Lain Bilong Snek—Ol i Kamap Ples Klia Olsem Wanem?
“Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri.”—STAT 3:15.
JEHOVA i God bilong amamas, na i gat as na em i stap amamas. Em i nambawan Man bilong givim ol gutpela samting long ol man, na i no gat wanpela samting i ken pasim em long kamapim laik bilong em. (Aisaia 55:10, 11; 1 Timoti 1:11; Jems 1:17) Em i laik bai ol wokman bilong em tu i amamas, na em i givim planti samting long ol na bai i gat as bilong dispela amamas bilong ol. Olsem na long wanpela taim nogut tru—taim pasin bikhet i kamap long Iden—em i wokim rot bambai yumi ken wetim gutpela samting bai kamap bihain.—Rom 8:19-21.
2 Wanpela pikinini spirit bilong Jehova i sakim God na krungutim gutnem bilong em, olsem na em i mekim em yet i kamap Satan. Namba wan man na meri, pastaim Iv na bihain Adam, ol i kam aninit long strong bilong em na ol i brukim lo bilong Jehova em i bin kamapim klia long ol. Olsem na i stret God i makim tupela bilong i dai. (Stat 3:1-24) Tasol taim Jehova i tokaut long strafe bai painim dispela tupela bikhetman, em i wokim rot na bai i gat as na ol pikinini bilong Adam na Iv ol i ken wetim gutpela samting i kamap. Long Stat 3:15, Jehova i tok: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai [em] i krungutim het bilong yu, na bai yu kaikaim lek bilong [em].” Dispela tok profet i olsem wanpela ki bilong opim dua bilong kisim save long olgeta tok bilong Baibel, na long ol samting i bin kamap bipo na i kamap long nau, olsem ol samting bilong dispela graun na ol samting bilong ol wokman bilong Jehova.
Insait Bilong Dispela Tok Profet
3 Bilong pilim tru insait bilong dispela tok profet, skelim ol samting bilong en. Stat 3:15 i givim tok long Snek—i no wanpela snek tru, tasol em dispela man i bin toktok long rot bilong snek. (KTH 12:9) “Dispela meri” em i no Iv, nogat, em oganaisesen bilong Jehova long heven, em mama bilong lain bilong Jehova long graun em i makim ol long spirit holi. (Galesia 4:26) “Lain” bilong Snek, em ol lain bilong Satan, olsem ol pikinini bilong em—ol spirit nogut na ol man na ol oganaisesen bilong ol man, em ol i kamapim pasin olsem bilong Satan na ol i biruaim “lain” bilong meri. (Jon 15:19; 17:15) Nambawan Pikinini long “lain” bilong meri em Krais Jisas, em spirit holi i bin makim em long yia 29 C.E. Lain 144,000, em ol i bin “kamap nupela long wara na long Holi Spirit” na ol bai stap king wantaim Krais long Kingdom bilong heven, em ol nambatu pikinini bilong meri em God i bin tok promis long kamapim. Ol i kam insait long dispela lain bilong meri kirap long de Pentikos long yia 33 C.E.—Jon 3:3, 5; Galesia 3:16, 29.
4 Satan i bin mekim wok long dispela snek tru long Iden olsem maus bilong em, na tok giaman bilong em i mekim na ol man i no stap moa long Paradais. Stat 3:15 i makim taim bilong dispela man i bin mekim tok long maus bilong snek, em bai bagarap olgeta. Bihain rot bai op na lain bilong God long graun bai sindaun gen long Paradais, na sin na dai bai pinis olgeta. Man! Em i taim bilong amamas tru!—KTH 20:1-3; 21:1-5.
5 Bihain long taim pasin bikhet i bin kamap long Iden, sampela man na oganaisesen i kamap em ol i bin mekim pasin olsem Satan—ol i bikhet, na giaman, na bagarapim nem bilong man, na kilim man i dai, na ol i sakim laik bilong Jehova na ol i birua long ol man i lotu long Jehova. Ol dispela pasin nogut i kamapim long ples klia ol pikinini bilong Satan long spirit. Kein em wanpela bilong ol, em i kilim i dai Abel, long wanem, Jehova i bin laikim lotu bilong Abel na em i no laikim lotu bilong Kein. (1 Jon 3:10-12) Nimrot em wanpela man nem bilong em i kamapim stret pasin bilong em, olsem em i wanpela bikhetman na em i strongpela man bilong raunim ol animal, na em i wanpela king i birua long Jehova. (Stat 10:9) Na long bipo i gat sampela bikpela gavman, em narapela i bin kamap bihain long narapela, olsem Babilon, na gavman i helpim lotu em tok giaman i as bilong en, na ol dispela gavman i mekim nogut long ol manmeri i lotuim Jehova.—Jeremaia 50:29.
‘Satan i Birua Long Meri’
6 Long olgeta dispela taim, pasin birua i bin stap namel long Snek na meri bilong Jehova, olsem namel long Satan na ol gutpela ensel bilong oganaisesen bilong Jehova long heven. Pasin birua bilong Satan i bin kamap ples klia taim em i tok bilas long Jehova na em i laik bagarapim oganaisesen bilong Jehova long heven, na em i pulim sampela ensel long lusim ples bilong ol. (Sindaun 27:11; Jut 6) Na dispela pasin birua i kamap ples klia taim Satan i bin mekim wok long ol spirit nogut bilong em bilong pasim wok bilong ol ensel em Jehova i bin salim. (Daniel 10:13, 14, 20, 21) Na long taim bilong yumi dispela pasin birua i kamap ples klia moa yet taim Satan i laik bagarapim Kingdom bilong Krais taim em i kamap nupela.—KTH 12:1-4.
7 Pasin birua i stap tu namel long meri bilong Jehova, em dispela lain ensel i stap gut long em, na long Snek. Satan i bin krungutim gutnem bilong God; na em i bin tok, i no gat wanpela man, na ensel tu, inap holimpas bilip na stap gut long God, na em i bin wok strong long pulim ol bambai ol i no ken stap gut long God. (KTH 12:4a) Ol gutpela ensel, ol serap, na ol serafim, ol i bel nogut tru long dispela man i bin mekim em yet i kamap Satan. Tasol ol i bin wetim Jehova i stretim ol samting long taim na rot em yet i makim.—Skelim wantaim Jut 9.
Ol i Birua Long Lain Bilong Meri
8 Satan i bin was i stap bilong save husat dispela Pikinini bilong meri, em Jehova i bin tok em bai krungutim het bilong Snek. Taim wanpela ensel long heven i bin tokaut long Jisas, em mama i bin karim em long Betlehem, em i “Bikpela, na em i man God i makim bilong kisim bek ol manmeri bilong en,” dispela i bin kamapim long ples klia olsem em i dispela Pikinini bilong meri, em Jehova i bin tok profet long en.—Luk 2:10, 11.
9 I no longtaim na pasin birua nogut tru bilong Satan i kamap ples klia taim em i bin pulim sampela “saveman” haiden long go pastaim long King Herot long Jerusalem na bihain long dispela haus long Betlehem em ol i bin painim pikinini Jisas na mama bilong em, Maria. Bihain liklik King Herot i putim lo long kilim i dai olgeta pikinini man long Betlehem na ol ples klostu, em ol i gat tupela krismas o i no winim yet tupela krismas. Long dispela samting Herot i mekim, em i kamapim pasin bilong bel nogut tru long Pikinini bilong meri, olsem Satan i mekim. Ating Herot i bin save olsem em bai kilim i dai dispela man i mas kamap Mesaia. (Matyu 2:1-6, 16) Ol stori bilong bipo i kamapim klia olsem King Herot em i wanpela man nogut tru, na man bilong mekim pasin bilong trik na giaman, na kilim man i dai—em i wanpela bilong lain bilong Snek.
10 Long yia 29 C.E. God i makim Jisas long spirit holi na em i bin tokaut long heven olsem Jisas em i Pikinini bilong em. Bihain, Satan i bin wok strong long pundaunim Jisas long traim, na long dispela rot Satan i laik bagarapim laik bilong Jehova long dispela Pikinini bilong em. (Matyu 4:1-10) Jisas i no pundaun long ol traim, olsem na Satan i mekim wok long sampela man moa bilong pundaunim Jisas. Sampela em ol hetman bilong lotu i gat tupela maus. Ol i giaman na krungutim gutnem bilong em, em pasin Satan yet i save mekim. Taim Jisas i tokim wanpela sikman, bun bilong em i dai olgeta, “Bel bilong yu i ken i stap isi. Mi lusim pinis ol sin bilong yu,” ol saveman i kotim Jisas na ol i tok em i tok bilas long God; ol i no wet pastaim long lukim olsem man hia i orait o nogat. (Matyu 9:2-7) Taim Jisas i oraitim sampela sikman long de Sabat, ol Farisi i kotim em na ol i tok em i brukim lo bilong Sabat na ol i toktok bilong painim rot long kilim em i dai. (Matyu 12:9-14; Jon 5:1-18) Taim Jisas i bin rausim ol spirit nogut, ol Farisi i tok em i mekim olsem long “strong bilong Belsebul tasol, em hetman bilong ol spirit nogut.” (Matyu 12:22-24) Na taim Lasarus i kirap bek pinis long matmat, planti man i bilip long Jisas, tasol ol bikpris na Farisi i toktok gen long kilim i dai Jisas.—Jon 11:47-53.
11 Jisas i bin save gut long ol samting ol i laik mekim, tasol long Nisan 11, long yia 33 C.E., em i go long tempel long Jerusalem na long ai bilong ol man em i tokaut long strafe bai painim ol. Lain saveman bilong lo na lain Farisi i bin kamapim long ples klia ol i wanem kain man, olsem na Jisas i tok: “Yupela saveman bilong lo na yupela Farisi, yupela lukaut. Yupela i man bilong tupela maus. Yupela i save pasim dua bilong kingdom bilong heven long pes bilong ol manmeri. Yupela yet i no save go insait. Tasol taim ol manmeri i laik i go insait, yupela i save pasim rot bilong ol.” Jisas i bin kamapim long ples klia ol i lain bilong Snek, em i tok: “Yupela snek nogut. God bai i kotim yupela na bai yupela i go long hel [Gehena]. Na bai yupela i stap gut olsem wanem?” (Matyu 23:13, 33) Tok em i mekim i kain olsem tok profet bilong Stat 3:15.
12 Tasol taim ol i harim tok bilong Jisas, yu ting ol i bel hevi, na ol i beten askim God long marimari long ol? Ol i tanim bel na lusim ol pasin nogut? Nogat! Mak 14:1 i tok, long de bihain, long wanpela bung long banis bilong hetpris, “ol bikpris na ol saveman bilong lo ol i tok, ‘Olsem wanem na yumi ken giamanim Jisas na holimpas em na kilim em i dai?’ ” Ol i bin kamapim yet tingting nogut bilong Satan long bagarapim man, em Jisas i bin kolim em man bilong kilim man i dai. (Jon 8:44) I no longtaim na Judas Iskariot i bihainim pasin bilong ol, em Satan i bin kirapim em long mekim pasin bikhet na givim baksait long God. Judas i lusim Pikinini bilong meri bilong God i no gat asua na em i go bung wantaim lain bilong Snek.
13 Long moningtaim tru bilong Nisan 14, ol kaunsil bilong ol Juda i kisim Jisas olsem kalabusman na ol i bringim em i kam long namba wan gavman em bilong Rom. Nau ol bikpris i go pas long singaut long Pailat olsem em i mas nilim Jisas long diwai. Taim Pailat i askim ol, “Yupela i laik bai mi nilim king bilong yupela long diwai?” ol bikpris i bekim tok olsem, “Mipela i no gat narapela king. Sisar wanpela tasol!” (Jon 19:6, 15) Tru tumas, long olgeta samting ol i mekim ol i kamapim long ples klia olsem ol i bilong lain bilong Snek. Tasol i no ol tasol. Matyu 27:24, 25 i tok: “[Pailat] i kisim sampela wara na em i wasim han bilong en long ai bilong ol manmeri.” Na olgeta manmeri i tok: “Dispela asua i ken i stap long mipela na long ol pikinini bilong mipela.” Olsem na planti Juda bilong dispela taim i kamapim long ples klia olsem ol i bilong lain bilong Snek. Dispela de i no pinis yet na Jisas i dai. Satan i bin mekim wok long lain bilong em long graun, na long dispela rot em i kaikaim lek bilong Pikinini bilong meri bilong God.
14 Tasol olsem wanem? Satan i win? Nogat tru! Krais Jisas i winim pinis strong bilong dispela graun na em i winim hetman bilong dispela graun. (Jon 14:30, 31; 16:33) Em i bin stap gut long God inap long taim em i dai. Em i dai olsem man i gutpela olgeta, na dispela i olsem pe bilong baim bek laip em Adam i bin lusim. Olsem na em i opim rot bambai ol man i bilip long dispela gutpela ofa na bihainim ol lo bilong God, ol i ken kisim laip oltaim. (Matyu 20:28; Jon 3:16) Jehova i bin kirapim bek Jisas long matmat na em i givim em laip i stap oltaim long heven na em i no inap i dai moa. Long taim Jehova i makim, Jisas bai bagarapim Satan na em bai pinis olgeta. Tok profet long Stat 22:16-18 i tok Jehova bai givim blesing long olgeta famili bilong dispela graun, em ol i mekim ol samting bilong kisim blesing long rot bilong dispela Pikinini i stap gut long God.
15 Jisas i dai pinis, na bihain ol Kristen em God i makim ol long spirit holi, ol i wok yet long kamapim long ples klia lain bilong Snek, olsem Bikpela bilong ol i bin mekim. Spirit holi i kirapim aposel Pol na em i toksave long “man bilong sakim lo” bai kamap ples klia “long strong bilong Satan.” (2 Tesalonaika 2:3-10) Dispela “man” i makim ol pris pasto bilong ol lotu i holim nating nem Kristen. Na lain bilong Snek i bin mekim nogut tru long ol disaipel bilong Krais Jisas. Long tok profet bilong Kamapim Tok Hait 12:17, aposel Jon i tok profet olsem Satan bai pait yet long ol pikinini bilong lain bilong meri bilong God inap long taim bilong yumi. Na dispela samting i bin kamap stret olsem tok profet i bin makim. Long planti kantri, ol i tambuim ol Witnes Bilong Jehova, ol i mekim nogut long ol, na putim ol long kalabus na long ol banis kalabus nogut, long wanem, ol i stap gut long Kingdom bilong God na ol stretpela pasin bilong em.
Kamapim Pasin Nogut Bilong Lain Bilong Snek Long Nau
16 Ol Kristen tru i bihainim pasin bilong Krais Jisas na ol i wok strong long kamapim long ples klia pasin nogut bilong Snek na lain bilong em. Long 1917 ol Sumatin Bilong Baibel, em nem bilong ol Witnes Bilong Jehova long bipo, ol i wokim wanpela buk (The Finished Mystery), na long dispela buk ol i kamapim long ples klia pasin giaman bilong ol pris pasto bilong ol lotu i holim nating nem Kristen. Na bihain, long 1924, ol i kamapim wanpela liklik nius i gat strongpela tokaut long en, nem bilong en, “Ol Pris Pasto i Gat Kot” (Ecclesiastics Indicted). Ol i tilim 50 milion bilong dispela liklik nius long olgeta hap bilong graun. Long 1937, J. F. Rutherford, em presiden bilong Sosaiti Was Taua long dispela taim bipo, em i kamapim strong pasin nogut bilong lain bilong Satan long ol tok em i mekim, i gat nem olsem “Kamapim Long Ples Klia Rong Bilong Ol” (Exposed) na “Ol Lotu na Lotu Kristen” (Religion and Christianity). Long yia bihain, ol manmeri long 50 kibung long sampela kantri i harim tok em i mekim long redio-telefon long Landon, Inglan, nem bilong en, “Kamapim Tok i Tru” (Face the Facts). Wanpela mun bihain, ol i kamapim wanpela tok long planti redio long Yunaitet Stets, nem bilong en “Gavman Fasis o Stap Fri” (Fascism or Freedom). Na ol i bin kamapim tupela buk (Enemies na Religion) na wanpela buklet (Uncovered), na ol dispela buk tu i kamapim long ples klia pasin nogut bilong ol pris pasto. Ol buk na buklet ol i bin wokim kirap long 1920 samting i kam inap nau, na buk Kamapim Tok Hait—Bikpela Samting Bilong En i Laik Kamap!,a nau ol i wokim long 65 tok ples, ol i kamapim klia olsem ol hetman politik nogut na ol bikpela bisnisman i giaman na mangal long mani, em ol nambawan man long lain bilong Snek long graun. Taim ol hetman politik i save mekim tok giaman bilong paulim ol man i stap aninit long ol, na bai ol i no tingim blut i samting holi, na ol i daunim ol wokboi bilong Jehova (long dispela rot ol i soim olsem ol i bel nogut long lain bilong meri bilong God), ol i kamapim long ples klia olsem ol i insait long lain bilong Snek. Na i wankain long ol bikpela bisnisman, em bel bilong ol i no gat tok taim ol i giaman bilong kisim mani na ol i wokim o baim i go long ol man ol samting inap givim sik long man, na ol i save long dispela.
17 Tasol i no olgeta wan wan i gat hap doti bilong ol lotu giaman, na wok politik, na ol wok bisnis, ol bai i stap yet long lain bilong Snek. Sampela bilong ol dispela man na meri i laikim ol Witnes Bilong Jehova. Ol i mekim wok long namba bilong ol bilong helpim ol Witnes na bihain sampela i kirap na lotuim God tru. (Skelim wantaim Aposel 13:7, 12; 17:32-34.) Wanpela tok i go long ol dispela man olsem: “Yupela ol king, yupela putim gut yau na stretim pasin bilong yupela. Yupela ol hetman bilong graun, yupela harim dispela tok na yupela lukaut. Yupela i mas pret long God na aninit long em. Yupela i mas guria long em na amamas wantaim. Yupela i mas aninit long pikinini bilong en na givim kis long em. Nogut em i kros long yupela na yupela i dai. Long wanem, em i save belhat hariap. Man i save bilip long God na pas tru long em, em i ken amamas.” (Song 2:10-12) Tru tumas, olgeta man i laik bai Jehova i orait long ol, ol i mas kirap kwik long bihainim laik bilong God, paslain long taim dispela Jas long heven bai pasim dua!
18 Ol lain bilong Kingdom bilong heven, ol tasol i hap bilong lain bilong meri. Ol i no planti. (KTH 7:4, 9) Tasol i gat wanpela bikpela lain manmeri, ol i planti milion, em ol i lotu long Jehova na ol i gat tingting long i stap laip oltaim long Paradais long graun. Long maus na long pasin bilong ol, ol i tok long ol manmeri Jehova i bin makim ol olsem: “Mipela i harim olsem God i stap wantaim yupela . . . Olsem na mipela i laik kamap wanlain wantaim yupela.”—Sekaraia 8:23.
19 Nau em taim bilong olgeta manmeri i mas makim wanem rot ol i laik bihainim. Ol i laik lotuim Jehova na stap gut long wok king bilong em, o ol i larim Satan i bosim ol na ol i mekim ol samting em i amamas long en? Inap 5 milion manmeri bilong olgeta hap wantaim hap lain bilong lain bilong meri, em lain bilong Kingdom, ol i kamapim long ples klia olsem ol i stap gut long Jehova. Na inap 8 milion manmeri moa i kamapim klia olsem ol i amamas long stadi long Baibel wantaim ol Witnes o ol i go long ol miting bilong ol. Ol Witnes Bilong Jehova i tokim ol dispela man olsem: Dua i op yet. Kam insait long lain bilong Jehova na lotuim em. Bilip long Krais Jisas em i dispela Pikinini God i bin tok promis long salim i kam. Bung wantaim oganaisesen bilong Jehova long graun. Kisim ol gutpela blesing Em bai givim long rot bilong King Krais Jisas, em bai bosim graun.
[Futnot]
a Sosaiti Wastaua bilong Nu Yok i wokim.
Yu Tingim Yet?
◻ Husat em dispela Snek bilong Stat 3:15? Na husat em dispela meri?
◻ Wanem ol pasin i makim lain bilong Snek?
◻ Olsem wanem Jisas i kamapim klia lain bilong Snek?
◻ Husat long nau i kamap ples klia olsem lain bilong Snek?
◻ Kwiktaim ol manmeri i mas mekim wanem na ol i no ken insait long lain bilong Snek?
[Askim Bilong Stadi]
1. (a) Bilong wanem Jehova i God bilong amamas? (b) Em i mekim wanem na yumi tu i ken amamas?
2. Taim Jehova i tokaut long strafe bai painim tupela bikhetman long Iden, olsem wanem em i wokim rot bambai ol pikinini bilong Adam na Iv i ken wetim ol gutpela samting long bihain?
3. Olsem Stat 3:15 i tok, husat em (a) dispela Snek, (b) “dispela meri,” (c) “lain” bilong Snek, (d) “lain” bilong meri?
4. Olsem wanem Stat 3:15 i kamapim klia olsem graun bai kamap wanpela paradais gen, na ol man i stap fri long sin na i dai, ol bai pulap long en?
5. Wanem ol pasin nogut i olsem mak bilong ol pikinini bilong Satan long spirit?
6. Long wanem ol rot Satan i bin kamapim pasin birua bilong em long meri bilong Jehova?
7. Bilong wanem lain ensel i stap gut long Jehova ol i birua long Snek? Tasol ol i no bin mekim wanem samting?
8. Satan i bin was i stap long husat?
9. Jisas i kamap pinis, na bihain Satan i kamapim pasin birua nogut tru olsem wanem?
10. (a) Bihain long taim Jisas i kisim baptais, olsem wanem Satan yet i bin traim long bagarapim laik bilong Jehova long dispela Pikinini em i tok promis long salim i kam? (b) Olsem wanem Satan i bin mekim wok long ol hetman bilong lotu Juda bilong kamapim laik bilong em?
11. Tripela de paslain long Jisas i dai, em i tok husat i olsem hap lain bilong Snek? Bilong wanem ol i hap lain bilong Snek?
12, 13. (a) Ol bikpris na ol saveman bilong lo i bin mekim wanem samting moa i kamapim klia olsem husat i papa bilong ol long spirit? (b) Husat i bihainim pasin bilong ol? (c) Olsem tok profet bilong Stat 3:15 i tok, olsem wanem lain bilong Satan i bin kaikaim lek bilong Pikinini bilong meri?
14. Lain bilong Satan i kaikaim lek bilong Pikinini bilong meri, tasol bilong wanem dispela i no mekim na Satan i win?
15. (a) Jisas i dai pinis, na bihain ol aposel i bin kamapim long ples klia lain bilong Snek olsem wanem? (b) Inap long nau, lain bilong Snek i bin mekim wanem samting moa bilong kamapim pasin birua bilong ol?
16. Husat long nau i kamap ples klia olsem lain bilong Snek? Olsem wanem em i kamap ples klia?
17. Wanem rot i op yet bilong sampela man i gat namba, em ol i bin lusim pasin bilong dispela graun?
18. Husat moa i lotuim Jehova tasol ol i no hap bilong lain bilong meri?
19. (a) Olgeta manmeri i mas mekim wanem samting? (b) Long nau, singaut i go long husat ol man long bihainim gutpela tingting taim i gat rot yet long mekim olsem?
[Piksa long pes 10]
Jisas i bin kamapim klia olsem ol hetman bilong lotu i gat tupela maus ol i hap bilong lain bilong Snek