“Yupela i Mas Amamas Tru”

“Yupela i mas mekim lotu na litimapim nem bilong God, Bikpela bilong yumi . . . na yupela i mas amamas tru.”​—LO 16:15.

1. (a) Satan i kamapim wanem ol bikpela tok? (b) Bihain long Adam tupela Iv i bikhet, Jehova i tok profet long wanem samting?

TAIM Satan i pulim Adam tupela Iv long bikhet long Man Bilong Wokim ol, em i kamapim tupela bikpela tok. Namba 1, em i sutim tok olsem Jehova i giaman na em i no save bosim ol man long stretpela rot. Namba 2, Satan i tok ol man i mekim wok bilong God bilong helpim ol yet tasol. Dispela namba 2 tok i kamap long ples klia long taim bilong Jop. (Stat 3:​1-6; Jop 1:​9, 10; 2:​4, 5) Tasol Jehova i kirap hariap long stretim dispela samting. Taim Adam tupela Iv i stap yet long gaden Iden, Jehova i tok profet long olsem wanem Em bai stretim ol dispela bikpela tok. Em i tok profet long wanpela “lain” o pikinini em Satan bai kaikaim lek bilong em, na bihain dispela pikinini bai krungutim het bilong Satan.​—Stat 3:15.

2. Jehova i bin mekim wanem bilong kamapim klia olsem wanem em bai truim tok profet i stap long Stat 3:15?

² Insait long ol yia i kam na i go, Jehova i wok long kamapim klia mining bilong dispela tok profet. Long dispela rot em i soim olsem dispela tok profet bai kamap tru. Olsem: God i tokim Abraham olsem dispela “pikinini” bai kamap long lain tumbuna pikinini bilong em. (Stat 22:​15-​18) Tumbuna pikinini bilong Abraham, em Jekop, em i kamap papa bilong 12-pela lain bilong Israel. Long 1513 B.C.E., taim ol dispela manmeri i kamap wanpela lain, Jehova i givim lo long ol na insait long en i gat lo bilong ol bikpela de bilong lotu. Aposel Pol i tok ol dispela bikpela de bilong lotu i olsem “piksa o tewel tasol bilong ol gutpela samting i laik kamap bihain.” (Hibru 10:1; Kolosi 2:​16, 17) Ol dispela bikpela de i soim ol samting Jehova i laik bai dispela Pikinini i mekim. Pasin bilong tingim ol dispela bikpela de bilong lotu i givim bikpela amamas long lain Israel. Orait, nau yumi ken stori long ol dispela bikpela de na dispela bai strongim bilip bilong yumi olsem ol tok promis bilong Jehova i save kamap tru.

Pikinini i Kamap

3. Dispela Pikinini bilong promis em i husat? Olsem wanem Satan i kaikaim lek bilong em?

³ Winim 4,000 yia bihain long Jehova i tokaut long dispela namba wan tok profet, dispela Pikinini bilong promis i kamap. Dispela Pikinini em i Jisas. (Galesia 3:16) Jisas em i gutpela olgeta, em i stap gut long God i go inap long em i dai na long dispela rot em i soim olsem ol tok Satan i sutim i giaman. Na tu, Jisas i no gat sin, olsem na indai bilong em i wanpela gutpela ofa tru. Long rot bilong en, Jisas i kisim bek ol tumbuna pikinini bilong Adam tupela Iv long sin na dai, em ol lain i stap gut long God. Taim Jisas i dai long diwai pos, dispela i olsem Satan i “kaikaim lek” bilong dispela Pikinini.​—Hibru 9:​11-​14.

4. Wanem samting i makim ofa bilong Jisas?

⁴ Jisas i dai long Nisan 14, 33 C.E.a Long Israel, Nisan 14 em i de bilong amamas long mekim Pasova. Long dispela de long olgeta yia, ol famili i kaikai wanpela pikinini sipsip i no gat bagarap long skin. Long dispela rot, ol i tingim wok bilong blut bilong pikinini sipsip long lukautim ol namba wan pikinini bilong ol Israel na bai ol i no ken i dai, taim wanpela ensel i kilim i dai ol namba wan pikinini bilong ol Isip long Nisan 14, 1513 B.C.E. (Kisim Bek 12:​1-​14) Pikinini sipsip bilong Pasova i makim Jisas, na aposel Pol i tok long em olsem: “Ol i ofaim pinis Krais, na em i olsem sipsip yumi ofaim long Bikpela De Bilong Tingim De God I Larim Ol Israel I Stap Gut [“Pasova,” NW].” (1 Korin 5:7) Olsem blut bilong pikinini sipsip bilong Pasova i bin mekim, blut bilong Jisas i kisim bek planti man.​—Jon 3:​16, 36.

“Kirap Paslain Long Ol Arapela Man i Dai Pinis”

5, 6. (a) Jisas i kirap bek long wanem taim? Wanem samting long Lo i makim dispela samting? (b) Olsem wanem kirap bek bilong Jisas i mekim na tok bilong Stat 3:15 inap kamap tru?

⁵ Long namba tri de, Jisas i kirap bek na go long heven na bai em i ken givim pe bilong ofa bilong em i go long Papa. (Hibru 9:24) Wanpela narapela bikpela de bilong lotu i makim kirap bek bilong em. De bihain long Nisan 14, em i kirap bilong Ol Bikpela De Bilong Bret i No Gat Yis. Long de bihain, Nisan 16, ol Israel i bringim wanpela mekpas bilong namba wan bali ol i kisim long gaden, na ol i kisim i go long pris bilong em i ken holim dispela mekpas long han na mekim i go i kam long ai bilong Jehova. (Wok Pris 23:​6-​14) I stret tru olsem long yia 33 C.E., long dispela de stret, Jehova i pasim wok nogut bilong Satan long bagarapim olgeta dispela man i “save autim stret olgeta tok bilong God”! Long Nisan 16, 33 C.E., Jehova i kirapim bek Jisas na em i go long heven olsem wanpela spirit i no inap i dai.​—KTH 3:14; 1 Pita 3:18.

⁶ Jisas i “kirap paslain long ol arapela man i dai pinis, olsem namba wan kaikai i redi long gaden.” (1 Korin 15:20) Ol man i bin kirap bek bipo ol i dai gen, tasol Jisas, nogat. Em i go antap long heven na stap long han sut bilong Jehova na em i wet long taim em bai kamap King long Kingdom Bilong Jehova long heven. (Song 110:1; Aposel 2:​32, 33; Hibru 10:​12, 13) Kirap long taim em i kamap King, em inap krungutim tru het bilong dispela bikpela birua, Satan, na pinisim lain bilong em.​—KTH 11:​15, 18; 20:​1-3, 10.

Sampela Tumbuna Pikinini Moa Bilong Abraham

7. Bikpela De Bilong Amamas Long Kisim Kaikai Long Gaden em wanem samting?

⁷ Jisas em i dispela Pikinini God i bin promis long en long Iden na long rot bilong em Jehova bai “bagarapim na rausim wok bilong Satan.” (1 Jon 3:8) Tasol taim Jehova i toktok wantaim Abraham, Em i tok “ol lain tumbuna pikinini bilong yu i kamap planti tru olsem ol sta bilong skai na olsem wesan bilong nambis.” (Stat 22:17) Olsem na i no wanpela man tasol i insait long dispela tok. Narapela bikpela bung bilong amamas i makim olsem bai i gat ol narapela man i insait long dispela lain “pikinini.” Na 50 de bihain long Nisan 16, ol Israel i tingim Bikpela De Bilong Amamas Long Kisim Kaikai Long Gaden. Lo i tok long dispela olsem: “Long de namba 50, em de bihain long namba 7 wik i pinis, yupela i mas givim narapela ofa bilong nupela wit long mi. Olgeta famili wan wan i mas bringim tupela bret na givim long mi olsem ofa bilong nupela wit. Yupela i mas kisim tupela kilogram plaua bilong wokim wanpela wanpela bret, na tanim wantaim yis na kukim, na ofaim dispela bret long mi, Bikpela.”b​—Wok Pris 23:​16, 17, 20.

8. Wanem bikpela samting i kamap long Pentikos bilong yia 33 C.E.?

⁸ Taim Jisas i stap long graun, ol i kolim Bikpela De Bilong Amamas Long Kisim Kaikai Long Gaden olsem Pentikos (ol i tanim long tok Grik i makim “namba fifti”). Long Pentikos bilong yia 33 C.E., bikpela Hetpris, em Jisas Krais i kirap bek pinis, em i kapsaitim holi spirit antap long 120 disaipel i bung long Jerusalem. Long dispela rot ol dispela disaipel i kamap ol brata bilong Jisas Krais na ol pikinini bilong God em i makim pinis. (Rom 8:​15-​17) Ol i kamap nupela lain, “lain Israel tru bilong God.” (Galesia 6:16) Bihain, dispela liklik lain manmeri bai inap olsem 144,000.​—KTH 7:​1-4.

9, 10. Wanem samting long Pentikos i makim lain Kristen God i bin makim?

⁹ Tupela bret i gat yis em pris i mekim i go i kam long ai bilong Jehova long olgeta de Pentikos, i makim lain Kristen God i bin makim long holi spirit. Yis i stap long bret i makim olsem sin i stap yet long ol Kristen God i bin makim. Tasol maski i olsem, ol inap i go klostu long Jehova long rot bilong ofa bilong Jisas bilong baim bek ol man. (Rom 5:​1, 2) Bilong wanem i gat tupela bret? Dispela inap makim olsem ol pikinini bilong God em i makim ol, ol bai i kam long tupela lain man​—pastaim long ol Juda bilong skin na bihain long ol narapela lain.​—Galesia 3:​26-​29; Efesus 2:​13-​18.

¹⁰ Tupela bret ol i ofaim long Pentikos ol i wokim long namba wan wit ol i kisim long gaden. Na olsem tasol, ol i kolim ol dispela Kristen God i bin makim olsem “namba wan lain bilong olgeta manmeri na olgeta arapela samting em i bin wokim.” (Jems 1:18) Ol i namba wan lain God i lusim rong bilong ol long rot bilong blut bilong Jisas, na dispela i mekim na ol inap kisim laip long heven na ol i no inap i dai moa, na ol bai mekim wok king wantaim Jisas long Kingdom bilong em. (1 Korin 15:53; Filipai 3:​20, 21; KTH 20:6) Ol i gat dispela namba, olsem na klostu nau ol bai “bosim ol [manmeri] strong tru” na ‘krungutim Satan aninit long lek bilong ol.’ (KTH 2:​26, 27; Rom 16:20) Aposel Jon i tok: “Olgeta ples Pikinini Sipsip i laik i go long en, orait ol dispela man i save bihainim em i go. God i bin baim bek ol dispela lain namel long olgeta manmeri bilong graun, na ol i stap olsem namba wan lain God i kisim bek, bai ol i stap ol lain bilong em yet na bilong Pikinini Sipsip.”​—KTH 14:4.

Bikpela De Bilong Rausim Sin na Kisim Bek Ol Man

11, 12. (a) Wanem samting i kamap long Bikpela De Bilong God i Tekewe Sin Bilong Ol Manmeri? (b) Ol ofa bilong bulmakau na meme i helpim lain Israel olsem wanem?

¹¹ Long de namba 10 bilong mun Etanim (bihain ol i kolim Tisri),c lain Israel i mekim wanpela bikpela de na ol samting i kamap long dispela de i makim olsem wanem Jisas bai mekim wok long ofa bilong em bilong helpim ol man. Long dispela de, lain Israel olgeta i kam long Bikpela De Bilong God i Tekewe Sin Bilong Ol Manmeri, bilong pris i ken mekim ol ofa bilong rausim sin bilong ol.​—Wok Pris 16:​29, 30.

¹² Long Bikpela De Bilong God i Tekewe Sin Bilong Ol Manmeri, hetpris i kilim i dai wanpela pikinini bulmakau, na long Rum Tambu Tru, em i kisim hap blut bilong en na putim long pinga na tromoi blut inap 7-pela taim long ai bilong Bokis Kontrak, i olsem em i givim blut olsem ofa long ai bilong Jehova. Dispela ofa i bilong rausim sin bilong hetpris na “famili bilong en,” na bilong nambatu lain pris na ol Livai. Orait nau hetpris i kisim tupela meme. Wanpela em i kilim i dai olsem ofa bilong rausim sin bilong “ol manmeri.” Em i tromoi liklik hap blut bilong meme tu long ai bilong Bokis Kontrak long Rum Tambu Tru. Bihain, hetpris i putim tupela han bilong em antap long het bilong namba tu meme na autim ol sin bilong lain Israel. Em i givim dispela meme long wanpela man na dispela man i mas kisim dispela meme i go long ples drai nating na lusim em long dispela hap, i olsem meme i karim olgeta sin bilong lain Israel i go.​—Wok Pris 16:​3-​16, 21, 22.

13. Olsem wanem ol samting long Bikpela De Bilong God i Tekewe Sin Bilong Ol Manmeri i makim samting Jisas i mekim?

¹³ Olsem ol dispela samting i makim, bikpela Hetpris, em Jisas, em i mekim wok long blut bilong em yet bilong rausim sin bilong ol man. Namba wan samting, blut bilong em i helpim lain 144,000 Kristen God i bin makim, na long dispela rot Jehova inap kolim ol olsem stretpela man na ol inap stap klin long ai bilong em. (1 Pita 2:5; 1 Korin 6:11) Ofa bilong bulmakau i makim dispela samting. Olsem na rot i op long ol i ken kisim laip long heven. Namba tu samting, blut bilong Jisas i helpim planti milion narapela man husat i bilip long Krais, olsem ofa bilong meme i makim. Ol bai kisim laip oltaim hia long graun, em dispela gutpela samting Adam tupela Iv i bin lus long kisim. (Song 37:​10, 11) Long rot bilong blut bilong em yet, Jisas i karim sin bilong ol manmeri i go, wankain olsem dispela wanpela meme i karim sin bilong lain Israel i go long ples drai nating.​—Aisaia 53:​4, 5.

Amamas Long Ai Bilong Jehova

14, 15. Wanem samting i kamap long Ol Bikpela De Bilong i Stap Long Haus Win? Dispela i kirapim lain Israel long tingim wanem samting?

¹⁴ Bihain long Bikpela De Bilong God i Tekewe Sin Bilong Ol Manmeri, lain Israel i mekim Ol Bikpela De Bilong i Stap Long Haus Win, em wanpela bikpela bung bilong amamas long kalenda bilong ol Juda. (Wok Pris 23:​34-​43) Dispela bung i kamap long de namba 15 i go inap long de 21 bilong mun Etanim, na em i pinis long rot bilong wanpela bikpela bung bilong lotu long de namba 22 bilong dispela mun. Em i makim pinis bilong wok bilong bungim kaikai long gaden na em i taim bilong tok tenkyu long planti gutpela samting God i save mekim. Long dispela as, Jehova i tokim ol man: “Yupela i mas tingting long Bikpela bai i mekim gaden na wok bilong yupela i kamap gutpela, na yupela i mas amamas tru.” (Lo 16:15) Em i taim bilong bikpela amamas tru!

¹⁵ Long taim bilong dispela bung, lain Israel i stap long ol haus win inap 7-pela de. Long dispela rot ol inap tingim olsem bipo ol i bin stap long ol haus win long ples drai nating. Dispela bung i opim rot long ol i ken tingim tingim long bel pasin bilong Jehova long lukautim ol olsem wanpela papa. (Lo 8:​15, 16) Na olgeta bilong lain Israel, ol maniman na ol rabisman, i bin stap long ol wankain haus win, na dispela i kirapim ol long tingim olsem long taim bilong dispela bung bilong lotu, olgeta i wankain tasol.​—Nehemia 8:​14-​16.

16. Ol Bikpela De Bilong i Stap Long Haus Win i makim wanem samting?

¹⁶ Ol Bikpela De Bilong i Stap Long Haus Win em wanpela bung bilong amamas long bungim kaikai long gaden, na ol samting i kamap long dispela de i makim wok bilong amamas long bungim ol man i bilip long Jisas Krais. Dispela wok i kirap long Pentikos bilong yia 33 C.E., taim Jisas i kapsaitim holi spirit long 120 disaipel na ol i kamap hap bilong “lain pris.” Lain Israel i stap long ol haus win inap sampela de tasol, na olsem tasol ol Kristen God i bin makim ol i save ol i “olsem ol tripman” namel long ol man bilong dispela graun. Ol i bilip na wet long kisim laip long heven. (1 Pita 2:​5, 11) Wok bilong bungim ol Kristen God i bin makim i pinis long dispela “taim bilong las de,” taim God i bungim ol laspela man bilong lain 144,000.​—2 Timoti 3:1.

17, 18. (a) Wanem samting i soim olsem ofa bilong Jisas bai helpim ol narapela man tu na i no helpim tasol ol Kristen God i bin makim? (b) Husat long nau i kisim helpim long samting em Ol Bikpela De Bilong i Stap Long Haus Win i olsem piksa bilong en? Long wanem taim bikpela samting bilong dispela bikpela de bai i kamap?

¹⁷ Long dispela bung bilong bipo, ol i ofaim 70 bulmakau man. (Namba 29:​12-​34) Namba 70 i makim 7 taims 10, long Baibel ol dispela namba i makim samting bilong heven na bilong graun i gutpela olgeta. Olsem na ofa bilong Jisas bai helpim ol gutpela man bilong olgeta 70 lain famili i bin kamap long rot bilong Noa. (Stat 10:​1-​29) Na olsem tasol, long taim bilong yumi wok bilong bungim ol man i go bikpela na God i bungim ol man bilong ol narapela lain husat i bilip long Jisas na ol i bilip na wet long kisim laip long wanpela paradais long graun.

¹⁸ Aposel Jon i lukim dispela wok bilong bungim ol man long nau long wanpela samting olsem driman. Pastaim em i harim toksave long wok bilong putim mak long ol laspela man bilong lain 144,000. Bihain, em i lukim “planti manmeri tru ol i bung i stap, na i no inap man i kaunim namba bilong ol,” ol i sanap i stap long ai bilong Jehova na Jisas, na ol i “holim ol lip bilong diwai pam.” Ol i winim pinis taim bilong “bikpela hevi” tru na i go insait long nupela taim. Ol dispela lain tu i olsem ol tripman long dispela taim nogut bilong nau, na ol i bilip na wet long taim we “Pikinini Sipsip . . . i stap wasman bilong ol. Em bai i bringim ol i go long ol hul i gat wara i kamap, em wara bilong givim laip.” Long dispela taim, “God bai i mekim drai wara bilong ai bilong ol, na ol bai i no krai moa.” (KTH 7:​1-​10, 14-​17) Bikpela samting em Ol Bikpela De Bilong i Stap Long Haus Win i makim, bai kamap long pinis bilong Wan Tausen Yia Bilong Krais i Stap King, taim bikpela lain manmeri na ol manmeri i kirap bek bai kisim laip oltaim.​—KTH 20:5.

19. Olsem wanem pasin bilong skelim ol bikpela de bilong lotu em lain Israel i bin mekim i helpim yumi?

¹⁹ Yumi tu i mas “amamas tru” taim yumi tingim tingim long bel mining bilong ol bikpela de bilong lotu bilong ol Juda long bipo. Yumi amamas long tingim olsem Jehova i soim olsem wanem tok profet em i bin mekim long gaden Iden bai kamap tru, na yumi amamas long lukim olsem truim bilong en i wok long kamap isi isi. Long nau, yumi save olsem dispela Pikinini i kamap pinis na Satan i bin kaikaim lek bilong em. Nau em i stap King long heven. Na tu, klostu olgeta bilong lain 144,000 i bin stap gut long God i go inap long ol i dai. Wanem samting moa i mas kamap? Long wanem taim olgeta samting bilong dispela tok profet bai kamap tru? Bai yumi skelim ol dispela samting long stadi i kamap bihain long dispela.

[Ol Futnot]

Yu Inap Stori Long Dispela?

• Pikinini sipsip bilong Pasova i makim wanem samting?

• Pentikos i makim wok bilong bungim wanem ol samting?

• Wanem ol samting long Bikpela De Bilong God i Tekewe Sin Bilong Ol Manmeri i makim ol samting ofa bilong Jisas bai mekim?

• Olsem wanem Ol Bikpela De Bilong i Stap Long Haus Win i makim wok bilong bungim ol Kristen?

[Sat long pes 22, 23]

(Bilong save ol dispela rait i stap we long pes, lukim buk o magasin)

Samting i Kamap: Samting Em i Makim:

  ↑

50 de

  ↓

[Ol Piksa long pes 21]

Olsem blut bilong pikinini sipsip bilong Pasova i bin mekim, blut bilong Jisas i opim rot long planti man i ken kisim laip

[Ol Piksa long pes 22]

Namba wan bali ol i kisim long gaden na givim olsem ofa long Nisan 16 i makim kirap bek bilong Jisas

[Ol Piksa long pes 23]

Tupela bret ol i givim olsem ofa long Pentikos i makim ol Kristen God i bin makim

[Ol Piksa long pes 24]

Ol Bikpela De Bilong i Stap Long Haus Win i makim wok bilong bungim ol Kristen God i bin makim na “planti manmeri tru” bilong olgeta lain man