Yumi Mas Beten Long God Olsem Wanem?
TAIM wanpela disaipel i askim Jisas long skulim em long beten, Jisas i no bin sakim em, nogat; em i helpim em. Long Luk 11:2-4 em i tok: “Taim yupela i beten, yupela i ken tok olsem, ‘Papa, nem bilong yu i mas i stap holi. Kingdom bilong yu i mas i kam. Na olgeta de yu ken givim mipela kaikai inap bilong dispela de. Na yu ken lusim ol sin bilong mipela, long wanem, mipela i save lusim ol rong ol arapela i bin mekim long mipela. Na yu no ken larim ol traim i kamap long mipela.’ ” Yumi save kolim dispela beten olsem Beten Bilong Bikpela, na em i gat planti gutpela tok.
Namba wan tok long dispela beten i soim yumi olsem yumi mas beten long husat—em long Papa bilong yumi. Jisas i no mekim wanpela tok i skulim yumi olsem yumi ken beten long sampela narapela man, o imis, o “santu,” o yumi ken beten long em yet, nogat tru. God i bin tok: “Yupela i mas givim biknem long mi wanpela tasol. Yupela i no ken litimapim nem bilong ol giaman god, em ol man yet i wokim.” (Aisaia 42:8) Olsem na sapos yumi beten long wanpela samting o wanpela man na yumi no beten long Papa bilong yumi long heven, God i no inap harim beten bilong yumi, maski yumi bilip tru long dispela samting. Baibel i tok, God Jehova em wanpela tasol em i Man bilong “harim beten.”—Song 65:2.
Tasol ating sampela bai tok “ol santu” i olsem rot tasol bilong beten long God. Tasol Jisas i bin tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol. Na olgeta samting yupela i askim long nem bilong mi, em bai mi mekim. Olsem na Papa bai i kisim biknem long Pikinini bilong en.” (Jon 14:6, 13) Dispela tok bilong Jisas i kamapim klia olsem i no gat wanpela man ol i kolim santu em inap i stap olsem rot bilong beten long God. Tingim tu tok aposel Pol i mekim long Krais, olsem: “Krais Jisas i bin i dai, na em i kirap bek tu. Na nau em i stap long han sut bilong God, na em i save askim God long helpim yumi.” “Oltaim em inap tru long kisim bek ol manmeri i kam klostu long God long nem bilong em, long wanem, em i stap laip oltaim, na em i save beten long God long helpim ol.”—Rom 8:34; Hibru 7:25.
Nem Bilong God i Mas i Stap Holi
Narapela tok long beten bilong Jisas i olsem: “Nem bilong yu i mas i stap holi.” Olsem wanem ol man i ken mekim holi nem bilong God sapos ol i no save long dispela nem na mekim wok long en? Winim 6,000 taim “Olpela Testamen” i kamapim klia olsem nem tru bilong God em Jehova.
Wanpela sta daunbilo long Kisim Bek 6:3 long Baibel Katolik Douay Version i tok long nem bilong God olsem: “Sampela man bilong nau ol i bin kamapim dispela nem Jehova. . . . dispela nem [bilong God] i stap long olpela rait Hibru bilong Baibel, tasol longtaim pinis ol man i no kolim, olsem na nau yumi no save ol i bin kolim olsem wanem.” Olsem na Baibel Katolik New Jerusalem Bible i kolim dispela nem olsem Yawe. Tru sampela saveman i laik kolim nem bilong God olsem, tasol long tok Inglis inap longtaim pinis ol man i kolim nem bilong God olsem “Jehova,” na i stret ol i kolim olsem. Ol narapela tok ples i gat pasin bilong ol yet long kolim nem bilong God. Tasol em i bikpela samting long yumi mekim wok long dispela nem bambai yumi ken mekim nem i stap holi. Olsem wanem? Misin bilong yu i bin skulim yu long kolim nem bilong Jehova taim yu beten?
Ol Samting Yumi Ken Beten Long En
Nau Jisas i skulim ol disaipel long beten olsem: “Kingdom bilong yu i mas i kam.” Na Gutnius Matyu i raitim i tok moa olsem: “Mipela i mas bihainim laik bilong yu long graun olsem ol i save bihainim long heven.” (Matyu 6:10) Kingdom bilong God em i wanpela gavman long han bilong Krais Jisas. (Aisaia 9:6, 7) Olsem tok profet bilong Baibel i tok, klostu nau dispela Kingdom bai senisim olgeta gavman bilong graun na kamapim gutaim long olgeta hap. (Song 72:1-7; Daniel 2:44; KTH 21:3-5) Olsem na planti taim ol Kristen tru i save beten long Kingdom i mas i kam. Olsem wanem? Misin bilong yu i bin skulim yu long mekim olsem?
Na Jisas i kamapim klia olsem yumi ken beten long ol samting bilong yumi yet tu. Em i tok: “Na olgeta de yu ken givim mipela kaikai inap bilong dispela de. Na yu ken lusim ol sin bilong mipela, long wanem, mipela i save lusim ol rong ol arapela i bin mekim long mipela. Na yu no ken larim ol traim i kamap long mipela.” (Luk 11:3, 4) Ol tok bilong Jisas i makim olsem yumi ken askim God long kamapim klia laik bilong em long ol samting yumi save mekim long olgeta de, na yumi ken toktok long Jehova long olgeta samting yumi tingting planti long en o i bagarapim bel isi bilong yumi. Sapos long olgeta taim yumi askim God long helpim yumi long ol dispela samting, dispela bai helpim yumi long tingim tru olsem God i mas strongim yumi bilong karim ol dispela hevi. Long dispela rot bai yumi pilim moa yet olsem em i stiaim laip bilong yumi. Na sapos long olgeta de yumi askim God long lusim ol rong bilong yumi, dispela tu bai helpim yumi. Long wanem, bai yumi tingim moa pasin kranki bilong yumi, na bai yumi no tingim tumas ol pasin kranki bilong ol narapela. Na olsem Jisas i tok, i stret tu long yumi beten olsem God i no ken larim ol traim i daunim yumi, na em i bikpela samting yumi beten olsem, long wanem, ol man i wok long lusim stretpela pasin. Taim yumi beten olsem, bai yumi wok strong long abrusim ol samting em inap pulim yumi long mekim rong.
Olsem na yumi save, Beten Bilong Bikpela i skulim gut yumi long olsem wanem yumi mas beten long God na em bai harim beten bilong yumi. Tasol olsem wanem? Jisas i laik bai yumi kolim kolim dispela beten long olgeta taim?
Sampela Tok Moa Long Beten
Jisas i mekim sampela tok moa long beten. Long Matyu 6:5, 6 em i tok: “Taim yupela i mekim prea, yupela i no ken mekim olsem ol man bilong giaman i save mekim. Ol i laikim tumas long sanap na mekim prea insait long ol haus lotu, na long ol kona bilong bikrot, bai ol man i ken lukim ol. . . . Tasol taim yu laik mekim prea, yu mas i go insait long rum bilong yu na pasim dua na beten long Papa bilong yu i stap long ples hait. Na Papa bilong yu i save lukim ol samting i stap hait, em bai i bekim pe long yu.” Dispela tok i skulim yumi olsem yumi no ken beten na hambak long ai bilong ol man bambai ol i ken lukim yumi na litimapim nem bilong yumi. Olsem wanem? Taim yu wanpela i stap yu save autim olgeta tingting bilong yu long Jehova, olsem Baibel i kirapim yumi long mekim?—Song 62:8.
Jisas i mekim dispela tok lukaut: “Taim yupela i mekim prea, maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol.” (Matyu 6:7) Tru tumas, Jisas i no orait long kolim kolim nating ol beten—na em i no orait long ol man i kaunim ol beten bilong sampela buk. Na ol tok bilong em i kamapim ples klia olsem em i no stret long mekim beten wantaim korona.
Wanpela buk Katolik i tok: “Ating yumi mekim gutpela beten sapos wantu yumi kirap beten na kamapim tingting bilong yumi long God bilong tok tenkyu long em o bilong tokim em olsem yumi sot long wanpela samting, o yumi bel hevi, o taim yumi lotu long em long olgeta de.” Jisas i no bin tingim tingim wanpela beten pastaim na bihain em i kolim, nogat, em i kamapim ol tok i stap long bel bilong em. Kaunim beten bilong em i stap long Jon sapta 17. Em i olsem dispela beten Jisas i bin skulim ol disaipel long en, na em i kamapim klia olsem Jisas i laik bai nem bilong Jehova i mas i stap holi. Jisas i kamapim tingting i stap long bel bilong em taim em i beten na em i no kamapim wanpela beten em i bin tingim tingim pastaim.
Ol Beten God i Save Harim
Sapos ol i bin skulim yu long kolim nating ol beten yu save holim long tingting, o long beten long “ol santu” o ol imis, o long mekim wok long samting olsem korona taim yu beten, ating bai yu tingting planti sapos ol i tokim yu long beten olsem Jisas i bin makim. Tasol bilong yu ken beten olsem Jisas i bin skulim ol disaipel long en yu mas save long God—long nem na laik na pasin bilong em. Na yu ken kisim save long God taim yu stadi gut long Baibel. (Jon 17:3) Ol Witnes Bilong Jehova i amamas long helpim yu long mekim olsem. Ol i helpim pinis planti milion man long olgeta hap long “ol yet i mas traim na lukim na bai [ol] i save olsem Bikpela i gutpela tru”! (Song 34:8) Sapos yu wok strong moa long save gut long God, orait bai yu wok strong moa long litimapim nem bilong em long rot bilong beten. Na sapos yu wok strong moa long go klostu long Jehova long rot bilong beten, bai yu pas gut moa wantaim em olsem pren.
Olsem na olgeta man i save lotu tru long God ol i mas “beten oltaim.” (1 Tesalonaika 5:17) Beten bilong yu i mas stret wantaim tok bilong Baibel na i mas stret wantaim beten em Krais Jisas i bin skulim ol disaipel long mekim. Long dispela rot yu ken save tru olsem God bai orait long beten bilong yu.
[Ol Piksa long pes 7]
Sapos yumi wok strong moa long kisim save long Jehova, orait bai yumi wok strong moa long beten na kamapim bel bilong yumi long God