Yu Ting God i Makim Pinis Ol Samting i Mas Painim Yu?
“ALA NÒ DON.” Long tok ples Bambara bilong Mali, Wes Afrika, insait bilong dispela tok i olsem, “Em wok bilong God.” Long dispela hap bilong graun, i gat planti kain tok olsem. Long tok ples Wolof, ol man i save tok, “Yallah mo ko def” (God i mekim). Na long wanpela tok ples bilong ol Dogon, ol i save tok, “Ama biray” (God i kamapim).
Long ol narapela hap bilong graun, i gat wankain tok. Taim indai o bagarap i kisim man, yumi harim planti man i tok, “Em taim bilong em” o “Em laik bilong God.” Long Wes Afrika, i gat sampela tok olsem: “Man i tingting long samting em i laik mekim, tasol God yet i stretim rot,” na ol man i save raitim long ol PMV samting o raitim long hap pepa samting na pasim long ol stua. Long planti man, kain tok olsem i no gat insait bilong en. Tasol long planti narapela man, kain tok olsem i kamapim samting ol i bilip strong long en—i gat taim bilong olgeta samting i mas kamap na i no gat rot bilong abrusim.
Buk The World Book Encyclopedia i stori long dispela bilip olsem, “sampela strong i makim olgeta samting i mas kamap na ol man i no inap abrusim.” Wanem ol dispela “strong”? Ol Babilon bilong planti tausen yia bipo ol i bilip olsem, wanem wanem hap ol sta i stap long en taim mama i karim pikinini, dispela bai makim ol samting i painim pikinini taim em i go bikpela.” (Skelim wantaim Aisaia 47:13.) Ol Grik bilong bipo i bilip olsem: I gat tripela strongpela god meri na tripela i save makim taim bilong olgeta man wan wan i mas i dai—wanpela i lumim tret bilong laip, wanpela i makim longpela bilong en, na wanpela i katim. Tasol ol pris pasto bilong ol misin ol i kamapim bilip olsem: God yet i makim ol samting i mas painim ol man!
Olsem: “Santu” Ogastin em i sakim “ol tingting giaman nogut” bilong ol man i lukluk long ol sta bilong kisim save long ol samting i laik kamap bihain. Tasol em i tok, “sapos yumi tokaut olsem God i stap, tasol yumi tok em i no gat save long wanem samting i laik kamap, dispela em i tingting kranki tru.” Em i tok, sapos God i gat olgeta strong, orait, em i mas “save long olgeta samting i mas kamap taim ol i no kamap yet,” na em i “makim pinis olgeta samting i mas painim ol man.” Tasol Ogastin i tok, maski God i save long olgeta samting i mas kamap, ol man inap tingim wanem rot ol i laik bihainim.—Buk The City of God, Buk 5, Sapta 7-9.
Planti handet yia bihain, wanpela pris Talatala, Jon Kalvin, em i skruim sampela tok moa long dispela bilip. Em i tok, “God i makim pinis sampela man bilong kamap pikinini bilong kingdom long heven,” na em i makim pinis sampela narapela bilong “kisim strafe bilong em”!
Long nau, planti man long planti hap bilong graun ol i bilip olsem God i makim pinis ol samting i mas painim ol man. Tingim stori bilong Ousmane, em wanpela yangpela man long Wes Afrika. Em i olsem nambawan sumatin long skul, tasol taim em i mekim ol laspela tes bilong em, em i no winim! Orait nau em i mas skul gen long dispela klas inap wanpela yia moa, na tu, em i kisim sem long ai bilong famili na ol pren bilong em. Wanpela pren i laik mekim gut bel bilong em na em i tok, em laik bilong God. Mama bilong Ousmane, em tu i mekim wankain tok.
Pastaim Ousmane i amamas long harim kain tok olsem. Em i ting, sapos em laik bilong God na em i no bin winim tes, orait, maski em i bin mekim wanem, bai dispela i no inap pasim laik bilong God. Tasol papa bilong em i gat narapela tingting. Em i tokim Ousmane, em asua bilong Ousmane yet na em i no bin winim tes—i no asua bilong God. Ousmane i no bin winim tes, long wanem, em i les long stadi.
Nau Ousmane i no strong tumas long bilip olsem God i makim pinis ol samting i mas painim em, na em i tingting long kisim sampela save moa long dispela bilip. Orait nau mipela i laik bai yu tu i mekim olsem. Tingim narapela tok i kamap bihain long dispela.