Mekim Memorial Long Pasin i Stret

LONG Nisan 14, long yia 33, Jisas i kamapim bung bilong Memorial.a Em i mekim pinis Pasova wantaim 12-pela aposel bilong em long dispela nait yet, olsem na yumi inap save long de stret em i bin kamapim Memorial. Taim Jisas i rausim pinis Judas, em man bilong kamapim em long ol birua, Jisas i “kisim wanpela bret, na i tenkyu long God, na i brukim, na i givim long ol disaipel. Na em i tok, ‘Yupela kisim. Dispela em i bodi bilong mi.’ Na em i kisim wanpela kap wain, na i tenkyu long God, na i givim long ol. Na olgeta ol i dring long en. Na Jisas i tokim ol olsem, ‘Dispela em i blut bilong mi bilong mekim kontrak. Mi kapsaitim bilong helpim planti manmeri.’ ”​—⁠Mak 14:​22-​24.

Jisas i bin tokim ol disaipel long mekim bung bilong tingim i dai bilong em, long wanem, i dai bilong em i bikpela samting. (Luk 22:19; 1 Korin 11:​23-​26) Ofa bilong em tasol inap baim bek ol man long sin na dai ol i bin kisim long namba wan tumbuna bilong ol. (Rom 5:​12; 6:​23) Bret na wain Jisas i bin mekim wok long en, em i makim skin bilong em i no gat sin, na blut bilong em. Yumi save pinis long de Jisas i bin kirapim Memorial, olsem na long olgeta yia yumi inap mekim dispela bung long de i stret long dispela, olsem ol i bin mekim long Pasova bilong ol Juda. Tasol yumi mas mekim dispela bung long pasin i stret. Bilong wanem yumi mas mekim long pasin olsem?

Aposel Pol i tok, ol man i kisim bret na wain bilong Memorial, long olgeta taim ol i mekim dispela samting ol “i save tokaut long pen na i dai bilong Bikpela, inap long taim em i kam bek.” (1 Korin 11:26) Olsem na bikpela samting bilong Memorial, em dai bilong Jisas na ol samting dispela bai mekim long ol man. Dispela bung em i taim bilong tingting gut na tingim gutpela samting God i mekim bilong helpim yumi, na tingim tu olsem yumi mas tenkyu tru long Jehova na Pikinini bilong em. (Rom 5:8; Taitus 2:​14; 1 Jon 4:​9, 10) Olsem na Pol i toksave long yumi olsem: “Sapos wanpela man i mekim pasin i no stret long taim em i kaikai dispela bret bilong Bikpela na i dring long dispela kap bilong Bikpela, orait i olsem em i mekim nogut long bodi na blut bilong Bikpela yet, na em i gat asua long dispela pasin bilong en.”​—⁠1 Korin 11:⁠27.

Mekim Long Pasin i Stret

Yumi save, sapos yumi mekim sampela pasin i no stret long dispela bung o yumi mekim sampela pasin bilong lotu haiden, God i no ken amamas long yumi. (Jems 1:​27; 4:​3, 4) Olsem na yumi no ken mekim ol pasin olsem ol man i save mekim long taim bilong Ista. Bilong bihainim tok bilong Jisas long “mekim olsem bilong tingim [em],” yumi mas mekim Memorial long wankain pasin olsem Jisas i bin mekim taim em i kamapim dispela bung. (Luk 22:19; 1 Korin 11:​24, 25) Olsem na yumi no ken mekim ol bilaspasin em ol lotu i holim nating nem Kristen ol i bin skruim long dispela bung. Wanpela buk (New Catholic Encyclopedia) i tok: “Misa bilong nau i narapela kain tru long dispela bung em Krais wantaim ol Aposel bilong Em i bin mekim.” Ol lotu i gat nem Kristen ol i save mekim Misa planti taim insait long yia, na sampela i mekim long olgeta de, olsem na ol i lusim tru pasin Jisas i bin kirapim long mekim Memorial, na ol i mekim i kamap olsem wanpela samting i save kamap long olgeta taim na i no bikpela samting.

Pol i bin tokim ol Kristen bilong Korin long ol i no ken mekim pasin i no stret long kisim bret na wain bilong Memorial, na Pol i bin tok olsem long ol, long wanem, wanpela hevi i bin kamap insait long kongrigesen taim ol i mekim Kaikai Bilong Bikpela. Dispela kaikai em samting i holi, tasol sampela i mekim olsem em i samting nating. Ol i karim kaikai bilong ol i kam na ol i kaikai paslain o long taim bilong mekim dispela miting. Na sampela ol i kaikai na dring planti tumas, na dispela i mekim na ai bilong ol i laik slip na tingting bilong ol i no klia. Ol i no inap wokim tingting bilong ol na tingim gut ol samting bilong spirit, olsem na ol i no inap pilim tru bikpela samting bilong “bodi na blut bilong Bikpela,” na ol “i gat asua long dispela pasin” bilong ol. Na ol manmeri i no bin kaikai, ol i hangre na i no inap putim gut yau long ol tok i kamap. Klostu olgeta ol i no inap pilim gut olsem i gat wanem as na ol i kaikai bret na dring wain​—⁠ol i no inap tenkyu long en na save olsem em i bikpela samting tru na ol i mekim bilong tingim i dai bilong Bikpela. Olsem na God i gat tok long dispela pasin bilong ol, long wanem, ol i mekim nogut long dispela bung, olsem em i samting nating tasol.​—⁠1 Korin 11:​27-​34.

Mas Bihainim Gutpela Tingting

Sampela i bin kisim bret na wain bilong Memorial tasol bihain ol i save i no stret ol i bin mekim olsem. Ol man i kisim bret na wain na i stret ol i ken kisim, God i makim pinis ol dispela man, na spirit bilong God yet i givim tingting long ol olsem God i makim ol pinis. (Rom 8:​15-​17; 2 Korin 1:​21, 22) I no olsem ol yet i tingim o ol i gat strongpela laik long en na dispela inapim ol long kisim bret na wain, nogat; i no olsem. God i makim pinis hamas man ol bai mekim wok king wantaim Krais long heven, em 144,000 tasol; em i liklik namba sapos yumi skelim wantaim bikpela lain manmeri em ofa bilong Krais i helpim ol. (KTH 14:​1, 3) Taim Jisas i stap long graun, God i kirap long makim dispela lain, olsem na long nau i gat wan wan tasol i save kisim bret na wain bilong Memorial. Na sampela ol i wok long i dai, olsem na dispela lain i mas wok long i go liklik moa yet.

Taim man i kisim bret na wain bilong Memorial na i no stret em i mekim olsem, i gat wanem sampela as na i no stret em i bin kisim? Sampela as i olsem: Ating em i tingim yet sampela bilip bilong em bilong bipo​—⁠olsem olgeta man i stap gut long God ol i save go long heven. O ating em i gat strongpela laik long i go long heven, o em i tingim em yet tasol​—⁠em i ting em inap tru long mekim olsem, winim ol narapela​—⁠na em i laik i stap olsem bikman. O ating sampela bikpela hevi i bin painim em na dispela i bagarapim bel bilong em na em i les long i stap long graun. O ating wanpela gutpela pren tru bilong em i bilong dispela lain bilong i go long heven. Tasol yumi olgeta i mas save, em i wok bilong God yet long makim olsem yumi bilong i go long heven​—⁠em i no wok bilong yumi. (Rom 9:​16) Olsem na taim man i “skelim gut bel bilong em” na em i save, i no stret em i bin kisim bret na wain, orait nau em i no ken kisim moa.​—⁠1 Korin 11:⁠28.

Gutpela tok promis bilong God long klostu olgeta manmeri bilong graun ol inap wetim, em laip i stap oltaim long Paradais long graun. Em gutpela samting tru ol inap tingim na wet long en, na i no hatwok long yumi ol man i tingim na amamas long kisim dispela gutpela blesing. (Stat 1:​28; Song 37:​9, 11) Long dispela graun yet ol manmeri i stap gut long God ol bai bungim gen ol famili na pren bilong ol i kirap bek long matmat, na ol bai bungim ol stretpela manmeri bilong bipo, olsem Abraham, Sara, Moses, Rahap, Devit, na Jon, man bilong givim baptais​—⁠olgeta i bin i dai taim Jisas i no opim rot yet bilong i go long heven.​—⁠Matyu 11:11; skelim wantaim 1 Korin 15:​20-​23.

Ol man i gat tingting long i stap long graun, ol i save mekim pasin i stret long dispela bung taim ol i kam bung bilong mekim Kaikai Bilong Bikpela, na ol i sindaun gut na putim gut yau long ol tok i kamap, maski ol i no kaikai bret na dring wain bilong Memorial. Ofa bilong Krais i helpim ol tu, na dispela ofa i mekim na God i orait long ol. (KTH 7:​14, 15) Taim ol i wok long harim tok bilong Memorial, dispela i strongim ol long pilim moa yet ol samting i holi, na ol i laik moa yet long i stap wanbel wantaim lain bilong God em ol i stap long olgeta hap.

Long dispela yia, taim san i go daun pinis long Tunde, Epril 2, ol bai mekim bung bilong Memorial long 78,000 samting kongrigesen bilong ol Witnes Bilong Jehova long olgeta hap. Bai yu go long dispela bung?

[Futnot]

[Piksa long pes 8]

Ol Witnes Bilong Jehova i save mekim Memorial wanpela taim long olgeta yia