Askim
Olsem wanem long nupela tingting yumi bin kisim long dispela tok “ol manmeri bilong dispela taim,” i stap long Matyu 24:34? Yumi inap kisim tingting long en olsem pinis i no ken kamap yet—em bai kamap bihain bihain?
Nogat, i no olsem. Nupela tingting yumi bin kisim long dispela samting em i mas helpim yumi long was gut oltaim na wetim pinis i kamap. Olsem wanem yumi inap tok olsem?
Olsem Wastaua bilong Novemba 1, 1995, i tok, Jisas i kolim dispela tok “ol manmeri bilong dispela taim” bilong makim ol manmeri nogut i stap long taim bilong em. (Matyu 11:7, 16-19; 12:39, 45; 17:14-17; Aposel 2:5, 6, 14, 40) Em i no stori long wanpela hap taim stret na i gat yia stret dispela taim i bin kirap, nogat.
“Askim” i stap long dispela Wastaua yet i kamapim tupela bikpela samting bilong ol manmeri bilong wanpela taim, olsem: “Dispela i no makim wanpela hap taim i gat yia stret bilong en olsem yumi save kolim ol yia bilong wanpela hap taim,” na “Ol manmeri bilong wanpela taim ol i save stap olsem sotpela taim tasol—ol i no save stap longpela taim.”
Planti taim yumi save kolim dispela tok “ol manmeri bilong dispela taim” bilong makim olsem. Yumi ken tok, ‘Ol soldia bilong taim bilong Napoleon ol i no bin save long ol balus na bom atom.’ Orait olsem wanem? Yumi tingim ol soldia em mama i bin karim ol long wankain yia stret olsem mama i bin karim Napoleon? O yumi tingim ol dispela soldia Frans ol i bin i dai paslain long taim Napoleon i dai? Nogat, a? Na taim yumi toktok long “ol manmeri bilong dispela taim” bilong Napoleon, yumi no wok long makim hamas yia stret bilong en, nogat. Tasol yumi bai tingim wanpela hap taim long taim bilong Napoleon i olsem sotpela taim—i no winim taim bilong Napoleon na i go inap sampela handet yia bihain, nogat.
Dispela i wankain long tingting yumi bin kisim long tok profet Jisas i bin mekim long maunten Oliv. Planti samting Jisas i bin kolim long dispela tok profet i kamap tru pinis na dispela i kamapim klia olsem pinis bilong dispela pasin bilong nau i klostu. (Matyu 24:32, 33) Yumi no ken lusim tingting long tok bilong Kamapim Tok Hait 12:9, 10, em i soim yumi olsem taim Kingdom bilong God i kamap pinis long 1914, ol i tromoi Satan i kam daun long hap bilong graun. Na Kamapim Tok Hait i tok moa olsem nau Satan i belhat nogut tru. Bilong wanem? Long wanem, em i save “em i gat sotpela taim tasol bilong i stap.”—KTH 12:12.
Olsem na i stret dispela Wastaua bilong Novemba 1 i gat wanpela liklik het-tok olsem “Yupela i Mas Was i Stap”! Paragraf i kam bihain long en i tok stret olsem: “Yumi no gat wok long save wanem taim stret dispela ‘bikpela hevi tru’ bai kamap. Yumi mas was i stap, na wok long kisim strongpela bilip, na wok strong long mekim wok bilong Jehova—maski skelim skelim wanem taim stret dispela samting bai kamap.” Orait nau dispela paragraf i kamapim tok bilong Jisas, em i tok: “Yupela lukaut. Yupela i mas was i stap, long wanem, yupela i no save wanem taim dispela ol samting bai i kamap. Dispela tok mi givim long yupela, em mi givim long olgeta manmeri. Yupela i mas was i stap.”—Mak 13:33, 37.