Rot Bilong Painim Gutpela Samting Bilong Wetim Long Taim Bilong Bel Hevi
YU KEN tingting olsem ol dispela samting hia i painim yu: Olgeta kago bilong yu i bagarap olgeta, na nau yu stap rabis. Ol pikinini bilong yu—nambawan bikpela amamas bilong yu—ol i dai pinis. Meri bilong yu i no wok long strongim bel bilong yu. Yu sik nogut tru. Olgeta wan wan de yu karim bikpela pen.
Sapos ol dispela hevi i painim yu, bai yu inap painim gutpela samting bilong wetim na yu ken amamas yet long i stap laip? O bai yu larim bel hevi i daunim yu olgeta?
Dispela ol hevi nau mipela i stori long en i bin painim tru Jop, em wanpela man i bin stap long taim bilong ol man i bin raitim Baibel. (Jop, sapta 1, 2) Taim Jop i stap bel hevi tru, em i tok: “Mi les pinis long i stap laip. Mobeta mi dai.” Em i laik i dai na bai em i no ken karim hevi moa. (Jop 10:1; 14:13) Tasol maski Jop i karim bikpela pen na hevi tru, em i bin stap gut long God. Olsem na Jehova i “mekim gut moa yet long Jop. Na las hap bilong laip bilong en i winim tru ol yia em i bin i stap bipo.” Jop i stap bel isi na i stap gut tru, na “em i kamap lapun tru” na em i dai.—Jop 42:12, 17.
Jop i stap gutpela piksa long pasin bilong sanap strong na karim hevi, na ol man i save litimapim dispela pasin bilong em i kam inap long nau. Pen na hevi bilong em i mekim na pasin bilong em i kamap gutpela moa, na i kirapim ol narapela long mekim ol gutpela wok. (Jems 5:10, 11) Na bikpela samting tru, pasin bilong Jop long stap gut olgeta long God i mekim Jehova i belgut tru. (Sindaun 27:11) Olsem na dispela taim nogut bilong pen na hevi i bin painim Jop, bihain em i kamapim ol gutpela pasin tru long em—em pasin bilong givim bel long God, na bilip, na stap gut long God—na Jop i kisim ol blesing long dispela, na olgeta man em ol i pilim tru pasin bilong Jop, ol tu i kisim blesing.
Maski Kain Kain Hevi, Yu Inap Wetim Gutpela Samting
Ating sampela hevi i bin painim yu na i wankain long ol hevi i bin painim Jop. Ating wanpela famili bilong yu i bin dai na bel bilong yu i bagarap tru. O ating bikpela sik i bin painim yu na olgeta de yu karim bikpela pen. O sindaun bilong yu i go nogut olgeta na yu stap bel hevi, long wanem, yu na poroman bilong yu i bin katim marit. O bikpela hevi bilong mani i bin painim yu na nau yu stap rabis. O ating ol birua bilong lotu i tru i mekim nogut long yu. Ating yu bin wok strong long karim hevi bilong yu, na nau yu pilim olsem i no gat gutpela samting inap painim yu long bihain.—1 Pita 1:6.
Yu no ken larim bel hevi i daunim yu olgeta. Tasol askim yu yet olsem, ‘Bilong wanem mi wok long karim pen na hevi?’ Yu karim pen na hevi, long wanem, yu stap long dispela graun em i “stap aninit long strong bilong Satan.” (1 Jon 5:19) Long dispela as, olgeta man i karim hevi. Long sampela rot yumi olgeta i kisim hevi long taim Satan i kirapim ol man long birua long tok bilong Kingdom, o taim sampela i mekim ol tok i bagarapim bel, o taim ol man i mekim ol pasin nogut tru olsem planti i save mekim long dispela ‘taim bilong planti hevi.’—2 Timoti 3:1-5.
Sapos wanpela bikpela hevi tru i bin painim yu, ating dispela hevi i kamap, long wanem, “taim nogut i save painim yumi olgeta.” (Saveman 9:11) Tasol sampela taim hevi i kamap, long wanem, sin bilong Adam i stap long skin bilong yumi. (Rom 5:12) Sapos yu bin mekim bikpela rong, tasol yu tanim bel pinis na yu bin go askim ol elda long helpim yu, yu no ken pilim olsem God i lusim yu pinis. (Song 103:10-14; Jems 5:13-15) Jehova i tingim tru yumi—i no gat narapela i save tingim yumi olsem. (1 Pita 5:6, 7) Yu ken bilip tru olsem “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.” (Song 34:18) Maski dispela hevi yu karim em i bikpela tru, Jehova inap givim gutpela tingting long yu bilong helpim yu long karim hevi bilong yu. (Jems 1:5-8) Oltaim yu mas tingim: Maski wanem wanem samting i bagarapim bel bilong yu, Jehova inap oraitim bel bilong yu. Sapos Jehova i orait long yu, i no gat wanpela samting inap pasim yu long kisim prais bilong laip.—Rom 8:38, 39.
Ol Hevi Inap Kamapim Gutpela Samting?
Wanpela olpela savetok i olsem, “Olgeta klaut i gat lait long arere bilong en.” Insait bilong dispela tok i olsem: Maski hevi bilong yu i go bikpela tru, oltaim yu inap painim wanpela as na yu ken wetim gutpela samting. Olgeta tok ol i raitim long Baibel, ol i raitim bilong “mekim yumi sanap strong na wetim God i kisim yumi.” (Rom 15:4) Maski hevi bilong yu i bikpela tru, ol tok promis na ol lo i stap long Baibel inap kamapim gen amamas bilong yu na strongim bilip bilong yu long wetim ol gutpela samting i kamap.
Baibel i kamapim klia olsem, ol pen na hevi yumi karim “ol bai i stap sotpela taim tasol” taim yumi skelim wantaim ol blesing bilong oltaim ol manmeri i laikim tumas God bai kisim. (2 Korin 4:16-18) Na tu, tok bilong Baibel i makim olsem ol pasin bilong God yumi kisim long taim yumi karim hevi i winim tru biknem o planti mani kago samting. (1 Jon 2:15-17) Olsem na pen na hevi tu inap kamapim gutpela samting. (Hibru 5:8) Tru tumas, sapos yumi mekim wok long skul yumi kisim long taim yumi karim hevi, dispela inap kamapim ol blesing yu no bin tingim.
Sapos yu bin hatwok tru long karim wanpela hevi, ating dispela inap helpim yu long mekim pasin sori moa long ol narapela na yu no mekim hatpela pasin olsem long pastaim. Ating long bipo wanpela pasin bilong yu i bin skrapim bel bilong ol narapela na dispela i pasim yu long kamap strong long ol samting bilong spirit. Ating em pasin bilong hambak. Tasol taim hevi i painim yu, ating kwiktaim yu bin kisim save olsem yu no gat strong na i mas i gat ol narapela bilong helpim yu. Sapos hevi bilong yu i bin skulim yu olsem, na yu stretim pinis pasin bilong yu, orait dispela hevi i bin helpim yu.
Olsem wanem sapos long bipo, sampela i bin hatwok long toktok wantaim yu, long wanem, yu no save bosim gut bel bilong yu? Ating dispela i bin kamapim sampela hevi tu long skin bilong yu. (Sindaun 14:29, 30) Tasol nau yu no gat dispela hevi moa, long wanem, yu save mekim wok long spirit bilong God bilong helpim yu long bosim gut bel.—Galesia 5:22, 23.
Wankain long sampela man, ating long bipo yu no save sori na marimari long man i mekim rong. Tasol sapos yu yet i bin pundaun long sampela samting na yu bin laik tru long narapela i mas marimari long yu, ating dispela i mekim na nau bel bilong yu i save kirapim yu moa long marimari long ol narapela. Gutpela pasin em narapela i bin mekim long yu, olsem em i pilim tru hevi bilong yu na em i tingim yu na marimari long yu, dispela i mekim na nau yu save, yu yet i mas mekim wankain pasin long ol man i mekim rong na ol i tanim bel. Sapos pen na hevi bilong yu i bin kirapim yu long stretim pasin bilong yu long ol samting yu no strong long en, dispela em wanpela gutpela samting hevi bilong yu i kamapim. Yu lain pinis olsem “man i save sori long ol arapela man, em bai i winim kot.”—Jems 2:13; Matyu 5:7.
Olsem wanem sapos kongrigesen Kristen i bin stretim yu na nau yu no holim moa sampela gutpela wok na yu no gat gutnem moa long ai bilong ol narapela? Yu no ken larim bel hevi i daunim yu olgeta. Ol i save stretim man bilong helpim kongrigesen long i stap klin, na tu ol i mekim bilong helpim man i bin mekim rong long kamap strong gen long ol samting bilong spirit. Tru, “taim Papa i givim hevi long yumi bilong stretim yumi, yumi no save amamas. Nogat. Bel bilong yumi i pilim hevi tasol. Tasol taim em i stretim yumi pinis, yumi bai kisim gutpela pasin tru. Yumi bai mekim ol stretpela pasin, na bel bilong yumi bai i stap isi.” (Hibru 12:11) Taim narapela i stretim yumi dispela inap bagarapim bel bilong yumi, tasol sapos yumi mekim pasin daun na tanim bel, yumi ken wetim gutpela samting i kamap. Taim King Devit bilong Israel bipo i bin mekim rong, Jehova i givim bikpela strafe long em, tasol em i tanim bel na bihain Baibel i mekim gutpela tok long em olsem man i gat strongpela bilip tru.—2 Samuel 12:7-12; Song 32:5; Hibru 11:32-34.
Taim wanpela hevi i painim yu, dispela inap senisim tru tingting bilong yu long planti samting. Long bipo, ating yu gat bikpela tingting long kisim ol mani kago samting na long winim sampela mak em bai helpim yu long kisim biknem na namba long ai bilong ol manmeri. Tasol ating bikpela hevi bilong mani i bin painim yu o ol kago samting bilong yu i bin lus, na dispela i helpim yu long tingim moa ol samting i bikpela samting tru. (Skelim wantaim Filipai 1:10.) Nau yu save, ol samting bilong spirit na ol mak yumi inap winim long mekim wok bilong God, ol dispela samting tasol inap kamapim amamas tru bilong i stap oltaim.
Bilip Strong Long Jehova
Taim yu mekim wok bilong Jehova, dispela inap kirapim ol man em ol i birua long ol bilip Kristen bilong yu long mekim nogut long yu na givim hevi long yu. Ating bai yu pilim olsem dispela hevi i wok long daunim yu tru, tasol em inap kamapim gutpela samting. Dispela traim inap strongim bilip bilong yu. Na tu, em inap strongim bel bilong ol narapela em ol i karim hevi long han bilong ol birua, long wanem, ol i lukim yu i sanap strong na i no les. Ol man i lukim gutpela pasin bilong yu, dispela inap kirapim ol long litimapim nem bilong God. Ating ol birua bilong yu tu ol bai sem na ol bai tokaut long ol gutpela wok yu mekim!—1 Pita 2:12; 3:16.
Bilong helpim yu na bel hevi i no ken daunim yu olgeta long taim ol man i birua long yu, yu mas bilip strong long Jehova. Tok bilong em, em Baibel, i soim yumi olsem olgeta traim i gat pinis bilong en, tasol ating em i no kam hariap olsem yumi laik bai em i mas kamap. Tasol inap long taim dispela traim i pinis, “no ken les long mekim gutpela pasin.” (2 Tesalonaika 3:13) Wok long painim rot long karim ol hevi i painim yu na long sanap strong. Na long taim yu pilim olsem yu no gat rot moa, “Yu mas putim [hevi bilong yu] long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Song 55:22) No ken wok long tingim hevi bilong yu yet tasol, nogat; tingim gutpela blesing bilong yu, em yu save long Jehova, na yu stap insait long lain bilong em, na yu gat gutpela samting yu inap wetim—em laip i stap oltaim oltaim.—Jon 3:16, 36.
Wok long tingim ol samting i bikpela samting. Long olgeta de, beten askim Jehova long strongim yu bambai yu ken karim dispela hevi na sanap strong. (Filipai 4:6, 7, 13) Rausim olgeta tingting bilong bekim nogut long ol man i givim hevi long yu. Larim olgeta samting long han bilong Jehova. (Rom 12:19) Wok long painim rot long stretim pasin bilong yu na long kisim ol pasin Kristen. (2 Pita 1:5-8) Yu mas pilim tru olgeta samting ol narapela i mekim bilong helpim yu, na ol elda tu, em ol i mekim pasin sori na lukautim yu long ol samting bilong spirit yu mas kisim. (Hibru 13:7, 17) Stap gut long God, na lukluk i go long prais bilong laip, na bilip tru olsem i no gat wanpela samting—dai tu nogat—em inap pasim yu long kisim dispela prais.—Jon 5:28, 29; 17:3.
Sapos nau yu stap bel hevi tru o ol bikpela hevi i wok long painim yu, “yu mas bilip strong long Bikpela,” na bihain bai bel hevi na pen yu karim i pinis na bikpela amamas tru bai kamap. (Sindaun 3:5, 6; Jon 16:20) Taim God i mekim gut long yu olsem em i bin mekim long Jop, bel hevi bilong yu bai pinis na amamas bai kamap. Olgeta pen na hevi nau yu karim long dispela taim em i liklik samting tru taim yu skelim wantaim gutpela pe Jehova bai givim long yu. (Skelim wantaim Rom 8:18.) Pasin bilong yu long sanap strong long karim hevi na stap gut long God, em inap strongim bel bilong ol narapela na helpim yu long kisim ol gutpela pasin Kristen, em ol pasin bilong man “i kamap nupela man pinis.” (Efesus 4:23, 24; Kolosi 3:10, 12-14) Olsem na larim dispela gutpela tok bilong aposel Pita i strongim bel bilong yu: “Sapos long laik bilong God sampela man i mas karim pen, orait dispela ol man i mas putim laip bilong ol long han bilong God na mekim ol gutpela pasin tasol. God i bin wokim yumi, na oltaim em i save lukautim yumi gut tru.”—1 Pita 4:19.
[Piksa long pes 23]
Bihainim pasin bilong Jop. No ken les long wetim gutpela samting i kamap
[Piksa long pes 24]
Bilip strong long Jehova