Yu Wanpela Painia i Save Skelim Stret Ol Samting?
AI BILONG papa i lait, na em i opim tupela han bilong em na wetim pikinini meri bilong em i mekim traim long wokabaut—em namba wan taim bilong pikinini. Taim pikinini wantu i pundaun, papa i strongim em long mekim traim gen. Em i save olsem i no longtaim na pikinini bai kisim strong na wokabaut gut.
Na i wankain tu long nupela painia. Bilong painia i ken lain long skelim stret ol samting na mekim gut wok painia oltaim, ating sampela hap taim i mas lus pastaim na i mas i gat wanpela bilong strongim em. Planti painia i bin mekim dispela wok inap 20, 30, 40 yia samting, na ol i amamas yet long mekim. Tasol sampela i olsem ol i pundaun—ol i lusim stretpela tingting taim sampela senis i kamap long sindaun bilong ol na ol i no bin tingim. Na sampela ol i lusim amamas tu long mekim wok. Long wanpela kantri, long olgeta manmeri i kirap mekim wok painia oltaim, inap 20 pesen i save lusim dispela wok insait long tupela yia. Wanem samting inap mekim na bai painia i lusim dispela gutpela wok tru? I gat sampela samting painia i ken mekim na bai ol hevi i no ken kirapim em long lusim wok painia?
Sik, sot long mani, ol wok bilong lukautim famili—ating ol dispela samting i mekim na sampela i bin lusim wok painia oltaim, tasol wanpela samting i bin pundaunim sampela narapela, em ol i no bin skelim stret ol narapela narapela wok Kristen ol i mas mekim. Pasin bilong skelim stret ol samting i olsem: ‘Olgeta samting i mas wankain tasol—narapela samting i no ken winim narapela samting.’
Krais Jisas i lainim ol disaipel long pasin bilong autim tok na kamapim ol disaipel. Na tu long wok autim tok bilong em yet, em i makim olsem wanem ol disaipel inap skelim stret ol samting. Jisas i kamapim klia olsem ol hetman bilong lotu Juda i no save skelim stret ol samting, na em i tokim ol: “Olgeta liklik sayor samting bilong gaden em yupela i save tilim long 10-pela hap na givim wanpela hap long God. Tasol yupela i lusim pinis olgeta bikpela hap tok bilong lo, olsem tok bilong stretpela pasin bilong skelim man na pasin bilong marimari na pasin bilong bilip. Mobeta yupela i strong long bihainim ol tok bilong ol dispela bikpela lo, na yupela i no lusim ol arapela lo tu.”—Matyu 23:23.
Dispela tok tru i stret tu long nau, na i stret moa yet long wok painia. Sampela i bin kirap mekim wok painia, long wanem, ol i gat strongpela laik long mekim na ol i ting ol inap mekim, tasol ol i no redi gut pastaim o tingim gut ol samting em painia i mas mekim. (Luk 14:27, 28) Na sampela i tingim tumas wok autim tok na ol i no tingim ol narapela bikpela samting ol Kristen i mas mekim. Olsem wanem ol inap kisim na holimpas stretpela tingting?
Stap Strong Long Spirit!
Oltaim Jisas i save tingting long i stap strong long spirit. Maski ol bikpela lain manmeri i save pulim bikpela hap taim bilong em taim ol i kam bilong harim tok bilong em na bilong em i ken oraitim ol, Jisas i save makim taim bilong beten na tingim gut ol tok long bel. (Mak 1:35; Luk 6:12) Bilong painia i ken skelim stret ol samting taim em i mekim dispela wok, oltaim em i mas mekim wok long olgeta samting Jehova i givim long yumi bilong helpim yumi long i stap strong long spirit. Pol i tok: “Yes, yupela i save skulim ol arapela manmeri, tasol bilong wanem yupela i no save skulim yupela yet?” (Rom 2:21) Olsem na bai yumi popaia tru sapos yumi lusim olgeta hap taim bilong yumi long autim tok long ol narapela, tasol yumi no makim taim inap long mekim stadi bilong yumi yet na bilong beten.
Kumiko i bin mekim wok painia inap 20 yia pinis. Em i gat 3-pela pikinini na man bilong em i no bilip, tasol nau em i lain pinis olsem, gutpela taim tru bilong em i kaunim Baibel na stadi long en em klostu long taim em i laik slip. Taim em i stadi, em i save tingim gut ol tok em inap mekim wok long en long taim em i autim tok, na long dispela rot long olgeta de em inap mekim gut wok bilong autim tok. Sampela narapela painia em wok bilong ol i kamap gutpela, ol i save kirap long moning tru paslain long ol narapela long famili bambai ol i ken stadi na kisim nupela strong long spirit. Ating yu bin makim sampela narapela taim i stret long yu bilong redim ol tok bilong miting na bilong kaunim ol nupela buk na nius Kristen. Sapos yu laik i stap amamas long wok bilong autim tok, yu no ken lusim stadi bilong yu yet o mekim hariap tumas.
Wok Painia na Ol Wok Bilong Famili
Ol papamama painia i mas tingim tu olsem, bikpela hap wok bilong ol i insait long “laik bilong Bikpela” em i olsem: Ol i mas lukautim gut famili bilong ol long ol samting bilong skin, na bel na tingting, na spirit. (Efesus 5:17; 6:1-4; 1 Timoti 5:8) Sampela taim maski poroman marit tu i bilip, em wantaim ol pikinini ol i tingting planti olsem, nogut dispela meri o mama bilong ol bai i no inap helpim gut ol na mekim gut bel bilong ol taim em i kirap mekim wok painia. Ol kain tingting olsem i mekim na taim meri i kamapim laik bilong em long kamap painia, famili i no amamas tumas. Tasol sapos meri i stretim gut ol samting na redi gut pastaim, em inap mekim gut dispela tupela wok wantaim.
Planti painia i save mekim olgeta wok bilong ol long autim tok long taim famili i no i stap long haus. Kumiko, pastaim yumi stori long em, em i save stap wantaim famili taim ol i kisim kaikai bilong moning, na em i wet na tok gutbai long man bilong em na ol pikinini, na em i save kamap long haus paslain long ol i kam bek. Long Mande em i save redim kaikai bilong sampela de bihain, bambai em i ken sindaun gut na kaikai wantaim famili bilong em na i no gat planti wok bilong mekim long haus kuk. Narapela samting i helpim em, em pasin bilong mekim tupela wok long wankain taim, olsem klinim haus long taim em i wok long redim kaikai. Long dispela rot Kumiko i gat taim tu bilong singautim ol pren bilong pikinini bilong em i kam long haus na em inap redim sampela kaikai ol i ken amamas tru long en.
Taim ol pikinini i kisim 13 krismas samting, planti taim papamama i mas lusim sampela hap taim moa bilong helpim ol, long wanem, ol nupela senis i kamap long bel na tingting na laik bilong ol, na ol i gat tupela tingting, na ol i pret. Olsem na sapos papa o mama i painia, em i mas tingting gut long pikinini na redi long lusim sampela samting long sedyul bilong em na bai em i ken helpim pikinini. Tingim Hisako, em wanpela mama i gat 3-pela pikinini na em i mekim wok painia. Em i bin mekim wanem taim bikpela pikinini meri bilong em i no amamas moa long i go long ol miting Kristen na long wok autim tok, long wanem, ol wanskul i wok long pulim em? Bilong helpim tru dispela pikinini, em yet i mas pilim tru tok i tru, na em i mas bilip tru olsem pasin bilong no ken bung wantaim ol man ausait em rot tru bilong i stap gut.—Jems 4:4.
Hisako i tok: “Mi pasim tok long bel long stadi wantaim em long olgeta de long ol bikpela as tok bilong Baibel long buk Stap Oltaim. Pastaim mipela bin stadi inap sampela minit tasol, long wanem, planti taim pikinini meri bilong mi i tok em i gat bikpela bel pen o het pen long taim bilong stadi. Tasol mi save mekim stadi oltaim. Bihain long sampela mun, pasin bilong em i kamap gutpela tru, na i no longtaim bihain em i dediket na baptais.” Nau Hisako i amamas long mekim wok painia oltaim wantaim pikinini meri bilong em.
Na ol papa i wok painia, ol tu i mas was gut—nogut ol i tingting tasol long helpim ol man i amamas long harim tok long taim ol i autim tok, na long mekim ol wok long kongrigesen, tasol ol i no strongim bel bilong ol pikinini i wok long i go bikpela na soim rot long ol. Em i no wanpela wok man i ken abrusim na larim meri tasol i mekim. Wanpela elda Kristen i bin mekim wok painia inap longtaim na em i save lukautim wanpela liklik bisnis tu, tasol maski em i gat planti wok, em i save makim taim bilong stadi wantaim olgeta fopela pikinini bilong em wan wan. (Efesus 6:4) Na tu, em i save redim ol tok bilong ol miting wantaim famili bilong em. Ol painia i save skelim stret ol samting, ol i no save lusim tingting long lukautim famili bilong ol long skin o long spirit.
Stretpela Tingting Long Mani
Na ol painia i mas holim stretpela tingting long ol samting bilong skin ol i mas kisim long olgeta de. Long dispela samting tu, Jisas i stap olsem gutpela piksa long pasin na tok bilong em, na dispela inap lainim gut yumi. Em i tokim ol disaipel, ol i no ken tingting planti tumas long ol samting bilong skin. Tasol em i strongim ol long painim Kingdom pastaim, na em i promis olsem God bai lukautim ol olsem em i save lukautim olgeta narapela samting em i wokim. (Matyu 6:25-34) Ol painia i bihainim dispela gutpela tok ol i bin mekim wok painia oltaim winim planti yia, na Jehova i blesim ol samting ol i mekim bilong kisim ‘kaikai bilong olgeta de.’—Matyu 6:11.
Aposel Pol i bin tokim ol wanwok Kristen olsem, ‘ol i mas isi isi long olgeta man na larim ol i lukim dispela gutpela pasin bilong ol.’ Sapos yumi gat gutpela tingting, bai yumi lukautim gut skin bilong yumi. Ol painia i gat stretpela tingting, ol i wok strong long kamapim long ples klia olsem ol i bihainim gutpela tingting long wokabaut bilong ol na long tingting bilong ol long ol samting bilong skin, long wanem, ol i save ol narapela i lukim pasin ol i mekim.—Skelim wantaim 1 Korin 4:9.
Ol yangpela i mekim wok painia ol i no ken kisim tasol ol gutpela samting papamama i givim long ol na ting papamama i mas mekim olsem. Sapos ol i stap long haus bilong papamama, gutpela sapos ol i helpim ol long klinim haus samting na mekim wok haptaim bambai ol inap givim hap mani long papamama bilong baim haus na kaikai samting—olsem bai ol i soim papamama ol i tenkyu long ol na ol i gat stretpela tingting.—2 Tesalonaika 3:10.
Painia i Skelim Stret Ol Samting—Wanpela Blesing Tru
Ating yu wanpela painia i wok strong long kisim pasin bilong skelim stret ol samting. Yu mas bilip tru olsem yu inap kisim dispela pasin. Liklik pikinini i mas i gat bikpela hap taim bilong lain long sanap gut na wokabaut, na olsem tasol planti strongpela painia i tok, ol i bin wok inap longtaim liklik bilong kisim dispela pasin bilong skelim stret olgeta wok bilong ol.
Mekim stadi bilong em yet, lukautim famili, mekim wok bilong lukautim em yet long ol samting bilong skin—em sampela wok ol painia i mas lain long skelim stret wantaim. Ol ripot i soim olsem planti painia i save inapim tru olgeta wok ol i mas mekim. Tru tumas, ol i olsem wanpela blesing long olgeta man long hap ol i stap long en, na ol i givim gutnem long Jehova na oganaisesen bilong em.