Sampela i Gat Bikpela Namba Moa Long Yumi

MI SAVE yu bai wanbel long tok olsem sampela i gat bikpela namba na strong, winim yu na mi. Yu ting husat i olsem?— God Jehova. Olsem wanem long Pikinini bilong em, Bikpela Tisa? Yu ting em i gat bikpela namba na strong, winim yumi?— Yes, em i gat.

Jisas i bin stap wantaim God long heven. Em i wanpela Pikinini spirit, o ensel. Yu ting God i bin wokim ol arapela ensel, o ol pikinini spirit?— Yes, em i bin wokim planti milion ensel. Ol dispela ensel tu i gat bikpela namba na ol i strong moa, winim yumi.—Hibru 1:7; KTH 5:11.

Yu tingim yet nem bilong dispela ensel i bin toktok long Maria?— Nem bilong em Gebriel. Em i tokim Maria olsem pikinini em bai karim em i Pikinini Bilong God. God i putim laip bilong Pikinini spirit bilong em insait long bel bilong Maria na bai Jisas inap kamap olsem bebi long graun.—Luk 1:​26, 27.

Yu bilipim dispela mirakel? Yu bilip olsem Jisas i bin stap wantaim God long heven?— Jisas i tok em i bin stap long heven. Olsem wanem na Jisas i save long ol dispela samting? Orait, ating taim em i stap mangi yet, Maria i bin tokim em long ol samting Gebriel i bin tokim em long en. Na tu, ating Josep i bin tokim Jisas olsem God em i Papa tru bilong em.

Taim Jisas i kisim baptais, God i stap antap long heven na em i tok: “Dispela em i Pikinini bilong mi.” (Matyu 3:17) Na long nait paslain long em i dai, Jisas i beten olsem: “Papa, taim graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi gen na bai mi stap wantaim yu.” (Jon 17:5) Yes, Jisas i askim God long kisim em i go stap gen wantaim Em long heven. Olsem wanem bai em inap i stap long heven?— Em inap stap long heven sapos God i mekim em i kamap gen wanpela spirit o ensel.

Nau mi laik kamapim wanpela bikpela askim long yu. Yu ting olgeta ensel i gutpela? Yu ting wanem?— Long bipo tru, olgeta ensel i gutpela. Olgeta i gutpela, long wanem, Jehova yet i bin wokim ol, na olgeta samting em i wokim i gutpela. Tasol bihain wanpela ensel i kamap nogut. Dispela i kamap olsem wanem?

Bilong save long dispela, yumi mas i go bek long taim God i bin wokim namba wan man na meri, em Adam na Iv. Sampela man i tok stori bilong ol i wanpela stori nating tasol. Tasol Bikpela Tisa i save olsem em i trupela stori.

Taim God i wokim Adam na Iv, em i putim ol long wanpela naispela gaden long ples ol i kolim Iden. Em i wanpela pak, o paradais. Ol inap kamapim planti pikinini, kamapim bikpela famili, na stap long Paradais inap oltaim oltaim. Tasol i gat wanpela bikpela samting ol i mas kisim save long en. Em samting yumi bin stori pinis long en. Yumi ken traim tingim gen dispela samting.

Jehova i bin tokim Adam na Iv olsem ol i ken kaikai prut bilong olgeta diwai i stap long gaden. Tasol i gat wanpela diwai ol i no ken kaikai prut bilong en. God i tokim ol long samting bai painim ol sapos ol i kaikai prut bilong dispela diwai. Em i tok: ‘Wantu bai yutupela i dai.’ (Stat 2:17; 3:3) Olsem na Adam na Iv i mas lainim wanem samting?—

Ol i mas lain long pasin bilong bihainim tok. Yes, bilong i stap laip, ol i mas bihainim tok bilong God Jehova! Adam na Iv i no ken tok tasol olsem ol bai bihainim tok, nogat. Ol i mas soim olsem ol i bihainim tok bilong God long rot bilong ol samting ol i mekim. Sapos ol i bihainim tok bilong God, ol bai soim olsem ol i laikim em tru na ol i laik bai em i stap Bos bilong ol. Na ol bai inap i stap oltaim long Paradais. Tasol sapos ol i kaikai prut bilong dispela diwai, dispela bai soim wanem samting?—

Dispela bai soim olsem ol i no tenkyu long ol samting God i bin givim long ol. Sapos yu bin stap long dispela taim, bai yu bihainim tok bilong Jehova?— Pastaim, Adam na Iv i bihainim tok. Tasol bihain, wanpela man i gat bikpela namba moa long ol i giamanim Iv. Em i kirapim Iv long sakim tok bilong Jehova. Husat dispela man?—

Baibel i tok wanpela snek i bin toktok long Iv. Tasol yu save olsem snek yet i no inap long toktok. Olsem na wanem samting i mekim na em inap toktok?— Wanpela ensel i mekim na i olsem snek i toktok. Tasol tru tru em ensel i wok long toktok. Dispela ensel i kirap kisim ol tingting nogut. Em i laik bai Adam na Iv i lotuim em. Em i laik bai ol i bihainim tok bilong em. Em i laik kisim ples bilong God.

Olsem na dispela ensel nogut i kirapim Iv long kisim ol tingting nogut. Long rot bilong dispela snek, em i tokim Iv: ‘God i no tok tru long yupela. Yupela i no inap i dai sapos yupela i kaikai prut bilong dispela diwai. Yupela bai kisim gutpela save na tingting olsem God.’ Sapos yu bin stap long dispela taim, bai yu bilipim dispela tok?—

Iv i kirap laikim samting em God i no bin givim long em. Em i kaikai prut bilong diwai tambu. Na em i givim sampela long Adam. Adam i no bilipim tok bilong snek. Tasol laik bilong em long stap wantaim Iv i strong moa, winim pasin bilong em long laikim God. Olsem na em tu i kaikai prut bilong dispela diwai.—Stat 3:​1-6; 1 Timoti 2:14.

Wanem samting i kamap?— Adam na Iv i kisim sin, ol i go lapun, na ol i dai. Ol i gat sin long skin, olsem na olgeta pikinini bilong ol tu i kisim sin na isi isi ol i kamap lapun na ol i dai. God i no bin giaman! Tru tumas, bilong i stap laip man i mas bihainim tok bilong God. (Rom 5:12) Baibel i tokim yumi olsem dispela ensel i bin giamanim Iv, nem bilong em Satan, na ol arapela ensel husat i kamap nogut, em ol i spirit nogut.—Jems 2:19; KTH 12:9.

Olsem wanem? Yu save long as na dispela gutpela ensel God i bin wokim, em i kamap ensel nogut?— Em i bin kisim ol tingting nogut. Em i laik stap Namba Wan. Em i save olsem God i bin tokim Adam na Iv long kamapim ol pikinini, na em i laik bai olgeta i lotuim em. Satan i laik kirapim olgeta man long sakim tok bilong Jehova. Olsem na em i traim long kirapim yumi long kisim ol tingting nogut.—Jems 1:​13-15.

Satan i tok i no gat wanpela man i laikim tru Jehova. Em i tok yu na mi i no laikim God na yumi no gat laik long mekim ol samting God i tokim yumi long mekim. Em i tok taim ol samting i kamap olsem yumi laikim, long dispela taim tasol yumi save bihainim tok bilong Jehova. Yu ting Satan i tok stret? Yumi kain man olsem?

Bikpela Tisa i bin tok olsem Satan em i man bilong giaman! Jisas i bihainim tok bilong Jehova na long dispela rot em i soim olsem em i laikim tru Jehova. Na Jisas i no bihainim tok bilong God long taim ol samting i wok gut tasol, nogat. Em i mekim olsem long olgeta taim, maski ol man i putim hevi long em na i hatwok long bihainim tok. Em i stap gut long Jehova i go inap long taim em i dai. Long dispela as God i givim laip gen long em na bai em inap i stap inap oltaim oltaim.

Olsem na yu ting husat em i nambawan birua bilong yumi?— Yes, em Satan. Yu inap lukim em?— Nogat. Tasol yumi save olsem em i stap, na em i gat bikpela namba na strong, winim yumi. Tasol husat i gat bikpela namba moa, winim Satan?— Em God Jehova. Olsem na yumi ken save olsem God inap lukautim yumi.