Ripot Long Wok Bilong Kingdom

Ol i Sanap Strong Long Skul na Gutpela Samting i Kamap

BAIBEL i tok profet olsem: “Bai mi yet mi skulim ol pikinini bilong yu, na bai ol i gat gutpela sindaun tru.” (Aisaia 54:13) Dispela tok “ol pikinini bilong yu,” em inap makim tu olgeta wokman bilong God long graun, na ol pikinini tu. Long nau, ol papamama Kristen i save mekim ol samting bambai Jehova i ken skulim ol pikinini bilong ol long haus bilong ol na long ol miting Kristen.

Tasol taim ol yangpela Kristen i stap long skul, i gat sampela hevi ol i mas winim. Planti taim ol i lukim olsem ol i mas sanap strong na bihainim ol tok ol i bin lainim long Baibel. Taim ol i mekim olsem, dispela inap helpim ol sumatin na ol tisa tu, olsem yumi lukim long wanpela stori i kam long hap bilong Maikronisia, olsem:

Long liklik ailan Tol long westen Pasifik, em wanpela bilong ol ailan Trak, ol tisa long skul i tokim olgeta pikinini long redim ol samting bilong mekim amamas bilong de Halowin long skul na ol i mas insait long ol pilai samting bilong en. Ol sumatin Witnes ol i save pinis, bilong insait long dispela amamas, ol i mas wokim ol bilas bilong makim ol samting olsem tewel na masalai samting​—⁠em ol samting i insait long wok bilong ol spirit nogut. Ol dispela pikinini i no inap insait long dispela amamas, long wanem, bel bilong ol i gat tok long en.a

Ol dispela pikinini i bin lain long ol tok bilong Baibel long haus bilong ol na long ol miting Kristen, olsem na ol i save, God i no orait long ol kain pasin olsem, maski ol i mekim bilong kisim amamas tasol. Ol dispela pikinini i laik kamapim klia, i gat wanem as na ol i no laik insait long dispela amamas, olsem na ol i singautim Barak, em wanpela misineri Witnes long dispela ailan, long kam na toktok wantaim ol tisa.

Ol tisa i harim dispela tok bilong Barak, na nau ol i stretim tok long em i ken kam bek na mekim namba 2 miting na givim tok long olgeta tisa na bos samting bilong skul. Long dispela miting, Barak i kamapim ol tok bilong soim ol long as tru bilong Halowin. Em i kisim ol tok bilong em long sampela nius na buk samting bilong Sosaiti Was Taua na long sampela buk moa. Ol tisa na bos bilong skul ol i kirap nogut long ol save ol i kisim long as bilong dispela amamas, na ol samting ol man i bin mekim bipo long dispela de, na ol samting bilong lotu i insait long dispela amamas. Orait, ol tisa na bos bilong skul i tok, ol bai miting na tingim wanem samting ol bai mekim bilong stretim dispela hevi.

Sampela de bihain ol i tokaut long samting ol i bin pasim tok long mekim. Ol i tok, ol i no ken redim ol samting bilong mekim Halowin. Long dispela yia, skul i no ken mekim amamas bilong Halowin. Em nau, ol dispela yangpela Witnes i strong long mekim ol samting i stret long skul, na gutpela samting tru i kamap! Ol yangpela i no ken pret o sem long sanap strong na sambai long tok i tru bilong Baibel.

Long olgeta hap bilong graun, ol Witnes Bilong Jehova i save skulim ol pikinini bilong ol long wok strong long skul. Na ol i skulim ol yangpela Witnes tu long bihainim ol lo bilong Baibel, na kamapim bilip bilong ol long ol narapela sumatin taim ol i gat rot long mekim. Maski i no gat gutpela samting i kamap long en olsem yumi bin kaunim long dispela stori, ol yangpela i ken bel gut na ol i ken save, ol i bin mekim ol samting i stret. Na bikpela samting moa, ol i ken save tru olsem Papa bilong ol long heven i amamas na em bai mekim gut long ol, long wanem, ol i bin i stap gut long em na bihainim tok bilong em.

[Futnot]