Baibel i Save Kamapim Ol “Mirakel”
EM STORI BILONG THÉRÈSE HÉON
Wanpela taim long 1965, mi go insait long wanpela haus bisnis na mi laik tilim nius Wastaua na Kirap! long ol bisnisman. Mi mekim pinis dispela wok na mi tanim bilong go ausait, na mi harim wanpela bikpela pairap. Wanpela katres bilong gan i paitim plua klostu long lek bilong mi. Wanpela bisnisman i tok: “Em gutpela pasin bilong mekim long ol Witnes Bilong Jehova.”
DISPELA samting i kamap em i pretim mi, tasol mi no pret olgeta na lusim wok bilong autim tok long olgeta de, nogat. Ol tok i tru bilong Baibel mi bin lainim, ol i gutpela samting tru long mi na mi no inap larim wanpela samting i mekim na bai mi lusim wok bilong mi long autim tok, nogat tru. Mi laik stori long yu na bai yu ken save, i gat wanem as na mi tok olsem.
Mama i karim mi long Julai 1918, na bihain long dispela mipela i go sindaun long Kap-de-la-Madelen, em wanpela liklik ples long Kwibek, long Kanada, ol i kolim dispela ples olsem Ples Bilong Ol Mirakel. Planti manmeri tru ol i save kam long liklik ples lotu bilong Virgo Maria i stap long dispela hap na bai ol i ken adorim em. Ol i tok, Maria i bin wokim sampela mirakel long dispela hap, tasol ol i no inap kamapim long ples klia olsem em i bin wokim tru ol dispela mirakel. Tasol Baibel i bin mekim wanpela samting i olsem mirakel long planti manmeri bilong dispela ples nau em i kamap wanpela taun i gat olsem 30,000 manmeri i stap long en.
Taim mi gat 20 krismas samting, papa i lukim olsem mi save tingim ol samting bilong lotu, olsem na em i givim Baibel bilong em long mi. Taim mi kirap kaunim dispela Baibel, mi kirap nogut tru long tok bilong Kisim Bek sapta 20, em i tambuim pasin bilong lotuim piksa bilong ol samting. Em nau, wantu mi no bilip moa long ol tok bilong Misin Katolik, na mi no go moa long Misa. Mi no laik lotuim ol piksa. Long tingting bilong mi, mi inap harim yet tok bilong Papa, em i tok, “Thérèse, yu no laik go long lotu?” Mi tokim em, “Mi no laik. Mi kaunim Baibel.”
Mi wok long kaunim Baibel long olgeta taim, na taim mi marit pinis long Septemba 1938, mi wok yet long kaunim. Planti taim man bilong mi, Rosaire, i save wok nait, olsem na taim em i stap long wok mi save kaunim Baibel. I no longtaim na mi tingting pinis olsem God i mas i gat wanpela lain manmeri bilong em, na mi kirap long painim dispela lain.
Mi Laik Painim Lain Bilong God
Ol tok mi bin lainim long misin taim mi yangpela yet, dispela i mekim na mi pret long slip, nogut bihain mi lusim slip na kirap na mi lukim olsem mi stap pinis long bikpaia. Bilong daunim dispela pret, mi bin tokim skin bilong mi olsem, God bilong sori i no inap larim samting nogut olsem i kamap. Mi wok long kaunim Baibel, na mi wok long painim tok i tru. Mi wankain olsem dispela man Itiopia, em i bin kaunim Baibel tasol em i no kisim gut tok bilong en.—Aposel 8:26-39.
Brata bilong mi André na meri bilong em, ol i bin sindaun long wanpela flet long plua aninit long mipela, na ol i kirap stadi long Baibel wantaim ol Witnes Bilong Jehova long 1957 samting. Mi tokim tambu meri, taim ol Witnes i kam bilong autim tok long dispela haus, em i mas kisim wanpela samting na paitim rup bilong em, olsem plua bilong mi, bilong toksave long mi, na taim ol i kam long flet bilong mi, mi no ken opim dua long ol. Tasol wanpela taim em i no toksave long mi.
Long dispela taim mi opim dua na mi bungim Kay Munday, em i wanpela painia, em nem bilong ol Witnes Bilong Jehova ol i save autim tok bilong Baibel long olgeta de. Em i toktok wantaim mi long nem bilong God, na em i tok, God i gat nem bilong em, Jehova. Taim em i go pinis, mi lukim Baibel bilong mi na bai mi ken save tru olsem tok bilong dispela Witnes i stret wantaim tok bilong Baibel o nogat. Taim mi skelim ol dispela tok bilong Baibel, mi amamas tru.—Kisim Bek 6:3, Baibel Douay Version, long sta daunbilo; Matyu 6:9, 10; Jon 17:6.
Bihain Kay i kam lukim mi gen na mipela i toktok long bilip bilong lotu Katolik long God Triwan, i tok God em i 3-pela man, tasol em i wanpela God tasol. Bihain mi skelim gut dispela tok long Baibel bilong mi yet na bai mi ken save tru olsem Baibel i no tok long God Triwan. (Aposel 17:11) Na taim mi wok long skelim ol tok bilong Baibel, mi kisim save olsem Jisas i no bikpela olsem God. God i bin wokim em. Em i bin kamap nupela long wanpela taim, tasol God i no bin kamap nupela long wanpela taim—em i olsem yet. (Song 90:1, 2; Jon 14:28; Kolosi 1:15-17; KTH 3:14) Mi pilim olsem ol tok mi lainim em tok i tru, olsem na mi amamas long Kay i kam na toktok wantaim mi long Baibel.
Wanpela taim long Novemba 1958, taim i gat bikpela ren ais i kam daun, Kay i singautim mi long go long wanpela kibung sekit em bai kamap long dispela apinun yet long wanpela haus ol i baim bilong mekim kibung. Mi go na mi amamas tru long ol tok i kamap. Bihain wanpela Witnes i kam toktok wantaim mi, na mi askim em, “Kristen tru i mas go long ol haus na autim tok, o nogat?”
Em i tok, “Yes, em i mas mekim olsem, long wanem, ol Kristen i mas autim gutnius, na Baibel i kamapim klia olsem pasin bilong go long haus bilong ol man, em bikpela samting long wok bilong autim tok.”—Aposel 20:20.
Mi amamas tru long tok em i mekim bilong bekim askim bilong mi! Mi bilip tru olsem mi painim pinis lain bilong God. Sapos dispela man i bin tok, “I no gat wok long ol Kristen i go long ol haus na autim tok,” bai mi no bilip olsem mi painim pinis tok i tru, long wanem, mi save pinis long tok bilong Baibel long go long ol haus na autim tok. Kirap long dispela taim, kwiktaim mi wok long kamap strong long ol samting bilong spirit.
Bihain long dispela kibung sekit, mi kirap i go long ol miting bilong ol Witnes Bilong Jehova i kamap long taun Twa-Rivier, klostu long taun bilong mipela. Long dispela taim i gat tupela Witnes tasol i stap long Kap-de-la-Madelen, em Kay wantaim poroman bilong em, Florence Bowman. Wanpela taim mi tokim tupela, “Tumora bai mi go wantaim yupela long autim tok.” Ol i amamas long kisim mi i go wantaim ol.
Mi Autim Tok Long Ples Bilong Mi
Mi ting olgeta man bai bilip long tok bilong Baibel mipela i autim long ol, tasol i no longtaim na mi save, dispela tingting bilong mi i kranki. Bihain ol i salim Kay na Florence i go long narapela hap bilong mekim wok autim tok, na mi wanpela tasol i go long ol haus na autim tok i tru bilong Baibel. Tasol mi no larim dispela i pasim mi—mi wanpela mi wok long autim tok i go inap tupela yia, inap long taim mi kisim baptais long Jun 8, 1963. Long dispela de stret mi putim nem bilong mi long mekim wok painia haptaim.
Mi mekim dispela wok inap wanpela yia, na nau Delvina Saint-Laurent i tok promis olsem em bai kam long Kap-de-la-Madelen na wok wantaim mi wanpela de long olgeta wik sapos mi kamap painia oltaim. Olsem na mi wokim pepa bilong mekim dispela wok. Tasol sori tru, tupela wik paslain long taim mi laik kirap na mekim dispela wok, Delvina i dai. Nau bai mi mekim wanem? Mi wokim pinis pepa na mi no laik senisim dispela samting. Olsem na long Oktoba 1964, mi kirap mekim wok painia long olgeta de. Inap 4-pela yia mi wanpela mi go long ol haus na autim tok.
Planti taim ol strongpela Katolik bilong Kap-de-la-Madelen ol i birua long mi. Sampela i singautim ol polis bambai ol i ken pasim mi na bai mi no inap autim tok. Wanpela taim, olsem mi stori pinis long kirap bilong dispela stori, wanpela bisnisman i laik pretim mi na em i sutim katres klostu long lek bilong mi. Bikpela toktok i kamap long dispela samting long taun. Stesin bilong televisen long taun i tok, em wok bilong wanpela lain ol i laik pasim wok bilong ol Witnes Bilong Jehova. Dispela samting i bin kamap em i mekim gutpela wok—ol man i mekim gutpela tok long wok bilong mipela. Tenpela yia bihain, wanpela wanblut bilong dispela man i bin sutim katres klostu long lek bilong mi, em i kamap wanpela Witnes.
Baibel i Kamapim Ol “Mirakel”
Insait long ol yia mi bin autim tok long Kap-de-la-Madelen, mi lukim pasin birua ol man i mekim long tok i tru bilong Baibel i wok long pinis long dispela taun. Long 1968 samting, sampela Witnes moa i kam sindaun long dispela hap, na ol manmeri bilong taun ol i kirap putim yau long tok i tru bilong Baibel. I kam inap long 1972 samting, namba bilong ol Baibel-stadi i go bikpela tru. Mi gat planti Baibel-stadi tumas, olsem na mi mas askim ol narapela Witnes long kisim sampela Baibel-stadi bilong mi na bai mi gat taim bilong go long ol haus na autim tok.
Wanpela taim wanpela yangpela meri i kisim wanpela buk long mi, nem bilong en Tok i Tru i Bringim Man Long Laip Oltaim, em wanpela buk bilong helpim ol man long kisim save long Baibel. Long dispela taim meri hia i poromanim wanpela yangpela man nem bilong em André, em i wanpela raskol na em i olsem man bilong pait na bikhet. Em i kam insait long dispela tok mitupela i mekim. Mi toktok wantaim André na dispela i kirapim em na em i laik harim sampela tok moa, na mi kirapim Baibel-stadi wantaim em. I no longtaim na em i kirap na tokim ol pren bilong em long ol dispela tok em i wok long lainim.
Wanpela taim mi bin stadi long Baibel wantaim 4-pela raskol. Wanpela i no mekim planti tok, tasol em i putim gut yau long ol tok i kamap. Nem bilong em Pierre. Wanpela taim, olsem lusim biknait pinis na i olsem 2 klok, mi wantaim man bilong mi i harim wanpela man i paitim dua. Long tingting bilong yu, yu ken tingim samting mipela lukim: Fopela raskol i sanap long dua na ol i gat sampela askim ol i laik givim long mi. Gutpela tru, Rosaire i no save toktok planti long ol man i kam lukim mi long kain taim olsem.
Pastaim dispela 4-pela man i save kam long ol miting. Tasol bihain André na Pierre tasol i stap strong na i no les. Ol i stretim pasin bilong ol na bai i stret wantaim ol lo bilong God, na ol i kisim baptais. Winim 20 yia pinis, tupela man hia i stap gut long mekim wok bilong Jehova. Taim tupela i kirap long stadi, planti man i save long pasin raskol bilong ol, na ol polis i save was long ol. Sampela taim ol polis i save kam painim tupela taim mipela i mekim pinis stadi bilong mipela o long taim bilong miting bilong kongrigesen. Mi amamas long mi bin autim tok long olgeta kain manmeri, olsem na long ai bilong mi yet mi bin lukim Tok Bilong God, em Baibel, i kamapim sampela bikpela senis long ol man, em i olsem wanpela mirakel tru.—1 Timoti 2:4.
Taim mi kirap nupela long autim tok, sapos ol i bin tokim mi, bihain bai i gat wanpela Haus Kingdom long Kap-de-la-Madelen na lain bilong Jehova bai pulap long en, mi no inap bilipim tok bilong ol. Mi amamas tru, long wanem, pastaim i gat wanpela liklik kongrigesen tasol long taun Twa-Rivier, tasol nau i gat 6-pela strongpela kongrigesen i save bung long 3-pela Haus Kingdom, wanpela bilong ol i stap long Kap-de-la-Madelen.
Mi bin kisim amamas long helpim 30 manmeri long kamap strong na dediket long Jehova na kisim baptais. Nau mi gat 78 krismas, na mi inap tok tru olsem mi amamas long mi bin dediketim laip bilong mi long Jehova. Tasol mi mas tokaut olsem sampela taim i gat sampela samting i mekim na mi bel hevi. Bilong daunim dispela bel hevi, mi save opim Baibel bilong mi na kaunim sampela tok i givim nupela strong long mi. Mi no inap larim wanpela de i lus nating na mi no kaunim Baibel. Tok bilong Jon 15:7 i save strongim tru bel bilong mi, em i tok: “Sapos yupela i pas long mi, na tok bilong mi em i stap long yupela, orait yupela i ken askim inap long laik bilong yupela, na ol samting bai i kamap olsem yupela i bin tok.”
Mi wet long lukim Rosaire long nupela taim klostu nau bai kamap. (2 Pita 3:13; KTH 21:3, 4) Klostu long taim em i dai long 1975, em i wok long kamap strong na klostu em inap long kisim baptais. Tasol nau mi strong long mi mas i stap yet long wok bilong autim tok long olgeta de na amamas yet long mekim wok bilong Jehova.