Askim

Dispela snek i bin toktok wantaim Iv em i gat lek?

Olsem yumi lukim long Stat 3:​14, God Jehova i toktok long dispela snek i bin giamanim Iv long gaden Iden. God i tok: “Yu bin mekim dispela pasin nogut, olsem na nau mi gat strongpela tok bilong daunim yu. Bai yu gat bikpela hevi. Hevi yu karim bai i winim hevi bilong olgeta arapela animal. Nau na long olgeta taim bihain bai yu wokabaut long bel bilong yu tasol. Na bai yu kaikai das bilong graun.” Baibel i no tokaut stret olsem dispela snek em ensel i bin yusim bilong traim Iv, em i gat lek, tasol bihain ol lek bilong en i lus, nogat. Tru, ating tok i stap long Stat 3:14 inap kirapim sampela long ting olsem, tasol yumi no ken ting olsem paslain long taim God i kolim dispela strafe, snek i bin i gat lek. Bilong wanem yumi no ken ting olsem?

Long wanem, dispela tok bilong kot Jehova i bin mekim i go long Satan​—em wanpela spirit yumi no inap lukim na em i bin mekim wok long dispela snek. Baibel i kolim Satan olsem “papa tru bilong pasin bilong tok giaman” na “snek bilong bipo tru.” I luk olsem dispela tupela tok wantaim i toktok long taim Satan i bin mekim wok long wanpela snek olsem maus bilong em long kirapim Iv long sakim tok bilong God.​—Jon 8:44; KTH 20:2.

God i bin wokim ol snek, na ating Adam i bin givim nem long ol snek paslain long taim Satan i bin giamanim Iv long rot bilong wanpela snek. Dispela snek i bin toktok wantaim Iv em i no gat tingting, olsem na em i no gat asua. Em i no save olsem Satan i mekim wok long rot bilong en, na em i no inap save long dispela strafe Jehova i bin givim long ol dispela lain i bikhet long em.

Orait, bilong wanem God i tok long daunim snek olsem? Pasin tru bilong ol snek, em ol i save wokabaut long bel na sutim tang bilong ol i go, olsem ol i kaikai das, dispela i makim stret samting i bin painim Satan, olsem God i daunim em tru. Pastaim em i holim bikpela namba olsem wanpela ensel bilong God, tasol nau God i daunim em olgeta long ples tudak, em Baibel i kolim Tatarus.​—2 Pita 2:​4, NW.

Na tu, sampela taim ol snek tru tru i save kaikaim lek bilong man, na olsem tasol Satan i bin “kaikaim lek” bilong “lain” olsem pikinini bilong God. (Stat 3:15) Nambawan bilong dispela lain pikinini, em Jisas Krais, na inap liklik taim em i bin kisim pen long han bilong ol lain bilong Satan. Tasol bihain Krais wantaim ol poroman bilong em, em ol Kristen em God i bin makim na ol i kirap bek pinis long matmat, ol bai krungutim het bilong Satan, em snek i olsem piksa bilong en, na ol bai pinisim em olgeta. (Rom 16:20) Olsem na taim God i mekim tok bilong kot long snek, dispela i makim stret olsem God i daunim Satan, dispela “snek bilong bipo tru” em yumi no inap lukim, na bihain em bai bagarap olgeta.