“Yupela i No Bin Lukim Em Yet, Tasol Yupela i Save Laikim Em”
“Yupela i no bin lukim em yet, tasol yupela i save laikim em na givim bel bilong yupela long em. Nau yupela i no save lukim em, tasol yupela i bilip long em na amamas tru.”—1 PITA 1:8.
I NO gat wanpela man long nau em i bin lukim Krais Jisas. Tasol planti milion manmeri ol i tok ol i save laikim em tru. Long Manila long kantri Filipin, long olgeta yia long Janueri 9, ol i save wokabaut long ol rot na pulim wanpela traipela imis bilong Krais Jisas i holim kruse, na imis i bikpela olsem wanpela man. Ol man i tok, dispela bung i bikpela tru, winim ol narapela bung bilong lotu, na ol bilaspasin bilong en i moa yet—i no gat narapela bung i kamapim amamas bilong ol man long wanpela lotu bilong dispela kantri olsem dispela bung i mekim. Bel bilong dispela bikpela lain i kirap tru na narapela i subim narapela. Sampela i kalap antap long ol narapela na bai ol i ken go klostu na putim han long dispela imis. Planti manmeri i kam bilong lukim dispela samting ol i tingting tasol long lukim bikpela lain manmeri i mekim ol bilaspasin bilong lotu na ol i wokabaut. Tasol yumi save, sampela man i gat gutpela bel na ol i tingting tru long Jisas na ol i kam long dispela bung. Bilong makim olsem ol i givim bel tru long em, sampela i save pasim wanpela kruse long bros, o ol i save go long lotu long olgeta taim. Tasol yu ting dispela pasin bilong lotuim imis em i pasin bilong lotu tru long God?
2 Long taim bilong ol aposel, i gat planti tausen manmeri i stap nabaut long ol provins bilong Rom olsem Judia, Samaria, Perea, Galili, ol i bin lukim tru Krais Jisas na ol i harim ol tok em i bin mekim. Ol i bin putim yau taim em i tokim ol long ol gutpela tok i tru bilong Kingdom bilong God. Ol i bin lukim ol mirakel em i wokim. Sampela namel long ol i bin kamap disaipel bilong em, long wanem, ol i bilip tru olsem em i “dispela man God i bin makim bilong kisim bek ol manmeri bilong en,” na em i “Pikinini Bilong God i gat laip.” (Matyu 16:16) Tasol ol manmeri em aposel Pita i bin raitim namba wan pas i go long ol, ol i no bin lukim Jisas.
3 Dispela lain em Pita i bin salim dispela pas long ol, ol i sindaun long ol provins bilong Rom olsem Pontus, Galesia, Kapadosia, Esia, Bitinia—olgeta dispela provins i stap long hap nau ol i kolim Turki. Pita i tokim ol: “Yupela i no bin lukim em yet, tasol yupela i save laikim em na givim bel bilong yupela long em. Nau yupela i no save lukim em, tasol yupela i bilip long em na amamas tru. Dispela amamas i winim olgeta amamas bilong dispela graun, na yumi no inap autim long maus. Nogat tru.” (1 Pita 1:1, 8) Olsem wanem ol i bin kisim save long Jisas na ol i laikim em tru na bilip long em?
4 Ating sampela i bin stap long Jerusalem taim aposel Pita i autim tok long bikpela lain manmeri ol i kam bung long Pentikos long yia 33 C.E. Bihain long Pentikos planti disaipel i stap yet long Jerusalem bambai ol i ken kisim sampela skul moa long ol aposel. (Aposel 2:9, 41, 42; skelim wantaim 1 Pita 1:1.) Long ol raun bilong em long wok misineri, aposel Pol i wok strong long autim tok namel long ol lain i sindaun long hap em bihain Pita i salim namba wan pas i go long en, em dispela pas i stap long Baibel na i gat nem bilong em i stap long en.—Aposel 18:23; 19:10; Galesia 1:1, 2.
5 Ol dispela man i no bin lukim Jisas, olsem wanem ol i givim bel tru long em? Long taim bilong yumi, olsem wanem na planti milion man moa long olgeta hap ol i save laikim em tumas?
Ol Samting Ol i Bin Harim
6 Sapos yu bin stap long Jerusalem taim Pita i givim tok long dispela bikpela lain i bung long Pentikos long yia 33 C.E., bai yu kisim wanem save long Jisas? Bai yu save, ol mirakel em i bin wokim i makim olsem God i bin salim em i kam. Na bai yu kisim save olsem, maski ol sinman i bin kilim i dai Jisas, em i no stap moa long matmat—God i bin kirapim em bek na em i go antap long heven na kisim bikpela namba na em i stap long han sut bilong God. Na tru tumas Jisas em i Krais, olsem man God i bin makim, em dispela Mesaia ol profet i bin tokaut long en. Na long rot bilong Krais Jisas, God i kapsaitim spirit holi i kam daun long ol disaipel bilong em bambai ol i ken kirap wantu tasol na autim tok long ol manmeri bilong planti kantri long ol gutpela samting God i mekim long rot bilong Pikinini bilong em. Planti man i harim tok bilong Pita long dispela taim, bel bilong ol i pilim tru, na inap olsem 3,000 ol i kisim baptais na kamap disaipel Kristen. (Aposel 2:14-42) Sapos yu bin i stap long dispela taim, bai yu mekim olsem?
7 Taim aposel Pol i skulim ol man long Antiok, long wanpela provins bilong Rom, em Galesia, sapos yu bin i stap namel long ol, ating bai yu kisim wanem save moa long Jisas? Bai yu harim Pol i tok, samting ol hetman bilong Jerusalem i bin mekim long Jisas, olsem ol i mekim kot long em na makim em bilong i dai, ol profet i bin tokaut long ol bai mekim olsem. Na bai yu harim olsem planti man ol i bin lukim Jisas taim em i kirap bek pinis. Ating bai yu amamas long harim tok bilong Pol olsem taim Jehova i kirapim bek Jisas long matmat, Jehova i kamapim klia olsem tru tumas, dispela man em i Pikinini bilong God. Na ating bel bilong yu bai pilim tru taim yu kisim save olsem, ol man i bilip long Jisas, God bai lusim ol rong bilong ol, na long dispela rot ol inap kisim laip i stap oltaim oltaim. (Aposel 13:16-41, 46, 47; Rom 1:4) Sampela long Antiok i save, ol tok ol i harim i bikpela samting tru, olsem na ol i kamap disaipel na ol i mekim wok bilong autim gutnius long ol narapela man, maski dispela bai kirapim ol man long mekim nogut tru long ol.—Aposel 13:42, 43, 48-52; 14:1-7, 21-23.
8 Sapos yu bin stap long kongrigesen Kristen long Efesus long hap bilong Esia taim kongrigesen i kisim pas bilong Pol, bai yu kisim wanem save long wok bilong Jisas long kamapim laik bilong God? Long dispela pas em spirit holi i bin stiaim Pol long raitim, Pol i tok, long rot bilong Krais olgeta samting long heven na long graun bai kamap wanbel wantaim God, na long rot bilong Krais marimari bilong God i go long ol manmeri bilong olgeta lain, na ol man i gat sin na i olsem ol i dai pinis long ai bilong God, ol i bilip long Krais na ol i kamap laip gen, na long dispela rot God i bin wokim, ol man inap kamap gen olsem pikinini bilong God em i laikim tumas ol.—Efesus 1:1, 5-10; 2:4, 5, 11-13.
9 Taim yu pilim tru ol dispela samting, dispela bai kirapim yu long laikim moa yet Pikinini bilong God? Dispela pasin bilong yu long laikim em tumas, em bai stiaim ol samting yu mekim long olgeta wan wan de, olsem aposel Pol i tok long Efesus sapta 4 i go inap long sapta 6? Bel bilong yu bai kirapim yu long skelim gut wanem ol samting i bikpela samting tru long i stap bilong yu yet? Yu laikim tumas God na yu tenkyu long Pikinini bilong em. Orait olsem wanem? Dispela bai kirapim yu long stretim sampela samting long i stap bilong yu bambai wok bilong mekim laik bilong God i stap olsem nambawan bikpela samting bilong yu? (Efesus 5:15-17) Taim aposel Pita i raitim pas i go long ol Kristen long Esia, na Galesia, na ol narapela provins bilong Rom, em i stori long samting ol i mekim taim ol i kisim save long Jisas. Em i tok: “Yupela i no bin lukim em yet, tasol yupela i save laikim em na givim bel bilong yupela long em. . . . Yupela i bilip long em na amamas tru. Dispela amamas i winim olgeta amamas bilong dispela graun, na yumi no inap autim long maus. Nogat tru.”—1 Pita 1:8.
10 Ol dispela Kristen em Pita i bin raitim pas long ol, i gat narapela samting tu i kirapim ol long laikim tumas Pikinini bilong God. Em wanem samting? I kam inap long taim Pita i raitim namba wan pas bilong em, ol i raitim pinis tupela Gutnius—em Matyu na Luk. Ol Kristen long taim bilong ol aposel em ol i no bin lukim Jisas, ol inap kaunim stori bilong em long ol dispela Gutnius. Yumi tu inap kaunim. Ol stori bilong Jisas long ol Gutnius i no ol stori nating tasol; olgeta samting long ol dispela stori i kamapim klia olsem ol dispela samting i bin kamap tru long bipo na yumi inap bilip long en. Long ol dispela Gutnius em spirit holi i stiaim ol long raitim, i gat planti tok i kirapim yumi long givim bel moa yet long Pikinini bilong God.
Pasin Em i Kamapim
11 Long stori bilong i stap bilong Jisas long Baibel, yumi kisim save long pasin em i bin mekim long ol man. Long nau tu, olsem 1,960 yia samting bihain long taim em i dai, bel bilong ol man i pilim tru gutpela pasin sori bilong em. Olgeta man i stap laip ol i pilim hevi bilong ol samting sin i kamapim. Planti milion manmeri ol i kisim bikpela hevi long ol man i save daunim ol, o sik i laik daunim ol, o i gat ol narapela samting i mekim na bel bilong ol i bagarap. Jisas i tokim ol dispela kain manmeri olsem: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. . . . Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.”—Matyu 11:28-30.
12 Jisas i tingim tru ol rabisman, na ol man i hangre, na ol man i bel hevi na krai. Na taim i no gat kaikai, em i wokim mirakel na givim kaikai long ol bikpela lain manmeri. (Luk 9:12-17) Em i helpim ol long lusim ol tok na pasin bilong ol tumbuna i bin kalabusim ol. Na em i helpim ol na bai ol i ken bilip strong long ol samting God i laik mekim bilong pinisim bikpela hevi em wok politik na ol samting bilong mani i putim long ol. Jisas i no bagarapim tingting na bel bilong ol man em ol bikman i daunim ol pinis na ol i stap nogut. Long pasin isi na pasin sori, em i strongim ol man i gat pasin daun. Em i strongim bel bilong ol man i kain olsem ol pitpit i no gat strong na i laik bruk, na ol man i kain olsem ol lam i no lait gut na i laik i dai. Long dispela taim bipo na i kam inap long nau, nem bilong em i save kirapim ol man long tingim gutpela samting bai kamap bihain, maski ol i no bin lukim em.—Matyu 12:15-21; 15:3-10.
13 Jisas i no orait long pasin bilong mekim rong, tasol em i save tingim ol man em ol i bin mekim ol rong, tasol ol i tanim bel na go long em bambai em i ken helpim ol. (Luk 7:36-50) Na ol manmeri em ol narapela bilong ples i ting ol i pipia lain tasol, Jisas i save sindaun na kaikai wantaim ol sapos em i ting dispela bai givim rot long em bilong helpim ol long ol samting bilong spirit. (Matyu 9:9-13) Planti milion manmeri i gat ol kain hevi olsem, ol i pilim tru dispela gutpela pasin bilong Jisas na dispela i kirapim ol long kisim save long em, na nau ol i bilip long em.
14 Pasin Jisas i bin mekim long ol man i gat sik o skin bilong ol i nogut, dispela i kamapim klia pasin sori bilong em, na i kamapim klia tu olsem em inap pinisim hevi bilong ol. Olsem na taim wanpela lepraman i kam na krai long Jisas i helpim em, Jisas i no surik long em taim em i lukim sik lepra i pulap long skin bilong em. Jisas i no tokim em, tru em i sori long em, tasol dispela sik i bikpela tumas na em i no inap mekim wanpela samting bilong helpim em. Jisas i no tok olsem. Dispela man i krai long em: “Bikpela, sapos yu laik, yu inap long mekim mi i kamap klin long ai bilong God.” Orait kwiktaim Jisas i putim han long dispela lepraman na i tok: “Mi laik. Yu kamap klin.” (Matyu 8:2, 3) Long narapela taim, wanpela meri i laik bai Jisas i oraitim sik bilong em, olsem na em i kam baksait long Jisas na putim han long arere bilong klos bilong em. Jisas i mekim gutpela pasin long em na i mekim isi bel bilong em. (Luk 8:43-48) Na wanpela taim Jisas i bungim wanpela lain i karim skin bilong wanpela man i dai pinis na ol i wokabaut i go bilong planim em. Bel bilong Jisas i sori tru long mama bilong dispela man, em i gat dispela wanpela pikinini tasol na nau em i dai na mama i krai long em. Bipo Jisas i no laik mekim wok long strong God i bin givim long em na wokim mirakel bilong kamapim sampela kaikai bilong em yet, tasol nau em i mekim wok long dispela strong na em i kirapim bek dispela man i dai pinis na givim em bek long mama bilong em.—Luk 4:2-4; 7:11-16.
15 Taim yumi kaunim ol dispela stori bilong Jisas na yumi tingim gutpela pasin em i bin kamapim, yumi givim bel moa yet long dispela man em i bin givim laip bilong em olsem man bilong graun bambai yumi inap kisim laip i stap oltaim oltaim. Maski yumi no bin lukim em, yumi laikim em tru na yumi laik bihainim lek bilong em.—1 Pita 2:21.
Long Pasin Daun Em i Wetim God
16 Bikpela samting tru, em Jisas i putim tingting bilong em na bilong yumi tu i go long Papa bilong em long heven, em God Jehova. Em i kamapim klia nambawan bikpela Lo, em i tok: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” (Matyu 22:36, 37) Em i tokim ol disaipel: “Yupela i mas bilip long God.” (Mak 11:22) Taim wanpela bikpela hevi i traim bilip bilong ol, em i tokim ol strong: “Yupela i mas . . . prea i stap.”—Matyu 26:41.
17 Jisas yet i bin mekim olsem, na em i stap olsem gutpela piksa. Beten em i bikpela samting tru long Jisas. (Matyu 14:23; Luk 9:28; 18:1) Taim Jisas i mas kirap na makim ol aposel bilong em, em i no bihainim tingting bilong em yet, maski bipo olgeta ensel long heven ol i stap aninit long em. Em i mekim pasin daun na long nait olgeta em i beten long Papa bilong em. (Luk 6:12, 13) Taim ol birua i laik kam holim em na em i mas karim bikpela pen na i dai, em i go long Papa bilong em gen na em i beten strong. Em i no ting olsem em i save gut long Satan na em inap tru long sakim dispela man nogut, maski em i laik mekim wanem long em. Jisas i no ting olsem. Em i save, i bikpela samting tru long em i no ken pundaun. Man! Sapos em i pundaun, dispela bai bagarapim tru nem bilong Papa bilong em! Na ol man bilong graun bai lus tru, long wanem, Jisas i mas givim skin bilong em olsem ofa bambai ol inap kisim laip i stap oltaim!
18 Planti taim Jisas i mekim beten—taim em i stap wantaim ol aposel bilong em long wanpela rum long Jerusalem, em i beten, na taim em i stap long gaden Getsemani, em i beten strong moa. (Matyu 26:36-44; Jon 17:1-26; Hibru 5:7) Taim em i hangamap long pos na karim pen, em i no toknogutim ol man i tok bilas long em. Em i beten bilong helpim ol man em ol i no save olsem samting ol i mekim i no stret. Em i beten olsem: “Papa, yu ken lusim sin bilong ol. Ol i no save long dispela samting ol i mekim.” (Luk 23:34) Em i putim tingting i go long Papa bilong em, na “em i putim em yet long han bilong God, em dispela Jas i save skelim stret olgeta samting.” Laspela tok bilong em taim em i hangamap long pos, em wanpela beten em i mekim long Papa bilong em. (1 Pita 2:23; Luk 23:46) Yumi ken tenkyu tru long Jisas i bin wetim Jehova na em i stap gut na pinisim wok Papa bilong em i bin givim long em! Maski yumi no bin lukim Jisas, yumi tingim bikpela samting em i bin mekim na yumi givim bel moa yet long em!
Kamapim Bel Bilong Yumi Olsem Yumi Laikim Em Tru
19 Olsem wanem yumi inap kamapim klia olsem yumi no tok tasol olsem yumi laikim Jisas—yumi laikim em tru? Papa bilong Jisas i tambuim pasin bilong wokim imis na mekim ol samting olsem yumi lotu long en. Olsem na sapos yumi pasim wanpela sen long bros bilong yumi i gat wanpela imis long en, o yumi karim wanpela imis na wokabaut long rot, yumi no givim biknem long Jisas, a? (Kisim Bek 20:4, 5; Jon 4:24) Na sapos yumi go long lotu, maski yumi go inap tupela o tripela taim long olgeta wik, yumi no givim biknem long Jisas sapos long ol narapela de bilong wik i stap bilong yumi i no stret wantaim ol tok Jisas i skulim ol man long en. Jisas i tok: “Man i kisim lo bilong mi na i bihainim gut, dispela man em i laikim mi tru. Na man i laikim mi, Papa bilong mi bai i laikim em.”—Jon 14:21, 23; 15:10.
20 Jisas i givim wanem ol lo long yumi? Nambawan bikpela lo, em yumi mas lotuim trupela God Jehova, em wanpela tasol. (Matyu 4:10; Jon 17:3) Na Jisas i insait long ol samting God i laik mekim bilong kamapim laik bilong Em, olsem na em i skulim yumi olsem yumi mas bilip long em, em i Pikinini bilong God, na bilong kamapim klia dispela bilip yumi mas givim baksait long ol pasin nogut na wokabaut long lait. (Jon 3:16-21) Em i tok, yumi mas wok pastaim long painim Kingdom bilong God wantaim stretpela pasin bilong em, na putim dispela i go pas long wok bilong tingim ol samting bilong skin yumi mas kisim. (Matyu 6:31-33) Em i tok, yumi wan wan i mas laikim tru ol narapela olsem em i bin laikim yumi. (Jon 13:34; 1 Pita 1:22) Na em i givim wok long yumi bilong tokaut long ol man long ol samting God i laik mekim, olsem em yet i bin tokaut long en. (Matyu 24:14; 28:19, 20; KTH 3:14) Maski ol i no bin lukim Jisas, inap olsem 5 milion Witnes Bilong Jehova long nau ol i givim bel tru long em na dispela i kirapim ol long bihainim ol dispela tok bilong em. Tru, ol i no bin lukim Jisas, tasol dispela i no daunim strongpela tingting bilong ol long bihainim tok bilong em. Ol i tingim wanpela tok Bikpela bilong ol i bin givim long aposel Tomas: “Yu lukim mi pinis na yu bilip, a? Ol man i no lukim mi na ol i bilip, ol dispela man i ken amamas.”—Jon 20:29.
21 Mipela i laik bai yu stap namel long ol manmeri ol bai bung long ol Haus Kingdom bilong ol Witnes Bilong Jehova long olgeta hap bilong graun long Sande, Mas 23, 1997, bilong tingim gen nambawan bikpela samting God i bin mekim bilong kamapim klia olsem em i laikim tumas ol man, na bilong tingim i dai bilong Pikinini bilong em Krais Jisas, em i bin stap gut long Em. Ol tok na ol samting ol bai mekim long dispela bung i mas kirapim yumi long givim bel moa yet long Jehova na Pikinini bilong em, na bai yumi gat bikpela laik moa long bihainim ol lo bilong God.—1 Jon 5:3.
Bai Yu Bekim Olsem Wanem?
◻ Ol man em namba wan pas bilong Pita i go long ol, olsem wanem ol i bin kisim save long Jisas na laikim em tru?
◻ Wanem sampela samting ol Kristen bilong pastaim i bin harim na dispela i kirapim tru bel bilong yu?
◻ Jisas i bin mekim wanem pasin long ol man na dispela i kirapim yu long givim bel moa yet long em?
◻ Pasin daun bilong Jisas long wetim God, bilong wanem dispela i bikpela samting tru long yumi?
◻ Olsem wanem yumi ken kamapim klia olsem yumi givim bel tru long Krais Jisas?
[Askim Bilong Stadi]
1. Tru, long nau i no gat wanpela man long graun i bin lukim Jisas, tasol sampela man bilong lotu ol i mekim wanem bilong makim olsem ol i givim bel tru long em?
2, 3. (a) Husat namel long ol disaipel bilong Jisas ol i bin lukim em na harim ol tok bilong em? (b) Husat moa long taim bilong ol aposel ol i laikim tru Jisas na bilip long em, maski ol i no bin lukim em?
4, 5. Ol dispela man i no bin lukim Jisas, olsem wanem ol i kisim save long em inap long ol i ken laikim em tru na bilip long em?
6. (a) Sapos long Pentikos 33 C.E. yu bin harim Pita i autim tok bilong Jisas, yu inap kisim save long wanem samting? (b) Dispela i bin mekim wanem long 3,000 manmeri ol i bin i stap na harim tok bilong Pita?
7. (a) Sapos yu bin i stap long Antiok taim aposel Pol i bin autim tok long dispela hap, ating bai yu kisim save long wanem samting? (b) Bilong wanem sampela namel long bikpela lain i bung ol i kamap bilipman na ol i kirap autim gutnius long ol narapela?
8. Sapos yu bin i stap long miting long kongrigesen Efesus taim ol i kisim pas bilong Pol, yu inap kisim save long wanem samting?
9. (a) Wanem samting inap helpim yu long skelim gut olsem yu pilim tru as bilong ol tok Pol i givim long ol Efesus o nogat? (b) Ol brata long ol provins bilong Rom em Pita i stori long ol, taim ol i wok long kisim save long Jisas dispela i mekim wanem long ol?
10. (a) Wanem samting i bin helpim ol Kristen bilong pastaim long laikim tumas Jisas? (b) Yumi ken mekim wanem na bai dispela inap helpim yumi tu?
11, 12. Wanem kain pasin Jisas i bin mekim long ol narapela na dispela i kirapim yu long laikim em tru?
13. Pasin Jisas i bin mekim long ol sinman, olsem wanem dispela i save kirapim ol man long laikim em?
14. Taim Jisas i helpim ol man i gat sik, o skin bilong ol i nogut, o wanpela bilong famili i dai, em i mekim wanem pasin long ol na yu laikim tru?
15. Taim yu kaunim ol stori bilong Jisas na yu tingim gut, dispela i save mekim wanem long yu?
16. Jisas i putim tingting bilong em i go long husat? Em i tokim yumi long mekim wanem?
17, 18. (a) Olsem wanem Jisas i kamapim klia pasin daun bilong em long wetim Papa bilong em? (b) Samting em i mekim, bilong wanem dispela i bikpela samting tru long yumi?
19. Bilong kamapim klia olsem yumi laikim tru Jisas, yumi mas abrusim wanem ol pasin i no stret long mekim?
20. Wanem sampela samting bai makim olsem yumi givim bel tru long Jisas o nogat?
21. Taim yumi go long Memorial bilong tingim i dai bilong Krais, em bai kamap long dispela yia long Sande, Mas 23, dispela bai helpim yumi olsem wanem?
[Ol Piksa long pes 16, 17]
Yumi tingim pasin Jisas i bin mekim long ol man na yumi laikim em tru