Larim Gutpela Tingting i Was Long Yu
“Pasin bilong tingting gut bai i banisim yu na gutpela save bai i was long yu.”—SINDAUN 2:11.
JEHOVA i laik bai yu bihainim gutpela tingting, long wanem, em i save dispela bai was long yu na yu inap abrusim ol kain kain bagarap na hevi. Hap tok bilong Sindaun 2:10-19 i tok: “Bai yu kisim planti gutpela tingting na bai yu belgut long gutpela save bilong yu. Pasin bilong tingting gut bai i banisim yu na gutpela save bai i was long yu.” Em bai was long yu na yu no mekim wanem? “Bai yu no bihainim ol man i save mekim pasin nogut,” em ol man i lusim stretpela rot, na i bihainim pasin giaman.
2 Sapos yu tingim bek, gutpela na stretpela tingting i olsem tingting bilong man inap skelim gut ol samting i narapela narapela kain olsem wanem. Man i gat gutpela tingting em inap save taim sampela tingting o sampela samting i narapela narapela kain, na tingting bilong em i sap long skelim ol samting. Yumi ol Kristen i laik kisim gutpela tingting long ol samting bilong spirit, em stretpela save long Baibel i as bilong en. Taim yumi stadi long Baibel, i olsem yumi digim graun i go daun bilong painim ol strongpela ples ston, olsem save, em bai stap olsem as bilong haus yumi laik wokim, olsem gutpela tingting long ol samting bilong spirit. Ol samting yumi lain long en i ken helpim yumi long taim yumi mas tingim ol samting yumi laik mekim, na bai yumi inap mekim ol samting Jehova i laikim.
3 Jehova i bin askim King Solomon bilong Israel long wanem kain blesing em i laik bai Jehova i givim long em, na king i tok: “Mi laik bai yu givim mi gutpela tingting na save, bai mi inap bosim gut ol dispela manmeri bilong yu, na bai mi inap save wanem pasin i gutpela na wanem pasin i nogut.” Solomon i bin askim Jehova long givim gutpela tingting long em, na Jehova i givim moa yet long em. (1 King 3:9; 4:30) Bilong kisim gutpela tingting, yumi mas beten, na stadi long Baibel long rot bilong ol buk samting yumi kisim long lain “wokboi i gat gutpela tingting.” (Matyu 24:45-47) Dispela bai helpim yumi long kisim gutpela tingting long ol samting bilong spirit na bai yumi stap olsem “ol man i kamap bikpela pinis,” ol inap “skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.”—1 Korin 14:20; Hibru 5:14.
Bilong Wanem Yumi Mas i Gat Gutpela Tingting
4 Sapos yumi gat gutpela tingting, bai yumi inap bihainim tok bilong Jisas, em i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting [bilong skin] tu long yupela.” (Matyu 6:33, Nupela Testamen na Ol Sam) Jisas i tok moa: “Ai bilong yu em i olsem lam bilong bodi bilong yu. Sapos ai bilong yu em i gutpela, orait lait bai i pulap long olgeta hap bodi bilong yu.” (Luk 11:34) Ai bilong yumi i kain olsem lam. Taim ai bilong yumi i “gutpela,” em i no giamanim yumi—em i lukluk stret long wanpela samting tasol. Sapos ai bilong yumi i olsem, yumi inap wokabaut gut na yumi no pundaun long ol samting bilong spirit.
5 Tasol sampela i no bin bihainim tok bilong Jisas, em i tok ai bilong yumi i mas gutpela, na ol i bin kirapim sampela bisnis samting i givim hatwok long ol yet na ol narapela tu. Tasol yumi mas tingim gut olsem, kongrigesen Kristen i olsem “strongpela pos i karim tok tru.” (1 Timoti 3:15) Olsem ol strongpela pos bilong haus, kongrigesen i save litimapim tok i tru—em i no helpim wok bisnis bilong wanpela man. Wok bilong ol kongrigesen bilong ol Witnes Bilong Jehova i no bilong kirapim ol man long go insait long ol bisnis, o baim sampela samting, o baim man long mekim wanpela wok bilong yumi, nogat. Yumi no ken wok long stretim tok wantaim narapela long ol samting bilong bisnis taim yumi stap insait long Haus Kingdom. Gutpela tingting i helpim yumi long tingim wok tru bilong ol Haus Kingdom, na Buk-Stadi, na ol kibung, olsem: Ol dispela ples em bilong ol Kristen i bung wantaim long en na toktok long ol samting bilong spirit. Sapos yumi laik kirapim ol brata spirit long go insait long wanpela bisnis samting, dispela bai kamapim klia olsem yumi no pilim tumas olsem ol samting bilong spirit i bikpela samting. Yumi no ken tru mekim wok long ol manmeri bilong kongrigesen bilong kisim mani long dispela rot.
6 Long rot bilong ol manmeri insait long kongrigesen sampela i bin salim ol marasin o samting bilong mekim gut skin, ol vaitamin, ol wok bilong putim telefon samting, ol samting bilong wokim haus, baim rot bilong raun long sampela hap, ol program o ol samting bilong kompyuta, na ol narapela samting. Tasol ol miting i no ples bilong salim ol samting long ol man o kirapim ol long baim ol samting, o baim sampela long mekim wanpela wok. Yumi inap pilim lo bilong dispela samting sapos yumi tingim olsem Jisas i “rausim dispela olgeta man wantaim ol sipsip na ol bulmakau bilong ol, na ol i lusim hap bilong tempel na i go. Na em i kapsaitim mani bilong ol man i senisim mani, na em i kapsaitim tu ol tebol bilong ol. Na em i tok olsem long ol man i wok bisnis long salim ol pisin, ‘Kisim ol pisin bilong yupela i go. Yupela i no ken mekim haus bilong Papa bilong mi i kamap olsem haus bilong maket.’ ”—Jon 2:15, 16.
Olsem Wanem Long Putim Mani Long Wanpela Bisnis?
7 Yu mas bihainim gutpela tingting na was gut taim yu laik putim mani long wanpela bisnis. Sapos wanpela man i laik kisim mani olsem dinau long yu na em i mekim kain tok promis olsem: “Mi tok tru, bai yu kisim winmani long en.” “Mani bilong yu i no inap lus. Dispela mani yu putim bai kamapim tru gutpela samting.” Yu mas lukaut sapos wanpela man i mekim kain tok olsem. Dispela i kamapim klia olsem em i no tingting gut o em i giaman, long wanem, taim man i putim mani long wanpela samting olsem, klostu olgeta taim em i no save kisim winmani o kisim bek mani bilong em. Sampela man i no bihainim stretpela pasin ol i bin grisim sampela long kongrigesen long dispela kain samting, na ol i paulim mani bilong ol. Dispela i kirapim yumi long tingim ol man em ol i bin hait na kam insait long kongrigesen Kristen bilong pastaim na ol i “senisim tok bilong marimari bilong God, na mekim em i kamap tok bilong ol kain kain pasin nogut.” Ol i olsem ol bikpela ston i sap tru na i stap hait aninit long wara, na ol inap katim na bagarapim ol man i subim wara. (Jut 4, 12) Tru, ating ol man bilong paulim mani ol i no gat wankain tingting olsem, tasol ol tu i save mekim nogut long ol lain bilong kongrigesen.
8 Sampela Kristen i laik helpim ol narapela na ol i toktok wantaim long wanpela wok bisnis ol inap putim mani long en na i olsem ol bai kisim bikpela winmani long en, tasol mani bilong ol yet wantaim ol narapela i bin bihainim ol, em i lus nating. Olsem na kongrigesen i tekewe wok bilong sampela Kristen insait long kongrigesen. Sampela bisnis ol i go insait long en bilong kamap maniman hariap, taim em i kamap ples klia olsem dispela bisnis em i wanpela bikpela giaman tru, i gat wanpela man tasol i winim sampela mani—em dispela man i bin giamanim ol na paulim mani bilong ol, na wantu em i ranawe pinis. Olsem wanem gutpela tingting inap helpim yumi long abrusim ol kain hevi olsem?
9 Man i gat gutpela tingting em inap pilim ol samting i no stap ples klia. Yumi mas i gat dispela gutpela tingting bambai yumi ken skelim gut tok bilong ol man i laik putim mani bilong yumi long wanpela bisnis ol i laik kirapim. Ol Kristen i save bilip long ol narapela Kristen, olsem na sampela taim ol i no tingting gut taim ol i givim mani long sampela insait long lain bilong God bilong kirapim bisnis long en. Ol i tingting olsem ol brata sista i no inap insait long wanpela bisnis samting em inap pundaun na mani samting bilong ol yet na bilong ol wanbilip bai lus nating. Tasol maski bisnisman em i wanpela Kristen, dispela i no as na yumi ken save tru olsem bisnis bilong em bai kamap gutpela, nogat. Na dispela i no makim olsem em i gat bikpela save tru long ol samting bilong wok bisnis.
10 Sampela Kristen i laik kisim dinau long ol brata sista bilong kirapim wanpela bisnis, long wanem, ol haus beng i no laik givim dinau bilong kirapim wanpela bisnis ol i ting ol i no inap kisim bek dinau bilong en. Na planti ol i larim ol man i giamanim ol na ol i ting sapos ol i putim mani bilong ol long wanpela bisnis samting bilong ol dispela man, ol inap kisim kwik bikpela mani na ol i no mekim bikpela wok, o i no gat wanpela hap wok ol i mas mekim. Na sampela i laik putim mani long wanpela bisnis, long wanem, ol i ting ol bai i gat nem long ai bilong ol man. Tasol olgeta mani bilong ol em ol i bin hatwok long bungim, em i lus nating long dispela pasin! Wanpela Kristen i bin putim bikpela mani long wanpela bisnis, na em i bilip olsem insait long tupela wik tasol em bai kisim bek 25 pesen winmani. Tasol dispela bisnis i bagarap na olgeta mani bilong em i lus nating! Na long narapela stori olsem, wanpela man bilong baim na salim graun em i kisim bikpela dinau tru long sampela insait long kongrigesen. Em i tok promis olsem ol bai kisim bek bikpela mani moa. Tasol bisnis bilong em i bagarap na olgeta mani em i bin kisim olsem dinau long ol, i lus olgeta.
Taim Wok Bisnis i Pundaun
11 Sampela Kristen i no bin tingting gut na ol i go insait long sampela bisnis ol i ting ol bai kisim bikpela mani long en, tasol bisnis i bagarap. Dispela i mekim na ol i bel hevi na sampela i no strong moa long ol samting bilong spirit. Taim ol Kristen i no larim gutpela tingting i was long ol long dispela samting, ol i kisim bikpela bel hevi tru na ol i stap bel nogut. Pasin bilong mangal i bin holimpas planti manmeri olsem umben i holimpas abus. Pol i tok: “Yupela i no ken mangalim ol samting . . . Tok bilong ol dispela pasin tu i no ken kamap liklik namel long yupela. I no inap yumi ol manmeri bilong God i toktok long ol dispela kain pasin.” (Efesus 5:3) Na em i toksave olsem: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta. Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.”—1 Timoti 6:9, 10.
12 Sapos wanpela Kristen i kisim pasin bilong laikim tumas mani, em inap bagarapim em yet long ol samting bilong spirit. Ol Farisi ol i man bilong laikim tumas mani, na dispela em i wanpela pasin bilong ol man i stap long dispela taim bilong las de. (Luk 16:14; 2 Timoti 3:1, 2) Tasol Kristen “i no ken bihainim pasin bilong mangal long mani.” (Hibru 13:5) Ol dispela tok yumi bin mekim i no makim olsem ol Kristen i no ken wok bisnis wantaim o kirapim wanpela bisnis wantaim. Tasol taim ol i mekim olsem, ol toktok ol i mekim long dispela samting i mas i stap narapela na ol samting bilong kongrigesen i stap narapela—ol i no ken bungim tupela wantaim. Na i gat wanpela bikpela samting tru, olsem: Namel long ol brata spirit tu, long olgeta taim ol i mas raitim kontrak bilong bisnis long wanpela pepa. Bilong helpim yumi, i gat wanpela stori long Kirap! bilong Disemba 8, 1983, pes 14 i go inap 17, nem bilong stori, “Raitim Long Pepa!”
13 Sindaun 22:7 i tok: “Ol man i gat dinau, ol i stap olsem wokboi nating bilong ol man i givim dinau.” Planti taim em i no pasin bilong gutpela tingting sapos yumi yet o brata bilong yumi i kamap olsem wokboi nating. Taim wanpela i askim yumi long givim dinau long em bilong kirapim wanpela bisnis, i gutpela sapos yumi skelim gut olsem em inap bekim dispela mani o nogat. Em i gat nem olsem man yumi inap bilip long tok bilong em? Yumi mas save, taim yumi givim dinau bilong mekim kain wok olsem, mani bilong yumi inap lus, long wanem, planti bisnis i save bagarap. Maski yu wokim kontrak, dispela i no makim olsem bisnis bai kamap gutpela. Na sapos man i no gat planti mani na em i givim bikpela hap mani bilong em olsem dinau bilong kirapim bisnis na dispela mani inap lus, dispela i no pasin bilong gutpela tingting.
14 Yumi mas bihainim gutpela tingting sapos yumi bin givim mani olsem dinau long wanpela Kristen bilong mekim wok bisnis long en na dispela mani i lus, tasol em i no bin mekim pasin bilong paulim mani. Sapos i no asua bilong dispela wanbilip i bin kisim dinau long yumi na bisnis bilong em i bagarap, yu ting yumi inap tok, em i bin rongim yumi? Nogat, long wanem, long laik bilong yumi yet yumi bin givim dinau long em, na ating em i bin givim hap winmani, olsem interes, bilong dispela dinau long yumi, na i no gat pasin olsem paulim mani samting i bin kamap. Olsem na i no gat as na yumi kisim dispela wanbilip i go long kot. Sapos yumi kotim dispela Kristen i no bin mekim pasin giaman, tasol bisnis bilong em i bagarap, dispela bai no inap helpim yumi, a?—1 Korin 6:1.
15 Sampela taim wok bisnis bilong ol man i pundaun na ol i askim kot long tokaut olsem bisnis i bagarap na ol i no inap bekim dinau. Maski kot i tokaut pinis long dispela samting, sampela Kristen i pilim ol i mas wok strong long bekim dispela dinau sapos ol man i bin givim dinau ol i orait long kisim dispela mani. Tasol olsem wanem sapos dinau wanpela man i kisim long brata bilong em i lus, tasol bihain dispela man bilong kisim dinau i gat gutpela sindaun na planti gutpela samting? Na olsem wanem sapos em i gat mani inap long bekim dinau, tasol em i ting em i no gat wok long bekim dinau long brata bilong em? Sapos olsem, orait bai ol i ting em i no inapim mak bilong holim sampela wok insait long kongrigesen.—1 Timoti 3:3, 8; lukim Wastaua, Septemba 15, 1994, pes 30, 31.
Olsem Wanem Sapos Narapela i Paulim Mani Bilong Yu?
16 Sapos yumi gat gutpela tingting bai yumi save, winmani i no save kamap long olgeta wok yumi putim mani bilong yumi long en. Tasol olsem wanem sapos narapela i paulim mani bilong yu? Dispela pasin i olsem: “Man i tingting pinis long mekim pasin giaman, o trik, o paulim tok tru bilong kirapim narapela long givim sampela samting long em i gat bikpela pe long en, o lusim wanpela samting em lo i tok i stret em i ken mekim o kisim.” Jisas i bin kolim ol samting Kristen i ken mekim sapos em i ting narapela Kristen i bin giamanim em na paulim mani bilong em. Long Matyu 18:15-17, Jisas i tok: “Sapos brata bilong yu em i mekim rong long yu, orait yu go lukim em, na taim yutupela tasol i stap, yu mas traim stretim tok wantaim em. Sapos em i harim tok bilong yu, orait bai yu kisim bek brata bilong yu. Na sapos em i no harim tok bilong yu, orait yu mas kisim wanpela o tupela man moa i go wantaim yu. Olsem na bai i gat tupela o tripela man bilong strongim tok. Tasol sapos em i no laik harim tok bilong ol, orait yu mas tokim ol manmeri bilong sios. Na sapos em i no laik harim tok bilong ol tu, orait yu mas lukim em i olsem wanpela haiden na olsem man bilong kisim takis.” Tok piksa Jisas i bin mekim bihain long dispela tok i makim olsem em i bin tingim ol kain rong olsem i save kamap long ol samting bilong mani, olsem giaman na paulim mani bilong narapela.—Matyu 18:23-35.
17 Tasol Baibel i no kolim wanpela as na Kristen i ken mekim ol samting olsem Matyu 18:15-17 i makim sapos i no gat wanpela samting i kamapim klia o i makim olsem narapela i bin giaman na paulim mani bilong em. Tasol olsem wanem sapos wanpela man i tok em i Kristen na em i bin giaman na paulim tru mani bilong yumi? Gutpela tingting inap was long yumi na bai yumi no mekim wanpela samting i bagarapim nem bilong kongrigesen. Aposel Pol i tokim ol Kristen mobeta ol i larim brata i rongim ol o paulim mani bilong ol, nogut ol i kisim brata i go long kot.—1 Korin 6:7.
18 Ol brata sista tru bilong yumi ol i no gat “pasin bilong giaman na olgeta pasin nogut,” olsem Barjisas, dispela man bilong wokim posin na marila samting. (Aposel 13:6-12) Olsem na taim yumi go insait long wanpela bisnis wantaim ol wanbilip na mani bilong yumi i lus, yumi mas bihainim gutpela tingting. Sapos yumi tingting long kisim ol i go long kot, yumi mas tingim ol samting dispela inap mekim long yumi yet, na narapela i bin insait long dispela bisnis, na kongrigesen, na ol ausaitman. Sapos yumi wok long mekim ol samting bilong kisim mani olsem kompensesen, dispela inap kisim bikpela hap taim, na strong, na mani samting bilong yumi. Na ating dispela bai mekim na ol loya na ol narapela i gat wok olsem, ol yet bai kisim bikpela mani long en, na yumi nogat. Sori tru, sampela Kristen i bin lusim gutpela wok insait long oganaisesen bilong God, long wanem, ol i bin tingting tumas long ol dispela samting. Taim ol dispela samting i pulim tingting bilong yumi olsem, ating Satan i amamas tru, tasol yumi laik mekim bel bilong Jehova i amamas. (Sindaun 27:11) Sapos yumi no mekim wanpela samting bilong kisim bek dispela mani i bin lus na yumi larim tasol, bai yumi inap abrusim planti hevi, na bikpela hap taim bilong yumi na bilong ol elda i no ken lus nating. Sapos yumi mekim olsem, bel isi bai stap yet insait long kongrigesen. Na tu, bai yumi wok yet long putim ol samting bilong Kingdom i stap olsem namba wan samting.
Gutpela Tingting na Ol Samting Yu Tingting Long Mekim
19 Sapos yumi mas skelim ol samting yumi mas mekim long samting bilong mani o bisnis, ating bai tingting na bel bilong yumi i no stap isi. Tasol gutpela tingting long ol samting bilong spirit inap helpim yumi long skelim gut ol samting na bai yumi bihainim gutpela save taim yumi mekim ol samting. Na tu, pasin bilong beten na wetim Jehova inap helpim yumi long kisim “bel isi God i save givim yumi.” (Filipai 4:6, 7) Dispela bel isi i olsem yumi no tingting planti long ol samting, nogat; bel na tingting bilong yumi i stap isi, long wanem, yumi stap klostu tru long Jehova. Dispela kain bel isi inap helpim yumi na taim yumi mas skelim ol bikpela samting yumi mas mekim, bai yumi inap tingting stret.
20 Orait, yumi mas pasim tok long bel olsem yumi no ken larim ol tok pait bilong wok bisnis i bagarapim bel isi bilong yumi o bilong kongrigesen. Yumi mas tingim gut dispela samting: Wok bilong kongrigesen Kristen em bilong helpim yumi long ol samting bilong spirit, na em i no ples bilong mekim ol wok bisnis samting. Long olgeta taim, ol samting bilong bisnis i mas i stap narapela na ol wok bilong kongrigesen i stap narapela. Taim yumi laik go insait long wanpela kain bisnis, yumi mas bihainim gutpela tingting na was gut. Na long olgeta taim yumi mas i gat stretpela tingting long ol samting bilong bisnis, na tingim wok bilong Kingdom i namba wan samting. Sapos yumi bin go insait long wanpela bisnis wantaim sampela wanbilip na dispela bisnis i bagarap, i gutpela sapos yumi mekim ol samting inap helpim olgeta wantaim.
21 Yumi no ken wok long tingim tumas ol samting bilong mani na ol narapela samting i no bikpela samting tru, nogat; yumi mas wok strong long kisim gutpela tingting, na beten long Jehova i ken stiaim yumi long ol samting yumi tingting long mekim, na tingim wok bilong Kingdom i namba wan samting. Olsem Pol i bin beten, ‘pasin bilong laikim tru ol arapela em i ken kamap strong moa long laip bilong yumi, na bai yumi gat planti save, na tingting bilong yumi i ken kamap klia tru. Olsem bai yumi inap skelim gut olgeta pasin na kisim ol pasin i gutpela tru.’ Yumi no laik bai yumi “gat asua” long pundaunim ol narapela—o yumi yet. Nau Krais i stap King na i sindaun long sia king bilong em long heven, olsem na yumi mas bihainim gutpela tingting long ol samting bilong spirit long olgeta samting bilong yumi. Sapos yumi mekim olsem, ‘ol stretpela pasin Jisas Krais i save kamapim, ol bai pulap tru long yumi, na ol manmeri bai lukim na ol bai givim biknem long God na litimapim nem bilong em,’ em Bikpela King Jehova.—Filipai 1:9-11.
Bai Yu Bekim Olsem Wanem?
◻ Gutpela na stretpela tingting em i wanem samting?
◻ Bilong wanem em i bikpela samting na ol Kristen i mas bihainim gutpela tingting taim ol i wok bisnis wantaim?
◻ Gutpela tingting inap helpim yumi olsem wanem sapos yumi ting wanpela wanbilip i bin paulim mani bilong yumi?
◻ Taim yumi skelim ol samting yumi mas mekim, gutpela tingting inap helpim yumi olsem wanem?
[Askim Bilong Stadi]
1. Gutpela tingting inap was long yumi long wanem ol samting?
2. Gutpela na stretpela tingting em i wanem samting? Na ol Kristen i laik tru long kisim wanem kain gutpela tingting?
3. Yumi mas mekim wanem bilong kisim gutpela tingting long ol samting bilong spirit?
4. Olsem wanem ai bilong yumi i ken i stap “gutpela”? Dispela inap helpim yumi olsem wanem?
5. Long ol samting bilong bisnis, yumi mas tingim wanem wok tru bilong kongrigesen Kristen?
6. Long ol miting bilong kongrigesen, bilong wanem yumi no ken salim ol samting long ol man o kirapim ol long baim ol samting, o baim sampela long mekim wanpela wok?
7. Bilong wanem yumi mas bihainim gutpela tingting na was gut taim yumi laik putim mani long wanpela bisnis?
8. Wanem samting i bin kamap taim sampela brata i bin putim mani bilong ol long wanpela wok bisnis i olsem em bai kamapim bikpela winmani?
9. Bilong wanem yumi mas i gat gutpela tingting bilong skelim gut tok bilong ol man i laik bai yumi putim mani long wanpela bisnis ol i laik kirapim?
10. I gat wanem as na sampela Kristen i laik kisim dinau long ol brata sista bilong kirapim wanpela bisnis? Wanem hevi inap kamap long dispela pasin?
11. Pol i tok wanem long pasin bilong mangal na laikim tumas mani?
12. Sapos ol Kristen i wok bisnis wantaim, ol i mas tingim wanem bikpela samting?
13. Yu ting tok bilong Sindaun 22:7 i stret olsem wanem long wok bilong kirapim wanpela bisnis?
14. Sapos yumi bin givim mani olsem dinau long wanpela wanbilip Kristen na bisnis bilong em i bagarap, bilong wanem yumi mas bihainim gutpela tingting?
15. Sapos kot i tokaut olsem bisnis bilong wanpela Kristen i bagarap na em i no inap bekim dinau, ol elda i mas skelim wanem ol samting?
16. Sapos yumi ting narapela i paulim mani bilong yumi, yumi ken mekim wanem ol samting?
17, 18. Sapos wanpela man i tok em i Kristen na em i giaman na paulim mani bilong yumi, gutpela tingting i ken was long yumi olsem wanem?
19. Sapos yumi mas skelim sampela bikpela samting yumi mas mekim, beten na gutpela tingting long ol samting bilong spirit i ken helpim yumi olsem wanem?
20. Long ol samting bilong wok bisnis na bilong kongrigesen, yumi mas pasim tok long bel long mekim wanem?
21. Olsem wanem yumi ken bihainim gutpela tingting na mekim ol samting i stret wantaim tok bilong Filipai 1:9-11?
[Piksa long pes 18]
Gutpela tingting bai helpim yumi long bihainim tok bilong Jisas long tingim wok bilong Kingdom i namba wan samting
[Ol Piksa long pes 20]
Long olgeta taim raitim kontrak bilong bisnis long wanpela pepa