Stretpela Pasin—Yumi Mas Mekim Wan Wan Taim Tasol o Long Olgeta Taim?
“MASKI mi no gat stretpela pasin, wan wan taim mi mekim nating stretpela pasin na mi no tingting long mekim.” Long buk bilong William Shakespeare (The Winter’s Tale), Otolikus i mekim dispela tok, na em man i no gat stretpela pasin. Dispela tok i kamapim klia wanpela pasin i stap long skin bilong yumi ol manmeri, olsem tingting bilong yumi long mekim ol pasin nogut, em laik nogut bilong bel i save kamapim. (Jeremaia 17:9; Song 51:5; Rom 5:12) Tasol olsem wanem? Dispela i makim olsem yumi no gat rot long mekim stretpela pasin? Yu ting stretpela pasin em samting yumi ken mekim nating long en na i no olsem yumi mas tingting long mekim? Nogat tru!
Paslain long taim ol Israel i go insait long Graun Bilong Promis, Moses i toktok wantaim ol taim ol i bung long ples daun bilong ol Moap. Em i tok klia long ol long tupela rot ol i ken bihainim. Ol i ken bihainim ol lo bilong God na kisim blesing o ol i ken sakim na kisim kaikai nogut bilong sin. (Lo 30:15-20) Ol yet i ken makim.
Yumi inap makim wanem rot yumi laik bihainim, olsem na em laik bilong yumi. Ol narapela, na God tu, ol i no subim yumi long mekim stretpela pasin o pasin nogut. Tasol ating sampela bai askim olsem, ‘Sapos bel bilong yumi i gat ol laik nogut, olsem wanem yumi ken mekim stretpela pasin?’ Orait, tingim dispela: Wanpela dentis i save skelim gut tit bilong lukim olsem tit i bagarap liklik o i gat sua, nogut em i stap na i bagarap olgeta. Olsem tasol, yumi mas skelim bel bilong yumi bilong painim ol pasin kranki long en na ol tingting nogut i save bagarapim pasin bilong yumi. Bilong wanem yumi mas mekim olsem? Long wanem, Jisas i tok: “Olkain samting i save kamap long tingting bilong man, em ol samting olsem, ol tingting nogut na pasin bilong kilim man i dai na olkain pasin pamuk na pasin bilong bagarapim marit na pasin bilong stil na pasin bilong tok giaman long kot na pasin bilong tok nogut long ol arapela.”—Matyu 15:18-20.
Bilong lukautim wanpela tit na i no ken bagarap, dentis i mas rausim gut tru ol hap bilong tit i bagarap. Olsem tasol, yumi mas wok strong long rausim “ol tingting nogut” na laik nogut i stap long bel. Taim yumi kaunim na tingim gut Tok Bilong God, em Baibel, yumi kisim save long pasin bilong Man bilong wokim yumi na tu yumi lain long mekim ol samting i stret.—Aisaia 48:17.
King Devit bilong Israel em i kisim sampela helpim moa long winim dispela pait bilong mekim stretpela pasin. Em i beten olsem: “God, yu wokim nupela klinpela bel insait long mi. Putim nupela spirit insait long mi na bai mi bihainim yu tasol.” (Song 51:10) Yes, sapos yumi beten strong long Jehova long helpim yumi, yumi tu inap daunim ol tingting bilong mekim pasin i no stret na kisim “nupela tingting” bilong mekim stretpela pasin. Long dispela rot bai yumi no mekim stretpela pasin long wan wan taim tasol. Em bai kamap olsem pasin yumi laik mekim long olgeta taim.
[Piksa long pes 21]
Olsem Devit, beten long Jehova inap helpim yumi tu long mekim gutpela pasin