Ol i Mekim Laik Bilong Jehova

Daniel i Lotu Oltaim Long God

ATING bikpela senis i no inap kamap insait long wanpela nait tasol. Tasol kain samting olsem i bin kamap long yia 539 B.C.E., taim ol Midia na Persia i daunim Babilon insait long sampela aua tasol. Long dispela yia, profet bilong Jehova, em Daniel, em i bin stap kalabus long Babilon klostu 80 yia pinis. Ating Daniel i gat 90 krismas samting, na nau wanpela samting i laik kamap em bai traim tru bilip bilong em​—⁠em bai stap gut long God o nogat.

Taim Babilon i pundaun pinis, pastaim i olsem ol samting long i stap bilong Daniel i gutpela tasol. Nupela king em Darius bilong Midia, em i gat 62 krismas na em i laikim Daniel. Taim Darius i kamap king, wanpela samting em i bin mekim pastaim, em bilong makim 120 man i kamap ofisa na em i givim bikpela namba long 3-pela man.a Daniel i wanpela bilong dispela 3-pela man i gat bikpela namba. Darius i save olsem Daniel inap mekim gutpela wok tru, olsem na em i gat tingting long makim em long kamap praim-minista! Tasol taim em i laik mekim olsem, wanpela samting i kamap na wantu dispela i senisim tingting bilong king.

Wanpela Tingting Nogut

Tupela wanwok ofisa bilong Daniel na planti narapela ofisa, ol i go lukim king na kamapim wanpela tingting ol i ting bai pulim tru tingting bilong king. Ol i strong long Darius i mas kamapim wanpela lo, olsem: “Inap long 30 de ol [manmeri] i no ken prea long wanpela god o long wanpela man. Nogat. Ol i mas prea long yu tasol. Sapos wanpela man i brukim dispela lo, orait yu ken tromoi em i go daun long hul bilong ol laion.” (Daniel 6:7) Ating long Darius i olsem ol dispela man i kamapim bel bilong ol olsem ol i stap gut long em. Na tu ating em i ting olsem dispela lo bai helpim em, em man bilong narapela kantri, long strongim namba bilong em olsem nambawan bos bilong dispela kantri.

Tasol dispela tupela ofisa na ol narapela ofisa ol i no tingting long putim dispela lo bambai ol i ken helpim king, nogat. Ol i laik “painim sampela rong long wok bilong Daniel, bilong ol i ken kotim em. Tasol ol i no lukim wanpela rong, long wanem, Daniel em i stretpela man na wok bilong en i gutpela tasol. Em i no save giaman o mekim wanpela pasin i no stret.” Olsem na ol dispela man bilong giaman ol i toktok long ol yet olsem: “Yumi no inap painim wanpela rong long wok bilong Daniel, bilong yumi ken kotim em. Yumi mas lukim pasin em i save mekim long bihainim ol lo bilong God bilong en, na ating bai yumi painim rot bilong kotim em.” (Daniel 6:​4, 5) Ol i save olsem Daniel i beten long Jehova long olgeta de, olsem na ol i wok long kamapim wanpela lo i tambuim dispela pasin, na sapos man i brukim, orait em i mas i dai.

Ating ol dispela ofisa i birua long Daniel, long wanem, “king i lukim wok bilong Daniel i gutpela tumas na i winim wok bilong ol ofisa na bilong tupela wanwok bilong en. Olsem na king i ting long makim em long kamap namba wan ofisa bilong kantri.” (Daniel 6:3) Ating stretpela pasin bilong Daniel i pasim rot bilong ol long mekim pasin giaman olsem paulim mani samting na ol narapela pasin i no stret. Tasol maski i gat wanem as na ol dispela man i birua long Daniel, toktok bilong ol i kirapim tingting bilong king long bilip olsem i gutpela sapos em i sainim nem bilong em long pepa ol i bin raitim dispela lo long en, na dispela lo bai kamap wanpela “lo bilong [ol] Midia na Persia, na i no gat wanpela man i ken senisim.”​—Daniel 6:​8, 9.

Daniel i Stap Strong

Taim Daniel i save long dispela nupela lo, yu ting em i lusim pasin bilong beten long Jehova? Nogat tru! Long rum antap long haus bilong em, em i brukim skru na beten long God tripela taim long olgeta wan wan de “olsem oltaim em i save mekim.” (Daniel 6:​10) Taim em i beten i stap, ol birua bilong em ol i “go long haus bilong Daniel, na ol i lukim em i beten long God bilong en.” (Daniel 6:​11) Taim ol i kamapim dispela samting long king, Darius i bel hevi tru, long wanem, dispela lo em i bin sainim em inap mekim nogut long Daniel. Baibel i tok: “Em i tingting strong i go inap san i go daun long painim rot bilong helpim Daniel.” Tasol maski em i king, em i no inap senisim dispela lo em i bin putim. Olsem na ol i kisim Daniel i go long hul bilong ol laion, em ples i stap daunbilo tru. King i strongim bel bilong Daniel, olsem: “Dispela God yu save bilip strong tru long em na lotu long em oltaim, em i ken helpim yu.”​—Daniel 6:​12-​16.

Long dispela nait king i no kaikai, na em i no inap slip; orait tulait pinis em i hariap i go long hul. Em i lukim Daniel i stap laip na em i no bin kisim wanpela bagarap! Wantu king i tok na ol i kisim ol birua bilong Daniel wantaim meri pikinini bilong ol na tromoi ol i go daun long hul bilong ol laion bilong bekim rong bilong ol. Na Darius i salim tok i go long ‘ol manmeri bilong kantri bilong em olsem olgeta i mas givim biknem long God bilong Daniel na ol i mas aninit long dispela God.’—Daniel 6:​17-​27.

Sampela Save Yumi Kisim Long En

Daniel i stap gutpela piksa long pasin bilong i stap gut long God. Na maski king i no lotu long Jehova, em tu i save olsem Daniel i lotu “oltaim” long Em. (Daniel 6:​16, 20) Long Baibel bilong pastaim, insait bilong tok Aram ol i tanim olsem “oltaim,” em olsem “wokabaut long raunpela lain.” I olsem yu go i go. Dispela tok i makim stret pasin bilong Daniel long stap gut oltaim long Jehova!

Paslain tru long taim ol i tromoi Daniel i go daun long hul bilong ol laion, em i kisim pinis pasin bilong lotu oltaim long God. Taim em i yangpela man na em i stap kalabus long Babilon, em i no laik tru long kaikai o dring ol samting em Lo Bilong Moses i tambuim o ol haiden i bin ofaim long ol god giaman bilong ol. (Daniel 1:8) Bihain, em i autim strong tok bilong God long King Nebukatnesar bilong Babilon. (Daniel 4:​19-​25) Inap sampela aua tasol paslain long taim ol i daunim Babilon, Daniel i no pret long tokaut long kot bilong Jehova long King Belsasar. (Daniel 5:​22-​28) Olsem na taim ol i laik tromoi Daniel i go long hul bilong ol laion, em i bihainim yet pasin bilong em long stap gut long Jehova.

Yu tu yu ken lotu oltaim long Jehova. Olsem wanem? Yu wanpela yangpela? Sapos olsem, orait, nau yu mas wok long kisim pasin bilong lotu oltaim long Jehova. Bilong mekim olsem, yu mas sakim ol poroman nogut bilong dispela graun wantaim ol pasin nogut bilong ol. Sapos longtaim pinis yu bin mekim wok bilong God, orait, bihainim yet pasin bilong sanap strong na karim hevi. No ken les, long wanem, olgeta wan wan traim i painim yumi ol i givim rot long yumi long kamapim klia olsem yumi gat strongpela tingting long lotu oltaim long Jehova.​—⁠Filipai 4:​11-​13.

[Futnot]