Ol Blesing o Ol Samting Nogut—Ol Samting i Stap Olsem Piksa
“Dispela ol samting i bin kamap long ol, em i olsem piksa bilong ol arapela man i ken lukim. Ol man i bin raitim ol dispela stori long buk bilong God, bilong givim tingting long yumi ol man i stap long dispela taim nau, em taim dispela graun klostu i laik pinis.”—1 KORIN 10:11.
TAIM ol i penim wanpela tul samting ol i bin wokim long ain, ros inap kamap aninit long pen na i wok long kaikai ain. Pastaim yumi no inap lukim dispela ros, tasol bihain em bai kamap ples klia. Na i olsem tu long ol tingting na laik i stap long bel bilong man—taim dispela tingting na laik i kirap long go nogut, ating pastaim dispela i no kamapim wanpela samting nogut, na ol man i no inap lukim tu. Tasol bihain em bai kirapim man long mekim wanpela rong, na nau dispela tingting na laik nogut i kamap ples klia. Sapos yumi gat gutpela tingting, bai yumi wok long glasim gut ol tul samting ol i bin wokim long ain, nogut ros i kamap long en, na i olsem tu sapos yumi glasim gut bel bilong yumi na yumi wok long stretim—sapos yumi mekim olsem, yumi inap holimpas pasin Kristen bilong i stap gut long God. O yumi ken tok, God inap mekim gut long yumi na yumi inap abrusim ol samting nogut i olsem strafe bilong God. Ating sampela i ting, ol blesing na ol samting nogut ol i bin tokaut long en long lain Israel bilong bipo i no samting bilong ol man i stap nau long taim bilong las de. (Josua 8:34, 35; Matyu 13:49, 50; 24:3) Tasol dispela tingting i no stret. Ol samting i bin painim ol Israel long bipo, olsem i stap long 1 Korin sapta 10, i olsem piksa bilong givim tingting long yumi, na dispela tok lukaut inap helpim gut yumi.
2 Aposel Pol i skelim ol Israel i stap aninit long Moses wantaim ol Kristen i stap aninit long Krais. (1 Korin 10:1-4) Ol manmeri bilong Israel ol inap i go insait long Graun Bilong Promis, tasol “God i no laikim pasin bilong planti bilong ol dispela lain manmeri. Olsem na ol i bin i dai long ples drai nating.” Olsem na Pol i tokim ol wanwok Kristen: “Na dispela olgeta samting i bin kamap olsem piksa, bilong yumi ken lukim na yumi no ken mangal long ol samting nogut, olsem ol i bin mekim.” (1 Korin 10:5, 6) Ol laik i save kamap long bel na i go bikpela, olsem na yumi mas tingim gut ol dispela tok lukaut bilong Pol long ol samting i bin painim ol Israel long bipo.
No Ken Lotuim God Giaman
3 Namba wan tok lukaut bilong Pol i olsem: “Yupela i no ken lotu long ol giaman god, olsem sampela bilong ol i bin mekim. Buk bilong God i tok olsem, ‘Ol i sindaun long kaikai na dring, na bihain ol man i go pilai long ol meri.’ ” (1 Korin 10:7) Pol i toktok long taim ol Israel i kirap bihainim pasin bilong ol Isip na ol i wokim wanpela bulmakau gol olsem god bilong ol. (Kisim Bek, sapta 32) Disaipel Stiven i kamapim as bilong dispela samting taim em i tok: “Tasol ol tumbuna bilong yumi ol i no laik harim tok bilong Moses [em mausman bilong God]. Nogat. Ol i sakim tok bilong em, na long bel bilong ol i laikim tumas long i go bek long Isip. Ol i tokim Aron olsem, ‘Mipela i no save wanem samting i bin kamap long Moses, dispela man i bin kisim yumi long Isip na bringim yumi i kam. Olsem na yu mas wokim ol god bilong mipela, na ol i ken i go paslain long mipela na bringim mipela long rot.’ Long dispela taim ol i wokim wanpela pikinini bulmakau, na ol i mekim ofa long dispela giaman god. Na ol i amamas long dispela samting ol i bin wokim long han bilong ol yet.” (Aposel 7:39-41) Tingim dispela: “Long bel bilong ol,” ol dispela bikhetlain Israel i kisim ol laik nogut, na bihain dispela i kirapim ol long lotuim god giaman. “Ol i wokim wanpela pikinini bulmakau, na ol i mekim ofa long dispela giaman god.” Na “ol i amamas long dispela samting ol i bin wokim long han bilong ol yet.” Ol i wokim musik na ol i singsing na danis na kaikai na dring. I olsem pasin bilong lotuim dispela god giaman i samting bilong grisim tru ol na i gat amamas long mekim.
4 Ol lain bilong dispela graun bilong Satan—em Isip i piksa bilong en—ol i givim bel olgeta long painim amamas, na em i kamap olsem god bilong ol. (1 Jon 5:19; KTH 11:8) Ol manmeri i gat nem long piksa wokabaut, na long singsing na spot, na ol danis na musik na ol samting ol i ting em i samting bilong kisim amamas long en, ol i kamap olsem god bilong ol manmeri bilong dispela graun. Planti ol i laik painim amamas long olgeta taim, tasol ol i tok yet olsem ol i save lotuim Jehova. Taim wanpela Kristen i no strong moa long spirit na em i mekim wanpela rong na kongrigesen i mas stretim em, planti taim ol i kisim save olsem as bilong dispela samting, em dispela Kristen i bin dring, na danis, na mekim olkain amamas i laik kamap olsem god bilong em. (Kisim Bek 32:5, 6, 17, 18) Tru, sampela samting yumi mekim bilong kisim amamas ol i gutpela na yumi amamas long mekim. Tasol long nau, planti musik na danis na piksa wokabaut na video i bilong amamasim ol man i gat ol laik nogut bilong dispela graun i stap long bel bilong ol.
5 Ol Kristen tru i no save pundaun na lotuim ol god giaman. (2 Korin 6:16; 1 Jon 5:21) Yumi olgeta wan wan i mas was gut, nogut yumi kalabus long mekim ol amamas i olsem lotuim god giaman na yumi tingting tasol long painim ol amamas olsem ol lain bilong dispela graun i save mekim, na bihain ol hevi i painim yumi long dispela. Sapos yumi larim ol pasin na tingting bilong dispela graun i bosim yumi, ol laik na tingting nogut inap pas strong long bel na tingting bilong yumi na yumi no save. Sapos yumi no stretim ol dispela laik na tingting nogut, bihain ol inap mekim na bai yumi ‘dai long ples drai nating’ bilong dispela graun bilong Satan.
6 Olsem Moses i bin mekim long taim ol Israel i lotuim bulmakau gol, i olsem dispela lain “wokboi i gat gutpela tingting” ol tu i tok: “Husat man i laik bihainim Bikpela [Jehova], orait em i mas i kam long mi.” Sapos yumi mekim ol samting i kamapim klia olsem yumi strong long bihainim lotu i tru, dispela inap lukautim yumi na yumi no bagarap. Lain bilong Moses, em lain Livai, ol i kirap kwik long rausim ol pasin nogut i kam insait long lain Israel. (Matyu 24:45-47; Kisim Bek 32:26-28) Olsem na yu mas skelim gut ol amamas na musik na video samting yu save laikim. Sapos yu lukim olsem sampela samting bilong en i nogut, orait bihainim Jehova. Long pasin bilong beten na wetim God i helpim yu, senisim laik bilong yu long ol dispela kain amamas na musik, na rausim ol samting inap bagarapim yu long ol samting bilong spirit, olsem Moses i bin brukbrukim dispela bulmakau gol.—Kisim Bek 32:20; Lo 9:21.
7 Yumi ken mekim wanem bambai bel bilong yumi i no ken go nogut olsem ros i save holim ain na em i bagarap? Yumi mas wok strong long stadi long Baibel na larim tok i tru bilong en i go long tingting na bel bilong yumi na pas strong long en. (Rom 12:1, 2) Na yumi mas go oltaim long ol miting Kristen. (Hibru 10:24, 25) Tasol sapos yumi go long miting na yumi sindaun nating tasol, i olsem yumi penim wanpela samting i gat ros long en. Ating pastaim yumi amamas liklik long miting, tasol as bilong dispela hevi i stap yet. Yumi mas redim gut ol tok bai kamap long miting, na tingim tingim, na bekim sampela tok long miting. Sapos yumi mekim olsem, bai yumi strong long rausim ol samting nogut i stap yet long bel bilong yumi na ol inap bagarapim yumi olsem ros i save bagarapim ol samting. Dispela bai helpim yumi long bihainim stret ol tok bilong Baibel na strongim yumi long karim ol hevi i save traim bilip bilong yumi, na bai ‘pasin bilong yumi i gutpela na i stret olgeta.’—Jems 1:3, 4; Sindaun 15:28.
Ol Tok Lukaut Long Pasin Pamuk
8 Orait nau Pol i kolim narapela samting i olsem piksa bilong yumi ken tingim, na em i tok: “Yumi no ken mekim pasin pamuk, olsem sampela bilong ol i bin mekim, na long wanpela de tasol 23,000 bilong ol i bin lus.”a (1 Korin 10:8) Pol i stori long taim ol Israel i brukim skru na lotuim ol god giaman na ol i “pamuk nabaut wantaim ol meri Moap.” (Namba 25:1-9) Pasin pamuk inap kamapim dai long man! Sapos yumi larim ol tingting na laik bilong pasin pamuk i go pulap long tingting na bel bilong yumi, i olsem yumi larim “ros” i bagarapim bel bilong yumi. Jisas i tok: “Yupela i harim pinis bipo ol i tok olsem, ‘Yupela ol marit, yupela i no ken mekim pasin pamuk.’ Tasol mi tokim yupela olsem, sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.”—Matyu 5:27, 28.
9 Pasin bilong “man i lukim wanpela meri na i gat mangal nogut long em,” dispela i save kamapim samting nogut. Na i olsem tu long taim bikpela Tait Wara long taim bilong Noa i no kamap yet na sampela ensel i bikhet na ol i kisim tingting nogut—dispela tu i bin kamapim samting nogut. (Stat 6:1, 2) Na yumi mas tingim King Devit—em i bin wok long lukim wanpela meri na em i mangal nogut long em, na dispela i kamapim wanpela bikpela hevi tru long Devit. (2 Samuel 11:1-4) Tasol stretpela man marit, em Jop, em i narapela kain—em i ‘mekim strongpela promis pinis olsem, em i no ken aigris long ol meri,’ olsem na em i abrusim pasin pamuk na em i holimpas pasin bilong i stap gut long God. (Jop 31:1-3, 6-11) Yumi ken tingim ai bilong yumi i olsem windo bilong bel. Na taim bel bilong man i nogut, planti pasin nogut i save kamap insait long bel na i kam ausait.—Mak 7:20-23.
10 Sapos yumi bihainim ol dispela tok bilong Jisas, bai yumi no larim tingting bilong yumi i wok long tingim ol samting nogut—olsem yumi no ken lukim ol piksa nogut bilong pasin sem, o lukim wanpela wanbilip Kristen o wanpela wanwok samting na yumi kisim tingting nogut bilong pasin pamuk. Sapos yumi laik rausim ros long wanpela hap ain, yumi no ken mekim olsem yumi laik rausim liklik hap pipia nating—dispela i no inap rausim ros. Olsem na yu no ken ting ol tingting yu kisim long mekim pasin pamuk samting em i liklik samting tasol na i no inap bagarapim yu. Yu mas kirap na wok strong long rausim ol dispela tingting nogut bilong pasin pamuk i stap long bel bilong yu. (Skelim wantaim Matyu 5:29, 30.) Pol i tok strong long ol wanbilip, olsem: “Yupela i mas kilim i dai olgeta pasin bilong dispela graun i stap long bel bilong yupela. Mi tok long olkain pasin olsem, pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal long ol samting bilong narapela man. Dispela pasin bilong mangal em i wankain olsem pasin bilong lotu long giaman god. God i redim pinis pe nogut bilong givim long olgeta man i save mekim ol dispela kain pasin, em ol man i save sakim tok bilong en.” Tru tumas, “God i redim pinis pe nogut,” em dispela samting nogut bilong ol man i save mekim pasin pamuk na olkain pasin olsem. Olsem na yumi mas “kilim i dai” ol laik nogut i stap long bel bilong yumi.—Kolosi 3:5, 6.
No Ken Bikhet na Toktok Planti
11 Pol i givim narapela tok lukaut long yumi, olsem: “Na yumi no ken traim [Jehova, NW] tu, olsem sampela bilong ol i bin mekim, na ol snek nogut i kaikaim ol na ol i bagarap.” (1 Korin 10:9) Taim ol Israel i wokabaut long ples wesan nating klostu long mak bilong kantri Idom, ol i wok long “tok kros [olsem toktok planti] long God na long Moses. Ol i tok olsem, ‘Bilong wanem yupela i kisim mipela long Isip na bringim mipela i kam bilong i dai tasol long dispela ples wesan nating? I no gat kaikai long dispela hap, na mipela i les pinis long dispela rabis kaikai,’ ” em dispela mana God i bin givim long ol. (Namba 21:4, 5) Man! Tingim dispela: Ol Israel i wok long toktok planti long God na ol i tok, kaikai em i givim long ol em i rabis kaikai!
12 Taim ol Israel i toktok planti olsem, ol i traim pasin bilong Jehova long isi long ol man. Ol i no abrusim strafe, nogat. Jehova i salim ol snek nogut i kam namel long ol na kaikaim ol, na planti ol i dai. Bihain ol i pilim rong bilong ol na ol i tanim bel, na Moses i beten long helpim ol na dispela samting nogut i pinis. (Namba 21:6-9) Dispela samting i painim ol Israel i mas i stap olsem piksa bilong yumi ken tingim na yumi no ken bikhet na toktok planti long God na ol samting em i bin putim bilong bosim yumi.
No Ken Tok Kros
13 Orait, nau Pol i kolim laspela tok lukaut long ol samting ol Israel i bin mekim long ples wesan nating. Em i tok: “Na yupela i no ken tok kros long God, olsem sampela bilong ol i bin mekim, na ensel bilong kilim man i dai, em i bin kam na kilim ol i dai.” (1 Korin 10:10) Ol i kirap na bikhet long Moses taim Kora na Datan na Abiram wantaim lain bilong ol i no laik daun long ol man God i bin putim bilong bosim ol, na ol i tok Moses na Aron i no gat namba tru long bosim ol. (Namba 16:1-3) Taim Jehova i kilim i dai ol dispela bikhetman, ol Israel i kirap na tok kros, long wanem, ol i ting i no stret Jehova i kilim i dai ol dispela bikhetman. Namba 16:41 i tok: “Long de bihain, olgeta manmeri i tok kros long Moses tupela Aron. Ol i tok olsem, ‘Yutupela i bin kilim i dai sampela manmeri bilong Bikpela.’ ” Ol Israel i toktok planti long strafe ol dispela man i bin kisim, olsem na God i salim wanpela bikpela sik nogut i kam, na 14,700 Israel ol i dai.—Namba 16:49.
14 Long taim bilong ol aposel, sampela man “i save givim baksait long God” ol i bin hait i kam insait long kongrigesen Kristen, tasol ol i tisa giaman na ol i man bilong toktok planti long ol samting. Ol dispela man “i save bikhet long Bikpela bilong yumi, na ol i save tok nogut long ol nambawan ensel,” olsem ol man God i bin makim long spirit holi na ol i kisim wok bilong lukautim kongrigesen Kristen long ol samting bilong spirit. Disaipel Jut i stori moa long ol man i bikhet na givim baksait long God na em i tok: “Ol dispela man ol i save bel nogut long olgeta samting i kamap long ol, na ol i save toktok planti oltaim. Ol i save bihainim ol laik nogut bilong bel bilong ol yet.” (Jut 3, 4, 8, 16) Long nau sampela man i save kamap man bilong toktok planti, long wanem, ol i larim bel bilong ol i go nogut, olsem ros i save bagarapim ain. Planti taim ol i save tingting tasol long ol liklik pasin kranki bilong ol man i gat wok long bosim kongrigesen, na ol i kirap na toktok planti long ol. Ol i mekim olsem i go, na ating bihain ol i kirap na skelim skelim ol buk na nius samting em “wokboi i gat gutpela tingting” i save wokim, na ol i laik daunim tok bilong en.
15 Sapos yumi gat gutpela bel, i stret yumi ken mekim sampela askim long wanpela tok bilong Baibel. Tasol olsem wanem sapos yumi wok long kisim sampela tingting olsem yumi no wanbel long ol dispela tok, na taim yumi bung wantaim ol gutpela pren bilong yumi, yumi wok long skelim skelim ol dispela tok? I gutpela yumi ken askim skin bilong yumi yet olsem: ‘Sapos mi wok long toktok planti i go i go, wanem samting bai kamap long dispela pasin? Ating i gutpela sapos mi mekim pasin daun na beten askim God long givim gutpela tingting long mi?’ (Jems 1:5-8; Jut 17-21) Kora wantaim ol man i bihainim em, em ol i bin bikhet long wok bilong Moses na Aron long bosim ol Israel, ating ol i bilip tru olsem tingting bilong ol i gat as bilong en, olsem na ol i no skelim bel bilong ol. Tasol tingting bilong ol i no stret liklik. Na i wankain tu long ol Israel i bin tok kros taim God i kilim i dai Kora na ol narapela bikhetman. Tru tumas, long pasin bilong gutpela tingting yumi mas larim ol dispela stori i stap olsem piksa bilong givim tingting long yumi na kirapim yumi long skelim bel bilong yumi yet, na rausim pasin bilong yumi long toktok planti na larim Jehova i stretim bel bilong yumi!—Song 17:1-3.
Larim Ol Dispela Stori i Skulim Yu na Kisim Ol Blesing
16 God i stiaim tingting bilong Pol, na laspela tok em i mekim long dispela lista bilong ol tok lukaut i olsem: “Dispela ol samting i bin kamap long ol, em i olsem piksa bilong ol arapela man i ken lukim. Ol man i bin raitim ol dispela stori long buk bilong God, bilong givim tingting long yumi ol man i stap long dispela taim nau, em taim dispela graun klostu i laik pinis. Olsem na sapos wanpela man i ting em i sanap strong, orait em i mas lukaut gut. Nogut em i pundaun.” (1 Korin 10:11, 12) Olsem na maski yumi gat namba o gutpela nem insait long kongrigesen Kristen, oltaim yumi mas wok long skelim bel bilong yumi.
17 Ros i save holim ain, na olsem tasol yumi ol pikinini bilong sinman Adam i bin kisim tingting long em long mekim pasin nogut. (Stat 8:21; Rom 5:12) Olsem na sapos yumi pilim olsem wanpela tingting i no stret i kamap long bel bilong yumi, yumi no ken bel hevi tumas long dispela. Yumi mas kirap kwik na mekim wanpela samting. Sapos wanpela hap ain i stap ausait na win i gat wara long en i holim dispela ain, o i gat sampela marasin nogut long win, ros inap bagarapim kwik dispela ain. Orait, yumi mas wok long abrusim “win” bilong dispela graun bilong Satan, i gat ol amamas nogut tru, na pasin pamuk i pulap long en, na tingting bilong ol man i nogut tasol.—Efesus 2:1, 2.
18 Jehova i bin givim wanpela samting long yumi bilong helpim yumi long daunim ol tingting nogut yumi bin kisim long nambawan tumbuna bilong yumi. Jehova i bin givim Pikinini bilong em long yumi bambai ol man i bilip long em ol inap kisim laip i stap oltaim. (Jon 3:16) Sapos yumi bihainim stret lek bilong Jisas na kamapim ol pasin Kristen, bai yumi olsem wanpela gutpela samting bilong helpim ol narapela man. (1 Pita 2:21) Na bai yumi no kisim ol samting nogut—bai yumi kisim ol blesing long God.
19 Tru, yumi ol manmeri bilong nau yumi inap mekim rong, wankain olsem ol Israel bilong bipo, tasol yumi gat Baibel olgeta, em Tok Bilong God, bilong soim rot long yumi. Baibel inap lainim yumi long ol samting Jehova i bin mekim long ol man, na i lainim yumi tu long ol gutpela pasin bilong Jehova i kamap ples klia long pasin bilong Jisas yet, em i olsem piksa bilong God na “em i soim bikpela lait bilong God . . . na em i wankain tru olsem God yet.” (Hibru 1:1-3; Jon 14:9, 10) Sapos yumi beten na stadi oltaim long ol tok bilong Baibel, yumi inap kisim “tingting bilong Krais.” (1 Korin 2:16) Taim sampela traim o hevi i painim yumi na i traim bilip bilong yumi, yumi ken tingim ol stori bilong Baibel long ol samting i bin kamap bipo, na pasin bilong Krais Jisas, em i nambawan gutpela piksa bilong yumi ken bihainim. Sapos yumi mekim olsem, dispela bai helpim yumi, na bai yumi no ken kisim ol samting nogut long God. Jehova bai orait long yumi na em bai mekim gut long yumi i go inap oltaim oltaim.
[Futnot]
Bai Yu Bekim Olsem Wanem?
◻ Olsem wanem yumi ken bihainim tok bilong Pol olsem yumi no ken kamap man bilong lotuim god giaman?
◻ Yumi ken mekim wanem bilong bihainim tok lukaut bilong Pol long pasin pamuk?
◻ Bilong wanem yumi mas abrusim pasin bilong tok kros na toktok planti?
◻ Olsem wanem yumi ken kisim ol blesing long God na yumi no ken kisim ol samting nogut long em?
[Askim Bilong Stadi]
1. Yumi mas glasim gut wanem samting, olsem yumi glasim wanpela tul samting?
2. Namba wan Korin 10:5, 6 i tok wanem long ol samting i bin painim ol Israel long ples wesan nating?
3. Taim ol Israel i wokim bulmakau gol, ol i mekim wanem rong?
4, 5. Yumi mas abrusim wanem ol pasin i olsem yumi lotuim god giaman?
6. Yumi mas mekim wanem long ol samting yumi save mekim bilong painim amamas?
7. Yumi ken mekim wanem bilong lukautim bel bilong yumi?
8-10. (a) I gat wanem tok lukaut long 1 Korin 10:8 na yumi mas tingim? (b) Olsem wanem yumi ken bihainim tok bilong Jisas long Matyu 5:27, 28 na bai em inap helpim yumi?
11, 12. (a) Wanem tok lukaut i stap long 1 Korin 10:9? Pol i toktok long wanem samting i bin kamap? (b) Dispela tok lukaut bilong Pol i mas mekim wanem long yumi?
13. Namba wan Korin 10:10 i mekim tok lukaut long wanem samting? Pol i tingim wanem pasin bikhet i bin kamap?
14, 15. (a) Wanem wanpela rong bilong “ol man i givim baksait long God” em ol i hait i kam insait long kongrigesen? (b) Stori bilong Kora inap lainim yumi long wanem samting?
16. Wanem bikpela tok bilong Pol i stap long 1 Korin 10:11, 12?
17. Sapos yumi pilim olsem wanpela tingting i no stret i kamap long bel bilong yumi, yumi mas mekim wanem?
18. Jehova i bin mekim wanem long pasin bilong ol man long kisim tingting bilong mekim pasin nogut?
19. Taim yumi tingim ol stori bilong Baibel long ol samting i bin kamap bipo, dispela inap helpim yumi olsem wanem?
[Piksa long pes 18]
Sapos yumi laik kisim ol blesing long God, yumi mas abrusim pasin bilong lotuim god giaman
[Ol Piksa long pes 20]
Yumi mas rausim ros long hap ain samting, na olsem tasol yumi mas rausim ol laik nogut i stap long bel bilong yumi