Klostu Nau Bai Lotu Tru i Win

“Bikpela bai i stap king bilong olgeta kantri.”​—⁠SEKARAIA 14:⁠9.

LONG taim bilong Namba Wan Pait Bilong Olgeta Hap, ol lain bilong graun i insait long pait ol i givim planti hevi long ol Kristen em God i bin makim, na kalabusim ol tu. Ol i no gat planti rot bilong givim maus bilong ol olsem ofa na litimapim nem bilong Jehova, na long ol samting bilong spirit i olsem ol i stap kalabus. Sekaraia 14:2 i tok profet long dispela samting. Dispela tok profet i stori long ol lain bilong olgeta kantri bai i kam pait long Jerusalem. Biktaun bilong dispela tok profet em “Jerusalem i stap long heven,” em Kingdom bilong God long heven, na “sia king bilong God na Pikinini Sipsip” i stap long dispela ples. (Hibru 12:​22, 28; 13:14; KTH 22:⁠3) Ol man God i makim na ol i stap long graun ol i olsem mausman bilong dispela taun. Ol manmeri bilong dispela lain em ol i stap gut long God, ol i winim dispela hevi​—⁠ol i nolaik tru long lusim dispela taun na i go kalabus.a

² Long 1919 ol man God i bin makim na ol i stap gut long em, ol i lusim kalabus bilong spirit, na kwiktaim ol i kirap mekim wok long dispela hap gutaim i kamap bihain long pait. Ol i mausman bilong Jerusalem i stap long heven, olsem na taim ol i lukim rot i op, ol i wok strong long autim gutnius bilong Kingdom bilong God na mekim wok bilong bungim ol laspela manmeri bilong lain 144,000. (Matyu 24:14; 2 Korin 5:​20) Long 1931 ol i kisim nem Witnes Bilong Jehova, em dispela nem i stap long Baibel.​—⁠Aisaia 43:​10, 12.

³ Kirap long dispela taim na i kam inap nau, ol Witnes bilong God em i bin makim ol, ol i wok strong na i no surik liklik. Na Hitler wantaim ol bikpela ami Natsi bilong em, ol tu i no inap daunim ol. Maski long olgeta kantri ol man i mekim nogut long ol, wok bilong ol i karim kaikai long olgeta hap bilong graun. Na kirap long yia 1935, wanpela bikpela lain bilong olgeta hap i kam bung wantaim ol, em dispela lain “planti manmeri tru” Baibel i tok profet long en long hap bilong Kamapim Tok Hait. Ol tu em ol Kristen i dediket na baptais pinis na ol i bin “wasim ol klos bilong ol long blut bilong Pikinini Sipsip [Krais Jisas], na ol klos i kamap waitpela.” (KTH 7:​9, 14) Tasol God i no bin makim dispela lain long spirit holi, na ol i no gat tingting long i go long heven. Ol i wet long kisim dispela samting em Adam na Iv i bin lusim, em gutpela laip olgeta long Paradais long graun. (Song 37:29; Matyu 25:34) Long nau dispela bikpela lain i kamap planti, winim 5 milion manmeri. Lotu tru bilong Jehova i wok long win, tasol bihain em bai win tru.

Ol Man Bilong Ol Narapela Kantri Insait Long Haus Spirit Bilong God

⁴ Olsem tok profet i tok, dispela bikpela lain i save lotuim God ‘long san na long nait long haus bilong en.’ (KTH 7:15) Dispela lain i no ol pris bilong lain Israel bilong spirit, olsem na yumi save, Jon i bin lukim ol i sanap long haus bilong God long ples bung bilong Ol Man Bilong Ol Arapela Lain. (1 Pita 2:⁠5) Tru tumas, haus spirit bilong Jehova i kamap gutpela tru​—⁠dispela bikpela lain i pulap tru insait long banis bilong en, na ol i wok long litimapim nem bilong Jehova wantaim liklik hap lain bilong Israel bilong spirit!

⁵ Bikpela lain i no save mekim wok bilong God long pasin em ples bung bilong ol pris i makim. God i no kolim ol stretpela man bambai ol i ken kamap pikinini bilong em long spirit, nogat. (Rom 8:​1, 15) Tasol ol i bilip long ofa bilong Jisas bilong baim bek ol, olsem na Jehova i orait long ol. Jehova i kolim ol olsem stretpela man bambai ol i ken kamap pren bilong em. (Skelim wantaim Jems 2:​21, 23.) Ol tu inap givim ofa long God long alta bilong spirit. Olsem na tok profet bilong Aisaia 56:​6, 7 i wok long kamap tru, em i tok: “Ol manmeri bilong ol arapela kantri i stap wantaim ol manmeri bilong mi [Jehova], na ol i save aninit long mi na laikim mi tru na mekim wok bilong mi, . . . bai mi bringim ol i go long Saion, dispela maunten bilong mi, na bai ol i amamas long i stap long haus bilong mi. Na bai ol i mekim ol ofa bilong paia i kukim olgeta na ol arapela kain ofa long alta bilong mi. Na bai mi laikim ol ofa bilong ol, long wanem, haus bilong mi bai i stap haus bilong ol manmeri bilong olgeta kantri i ken i kam long en na beten long mi.”

⁶ Wanpela ofa ol dispela manmeri bilong ol narapela kantri i givim, em ‘maus bilong ol [olsem gutpela plaua ol i wokim long wit na ol i givim olsem ofa] i litimapim nem bilong God,’ na ol i ‘mekim gutpela pasin long ol manmeri, na givim sampela samting bilong ol bilong helpim ol.’ (Hibru 13:​15, 16) Traipela dis i gat wara em ol pris i mas mekim wok long en bilong wasim hanlek bilong ol, dispela em i bikpela samting bilong givim tingting long ol dispela manmeri bilong ol narapela kantri. Ol tu i mas kamap klin long ol samting bilong spirit na long pasin bilong ol taim ol i wok long kisim save long Tok Bilong God, em Baibel.

Rum Tambu na Ol Samting Bilong En

⁷ Olsem wanem? Dispela bikpela lain manmeri bilong ol narapela kantri ol i mas tingim dispela Rum Tambu na ol samting i stap insait long en? Tru, inap long olgeta taim bihain ol i no inap i stap olsem samting dispela Rum Tambu i makim. Ol i no kamap nupela gen olsem ol pikinini bilong God long spirit na go i stap long heven. Orait, ating dispela i mekim na ol i bel kaskas long liklik hap lain bilong i go long heven? Nogat. Ol i amamas long gutpela wok ol i kisim bilong helpim liklik hap lain bilong 144,000, na ol i kamapim klia olsem ol i pilim tru gutpela laik bilong God, em i kisim dispela liklik lain olsem ol pikinini bilong em long spirit, em ol bai wok wantaim Krais long helpim ol manmeri bilong graun long kamap gutpela olgeta. Na tu, dispela bikpela lain manmeri bilong ol narapela kantri ol i pilim tru bikpela sori bilong God, em i opim rot long ol na ol i ken tingting long kisim laip oltaim long Paradais long graun. Sampela bilong dispela lain bilong ol narapela kantri ol i bin kisim gutpela wok wasman bilong helpim lain pris holi, olsem ol wokboi nating long haus bilong God long bipo i bin mekim, em ol Netinim.b (Aisaia 61:⁠5) Jisas i makim sampela bilong dispela lain long kamap olsem ‘pikinini bilong king’ na lukautim “ol manmeri long olgeta hap bilong graun.”​—⁠Song 45:⁠16.

⁸ Tru, dispela bikpela lain manmeri bilong ol narapela kantri ol i no inap tru long go insait long ples em Rum Tambu i makim, tasol ol samting insait long dispela rum inap skulim ol long sampela bikpela samting. Long olgeta taim dispela lam insait long Rum Tambu i mas i gat wel, na olsem tasol ol dispela manmeri bilong ol narapela kantri i mas i gat spirit holi bilong helpim ol long kisim gut ol tok i tru bilong Baibel i kam long rot bilong “wokboi i gat gutpela tingting.” (Matyu 24:​45-47) Na tu, spirit bilong God i helpim ol long kirap na bihainim singaut olsem: “Holi Spirit wantaim meri bilong Pikinini Sipsip [liklik hap lain God i bin makim] tupela i tok, ‘Yu kam.’ Na olgeta man i harim dispela tok, ol tu i mas tok, ‘Yu kam.’ Na wanem man nek bilong en i drai, em i mas kam . . . na kisim wara bilong givim laip, em i olsem presen bilong God.” (KTH 22:17) Olsem na dispela lam i kirapim tingting bilong bikpela lain na ol i ken tingim wok bilong ol long i stap olsem lait, olsem ol Kristen i mas mekim, na abrusim ol tingting na tok na pasin i givim bel hevi long spirit holi bilong God.​—⁠Efesus 4:​30.

⁹ Tebol i gat bret bilong givim long God, em i helpim bikpela lain long save, bilong i stap strong long ol samting bilong spirit, long olgeta taim ol i mas kisim ol kaikai bilong spirit i stap long Baibel na ol buk samting bilong dispela “wokboi i gat gutpela tingting.” (Matyu 4:⁠4) Alta bilong kamapim smok i gat gutpela smel i helpim ol long save, em i bikpela samting long ol i mas beten strong na askim Jehova long helpim ol bambai ol i ken holimpas bilip na stap gut long em. (Luk 21:36) Taim ol i beten, ol i mas litimapim nem bilong Jehova na tok tenkyu long em. (Song 106:⁠1) Na dispela alta bilong kamapim smok i gat gutpela smel i helpim ol long save, ol i mas litimapim nem bilong Jehova long ol narapela rot tu, olsem long taim ol i givim bel long mekim ol singsing bilong Kingdom long ol miting Kristen na long redi gut long ‘autim bilip bilong ol na bai God i kisim bek ol.’​—⁠Rom 10:⁠10.

Lotu Tru Bai Win Olgeta

¹⁰ Long nau planti manmeri bilong olgeta kantri ol i wok long kam insait long haus bilong Jehova bilong lotu long em. (Aisaia 2:​2, 3) Kamapim Tok Hait 15:4 i strongim dispela tok, olsem: “Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu. Olgeta lain man bai i kam na lotu long yu. Long wanem, stretpela pasin bilong yu i kamap ples klia pinis.” Sekaraia sapta 14 i stori long samting i kamap bihain long dispela. Klostu nau, tingting nogut bilong klostu olgeta man bilong graun bai i go bikpela olgeta na ol bai bung wantaim bilong kirapim laspela pait long Jerusalem​—⁠em lain bilong Jerusalem bilong heven ol i stap yet long graun. Em nau, Jehova bai kirap na mekim wok olsem God Bilong Pait, na em bai “i go pait long ol dispela kantri” ol i kirapim pait long lain bilong em.​—⁠Sekaraia 14:​2, 3.

¹¹ “Bikpela bai i mekim wanpela sik nogut tru i kamap long ol man bilong olgeta kantri i pait long Jerusalem. Dispela sik i olsem. Ol man bai i stap yet na skin na ai na tang bilong ol bai i sting. Na Bikpela bai i mekim ol dispela lain i pret na longlong nabaut. Olsem na ol man bai i holimpas ol man i stap klostu long ol na kilim ol i dai.”​—⁠Sekaraia 14:​12, 13.

¹² Dispela sik nogut bai kamap tru tru o em i wanpela tok piksa tasol, em yumi no save. Yumi mas wet pastaim na bai yumi lukim. Tasol i gat wanpela samting yumi save tru long en. Taim ol birua bilong God i wok long kirapim pait long ol wokman bilong Jehova i stap long olgeta hap, ol narapela kain samting tru bai kamap long bikpela strong bilong God, em i gat olgeta strong, na dispela bai pasim rot bilong ol birua. Maus bilong ol bai i pas na i no gat toktok moa. I olsem tang bilong ol i sting pinis na ol i no inap mekim tok bikhet moa long God. Pastaim ol i wanbel long mekim pait, tasol nau i olsem ai bilong ol i no inap lukim klia dispela samting​—⁠i olsem ai bilong ol i sting pinis. Bikpela strong long skin bilong ol i strongim bel bilong ol long kirapim pait, tasol dispela strong bilong ol bai i pinis tru. Ol bai longlong nabaut na ol bai kirap pait namel long ol yet, na narapela bai kilim i dai narapela, na bikpela lain moa yet bai bagarap. Olsem na olgeta birua bilong lotu bilong God bai i pinis olgeta. Em nau, olgeta lain bilong graun i mas save, Jehova i bos tru bilong heven na graun. Long dispela taim tok profet bai kamap tru, olsem: “Bikpela bai i stap king bilong olgeta kantri.” (Sekaraia 14:⁠9) Bihain long dispela, Satan wantaim ol spirit nogut bilong em bai i kalabus na Taim Bilong Wan Tausen Yia Bilong Krais i Stap King em bai kirap, na ol manmeri bilong graun bai i kisim planti blesing tru.​—⁠KTH 20:​1, 2; 21:​3, 4.

Lain Bilong Kirap Bek Long Graun

¹³ Tok profet bilong Sekaraia i go yet long sapta 14, ves 16, olsem: “Ol Juda i winim ol birua pinis, orait ol dispela hap lain . . . i stap yet bai i kam long Jerusalem long olgeta yia. Bikpela I Gat Olgeta Strong bai i stap king bilong ol na ol bai i lotu long em. Na bai ol i bihainim Ol Bikpela De Bilong I Stap Long Haus Win.” Baibel i tok, olgeta manmeri i stap laip long nau na ol i stap yet long pinis bilong dispela pasin nogut bilong graun na kot bilong God i makim olsem ol i birua bilong lotu i tru, strafe bilong God bai painim ol na “ol bai i bagarap i stap oltaim oltaim.” (2 Tesalonaika 1:​7-9; lukim tu Matyu 25:​31-​33, 46.) Ol i no inap kirap bek. Olsem na yumi ken ting, ol dispela lain “i stap yet,” em sampela bilong ol kantri em ol i bin i dai paslain long laspela pait bilong God na Baibel i makim olsem ol inap long kirap bek. Jisas i tok promis olsem: “Yupela i no ken tingting planti long dispela tok bilong mi. Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait. Ol manmeri i bin mekim gutpela pasin, ol bai i kirap bek na i stap laip. Na ol manmeri i bin mekim pasin nogut, ol bai i kirap bek na i kamap long kot.”​—⁠Jon 5:​28, 29.

¹⁴ Ol dispela manmeri i kirap bek long matmat ol i mas mekim wanpela samting bambai kirap bek bilong ol i bilong ol i ken i stap laip na i no bilong ol i mas bagarap. Ol i mas i kam insait long banis bilong haus bilong Jehova long graun na brukim skru long God, olsem dediket long em long rot bilong Krais Jisas. Sapos wanpela man i kirap bek em i no laik bihainim laik bilong God, wankain samting nogut bai painim em olsem i painim ol lain bilong graun ol i stap long nau. (Sekaraia 14:18) Yumi no save hamas manmeri i kirap bek ol bai i amamas long bung wantaim bikpela lain long bihainim samting Ol Bikpela De Bilong i Stap Long Haus Win i makim. Yumi ken ting bai i gat planti tru, na bikpela haus spirit bilong Jehova bai kamap gutpela moa yet na kisim biknem tru long dispela!

Samting Ol Bikpela De Bilong i Stap Long Haus Win i Makim

¹⁵ Long olgeta yia ol Israel bilong bipo i mas bihainim Ol Bikpela De Bilong i Stap Long Haus Win. Em i bin i stap inap wanpela wik olgeta, na em i save kamap taim ol i bungim pinis ol kaikai bilong gaden. Em i taim bilong amamas na tok tenkyu long God. Long dispela wik olgeta ol i mas i stap long ol haus win ol i karamapim long ol lip bilong diwai pam o lip bilong ol narapela diwai. Dispela i bin kirapim ol Israel long tingim taim God i bin kisim bek ol tumbuna bilong ol long Isip, na em i bin lukautim ol taim ol i raun long ples drai nating inap 40 yia na ol i stap long ol haus win i go inap long taim ol i kamap long Graun Bilong Promis. (Wok Pris 23:​39-​43) Long taim bilong ol dispela bikpela de, ol i kilim 70 bulmakau man na mekim ofa long en long alta bilong haus bilong God. Ating dispela samting ol i mekim long ol dispela bikpela de i olsem piksa na i makim nambawan gutpela wok Krais Jisas i mekim bilong kisim bek ol man. Ol gutpela samting em ofa bilong Krais bai kamapim, em bai helpim planti planti man em ol i tumbuna pikinini bilong 70 lain i bin kamap long Noa.​—⁠Stat 10:​1-​29; Namba 29:​12-34; Matyu 20:⁠28.

¹⁶ Olsem na dispela Ol Bikpela De Bilong i Stap Long Haus Win bipo i makim bikpela amamas bilong bungim ol sinman bilong graun em Krais i bin kisim bek ol, na ol i kam insait long bikpela haus spirit bilong Jehova. Samting ol dispela bikpela de i makim, em i kamap long Pentikos bilong yia 33 C.E., taim wok i kamap bilong bungim ol Israel bilong spirit i kam insait long lain Kristen, em wok bilong amamas. (Aposel 2:​41, 46, 47) Ol dispela man God i bin makim, ol i save ol i olsem “ol man bilong narapela ples” long dispela graun em Satan i bosim, long wanem, ples tru bilong ol em heven. (1 Pita 2:​11; Filipai 3:​20) Dispela wok bilong amamas long bungim ol Israel bilong spirit em i dai liklik, taim planti ol i bin lusim bilip na givim baksait long God, na ol lotu i holim nating nem Kristen ol i kamap. (2 Tesalonaika 2:​1-3) Tasol dispela wok Ol Bikpela De Bilong i Stap Long Haus Win i makim, i kirap gen long 1919, em taim bilong bungim ol laspela manmeri bilong lain 144,000 Israel bilong spirit, na bihain long en ol i bungim bikpela lain bilong olgeta kantri, em Kamapim Tok Hait 7:9 i tok long en.

¹⁷ Baibel i tok piksa olsem dispela bikpela lain i holim ol lip bilong diwai pam, em i makim olsem ol tu i amamas long bihainim samting dispela Ol Bikpela De Bilong i Stap Long Haus Win i makim. Ol i Kristen i dediket pinis, olsem na ol i amamas long mekim wok bilong bungim sampela manmeri moa i kam insait long haus bilong Jehova bilong lotu long em. Na tu, ol i stap sinman, olsem na ol i save, i no gat wanpela tok orait em inapim ol long i stap oltaim long graun. Dispela bikpela lain wantaim ol lain bai kirap bek bihain, ol i mas wok yet long bilip long ofa bilong Krais bilong baim bek ol man, i go inap long taim ol i kamap gutpela olgeta long pinis bilong Wan Tausen Yia Bilong Krais i Stap King.​—⁠KTH 20:⁠5.

¹⁸ Orait bihain long dispela, ol wokman bilong God long graun bai i sanap long ai bilong em olsem ol manmeri i gutpela olgeta, na i no gat wok long wanpela lain pris long heven i mas helpim ol. Long dispela taim, Krais Jisas bai “putim kingdom long han bilong God Papa.” (1 Korin 15:24) Satan bai lusim kalabus inap “sotpela taim tasol,” bilong traim ol manmeri em ol i kamap gutpela olgeta. Ol man i no stap gut long God ol bai i bagarap inap oltaim oltaim, wantaim Satan na ol spirit nogut bilong em. Ol man i stap gut long God, em bai givim laip i stap oltaim oltaim long ol. Ol bai kamap man bilong i stap oltaim long Paradais long graun. Em nau, dispela samting Ol Bikpela De Bilong i Stap Long Haus Win i makim, em i mekim gutpela wok tru na wok bilong en i pinis. Lotu tru i win olgeta, na dispela i litimapim nem bilong God inap oltaim oltaim, na ol manmeri bai i stap amamas oltaim.​—⁠KTH 20:​3, 7-​10, 14, 15.

[Ol Futnot]

Ol Askim Bilong Tingim Gen

◻ Olsem wanem ol lain i kam pait long “Jerusalem” long taim bilong Namba Wan Pait?​—⁠Sekaraia 14:⁠2.

◻ Kirap long 1919, wanem ol samting i painim lain bilong God?

◻ Long nau husat ol i insait long ol samting dispela Ol Bikpela De Bilong i Stap Long Haus Win i makim?

◻ Olsem wanem lotu tru bai win olgeta?

[Askim Bilong Stadi]

1. Long taim bilong Namba Wan Pait, wanem samting i bin painim ol Kristen em God i bin makim ol? Wanpela tok profet i tok wanem long dispela samting?

2, 3. (a) Kirap long 1919 na bihain long en, olsem wanem lotu bilong Jehova i win? (b) Kirap long 1935, wanem samting i kamap?

4, 5. (a) Bikpela lain i stap we na ol i lotuim Jehova? (b) Wanem gutpela samting ol i kisim? Dispela i truim wanem tok profet?

6. (a) Ol manmeri bilong ol narapela kantri ol i save givim wanem kain ofa long God? (b) Dis i gat wara na i stap long ples bung bilong ol pris, dispela i kirapim ol long tingim wanem samting?

7. (a) Bikpela lain i ting olsem wanem long gutpela wok em lain pris holi i kisim? (b) Wanem ol gutpela wok moa em sampela bilong dispela lain bilong ol narapela kantri i kisim?

8, 9. Taim bikpela lain i tingim ol samting i stap insait long Rum Tambu, dispela i helpim ol olsem wanem?

10. (a) Yumi inap wetim wanem gutpela samting tru bai kamap? (b) Wanem samting i mas kamap pastaim?

11, 12. (a) Taim olgeta lain bilong graun i kirapim pait long ol manmeri i lotuim Jehova long haus bilong em, Jehova bai kirap na mekim wanem? (b) Wanem samting bai kamap long pait bilong God?

13. Husat ‘ol dispela hap lain i stap yet’?

14. (a) Ol manmeri i kirap bek ol i mas mekim wanem bilong kisim laip i stap oltaim? (b) Wanem samting bai painim ol man i no laik dediket long Jehova na bihainim lotu i tru?

15. (a) Wanem sampela bikpela samting bilong Ol Bikpela De Bilong i Stap Long Haus Win em ol Israel bilong bipo i bihainim? (b) Bilong wanem ol i bin ofaim 70 bulmakau man long ol dispela bikpela de?

16, 17. (a) Samting dispela Ol Bikpela De Bilong i Stap Long Haus Win i makim, em i kirap long wanem taim? Wanem ol samting i kamap? (b) Bikpela lain i mekim wanem na ol tu i insait long dispela amamas?

18. (a) Wanem samting bai kamap long pinis bilong Wan Tausen Yia Bilong Krais i Stap King? (b) Wanem ol samting bai mekim na lotu tru bilong Jehova bai win olgeta?

[Piksa long pes 23]

Long Ol Bikpela De Bilong i Stap Long Haus Win ol i bin mekim wok long lip bilong diwai pam