:33) Long dispela taim Judas Iskariot i go pinis bilong stretim tok wantaim ol man nogut em ol i laik kilim i dai Jisas.
Jisas i pilim tru olsem taim bilong em i sot pinis. Em i save, liklik taim bai em i karim bikpela pen na hevi. Na Jisas i save tu olsem ol aposel bai lusim em long dispela nait stret. (Matyu 26:31; Sekaraia 13:7) Dispela em i laspela taim Jisas bai i gat rot bilong toktok wantaim ol aposel bilong em paslain long taim em i dai, olsem na yumi save, em bai toktok wantaim ol long ol bikpela samting tru.
“Yupela i Mas Mekim Olsem Bilong Tingim Mi”
Jisas i stap wantaim ol gutpela aposel na em i kamapim wanpela nupela samting i senis bilong Pasova bilong ol Juda. Aposel Pol i kolim olsem ‘kaikai bilong Bikpela.’ (1 Korin 11:20) Jisas i kisim wanpela bret i no gat yis, na em i mekim wanpela beten. Nau em i brukim bret na givim long ol aposel, na em i tok: “Yupela kisim na kaikai. Dispela em i bodi bilong mi.” Na em i kisim wanpela kap wain, na i tenkyu long God, na i givim long ol, na em i tok: “Yupela olgeta dring long dispela. Dispela em i blut bilong mi bilong mekim kontrak. Mi kapsaitim bilong tekewe sin bilong planti manmeri.”—Matyu 26:26-28.
Dispela samting Jisas i mekim i makim wanem samting? Olsem Jisas i makim, bret i olsem piksa na i makim bodi bilong em i no gat sin. (Hibru 7:26; 1 Pita 2:22, 24) Wain i makim blut bilong Jisas em i kapsaitim bambai God i ken lusim sin bilong ol man. Na blut bilong Jisas em i kapsaitim olsem ofa, em bai strongim nupela kontrak namel long God Jehova na 144,000 manmeri, bihain ol bai mekim wok king wantaim Jisas long heven. (Hibru 9:14; 12:22-24; KTH 14:1) Taim Jisas i singautim ol aposel long kisim dispela kaikai, em i makim olsem ol bai stap king wantaim em long Kingdom bilong heven.
Jisas i tingim dispela kaikai na em i tokim ol aposel: “Yupela i mas mekim olsem bilong tingim mi.” (Luk 22:19) Em nau, ol i mas mekim dispela Kaikai Bilong Bikpela long olgeta yia, olsem ol i bin mekim long Pasova. Dispela Pasova i bilong tingim taim Jehova i bin kisim bek ol Israel long kalabus long Isip, tasol Kaikai Bilong Bikpela i bilong tingim wanpela samting i bikpela moa—ol manmeri em ofa bilong Jisas inap baim bek ol, God bai i kisim bek ol long kalabus bilong sin na dai. (1 Korin 5:7; Efesus 1:7) Na ol man bilong kisim dispela bret na wain, taim ol i mekim olsem ol bai tingim gutpela wok tru ol bai kisim bihain, em ol bai stap king na pris long Kingdom bilong God long heven.—KTH 20:6.
Tru tumas, i dai bilong Krais Jisas em i nambawan bikpela samting i bin kamap long graun. Ol man i pilim tru dispela samting Jisas i bin mekim, ol i bihainim tok bilong em long dispela Kaikai Bilong Bikpela, olsem: “Yupela i mas mekim olsem bilong tingim mi.” Long olgeta yia ol Witnes Bilong Jehova i save mekim bung bilong tingim i dai bilong Jisas, na ol i mekim long de i stret wantaim Nisan 14. Long 1996 dispela de bai kamap long Epril 2, taim san i go daun pinis. Mipela laik singautim yu i kam long dispela bung bai kamap long wanpela Haus Kingdom i stap long hap bilong yu.
“Mi Givim Nupela Lo Long Yupela”
Jisas i kirapim dispela Kaikai Bilong Bikpela wantaim ol aposel bilong em, na em i laik givim sampela tok long ol tu, em laspela tok em bai givim long ol paslain long taim em i dai. Em i bin skulim ol gut, tasol i gat planti samting ol dispela man i mas lain yet long en. Ol i no pilim gut olgeta samting God i laik bai Jisas i mekim, o ol yet i mas mekim, o ol samting God bai mekim bihain. Tasol Jisas i no laik kamapim klia ol dispela samting long dispela taim. (Jon 14:26; 16:12, 13) Em i toktok wantaim ol long wanpela bikpela samting tru. Em i tok: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela.” Na Jisas i tok moa olsem: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:34, 35.
Olsem wanem dispela em i “nupela lo”? I olsem: Lo Bilong Moses i bin tok: “Yu mas laikim tru ol wantok olsem yu laikim yu yet.” (Wok Pris 19:18) Tasol Jisas i tokim ol aposel, ol i mas laikim tru ol narapela, na ol i mas redi long i dai bilong helpim ol brata Kristen. Tru, ol i no ken laikim tru ol narapela long taim bilong bikpela hevi tasol. Long olgeta taim ol disaipel bilong Krais Jisas i mas go pas long kamapim klia olsem em i laikim tru ol narapela—ol i mas helpim ol narapela long ol samting bilong spirit na ol narapela samting tu.—Galesia 6:10.
Long laspela nait bilong Jisas long graun, pasin sori i kirapim em long beten long God Jehova bilong helpim ol disaipel bilong em. Hap tok bilong beten i olsem: “Nau mi kam long yu, . . . tasol ol bai i stap long graun. Na Papa, yu holi na i no gat wanpela i olsem yu, yu ken lukautim ol long strong bilong nem bilong yu, em dispela nem yu bin givim long mi. Olsem na ol i ken i stap wanpela tru, olsem mitupela i stap wanpela tru.” (Jon 17:11) Tingim gut wanpela tok bilong Jisas insait long dispela beten: Em i beten askim Papa long ol disaipel bilong em i ken i stap wanbel. (Jon 17:20-23) Ol i mas laikim tru ol narapela long lain bilong ol olsem Jisas i bin laikim tru ol.—Jon 15:12.
Ol gutpela aposel ol i bihainim laspela tok bilong Jisas. Yumi tu i mas bihainim tok bilong em. Long dispela taim nogut bilong “las de,” pasin bilong laikim tru ol narapela na pasin wanbel namel long ol manmeri i lotu tru long God em i bikpela samting tru, winim olgeta narapela taim bipo. (2 Timoti 3:1) Tru tumas, ol Kristen tru i save bihainim ol tok bilong Jisas na laikim tru ol brata Kristen. Olsem na ol i save bihainim tok bilong Jisas long mekim Kaikai Bilong Bikpela.