Ol Man i Askim . . .

Bilong Wanem Satan i Yusim Wanpela Snek Bilong Toktok Wantaim Iv?

▪ Ating yu bai wanbel long ol tok i stap long pes 8, olsem Satan i putim tok long maus bilong snek na em i toktok long Iv. Baibel i skulim yumi long dispela samting. Tasol ating bai yu tingting olsem, ‘Bilong wanem wanpela strongpela spirit i toktok long rot bilong wanpela snek?’

Baibel i tok Satan i mekim wok long “pasin bilong trik na giaman,” na samting i kamap long gaden Iden i kamapim ples klia dispela samting. (Efesus 6:11) Samting i kamap long dispela gaden i no wanpela stori nating long wanpela animal i toktok, nogat, em i wanpela stori long samting tru em Satan i bin mekim bilong pulim ol man long lusim God. Dispela i kamap olsem wanem?

Satan i skelim gut husat em i laik pulim. Iv i bin kamap bihain long God i bin wokim ol ensel na Adam. Satan i save olsem Iv i no gat bikpela save, olsem na em i mekim ol samting bilong trikim na giamanim em. Em i yusim wanpela snek bilong haitim em yet​—⁠em wanpela animal i save was gut long pasin bilong em​—⁠na long dispela rot em i haitim gut samting em i laik mekim. (Stat 3:⁠1) Tingim tu samting i kamap long pasin bilong em long mekim snek i toktok.

Namba wan, Satan i kleva tru long pulim tingting bilong Iv na Iv i laik kisim sampela save moa. Iv i save olsem ol snek i no inap toktok; man bilong em i bin skelim gut pasin bilong olgeta animal na bihain em i givim nem long ol na long snek tu. (Stat 2:​19, 20) Iv tu i bin save gut long pasin bilong dispela animal. Olsem na pasin trik bilong Satan i kirapim tru tingting bilong Iv, na em i tingting strong long dispela wanpela samting i gat tambu long en long gaden Iden. Namba tu, sapos snek i hait long ol han bilong diwai tambu, ating Iv bai kisim wanem tingting long dispela? Olsem wanem? Iv inap kisim tingting olsem snek i kaikai prut bilong dispela diwai, na dispela i mekim na em inap toktok? Sapos prut i mekim na snek i toktok, orait dispela inap mekim wanem samting long em? Yumi no save long tingting bilong Iv o snek i bin kaikai dispela prut o nogat, tasol yumi save olsem taim snek i tokim Iv long prut bai mekim na em i kamap “wankain olsem God,” Iv i bilipim tok giaman bilong em.

Na ol tok Satan i mekim, ol tu i kamapim klia tingting bilong em. Satan i mekim na Iv i kisim tupela tingting, olsem God i pasim em long kisim sampela gutpela samting na i no givim fridom long em. Bambai laik bilong Satan i ken kamap, Iv i mas putim laik bilong em yet i go pas, winim pasin bilong em long laikim God husat i givim olgeta samting long em. (Stat 3:​4, 5) Sori tru, pasin trik bilong Satan i wok gut; Iv tupela Adam i no bin kamapim pasin laikim long bel bilong ol na ol i no gat pasin bilong tenkyu long Jehova, em ol pasin ol i mas i gat. Olsem wanem? Long nau tu Satan i save kirapim ol man long tingim laik bilong ol yet na kisim wankain tingting?

Bilong wanem Satan i mekim olsem? Em i laikim wanem samting? Long gaden Iden, em i traim long haitim em yet na tingting bilong em. Tasol bihain em i kamapim klia tingting bilong em. Taim em i traim Jisas, em i save olsem em i no inap haitim em yet. Olsem na em i tokim Jisas: “Brukim skru na lotu long mi.” (Matyu 4:⁠9) I klia tru olsem inap longtaim pinis Satan i jeles tru long pasin bilong ol man long lotuim God Jehova. Em i redi long mekim olgeta samting em inap long mekim bilong pasim ol man long lotuim God o pulim ol long lusim stretpela pasin bilong lotu. Em i gat laik tru long bagarapim pasin bilong ol man long stap gut long God.

Baibel i kamapim klia olsem Satan i wok strong tru long painim rot bilong pulim ol man na ol i no ken lotuim Jehova. Tasol yumi no ken larim Satan i giamanim yumi olsem em i giamanim Iv, long wanem, “yumi save pinis long tingting na pasin bilong em.”​—⁠2 Korin 2:11.