Adam na Iv i Sakim Tok Bilong God

Wanpela de taim Iv i stap wanpis, wanpela snek i toktok long em. Snek i tok: ‘Tru tru God i tok yutupela i no ken kaikai prut bilong olgeta diwai?’ Iv i tok: ‘Mitupela i ken kaikai prut bilong olgeta diwai, wanpela tasol nogat. Sapos mitupela i kaikai prut bilong dispela diwai, mitupela bai i dai.’ Snek i tok: ‘Yutupela i no inap dai. Sapos yutupela i kaikai, yutupela bai kamap wankain olsem God.’ Yu ting dispela tok i tru? Nogat, em tok giaman. Tasol Iv i bilipim. Taim Iv i wok long lukluk long dispela prut, em i laikim moa yet. Em i kaikai prut na givim hap long Adam. Adam i save olsem ol bai dai sapos ol i sakim tok bilong God. Maski Adam i save, em i kaikai dispela prut.

Bihain liklik long dispela de, Jehova i toktok long Adam na Iv. Em i askim ol wai na ol i sakim tok bilong em. Iv i sutim tok long snek, na Adam i sutim tok long Iv. Adam na Iv i sakim tok bilong Jehova, olsem na em i rausim ol long gaden. Bilong pasim ol long go bek, em i putim ol ensel na bainat i gat paia i tanim tanim long rot i go insait long dispela gaden.

Jehova i tok man i giamanim Iv bai kisim tu panismen. Tru tru, snek i no toktok long Iv. Jehova i no wokim ol snek bilong toktok. Em wanpela ensel nogut i mekim na snek i toktok. Em i mekim olsem bilong trikim Iv. Baibel i kolim dispela ensel olsem Satan o Devil. Bihain Jehova bai bagarapim Satan na em bai i no inap moa long trikim ol man long mekim ol pasin nogut.